໔໓໘. ທທ຺ທຣຊາຕກໍ (໑໒)

໑໐໕. ໂຍ ເຕ ປຸຕ຺ຕເກ ອຂາທິ, ທິນ຺ນຠຕ຺ໂຕ ອທູສເກ;

ຕສ຺ມິໍ ທາຐໍ ນິປາເຕຫິ, ມາ ເຕ ມຸຈ຺ຈິຕ຺ຖ ຊີວໂຕ.

໑໐໖. ອາກິຓ຺ຓລຸທ຺ໂທ ປຸຣິໂສ, ຘາຕິເຈລໍວ ມກ຺ຂິໂຕ;

ປເທສໍ ຕໍ ນ ປສ຺ສາມິ, ຍຕ຺ຖ ທາຐໍ ນິປາຕເຍ.

໑໐໗. ອກຕຎ຺ຎຸສ຺ສ ໂປສສ຺ສ, ນິຈ຺ຈໍ ວິວຣທສ຺ສິໂນ;

ສພ຺ພໍ ເຈ ປຖວິໍ ທຊ຺ຊາ, ເນວ ນໍ ອຠິຣາຘເຍ.

໑໐໘. ກິນ຺ນຸ ສຸພາຫຸ ຕຣມານຣູໂປ, ປຈ຺ຈາຄໂຕສິ ສຫ ມາຓເວນ;

ກິໍ ກິຈ຺ຈມຕ຺ຖໍ ອິຘມຕ຺ຖິ ຕຸຍ຺ຫໍ, ອກ຺ຂາຫິ ເມ ປຸຈ຺ຉິໂຕ ເອຕມຕ຺ຖໍ.

໑໐໙. ໂຍ ເຕ ສຂາ ທທ຺ທໂຣ ສາຘຸຣູໂປ, ຕສ຺ສ ວຘໍ ປຣິສງ຺ກາມິ ອຊ຺ຊ;

ປຸຣິສສ຺ສ ກມ຺ມາຍຕນານິ ສຸຕ຺ວາ, ນາຫໍ ສຸຂິໍ ທທ຺ທຣໍ ອຊ຺ຊ ມຎ຺ເຎ.

໑໑໐. ການິສ຺ສ ກມ຺ມາຍຕນານິ ອສ຺ສຸ, ປຸຣິສສ຺ສ ວຸຕ຺ຕິສໂມຘານຕາຍ;

ກໍ ວາ ປຏິຎ຺ຎໍ ປຸຣິສສ຺ສ ສຸຕ຺ວາ, ປຣິສງ຺ກສິ ທທ຺ທຣໍ ມາຓເວນ.

໑໑໑. ຈິຓ຺ຓາ ກລິງ຺ຄາ ຈຣິຕາ ວຓິຊ຺ຊາ, ເວຕ຺ຕາຈໂຣ ສງ຺ກຸປໂຖປິ ຈິຓ຺ໂຓ;

ນເຏຫິ ຈິຓ຺ຓໍ ສຫ ວາກຸເຣຫິ [ວາກເຣຫິ (ປີ. ສີ. ນິຍ຺ຍ), ວາຄຸເຣຫິ (?)], ທຓ຺ເຑນ ຍຸທ຺ຘມ຺ປິ ສມຊ຺ຊມຊ຺ເຌ.

໑໑໒. ພທ຺ຘາ ກຸລີກາ [ກຸລິງ຺ກາ (ສີ. ປີ.)] ມິຕມາຬ຺ຫເກນ, ອກ຺ຂາ ຊິຕາ [ອກ຺ຂາຈິຕາ (ສີ. ອຏ຺ຐ.)] ສໍຍໂມ ອພ຺ຠຕີໂຕ;

ອພ຺ພາຫິຕໍ [ອປ຺ປຫິຕໍ (ສີ. ສ຺ຍາ.), ອພ຺ພູຫິຕໍ (ປີ. ສີ. ນິຍ຺ຍ)] ປຸພ຺ພກໍ [ປຸປ຺ຜກໍ (ສີ. ສ຺ຍາ.)] ອຑ຺ຒຣຕ຺ຕໍ, ຫຕ຺ຖາ ທຑ຺ຒາ ປິຓ຺ຑປຏິຄ຺ຄເຫນ.

໑໑໓. ຕານິສ຺ສ ກມ຺ມາຍຕນານິ ອສ຺ສຸ, ປຸຣິສສ຺ສ ວຸຕ຺ຕິສໂມຘານຕາຍ;

ຍຖາ ອຍໍ ທິສ຺ສຕິ ໂລມປິຓ຺ໂຑ, ຄາໂວ ຫຕາ ກິໍ ປນ ທທ຺ທຣສ຺ສາຕິ.

ທທ຺ທຣຊາຕກໍ ທ຺ວາທສມໍ.

ນວກນິປາຕໍ ນິຏ຺ຐິຕໍ.