໑໑. ສມ຺ປກ຺ຂນ຺ທນລກ຺ຂຓສທ຺ຘາປຎ຺ໂຫ

໑໑. ‘‘ກຖໍ, ຠນ຺ເຕ, ສມ຺ປກ຺ຂນ຺ທນລກ຺ຂຓາ ສທ຺ຘາ’’ຕິ,? ‘‘ຍຖາ, ມຫາຣາຊ, ໂຍຄາວຈໂຣ ອຎ຺ເຎສໍ ຈິຕ຺ຕໍ ວິມຸຕ຺ຕໍ ປສ຺ສິຕ຺ວາ ໂສຕາປຕ຺ຕິຜເລ ວາ ສກທາຄາມິຜເລ ວາ ອນາຄາມິຜເລ ວາ ອຣຫຕ຺ເຕ ວາ ສມ຺ປກ຺ຂນ຺ທຕິ ໂຍຄໍ ກໂຣຕິ ອປ຺ປຕ຺ຕສ຺ສ ປຕ຺ຕິຍາ ອນຘິຄຕສ຺ສ ອຘິຄມາຍ ອສຈ຺ຉິກຕສ຺ສ ສຈ຺ຉິກິຣິຍາຍ. ເອວໍ ໂຂ, ມຫາຣາຊ, ສມ຺ປກ຺ຂນ຺ທນລກ຺ຂຓາ ສທ຺ຘາ’’ຕິ.

‘‘ໂອປມ຺ມໍ ກໂຣຫີ’’ຕິ. ‘‘ຍຖາ, ມຫາຣາຊ, ອຸປຣິປພ຺ພເຕ ມຫາເມໂຆ ອຠິປ຺ປວສ຺ເສຍ຺ຍ, ຕໍ ອຸທກໍ ຍຖານິນ຺ນໍ ປວຕ຺ຕມານໍ ປພ຺ພຕກນ຺ທຣປທຣສາຂາ ປຣິປູເຣຕ຺ວາ ນທິໍ ປຣິປູເຣຍ຺ຍ, ສາ ອຸຠໂຕ ກູລານິ ສໍວິສ຺ສນ຺ທນ຺ຕີ ຄຈ຺ເຉຍ຺ຍ, ອຖ ມຫາຊນກາໂຍ ອາຄນ຺ຕ຺ວາ ຕສ຺ສາ ນທິຍາ ອຸຕ຺ຕານຕໍ ວາ ຄມ຺ຠີຣຕໍ ວາ ອຊານນ຺ໂຕ ຠີໂຕ ວິຕ຺ຖໂຕ ຕີເຣ ຕິຏ຺ເຐຍ຺ຍ, ອຖຎ຺ຎຕໂຣ ປຸຣິໂສ ອາຄນ຺ຕ຺ວາ ອຕ຺ຕໂນ ຖາມຎ຺ຈ ພລຎ຺ຈ ສມ຺ປສ຺ສນ຺ໂຕ ຄາຬ຺ຫໍ ກຈ຺ຉໍ ພນ຺ຘິຕ຺ວາ ປກ຺ຂນ຺ທິຕ຺ວາ ຕເຣຍ຺ຍ, ຕໍ ຕິຓ຺ຓໍ ປສ຺ສິຕ຺ວາ ມຫາຊນກາໂຍປິ ຕເຣຍ຺ຍ. ເອວເມວ ໂຂ, ມຫາຣາຊ, ໂຍຄາວຈໂຣ ອຎ຺ເຎສໍ ຈິຕ຺ຕໍ ວິມຸຕ຺ຕໍ ປສ຺ສິຕ຺ວາ ໂສຕາປຕ຺ຕິຜເລ ວາ ສກທາຄາມິຜເລ ວາ ອນາຄາມິຜເລ ວາ ອຣຫຕ຺ເຕ ວາ ສມ຺ປກ຺ຂນ຺ທຕິ ໂຍຄໍ ກໂຣຕິ ອປ຺ປຕ຺ຕສ຺ສ ປຕ຺ຕິຍາ ອນຘິຄຕສ຺ສ ອຘິຄມາຍ ອສຈ຺ຉິກຕສ຺ສ ສຈ຺ຉິກິຣິຍາຍ. ເອວໍ ໂຂ, ມຫາຣາຊ, ສມ຺ປກ຺ຂນ຺ທນລກ຺ຂຓາ ສທ຺ຘາຕິ. ຠາສິຕມ຺ເປຕໍ, ມຫາຣາຊ, ຠຄວຕາ ສໍຍຸຕ຺ຕນິກາຍວເຣ –

‘‘‘ສທ຺ຘາຍ ຕຣຕີ ໂອຆໍ, ອປ຺ປມາເທນ ອຓ຺ຓວໍ;

ວີຣິເຍນ ທຸກ຺ຂມຈ຺ເຈຕິ, ປຎ຺ຎາຍ ປຣິສຸຊ຺ຌຕີ’’’ຕິ [ປສ຺ສ ສໍ. ນິ. ໑.໒໔໖].

‘‘ກລ຺ໂລສິ, ຠນ຺ເຕ ນາຄເສນາ’’ຕິ.

ສມ຺ປກ຺ຂນ຺ທນລກ຺ຂຓສທ຺ຘາປຎ຺ໂຫ ເອກາທສໂມ.