໘. ທຸສ຺ສີລປຎ຺ໂຫ

໘. ‘‘ຠນ຺ເຕ ນາຄເສນ, ຄິຫິທຸສ຺ສີລສ຺ສ ຈ ສມຓທຸສ຺ສີລສ຺ສ ຈ ໂກ ວິເສໂສ, ກິໍ ນານາກຣຓໍ, ອຸໂຠເປເຕ ສມສມຄຕິກາ, ອຸຠິນ຺ນມ຺ປິ ສມສໂມ ວິປາໂກ ໂຫຕິ, ອຸທາຫຸ ກິຎ຺ຈິ ນານາກາຣຓໍ ອຕ຺ຖີ’’ຕິ?

‘‘ທສ ຍິເມ, ມຫາຣາຊ, ຄຸຓາ ສມຓທຸສ຺ສີລສ຺ສ ຄິຫິທຸສ຺ສີລໂຕ ວິເສເສນ ອຕິເຣກາ, ທສຫິ ຈ ກາຣເຓຫິ ອຸຕ຺ຕຣິໍ ທກ຺ຂິຓໍ ວິໂສເຘຕິ.

‘‘ກຕເມ ທສ ຄຸຓາ ສມຓທຸສ຺ສີລສ຺ສ ຄິຫິທຸສ຺ສີລໂຕ ວິເສເສນ ອຕິເຣກາ? ອິຘ, ມຫາຣາຊ, ສມຓທຸສ຺ສີໂລ ພຸທ຺ເຘ ສຄາຣໂວ ໂຫຕິ, ຘມ຺ເມ ສຄາຣໂວ ໂຫຕິ, ສງ຺ເຆ ສຄາຣໂວ ໂຫຕິ, ສພ຺ຣຫ຺ມຈາຣີສຸ ສຄາຣໂວ ໂຫຕິ, ອຸທ຺ເທສປຣິປຸຈ຺ຉາຍ ວາຍມຕິ, ສວນພຫຸໂລ ໂຫຕິ, ຠິນ຺ນສີໂລປິ, ມຫາຣາຊ, ທຸສ຺ສີໂລ ປຣິສຄໂຕ ອາກປ຺ປໍ ອຸປຏ຺ຐເປຕິ, ຄຣຫຠຍາ ກາຍິກໍ ວາຈສິກໍ ຣກ຺ຂຕິ, ປຘານາຠິມຸຂຎ຺ຈສ຺ສ ໂຫຕິ ຈິຕ຺ຕໍ, ຠິກ຺ຂຸສາມຎ຺ຎໍ ອຸປຄໂຕ ໂຫຕິ. ກໂຣນ຺ໂຕປິ, ມຫາຣາຊ, ສມຓທຸສ຺ສີໂລ ປາປໍ ປຏິຈ຺ຉນ຺ນໍ ອາຈຣຕິ. ຍຖາ, ມຫາຣາຊ, ອິຕ຺ຖີ ສປຕິກາ ນິລີຍິຕ຺ວາ ຣຫສ຺ເສເນວ ປາປມາຈຣຕິ; ເອວເມວ ໂຂ, ມຫາຣາຊ, ກໂຣນ຺ໂຕປິ ສມຓທຸສ຺ສີໂລ ປາປໍ ປຏິຈ຺ຉນ຺ນໍ ອາຈຣຕິ. ອິເມ ໂຂ, ມຫາຣາຊ, ທສ ຄຸຓາ ສມຓທຸສ຺ສີລສ຺ສ ຄິຫິທຸສ຺ສີລໂຕ ວິເສເສນ ອຕິເຣກາ.

‘‘ກຕເມຫິ ທສຫິ ກາຣເຓຫິ ອຸຕ຺ຕຣິໍ ທກ຺ຂິຓໍ ວິໂສເຘຕິ? ອນວຊ຺ຊກວຈຘາຣຓຕາຍປິ ທກ຺ຂິຓໍ ວິໂສເຘຕິ, ອິສິສາມຎ຺ຎຠຓ຺ຑຸລິງ຺ຄຘາຣຓໂຕປິ ທກ຺ຂິຓໍ ວິໂສເຘຕິ, ສງ຺ຆສມຍມນຸປ຺ປວິຏ຺ຐຕາຍປິ ທກ຺ຂິຓໍ ວິໂສເຘຕິ, ພຸທ຺ຘຘມ຺ມສງ຺ຆສຣຓຄຕຕາຍປິ ທກ຺ຂິຓໍ ວິໂສເຘຕິ, ປຘານາສຍນິເກຕວາສິຕາຍປິ ທກ຺ຂິຓໍ ວິໂສເຘຕິ, ຊິນສາສນຘຣ [ຊິນສາສນຘນ (ສີ. ປີ.)] ປຣິເຍສນໂຕປິ ທກ຺ຂິຓໍ ວິໂສເຘຕິ, ປວຣຘມ຺ມເທສນໂຕປິ ທກ຺ຂິຓໍ ວິໂສເຘຕິ, ຘມ຺ມທີປຄຕິປຣາຍຓຕາຍປິ ທກ຺ຂິຓໍ ວິໂສເຘຕິ, ‘ອຄ຺ໂຄ ພຸທ຺ໂຘ’ຕິ ເອກນ຺ຕອຸຊຸທິຏ຺ຐິຕາຍປິ ທກ຺ຂິຓໍ ວິໂສເຘຕິ, ອຸໂປສຖສມາທານໂຕປິ ທກ຺ຂິຓໍ ວິໂສເຘຕິ. ອິເມຫິ ໂຂ, ມຫາຣາຊ, ທສຫິ ກາຣເຓຫິ ອຸຕ຺ຕຣິໍ ທກ຺ຂິຓໍ ວິໂສເຘຕິ.

