໑. ສຕິອຸປ຺ປຊ຺ຊນປຎ຺ໂຫ

໑. ຣາຊາ ອາຫ ‘‘ຠນ຺ເຕ ນາຄເສນ, ກຕິຫາກາເຣຫິ ສຕິ ອຸປ຺ປຊ຺ຊຕີ’’ຕິ? ‘‘ສຕ຺ຕຣສຫາກາເຣຫິ, ມຫາຣາຊ, ສຕິ ອຸປ຺ປຊ຺ຊຕີ’’ຕິ. ‘‘ກຕເມຫິ ສຕ຺ຕຣສຫາກາເຣຫີ’’ຕິ? ‘‘ອຠິຊານໂຕປິ, ມຫາຣາຊ, ສຕິ ອຸປ຺ປຊ຺ຊຕິ, ກຏຸມິກາຍປິ ສຕິ ອຸປ຺ປຊ຺ຊຕິ, ໂອຬາຣິກວິຎ຺ຎາຓໂຕປິ ສຕິ ອຸປ຺ປຊ຺ຊຕິ, ຫິຕວິຎ຺ຎາຓໂຕປິ ສຕິ ອຸປ຺ປຊ຺ຊຕິ, ອຫິຕວິຎ຺ຎາຓໂຕປິ ສຕິ ອຸປ຺ປຊ຺ຊຕິ, ສຠາຄນິມິຕ຺ຕໂຕປິ ສຕິ ອຸປ຺ປຊ຺ຊຕິ, ວິສຠາຄນິມິຕ຺ຕໂຕປິ ສຕິ ອຸປ຺ປຊ຺ຊຕິ, ກຖາຠິຎ຺ຎາຓໂຕປິ ສຕິ ອຸປ຺ປຊ຺ຊຕິ, ລກ຺ຂຓໂຕປິ ສຕິ ອຸປ຺ປຊ຺ຊຕິ, ສາຣຓໂຕປິ ສຕິ ອຸປ຺ປຊ຺ຊຕິ, ມຸທ຺ທາໂຕປິ ສຕິ ອຸປ຺ປຊ຺ຊຕິ, ຄຓນາໂຕປິ ສຕິ ອຸປ຺ປຊ຺ຊຕິ, ຘາຣຓໂຕປິ ສຕິ ອຸປ຺ປຊ຺ຊຕິ, ຠາວນໂຕປິ ສຕິ ອຸປ຺ປຊ຺ຊຕິ, ໂປຕ຺ຖກນິພນ຺ຘນໂຕປິ ສຕິ ອຸປ຺ປຊ຺ຊຕິ, ອຸປນິກ຺ເຂປໂຕປິ ສຕິ ອຸປ຺ປຊ຺ຊຕິ, ອນຸຠູຕໂຕປິ ສຕິ ອຸປ຺ປຊ຺ຊຕີຕິ.

‘‘ກຖໍ ອຠິຊານໂຕ ສຕິ ອຸປ຺ປຊ຺ຊຕິ? ຍຖາ, ມຫາຣາຊ, ອາຍສ຺ມາ ຈ ອານນ຺ໂທ ຂຸຊ຺ຊຸຕ຺ຕຣາ ຈ ອຸປາສິກາ, ເຍ ວາ ປນ ອຎ຺ເຎປິ ເກຈິ ຊາຕິສ຺ສຣາ ຊາຕິໍ ສຣນ຺ຕິ, ເອວໍ ອຠິຊານໂຕ ສຕິ ອຸປ຺ປຊ຺ຊຕິ.

‘‘ກຖໍ ກຏຸມິກາຍ ສຕິ ອຸປ຺ປຊ຺ຊຕິ? ໂຍ ປກຕິຍາ ມຸຏ຺ຐສ຺ສຕິໂກ, ປເຣ ຈ ຕໍ ສຣາປນຕ຺ຖໍ ນິພນ຺ຘນ຺ຕິ, ເອວໍ ກຏຸມິກາຍ ສຕິ ອຸປ຺ປຊ຺ຊຕິ.

‘‘ກຖໍ ໂອຬາຣິກວິຎ຺ຎາຓໂຕ ສຕິ ອຸປ຺ປຊ຺ຊຕິ? ຍທາ ຣຊ຺ເຊ ວາ ອຠິສິຕ຺ໂຕ ໂຫຕິ, ໂສຕາປຕ຺ຕິຜລໍ ວາ ປຕ຺ໂຕ ໂຫຕິ, ເອວໍ ໂອຬາຣິກວິຎ຺ຎາຓໂຕ ສຕິ ອຸປ຺ປຊ຺ຊຕິ.

