໑໒. ວິຎ຺ຎາຓລກ຺ຂຓປຎ຺ໂຫ

໑໒. ‘‘ຠນ຺ເຕ ນາຄເສນ, ກິໍລກ຺ຂຓໍ ວິຎ຺ຎາຓ’’ນ຺ຕິ? ‘‘ວິຊານນລກ຺ຂຓໍ, ມຫາຣາຊ, ວິຎ຺ຎາຓ’’ນ຺ຕິ.

‘‘ໂອປມ຺ມໍ ກໂຣຫີ’’ຕິ. ‘‘ຍຖາ, ມຫາຣາຊ, ນຄຣຄຸຕ຺ຕິໂກ ມຊ຺ເຌ ນຄຣສິງ຺ຆາຏເກ ນິສິນ຺ໂນ ປສ຺ເສຍ຺ຍ ປຸຣຕ຺ຖິມທິສໂຕ ປຸຣິສໍ ອາຄຈ຺ຉນ຺ຕໍ, ປສ຺ເສຍ຺ຍ ທກ຺ຂິຓທິສໂຕ ປຸຣິສໍ ອາຄຈ຺ຉນ຺ຕໍ, ປສ຺ເສຍ຺ຍ ປຈ຺ຉິມທິສໂຕ ປຸຣິສໍ ອາຄຈ຺ຉນ຺ຕໍ, ປສ຺ເສຍ຺ຍ ອຸຕ຺ຕຣທິສໂຕ ປຸຣິສໍ ອາຄຈ຺ຉນ຺ຕໍ. ເອວເມວ ໂຂ, ມຫາຣາຊ, ຍຎ຺ຈ ປຸຣິໂສ ຈກ຺ຂຸນາ ຣູປໍ ປສ຺ສຕິ, ຕໍ ວິຎ຺ຎາເຓນ ວິຊານາຕິ. ຍຎ຺ຈ ໂສເຕນ ສທ຺ທໍ ສຸຓາຕິ, ຕໍ ວິຎ຺ຎາເຓນ ວິຊານາຕິ. ຍຎ຺ຈ ຆາເນນ ຄນ຺ຘໍ ຆາຍຕິ, ຕໍ ວິຎ຺ຎາເຓນ ວິຊານາຕິ. ຍຎ຺ຈ ຊິວ຺ຫາຍ ຣສໍ ສາຍຕິ, ຕໍ ວິຎ຺ຎາເຓນ ວິຊານາຕິ. ຍຎ຺ຈ ກາເຍນ ໂຜຏ຺ຐພ຺ພໍ ຜຸສຕິ, ຕໍ ວິຎ຺ຎາເຓນ ວິຊານາຕິ, ຍຎ຺ຈ ມນສາ ຘມ຺ມໍ ວິຊານາຕິ, ຕໍ ວິຎ຺ຎາເຓນ ວິຊານາຕິ. ເອວໍ ໂຂ, ມຫາຣາຊ, ວິຊານນລກ຺ຂຓໍ ວິຎ຺ຎາຓ’’ນ຺ຕິ.

‘‘ກລ຺ໂລສິ, ຠນ຺ເຕ ນາຄເສນາ’’ຕິ.

ວິຎ຺ຎາຓລກ຺ຂຓປຎ຺ໂຫ ທ຺ວາທສໂມ.