໕. ຠວນ຺ຕສງ຺ຂາຣຊາຍມານປຎ຺ໂຫ

໕. ຣາຊາ ອາຫ ‘‘ຠນ຺ເຕ ນາຄເສນ, ອຕ຺ຖິ ເກຈິ ສງ຺ຂາຣາ, ເຍ ອຠວນ຺ຕາ ຊາຍນ຺ຕີ’’ຕິ? ‘‘ນຕ຺ຖິ, ມຫາຣາຊ, ເກຈິ ສງ຺ຂາຣາ, ເຍ ອຠວນ຺ຕາ ຊາຍນ຺ຕິ, ຠວນ຺ຕາ ເຍວ ໂຂ, ມຫາຣາຊ, ສງ຺ຂາຣາ ຊາຍນ຺ຕີ’’ຕິ.

‘‘ໂອປມ຺ມໍ ກໂຣຫີ’’ຕິ. ‘‘ຕໍ ກິໍ ມຎ຺ຎສິ, ມຫາຣາຊ, ອິທໍ ເຄຫໍ ອຠວນ຺ຕໍ ຊາຕໍ, ຍຕ຺ຖ ຕ຺ວໍ ນິສິນ຺ໂນສີ’’ຕິ? ‘‘ນຕ຺ຖິ ກິຎ຺ຈິ, ຠນ຺ເຕ, ອິຘ ອຠວນ຺ຕໍ ຊາຕໍ, ຠວນ຺ຕໍ ເຍວ ຊາຕໍ, ອິມານິ ໂຂ, ຠນ຺ເຕ, ທາຣູນິ ວເນ ອເຫສຸໍ, ອຍຎ຺ຈ ມຕ຺ຕິກາ ປຖວິຍໍ ອໂຫສິ, ອິຕ຺ຖີນຎ຺ຈ ປຸຣິສານຎ຺ຈ ຕຊ຺ເຊນ ວາຍາເມນ ເອວມິທໍ ເຄຫໍ ນິພ຺ພຕ຺ຕ’’ນ຺ຕິ. ‘‘ເອວເມວ ໂຂ, ມຫາຣາຊ, ນຕ຺ຖິ ເກຈິ ສງ຺ຂາຣາ, ເຍ ອຠວນ຺ຕາ ຊາຍນ຺ຕິ, ຠວນ຺ຕາ ເຍວ ສງ຺ຂາຣາ ຊາຍນ຺ຕີ’’ຕິ.

‘‘ຠິຍ຺ໂຍ ໂອປມ຺ມໍ ກໂຣຫີ’’ຕິ. ‘‘ຍຖາ, ມຫາຣາຊ, ເຍ ເກຈິ ພີຊຄາມຠູຕຄາມາ ປຖວິຍໍ ນິກ຺ຂິຕ຺ຕາ ອນຸປຸພ຺ເພນ ວຸຑ຺ຒິໍ ວິຣູຬ຺ຫິໍ ເວປຸລ຺ລໍ ອາປຊ຺ຊມານາ ປຸປ຺ຜານິ ຈ ຜລານິ ຈ ທເທຍ຺ຍຸໍ, ນ ເຕ ຣຸກ຺ຂາ ອຠວນ຺ຕາ ຊາຕາ, ຠວນ຺ຕາ ເຍວ ເຕ ຣຸກ຺ຂາ ຊາຕາ. ເອວເມວ ໂຂ, ມຫາຣາຊ, ນຕ຺ຖິ ເກຈິ ສງ຺ຂາຣາ, ເຍ ອຠວນ຺ຕາ ຊາຍນ຺ຕິ, ຠວນ຺ຕາ ເຍວ ເຕ ສງ຺ຂາຣາ ຊາຍນ຺ຕີ’’ຕິ.