‘‘ກຖໍ ຫິຕວິຎ຺ຎາຓໂຕ ສຕິ ອຸປ຺ປຊ຺ຊຕິ? ຍມ຺ຫິ ສຸຂາປິໂຕ, ‘ອມຸກສ຺ມິໍ ເອວໍ ສຸຂາປິໂຕ’ຕິ ສຣຕິ, ເອວໍ ຫິຕວິຎ຺ຎາຓໂຕ ສຕິ ອຸປ຺ປຊ຺ຊຕິ.

‘‘ກຖໍ ອຫິຕວິຎ຺ຎາຓໂຕ ສຕິ ອຸປ຺ປຊ຺ຊຕິ? ຍມ຺ຫິ ທຸກ຺ຂາປິໂຕ, ‘ອມຸກສ຺ມິໍ ເອວໍ ທຸກ຺ຂາປິໂຕ’ຕິ ສຣຕິ, ເອວໍ ອຫິຕວິຎ຺ຎາຓໂຕ ສຕິ ອຸປ຺ປຊ຺ຊຕິ.

‘‘ກຖໍ ສຠາຄນິມິຕ຺ຕໂຕ ສຕິ ອຸປ຺ປຊ຺ຊຕິ? ສທິສໍ ປຸຄ຺ຄລໍ ທິສ຺ວາ ມາຕຣໍ ວາ ປິຕຣໍ ວາ ຠາຕຣໍ ວາ ຠຄິນິໍ ວາ ສຣຕິ, ໂອຏ຺ຐໍ ວາ ໂຄຓໍ ວາ ຄທ຺ຣຠໍ ວາ ທິສ຺ວາ ອຎ຺ຎໍ ຕາທິສໍ ໂອຏ຺ຐໍ ວາ ໂຄຓໍ ວາ ຄທ຺ຣຠໍ ວາ ສຣຕິ, ເອວໍ ສຠາຄນິມິຕ຺ຕໂຕ ສຕິ ອຸປ຺ປຊ຺ຊຕິ.

‘‘ກຖໍ ວິສຠາຄນິມຕ຺ຕໂຕ ສຕິ ອຸປ຺ປຊ຺ຊຕິ? ອສຸກສ຺ສ ນາມ ວຓ຺ໂຓ ເອທິໂສ, ສທ຺ໂທ ເອທິໂສ, ຄນ຺ໂຘ ເອທິໂສ, ຣໂສ ເອທິໂສ, ໂຜຏ຺ຐພ຺ໂພ ເອທິໂສຕິ ສຣຕິ, ເອວມ຺ປິ ວິສຠາຄນິມິຕ຺ຕໂຕປິ ສຕິ ອຸປ຺ປຊ຺ຊຕິ.

‘‘ກຖໍ ກຖາຠິຎ຺ຎາຓໂຕ ສຕິ ອຸປ຺ປຊ຺ຊຕິ? ໂຍ ປກຕິຍາ ມຸຏ຺ຐສ຺ສຕິໂກ ໂຫຕິ, ຕໍ ປເຣ ສຣາເປນ຺ຕິ, ເຕນ ໂສ ສຣຕິ, ເອວໍ ກຖາຠິຎ຺ຎາຓໂຕ ສຕິ ອຸປ຺ປຊ຺ຊຕິ.

‘‘ກຖໍ ລກ຺ຂຓໂຕ ສຕິ ອຸປ຺ປຊ຺ຊຕິ? ໂຍ ປກຕິຍາ ພລີພທ຺ທານໍ ອງ຺ເຄນ ຊານາຕິ, ລກ຺ຂເຓນ ຊານາຕິ, ເອວໍ ລກ຺ຂຓໂຕ ສຕິ ອຸປ຺ປຊ຺ຊຕິ.

‘‘ກຖໍ ສາຣຓໂຕ ສຕິ ອຸປ຺ປຊ຺ຊຕິ? ໂຍ ປກຕິຍາ ມຸຏ຺ຐສ຺ສຕິໂກ ໂຫຕິ, ໂຍ ຕໍ ‘ສຣາຫິ ໂຠ, ສຣາຫິ ໂຠ’ຕິ ປຸນປ຺ປຸນໍ ສຣາເປຕິ, ເອວໍ ສາຣຓໂຕ ສຕິ ອຸປ຺ປຊ຺ຊຕິ.

