໖. ກມ຺ມຊາທິປຎ຺ໂຫ

໖. ‘‘ຠນ຺ເຕ ນາຄເສນ, ກຕເມ ເອຕ຺ຖ ກມ຺ມຊາ, ກຕເມ ເຫຕຸຊາ, ກຕເມ ອຸຕຸຊາ, ກຕເມ ນ ກມ຺ມຊາ, ນ ເຫຕຸຊາ, ນ ອຸຕຸຊາ’’ຕິ? ‘‘ເຍ ເກຈິ, ມຫາຣາຊ, ສຕ຺ຕາ ສເຈຕນາ, ສພ຺ເພ ເຕ ກມ຺ມຊາ; ອຄ຺ຄິ ຈ ສພ຺ພານິ ຈ ພີຊຊາຕານິ ເຫຕຸຊານິ; ປຖວີ ຈ ປພ຺ພຕາ ຈ ອຸທກຎ຺ຈ ວາໂຕ ຈ, ສພ຺ເພ ເຕ ອຸຕຸຊາ; ອາກາໂສ ຈ ນິພ຺ພານຎ຺ຈ ອິເມ ທ຺ເວ ອກມ຺ມຊາ ອເຫຕຸຊາ ອນຸຕຸຊາ. ນິພ຺ພານໍ ປນ, ມຫາຣາຊ, ນ ວຕ຺ຕພ຺ພໍ ກມ຺ມຊນ຺ຕິ ວາ ເຫຕຸຊນ຺ຕິ ວາ ອຸຕຸຊນ຺ຕິ ວາ ອຸປ຺ປນ຺ນນ຺ຕິ ວາ ອນຸປ຺ປນ຺ນນ຺ຕິ ວາ ອຸປ຺ປາທນີຍນ຺ຕິ ວາ ອຕີຕນ຺ຕິ ວາ ອນາຄຕນ຺ຕິ ວາ ປຈ຺ຈຸປ຺ປນ຺ນນ຺ຕິ ວາ ຈກ຺ຂຸວິຎ຺ເຎຍ຺ຍນ຺ຕິ ວາ ໂສຕວິຎ຺ເຎຍ຺ຍນ຺ຕິ ວາ ຆານວິຎ຺ເຎຍ຺ຍນ຺ຕິ ວາ ຊິວ຺ຫາວິຎ຺ເຎຍ຺ຍນ຺ຕິ ວາ ກາຍວິຎ຺ເຎຍ຺ຍນ຺ຕິ ວາ, ອປິ ຈ, ມຫາຣາຊ, ມໂນວິຎ຺ເຎຍ຺ຍໍ ນິພ຺ພານໍ, ຍໍ ໂສ ສມ຺ມາປຏິປນ຺ໂນ ອຣິຍສາວໂກ ວິສຸທ຺ເຘນ ຎາເຓນ ປສ຺ສຕີ’’ຕິ. ‘‘ຣມຓີໂຍ, ຠນ຺ເຕ ນາຄເສນ, ປຎ຺ໂຫ ສຸວິນິຈ຺ຉິໂຕ ນິສ຺ສໍສໂຍ ເອກນ຺ຕຄໂຕ, ວິມຕິ ອຸປ຺ປຈ຺ຉິນ຺ນາ, ຕ຺ວໍ ຄຓິວຣປວຣມາສຊ຺ຊາ’’ຕິ.

ກມ຺ມຊາທິປຎ຺ໂຫ ຉຏ຺ໂຐ.