‘‘ສຸວິປນ຺ໂນປິ ຫິ, ມຫາຣາຊ, ສມຓທຸສ຺ສີໂລ ທາຍການໍ ທກ຺ຂິຓໍ ວິໂສເຘຕິ. ຍຖາ, ມຫາຣາຊ, ອຸທກໍ ສຸພຫລມ຺ປິ ກລລກທ຺ທມຣໂຊຊລ຺ລໍ ອປເນຕິ; ເອວເມວ ໂຂ, ມຫາຣາຊ, ສຸວິປນ຺ໂນປິ ສມຓທຸສ຺ສີໂລ ທາຍການໍ ທກ຺ຂິຓໍ ວິໂສເຘຕິ.

‘‘ຍຖາ ວາ ປນ, ມຫາຣາຊ, ອຸຓ຺ໂຫທກໍ ສຸກຸຘິຕມ຺ປິ [ສຸກຐິຕມ຺ປິ (ສີ. ປີ), ສຸຂຸຐິຕມ຺ປິ (ສ຺ຍາ.)] ຊ຺ຊລນ຺ຕໍ ມຫນ຺ຕໍ ອຄ຺ຄິກ຺ຂນ຺ຘໍ ນິພ຺ພາເປຕິ, ເອວເມວ ໂຂ, ມຫາຣາຊ, ສຸວິປນ຺ໂນປິ ສມຓທຸສ຺ສີໂລ ທາຍການໍ ທກ຺ຂິຓໍ ວິໂສເຘຕິ.

‘‘ຍຖາ ວາ ປນ, ມຫາຣາຊ, ໂຠຊນໍ ວິຣສມ຺ປິ ຂຸທາທຸພ຺ພລ຺ຍໍ ອປເນຕິ, ເອວເມວ ໂຂ, ມຫາຣາຊ, ສຸວິປນ຺ໂນປິ ສມຓທຸສ຺ສີໂລ ທາຍການໍ ທກ຺ຂິຓໍ ວິໂສເຘຕິ.

‘‘ຠາສິຕມ຺ເປຕໍ, ມຫາຣາຊ, ຕຖາຄເຕນ ເທວາຕິເທເວນ ມຊ຺ຌິມນິກາຍວຣລຎ຺ຉເກ ທກ຺ຂິຓວິຠງ຺ເຄ ເວຍ຺ຍາກຣເຓ –

‘‘‘ໂຍ ສີລວາ ທຸສ຺ສີເລສຸ ທທາຕິ ທານໍ, ຘມ຺ເມນ ລທ຺ຘໍ ສຸປສນ຺ນຈິຕ຺ໂຕ;

ອຠິສທ຺ທຫໍ ກມ຺ມຜລໍ ອຸຬາຣໍ, ສາ ທກ຺ຂິຓາ ທາຍກໂຕ ວິສຸຊ຺ຌຕີ’’’ຕິ [ມ. ນິ. ໓.໓໘໒].

‘‘ອຈ຺ຉຣິຍໍ, ຠນ຺ເຕ ນາຄເສນ, ອພ຺ຠຸຕໍ, ຠນ຺ເຕ ນາຄເສນ, ຕາວຕກໍ ມຍໍ ປຎ຺ຫໍ ອປຸຈ຺ຉິມ຺ຫ, ຕໍ ຕ຺ວໍ ໂອປມ຺ເມຫິ ກາຣເຓຫິ ວິຠາເວນ຺ໂຕ ອມຕມຘຸຣໍ ສວນູປຄໍ ອກາສິ. ຍຖາ ນາມ, ຠນ຺ເຕ, ສູໂທ ວາ ສູທນ຺ເຕວາສີ ວາ ຕາວຕກໍ ມໍສໍ ລຠິຕ຺ວາ ນານາວິເຘຫິ ສມ຺ຠາເຣຫິ ສມ຺ປາເທຕ຺ວາ ຣາຊູປໂຠຄໍ ກໂຣຕິ; ເອວເມວ ໂຂ, ຠນ຺ເຕ ນາຄເສນ, ຕາວຕກໍ ມຍໍ ປຎ຺ຫໍ ອປຸຈ຺ຉິມ຺ຫ, ຕໍ ຕ຺ວໍ ໂອປມ຺ເມຫິ ກາຣເຓຫິ ວິຠາເວຕ຺ວາ ອມຕມຘຸຣໍ ສວນູປຄໍ ອກາສີ’’ຕິ.

ທຸສ຺ສີລປຎ຺ໂຫ ອຏ຺ຐໂມ.