‘‘ຠິຍ຺ໂຍ ໂອປມ຺ມໍ ກໂຣຫີ’’ຕິ. ‘‘ຍຖາ, ມຫາຣາຊ, ກຸມ຺ຠກາໂຣ ປຖວິຍາ ມຕ຺ຕິກໍ ອຸທ຺ຘຣິຕ຺ວາ ນານາຠາຊນານິ ກໂຣຕິ, ນ ຕານິ ຠາຊນານິ ອຠວນ຺ຕານິ ຊາຕານິ, ຠວນ຺ຕານິ ເຍວ ຊາຕານິ. ເອວເມວ ໂຂ, ມຫາຣາຊ, ນຕ຺ຖິ ເກຈິ ສງ຺ຂາຣາ, ເຍ ອຠວນ຺ຕາ ຊາຍນ຺ຕິ, ຠວນ຺ຕາ ເຍວ ສງ຺ຂາຣາ ຊາຍນ຺ຕີ’’ຕິ.

‘‘ຠິຍ຺ໂຍ ໂອປມ຺ມໍ ກໂຣຫີ’’ຕິ. ‘‘ຍຖາ, ມຫາຣາຊ, ວີຓາຍ ປຕ຺ຕໍ ນ ສິຍາ, ຈມ຺ມໍ ນ ສິຍາ, ໂທຓິ ນ ສິຍາ, ທຓ຺ໂຑ ນ ສິຍາ, ອຸປວີໂຓ ນ ສິຍາ, ຕນ຺ຕິໂຍ ນ ສິຍຸໍ, ໂກໂຓ ນ ສິຍາ, ປຸຣິສສ຺ສ ຈ ຕຊ຺ໂຊ ວາຍາໂມ ນ ສິຍາ, ຊາເຍຍ຺ຍ ສທ຺ໂທ’’ຕິ? ‘‘ນ ຫິ ຠນ຺ເຕ’’ຕິ. ‘‘ຍໂຕ ຈ ໂຂ, ມຫາຣາຊ, ວີຓາຍ ປຕ຺ຕໍ ສິຍາ, ຈມ຺ມໍ ສິຍາ, ໂທຓິ ສິຍາ, ທຓ຺ໂຑ ສິຍາ, ອຸປວີໂຓ ສິຍາ, ຕນ຺ຕິໂຍ ສິຍຸໍ, ໂກໂຓ ສິຍາ, ປຸຣິສສ຺ສ ຈ ຕຊ຺ໂຊ ວາຍາໂມ ສິຍາ, ຊາເຍຍ຺ຍ ສທ຺ໂທ’’ຕິ? ‘‘ອາມ, ຠນ຺ເຕ, ຊາເຍຍ຺ຍາ’’ຕິ. ‘‘ເອວເມວ ໂຂ, ມຫາຣາຊ, ນຕ຺ຖິ ເກຈິ ສງ຺ຂາຣາ, ເຍ ອຠວນ຺ຕາ ຊາຍນ຺ຕິ, ຠວນ຺ຕາ ເຍວ ໂຂ ສງ຺ຂາຣາ ຊາຍນ຺ຕີ’’ຕິ.

‘‘ຠິຍ຺ໂຍ ໂອປມ຺ມໍ ກໂຣຫີ’’ຕິ. ‘‘ຍຖາ, ມຫາຣາຊ, ອຣຓິ ນ ສິຍາ, ອຣຓິໂປຕໂກ ນ ສິຍາ, ອຣຓິໂຍຕ຺ຕກໍ ນ ສິຍາ, ອຸຕ຺ຕຣາຣຓິ ນ ສິຍາ, ໂຈຬກໍ ນ ສິຍາ, ປຸຣິສສ຺ສ ຈ ຕຊ຺ໂຊ ວາຍາໂມ ນ ສິຍາ, ຊາເຍຍ຺ຍ ໂສ ອຄ຺ຄີ’’ຕິ? ‘‘ນ ຫິ ຠນ຺ເຕ’’ຕິ. ‘‘ຍໂຕ ຈ ໂຂ, ມຫາຣາຊ, ອຣຓິ ສິຍາ, ອຣຓິໂປຕໂກ ສິຍາ, ອຣຓິໂຍຕ຺ຕກໍ ສິຍາ, ອຸຕ຺ຕຣາຣຓິ ສິຍາ, ໂຈຬກໍ ສິຍາ, ປຸຣິສສ຺ສ ຈ ຕຊ຺ໂຊ ວາຍາໂມ ສິຍາ, ຊາເຍຍ຺ຍ ໂສ ອຄ຺ຄີ’’ຕິ? ‘‘ອາມ, ຠນ຺ເຕ, ຊາເຍຍ຺ຍາ’’ຕິ. ‘‘ເອວເມວ ໂຂ, ມຫາຣາຊ, ນຕ຺ຖິ ເກຈິ ສງ຺ຂາຣາ, ເຍ ອຠວນ຺ຕາ ຊາຍນ຺ຕິ, ຠວນ຺ຕາ ເຍວ ໂຂ ສງ຺ຂາຣາ ຊາຍນ຺ຕີ’’ຕິ.

