໑. ຜສ຺ສາທິວິນິພ຺ຠຸຊນປຎ຺ໂຫ

໑. ຣາຊາ ອາຫ ‘‘ຠນ຺ເຕ ນາຄເສນ, ສກ຺ກາ ອິເມສໍ ຘມ຺ມານໍ ເອກໂຕຠາວຄຕານໍ ວິນິພ຺ຠຸຊິຕ຺ວາ ວິນິພ຺ຠຸຊິຕ຺ວາ ນານາກຣຓໍ ປຎ຺ຎາເປຕຸໍ ‘ອຍໍ ຜສ຺ໂສ, ອຍໍ ເວທນາ, ອຍໍ ສຎ຺ຎາ, ອຍໍ ເຈຕນາ, ອິທໍ ວິຎ຺ຎາຓໍ, ອຍໍ ວິຕກ຺ໂກ, ອຍໍ ວິຈາໂຣ’ຕິ’’? ‘‘ນ ສກ຺ກາ, ມຫາຣາຊ, ອິເມສໍ ຘມ຺ມານໍ ເອກໂຕຠາວຄຕານໍ ວິນິພ຺ຠຸຊິຕ຺ວາ ວິນິພ຺ຠຸຊິຕ຺ວາ ນານາກຣຓໍ ປຎ຺ຎາເປຕຸໍ ‘ອຍໍ ຜສ຺ໂສ, ອຍໍ ເວທນາ, ອຍໍ ສຎ຺ຎາ, ອຍໍ ເຈຕນາ, ອິທໍ ວິຎ຺ຎາຓໍ, ອຍໍ ວິຕກ຺ໂກ, ອຍໍ ວິຈາໂຣ’’’ຕິ.

‘‘ໂອປມ຺ມໍ ກໂຣຫີ’’ຕິ. ‘‘ຍຖາ, ມຫາຣາຊ, ຣຎ຺ໂຎ ສູໂທ ອຣສໍ ວາ ຣສໍ ວາ [ຍູສໍ ວາ ຣສໍ ວາ (ສີ. ສ຺ຍາ. ປີ.)] ກເຣຍ຺ຍ, ໂສ ຕຕ຺ຖ ທຘິມ຺ປິ ປກ຺ຂິເປຍ຺ຍ, ໂລຓມ຺ປິ ປກ຺ຂິເປຍ຺ຍ, ສິງ຺ຄິເວຣມ຺ປິ ປກ຺ຂິເປຍ຺ຍ, ຊີຣກມ຺ປິ ປກ຺ຂິເປຍ຺ຍ, ມຣິຈມ຺ປິ ປກ຺ຂິເປຍ຺ຍ, ອຎ຺ຎານິປິ ປກາຣານິ ປກ຺ຂິເປຍ຺ຍ, ຕເມນໍ ຣາຊາ ເອວໍ ວເທຍ຺ຍ, ‘ທຘິສ຺ສ ເມ ຣສໍ ອາຫຣ, ໂລຓສ຺ສ ເມ ຣສໍ ອາຫຣ, ສິງ຺ຄິເວຣສ຺ສ ເມ ຣສໍ ອາຫຣ, ຊີຣກສ຺ສ ເມ ຣສໍ ອາຫຣ, ມຣິຈສ຺ສ ເມ ຣສໍ ອາຫຣ, ສພ຺ເພສໍ ເມ ປກ຺ຂິຕ຺ຕານໍ ຣສໍ ອາຫຣາ’ຕິ. ສກ຺ກາ ນຸ ໂຂ, ມຫາຣາຊ, ເຕສໍ ຣສານໍ ເອກໂຕຠາວຄຕານໍ ວິນິພ຺ຠຸຊິຕ຺ວາ ວິນິພ຺ຠຸຊິຕ຺ວາ ຣສໍ ອາຫຣິຕຸໍ ອມ຺ພິລຕ຺ຕໍ ວາ ລວຓຕ຺ຕໍ ວາ ຕິຕ຺ຕກຕ຺ຕໍ ວາ ກຏຸກຕ຺ຕໍ ວາ ກສາຍຕ຺ຕໍ ວາ ມຘຸຣຕ຺ຕໍ ວາ’’ຕິ? ‘‘ນ ຫິ, ຠນ຺ເຕ, ສກ຺ກາ ເຕສໍ ຣສານໍ ເອກໂຕຠາວຄຕານໍ ວິນິພ຺ຠຸຊິຕ຺ວາ ວິນິພ຺ຠຸຊິຕ຺ວາ ຣສໍ ອາຫຣິຕຸໍ ອມ຺ພິລຕ຺ຕໍ ວາ ລວຓຕ຺ຕໍ ວາ ຕິຕ຺ຕກຕ຺ຕໍ ວາ ກຏຸກຕ຺ຕໍ ວາ ກສາຍຕ຺ຕໍ ວາ ມຘຸຣຕ຺ຕໍ ວາ, ອປິ ຈ ໂຂ ປນ ສເກນ ສເກນ ລກ຺ຂເຓນ ອຸປຏ຺ຐຫນ຺ຕີ’’ຕິ. ‘‘ເອວເມວ ໂຂ, ມຫາຣາຊ, ນ ສກ຺ກາ ອິເມສໍ ຘມ຺ມານໍ ເອກໂຕຠາວຄຕານໍ ວິນິພ຺ຠຸຊິຕ຺ວາ ວິນິພ຺ຠຸຊິຕ຺ວາ ນານາກຣຓໍ ປຎ຺ຎາເປຕຸໍ ‘ອຍໍ ຜສ຺ໂສ, ອຍໍ ເວທນາ, ອຍໍ ສຎ຺ຎາ, ອຍໍ ເຈຕນາ, ອິທໍ ວິຎ຺ຎາຓໍ, ອຍໍ ວິຕກ຺ໂກ, ອຍໍ ວິຈາໂຣ’ຕິ, ອປິ ຈ ໂຂ ປນ ສເກນ ສເກນ ລກ຺ຂເຓນ ອຸປຏ຺ຐຫນ຺ຕີ’’ຕິ.

‘‘ກລ຺ໂລສິ, ຠນ຺ເຕ ນາຄເສນາ’’ຕິ.

ຜສ຺ສາທິວິນິພ຺ຠຸຊນປຎ຺ໂຫ ປຐໂມ.