໒. ປຏິສນ຺ທຫນປຎ຺ໂຫ

໒. ຣາຊາ ອາຫ ‘‘ຠນ຺ເຕ ນາຄເສນ, ໂຍ ນ ປຏິສນ຺ທຫຕິ, ຊານາຕິ ໂສ ‘ນ ປຏິສນ຺ທຫິສ຺ສາມີ’ຕິ? ‘‘ອາມ, ມຫາຣາຊ, ໂຍ ນ ປຏິສນ຺ທຫຕິ, ຊານາຕິ ໂສ ‘ນ ປຏິສນ຺ທຫິສ຺ສາມີ’ຕິ. ‘‘ກຖໍ, ຠນ຺ເຕ, ຊານາຕີ’’ຕິ? ‘‘ໂຍ ເຫຕຸ ໂຍ ປຈ຺ຈໂຍ, ມຫາຣາຊ, ປຏິສນ຺ທຫນາຍ, ຕສ຺ສ ເຫຕຸສ຺ສ ຕສ຺ສ ປຈ຺ຈຍສ຺ສ ອຸປຣມາ ຊານາຕິ ໂສ ‘ນ ປຏິສນ຺ທຫິສ຺ສາມີ’’’ຕິ.

‘‘ໂອປມ຺ມໍ ກໂຣຫີ’’ຕິ. ‘‘ຍຖາ, ມຫາຣາຊ, ກສ຺ສໂກ ຄຫປຕິໂກ ກສິຕ຺ວາ ຈ ວປິຕ຺ວາ ຈ ຘຎ຺ຎາຄາຣໍ ປຣິປູເຣຍ຺ຍ. ໂສ ອປເຣນ ສມເຍນ ເນວ ກສ຺ເສຍ຺ຍ ນ ວປ຺ເປຍ຺ຍ, ຍຖາສມ຺ຠຕຎ຺ຈ ຘຎ຺ຎໍ ປຣິຠຸຎ຺ເຊຍ຺ຍ ວາ ວິສຊ຺ເຊຍ຺ຍ ວາ ຍຖາ ປຈ຺ຈຍໍ ວາ ກເຣຍ຺ຍ, ຊາເນຍ຺ຍ ໂສ, ມຫາຣາຊ, ກສ຺ສໂກ ຄຫປຕິໂກ ‘ນ ເມ ຘຎ຺ຎາຄາຣໍ ປຣິປູເຣສ຺ສຕີ’ຕິ? ‘‘ອາມ, ຠນ຺ເຕ, ຊາເນຍ຺ຍາ’’ຕິ. ‘‘ກຖໍ ຊາເນຍ຺ຍາ’’ຕິ? ‘‘ໂຍ ເຫຕຸ ໂຍ ປຈ຺ຈໂຍ ຘຎ຺ຎາຄາຣສ຺ສ ປຣິປູຣຓາຍ, ຕສ຺ສ ເຫຕຸສ຺ສ ຕສ຺ສ ປຈ຺ຈຍສ຺ສ ອຸປຣມາ ຊານາຕິ ‘ນ ເມ ຘຎ຺ຎາຄາຣໍ ປຣິປູເຣສ຺ສຕີ’’’ຕິ. ‘‘ເອວເມວ ໂຂ, ມຫາຣາຊ, ໂຍ ເຫຕຸ ໂຍ ປຈ຺ຈໂຍ ປຏິສນ຺ທຫນາຍ, ຕສ຺ສ ເຫຕຸສ຺ສ ຕສ຺ສ ປຈ຺ຈຍສ຺ສ ອຸປຣມາ ຊານາຕິ ໂສ ‘ນ ປຏິສນ຺ທຫິສ຺ສາມີ’ຕິ.

‘‘ກລ຺ໂລສິ, ຠນ຺ເຕ ນາຄເສນາ’’ຕິ.

ປຏິສນ຺ທຫນປຎ຺ໂຫ ທຸຕິໂຍ.