‘‘ຠິຍ຺ໂຍ ໂອປມ຺ມໍ ກໂຣຫີ’’ຕິ. ‘‘ຍຖາ, ມຫາຣາຊ, ມຓິ ນ ສິຍາ, ອາຕໂປ ນ ສິຍາ, ໂຄມຍໍ ນ ສິຍາ, ຊາເຍຍ຺ຍ ໂສ ອຄ຺ຄີ’’ຕິ? ‘‘ນ ຫິ ຠນ຺ເຕ’’ຕິ. ‘‘ຍໂຕ ຈ ໂຂ, ມຫາຣາຊ, ມຓິ ສິຍາ, ອາຕໂປ ສິຍາ, ໂຄມຍໍ ສິຍາ, ຊາເຍຍ຺ຍ ໂສ ອຄ຺ຄີ’’ຕິ? ‘‘ອາມ, ຠນ຺ເຕ, ຊາເຍຍ຺ຍາ’’ຕິ. ‘‘ເອວເມວ ໂຂ, ມຫາຣາຊ, ນຕ຺ຖິ ເກຈິ ສງ຺ຂາຣາ ເຍ ອຠວນ຺ຕາ ຊາຍນ຺ຕິ, ຠວນ຺ຕາ ເຍວ ໂຂ ສງ຺ຂາຣາ ຊາຍນ຺ຕີ’’ຕິ.

‘‘ຠິຍ຺ໂຍ ໂອປມ຺ມໍ ກໂຣຫີ’’ຕິ. ‘‘ຍຖາ, ມຫາຣາຊ, ອາທາໂສ ນ ສິຍາ, ອາຠາ ນ ສິຍາ, ມຸຂໍ ນ ສິຍາ, ຊາເຍຍ຺ຍ ອຕ຺ຕາ’’ຕິ? ‘‘ນ ຫິ, ຠນ຺ເຕ’’ຕິ. ‘‘ຍໂຕ ຈ ໂຂ, ມຫາຣາຊ, ອາທາໂສ ສິຍາ, ອາຠາ ສິຍາ, ມຸຂໍ ສິຍາ, ຊາເຍຍ຺ຍ ອຕ຺ຕາ’’ຕິ? ‘‘ອາມ, ຠນ຺ເຕ, ຊາເຍຍ຺ຍາ’’ຕິ. ‘‘ເອວເມວ ໂຂ, ມຫາຣາຊ, ນຕ຺ຖິ ເກຈິ ສງ຺ຂາຣາ, ເຍ ອຠວນ຺ຕາ ຊາຍນ຺ຕິ, ຠວນ຺ຕາ ເຍວ ໂຂ ສງ຺ຂາຣາ ຊາຍນ຺ຕີ’’ຕິ.

‘‘ກລ຺ໂລສິ, ຠນ຺ເຕ ນາຄເສນາ’’ຕິ.

ຠວນ຺ຕສງ຺ຂາຣຊາຍມານປຎ຺ໂຫ ປຎ຺ຈໂມ.