‘‘ກຖໍ ມຸທ຺ທາໂຕ ສຕິ ອຸປ຺ປຊ຺ຊຕິ? ລິປິຍາ ສິກ຺ຂິຕຕ຺ຕາ ຊານາຕິ ‘ອິມສ຺ສ ອກ຺ຂຣສ຺ສ ອນນ຺ຕຣໍ ອິມໍ ອກ຺ຂຣໍ ກາຕພ຺ພ’ນ຺ຕິ ເອວໍ ມຸທ຺ທາໂຕ ສຕິ ອຸປ຺ປຊ຺ຊຕິ.

‘‘ກຖໍ ຄຓນາໂຕ ສຕິ ອຸປ຺ປຊ຺ຊຕິ? ຄຓນາຍ ສິກ຺ຂິຕຕ຺ຕາ ຄຓກາ ພຫຸມ຺ປິ ຄເຓນ຺ຕິ, ເອວໍ ຄຓນາໂຕ ສຕິ ອຸປ຺ປຊ຺ຊຕິ.

‘‘ກຖໍ ຘາຣຓໂຕ ສຕິ ອຸປ຺ປຊ຺ຊຕິ? ຘາຣຓາຍ ສິກ຺ຂິຕຕ຺ຕາ ຘາຣຓກາ ພຫຸມ຺ປິ ຘາເຣນ຺ຕິ, ເອວໍ ຘາຣຓໂຕ ສຕິ ອຸປ຺ປຊ຺ຊຕິ.

‘‘ກຖໍ ຠາວນາໂຕ ສຕິ ອຸປ຺ປຊ຺ຊຕິ? ອິຘ ຠິກ຺ຂຸ ອເນກວິຫິຕໍ ປຸພ຺ເພນິວາສໍ ອນຸສ຺ສຣຕິ, ເສຍ຺ຍຖີທໍ, ເອກມ຺ປິ ຊາຕິໍ ທ຺ເວປິ ຊາຕິໂຍ…ເປ… ອິຕິ ສາກາຣໍ ສອຸທ຺ເທສໍ ປຸພ຺ເພນິວາສໍ ອນຸສ຺ສຣຕິ, ເອວໍ ຠາວນາໂຕ ສຕິ ອຸປ຺ປຊ຺ຊຕິ.

‘‘ກຖໍ ໂປຕ຺ຖກນິພນ຺ຘນໂຕ ສຕິ ອຸປ຺ປຊ຺ຊຕິ? ຣາຊາໂນ ອນຸສາສນິຍໍ ອສ຺ສຣນ຺ຕາ [ອນຸສ຺ສຣນ຺ຕາ (ສພ຺ພຕ຺ຖ)] ເອຕໍ ໂປຕ຺ຖກໍ ອາຫຣຖາຕິ, ເຕນ ໂປຕ຺ຖເກນ ອນຸສ຺ສຣນ຺ຕິ, ເອວໍ ໂປຕ຺ຖກນິພນ຺ຘນໂຕ ສຕິ ອຸປ຺ປຊ຺ຊຕິ.

‘‘ກຖໍ ອຸປນິກ຺ເຂປໂຕ ສຕິ ອຸປ຺ປຊ຺ຊຕິ? ອຸປນິກ຺ຂິຕ຺ຕໍ ຠຓ຺ຑໍ ທິສ຺ວາ ສຣຕິ, ເອວໍ ອຸປນິກ຺ເຂປໂຕ ສຕິ ອຸປ຺ປຊ຺ຊຕິ.

‘‘ກຖໍ ອນຸຠູຕໂຕ ສຕິ ອຸປ຺ປຊ຺ຊຕິ? ທິຏ຺ຐຕ຺ຕາ ຣູປໍ ສຣຕິ, ສຸຕຕ຺ຕາ ສທ຺ທໍ ສຣຕິ, ຆາຍິຕຕ຺ຕາ ຄນ຺ຘໍ ສຣຕິ, ສາຍິຕຕ຺ຕາ ຣສໍ ສຣຕິ, ຜຸຏ຺ຐຕ຺ຕາ ໂຜຏ຺ຐພ຺ພໍ ສຣຕິ, ວິຎ຺ຎາຕຕ຺ຕາ ຘມ຺ມໍ ສຣຕິ, ເອວໍ ອນຸຠູຕໂຕ ສຕິ ອຸປ຺ປຊ຺ຊຕິ. ອິເມຫິ ໂຂ, ມຫາຣາຊ, ສຕ຺ຕຣສຫາກາເຣຫິ ສຕິ ອຸປ຺ປຊ຺ຊຕີ’’ຕິ.

‘‘ກລ຺ໂລສິ, ຠນ຺ເຕ ນາຄເສນາ’’ຕິ.

ສຕິອຸປ຺ປຊ຺ຊນປຎ຺ໂຫ ປຐໂມ.