໔. ໂລເກ ນຕ຺ຖິຠາວປຎ຺ໂຫ

໔. ‘‘ຠນ຺ເຕ ນາຄເສນ, ທິສ຺ສນ຺ຕິ ໂລເກ ພຸທ຺ຘາ, ທິສ຺ສນ຺ຕິ ປຈ຺ເຈກພຸທ຺ຘາ, ທິສ຺ສນ຺ຕິ ຕຖາຄຕສ຺ສ ສາວກາ, ທິສ຺ສນ຺ຕິ ຈກ຺ກວຕ຺ຕິຣາຊາໂນ, ທິສ຺ສນ຺ຕິ ປເທສຣາຊາໂນ, ທິສ຺ສນ຺ຕິ ເທວມນຸສ຺ສາ, ທິສ຺ສນ຺ຕິ ສຘນາ, ທິສ຺ສນ຺ຕິ ອຘນາ, ທິສ຺ສນ຺ຕິ ສຸຄຕາ, ທິສ຺ສນ຺ຕິ ທຸຄ຺ຄຕາ, ທິສ຺ສຕິ ປຸຣິສສ຺ສ ອິຕ຺ຖິລິງ຺ຄໍ ປາຕຸຠູຕໍ, ທິສ຺ສຕິ ອິຕ຺ຖິຍາ ປຸຣິສລິງ຺ຄໍ ປາຕຸຠູຕໍ, ທິສ຺ສຕິ ສຸກຕໍ ທຸກ຺ກຕໍ ກມ຺ມໍ, ທິສ຺ສນ຺ຕິ ກລ຺ຍາຓປາປການໍ ກມ຺ມານໍ ວິປາກູປໂຠຄິໂນ ສຕ຺ຕາ, ອຕ຺ຖິ ໂລເກ ສຕ຺ຕາ ອຓ຺ຑຊາ ຊລາພຸຊາ ສໍເສທຊາ ໂອປປາຕິກາ, ອຕ຺ຖິ ສຕ຺ຕາ ອປທາ ທ຺ວິປທາ ຈຕຸປ຺ປທາ ພຫຸປ຺ປທາ, ອຕ຺ຖິ ໂລເກ ຍກ຺ຂາ ຣກ຺ຂສາ ກຸມ຺ຠຓ຺ຑາ ອສຸຣາ ທານວາ ຄນ຺ຘພ຺ພາ ເປຕາ ປິສາຈາ, ອຕ຺ຖິ ກິນ຺ນຣາ ມໂຫຣຄາ ນາຄາ ສຸປຓ຺ຓາ ສິທ຺ຘາ ວິຊ຺ຊາຘຣາ, ອຕ຺ຖິ ຫຕ຺ຖີ ອສ຺ສາ ຄາໂວ ມຫິໍສາ [ມຫິສາ (ສີ. ປີ.)] ໂອຏ຺ຐາ ຄທ຺ຣຠາ ອຊາ ເອຬກາ ມິຄາ ສູກຣາ ສີຫາ ພ຺ຍຄ຺ຆາ ທີປີ ອຈ຺ຉາ ໂກກາ ຕຣຈ຺ຉາ ໂສຓາ ສິງ຺ຄາລາ, ອຕ຺ຖິ ພຫຸວິຘາ ສກຸຓາ, ອຕ຺ຖິ ສຸວຓ຺ຓໍ ຣຊຕໍ ມຸຕ຺ຕາ ມຓິ ສງ຺ໂຂ ສິລາ ປວາຬໍ ໂລຫິຕງ຺ໂກ ມສາຣຄລ຺ລໍ ເວຬຸຣິໂຍ ວຊິຣໍ ຜລິກໍ ກາຬໂລຫໍ ຕມ຺ພໂລຫໍ ວຏ຺ຏໂລຫໍ ກໍສໂລຫໍ, ອຕ຺ຖິ ໂຂມໍ ໂກເສຍ຺ຍໍ ກປ຺ປາສິກໍ ສາຓໍ ຠງ຺ຄໍ ກມ຺ພລໍ, ອຕ຺ຖິ ສາລິ ວີຫິ ຍໂວ ກງ຺ຄຸ ກຸທ຺ຣູໂສ ວຣໂກ ໂຄຘູໂມ ມຸຄ຺ໂຄ, ມາໂສ ຕິລໍ ກຸລຕ຺ຖໍ, ອຕ຺ຖິ ມູລຄນ຺ໂຘ ສາຣຄນ຺ໂຘ ເຜຄ຺ຄຸຄນ຺ໂຘ ຕຈຄນ຺ໂຘ ປຕ຺ຕຄນ຺ໂຘ ປຸປ຺ຜຄນ຺ໂຘ ຜລຄນ຺ໂຘ ສພ຺ພຄນ຺ໂຘ, ອຕ຺ຖິ ຕິຓ ລຕາ ຄຈ຺ຉ ຣຸກ຺ຂ ໂອສຘິ ວນປ຺ປຕິ ນທີ ປພ຺ພຕ ສມຸທ຺ທ ມຈ຺ຉກຈ຺ຉປາ ສພ຺ພໍ ໂລເກ ອຕ຺ຖິ. ຍໍ, ຠນ຺ເຕ, ໂລເກ ນຕ຺ຖິ, ຕໍ ເມ ກເຖຫີ’’ຕິ.

‘‘ຕີຓິມານິ, ມຫາຣາຊ, ໂລເກ ນຕ຺ຖິ. ກຕມານິ ຕີຓິ? ສເຈຕນາ ວາ ອເຈຕນາ ວາ ອຊຣາມຣາ ໂລເກ ນຕ຺ຖິ, ສງ຺ຂາຣານໍ ນິຈ຺ຈຕາ ນຕ຺ຖິ, ປຣມຕ຺ເຖນ ສຕ຺ຕູປລທ຺ຘິ ນຕ຺ຖິ, ອິມານິ ໂຂ, ມຫາຣາຊ, ຕີຓິ ໂລເກ ນຕ຺ຖີ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ໂລເກ ນຕ຺ຖິຠາວປຎ຺ໂຫ ຈຕຸຕ຺ໂຖ.