໒. ຂີຓາສວຠາວປຎ຺ໂຫ

໒. ‘‘ຠນ຺ເຕ ນາຄເສນ, ຕຸມ຺ເຫ ຠຓຖ ‘ໂຍ ຄິຫີ ອຣຫຕ຺ຕໍ ປຕ຺ໂຕ, ທ຺ເວ ວາສ຺ສ ຄຕິໂຍ ຠວນ຺ຕິ ອນຎ຺ຎາ, ຕສ຺ມິໍ ເຍວ ທິວເສ ປພ຺ພຊຕິ ວາ ປຣິນິພ຺ພາຍຕິ ວາ. ນ ໂສ ທິວໂສ ສກ຺ກາ ອຕິກ຺ກເມຕຸ’ນ຺ຕິ. ສເຈ ໂສ, ຠນ຺ເຕ ນາຄເສນ, ຕສ຺ມິໍ ທິວເສ ອາຈຣິຍໍ ວາ ອຸປຊ຺ຌາຍໍ ວາ ປຕ຺ຕຈີວຣໍ ວາ ນ ລເຠຖ, ອປິ ນຸ ໂຂ ໂສ ອຣຫາ ສຍໍ ວາ ປພ຺ພເຊຍ຺ຍ ທິວສໍ ວາ ອຕິກ຺ກເມຍ຺ຍ, ອຎ຺ໂຎ ໂກຈິ ອຣຫາ ອິທ຺ຘິມາ ອາຄນ຺ຕ຺ວາ ຕໍ ປພ຺ພາເຊຍ຺ຍ ວາ ປຣິນິພ຺ພາເຍຍ຺ຍ ວາ’’ຕິ? ‘‘ນ ໂສ, ມຫາຣາຊ, ອຣຫາ ສຍໍ ປພ຺ພເຊຍ຺ຍ, ສຍໍ ປພ຺ພຊນ຺ໂຕ ເຖຍ຺ຍໍ ອາປຊ຺ຊຕິ, ນ ຈ ທິວສໍ ອຕິກ຺ກເມຍ຺ຍ, ອຎ຺ຎສ຺ສ ອຣຫນ຺ຕສ຺ສ ອາຄມນໍ ຠເວຍ຺ຍ ວາ ນ ວາ ຠເວຍ຺ຍ, ຕສ຺ມິໍ ເຍວ ທິວເສ ປຣິນິພ຺ພາເຍຍ຺ຍາ’’ຕິ. ‘‘ເຕນ ຫິ, ຠນ຺ເຕ ນາຄເສນ, ອຣຫຕ຺ຕສ຺ສ ສນ຺ຕຠາໂວ ວິຊຫິໂຕ ໂຫຕິ, ເຍນ ອຘິຄຕສ຺ສ ຊີວິຕຫາໂຣ ຠວຕີ’’ຕິ.

‘‘ວິສມໍ, ມຫາຣາຊ, ຄິຫິລິງ຺ຄໍ, ວິສເມ ລິງ຺ເຄ ລິງ຺ຄທຸພ຺ພລຕາຍ ອຣຫຕ຺ຕໍ ປຕ຺ໂຕ ຄິຫີ ຕສ຺ມິໍ ເຍວ ທິວເສ ປພ຺ພຊຕິ ວາ ປຣິນິພ຺ພາຍຕິ ວາ. ເນໂສ, ມຫາຣາຊ, ໂທໂສ ອຣຫຕ຺ຕສ຺ສ, ຄິຫິລິງ຺ຄສ຺ເສເວໂສ ໂທໂສ ຍທິທໍ ລິງ຺ຄທຸພ຺ພລຕາ.

‘‘ຍຖາ, ມຫາຣາຊ, ໂຠຊນໍ ສພ຺ພສຕ຺ຕານໍ ອາຍຸປາລກໍ ຊີວິຕຣກ຺ຂກໍ ວິສມໂກຏ຺ຐສ຺ສ ມນ຺ທທຸພ຺ພລຄຫຓິກສ຺ສ ອວິປາເກນ ຊີວິຕໍ ຫຣຕິ. ເນໂສ, ມຫາຣາຊ, ໂທໂສ ໂຠຊນສ຺ສ, ໂກຏ຺ຐສ຺ເສເວໂສ ໂທໂສ ຍທິທໍ ອຄ຺ຄິທຸພ຺ພລຕາ. ເອວເມວ ໂຂ, ມຫາຣາຊ, ວິສເມ ລິງ຺ເຄ ລິງ຺ຄທຸພ຺ພລຕາຍ ອຣຫຕ຺ຕໍ ປຕ຺ໂຕ ຄິຫີ ຕສ຺ມິໍ ເຍວ ທິວເສ ປພ຺ພຊຕິ ວາ ປຣິນິພ຺ພາຍຕິ ວາ. ເນໂສ, ມຫາຣາຊ, ໂທໂສ ອຣຫຕ຺ຕສ຺ສ, ຄິຫິລິງ຺ຄສ຺ເສເວໂສ ໂທໂສ ຍທິທໍ ລິງ຺ຄທຸພ຺ພລຕາ.

‘‘ຍຖາ ວາ ປນ, ມຫາຣາຊ, ປຣິຕ຺ຕໍ ຕິຓສລາກໍ ອຸປຣິ ຄຣຸເກ ປາສາເຓ ຐປິເຕ ທຸພ຺ພລຕາຍ ຠິຊ຺ຊິຕ຺ວາ ປຕຕິ. ເອວເມວ ໂຂ, ມຫາຣາຊ, ອຣຫຕ຺ຕໍ ປຕ຺ໂຕ ຄິຫີ ເຕນ ລິງ຺ເຄນ ອຣຫຕ຺ຕໍ ຘາເຣຕຸໍ ອສກ຺ໂກນ຺ໂຕ ຕສ຺ມິໍ ເຍວ ທິວເສ ປພ຺ພຊຕິ ວາ ປຣິນິພ຺ພາຍຕິ ວາ.

‘‘ຍຖາ ວາ ປນ, ມຫາຣາຊ, ປຸຣິໂສ ອພໂລ ທຸພ຺ພໂລ ນິຫີນຊຈ຺ໂຈ ປຣິຕ຺ຕປຸຎ຺ໂຎ ມຫຕິມຫາຣຊ຺ຊໍ ລຠິຕ຺ວາ ຂເຓນ ປຣິປຕຕິ ປຣິຘໍສຕິ ໂອສກ຺ກຕິ, ນ ສກ຺ໂກຕິ ອິສ຺ສຣິຍໍ ຘາເຣຕຸໍ, ເອວເມວ ໂຂ, ມຫາຣາຊ, ອຣຫຕ຺ຕໍ ປຕ຺ໂຕ ຄິຫີ ເຕນ ລິງ຺ເຄນ ອຣຫຕ຺ຕໍ ຘາເຣຕຸໍ ນ ສກ຺ໂກຕິ, ເຕນ ກາຣເຓນ ຕສ຺ມິໍ ເຍວ ທິວເສ ປພ຺ພຊຕິ ວາ ປຣິນິພ຺ພາຍຕິ ວາ’’ຕິ. ‘‘ສາຘຸ, ຠນ຺ເຕ ນາຄເສນ, ເອວເມຕໍ ຕຖາ ສມ຺ປຏິຈ຺ຉາມີ’’ຕິ.

ຂີຓາສວຠາວປຎ຺ໂຫ ທຸຕິໂຍ.