໔໓໖. ສມຸຄ຺ຄຊາຕກໍ (໑໐)

໘໗. ກຸໂຕ ນຸ ອາຄຈ຺ຉຖ ໂຠ ຕໂຍ ຊນາ, ສ຺ວາຄຕາ ເອຖ [ສ຺ວາຄຕໍ ເອຕ຺ຖ (ສີ. ປີ.)] ນິສີທຖາສເນ;

ກຈ຺ຈິຕ຺ຖ ໂຠນ຺ໂຕ ກຸສລໍ ອນາມຍໍ, ຈິຣສ຺ສມພ຺ຠາຄມນໍ ຫິ ໂວ ອິຘ.

໘໘. ອຫເມວ ເອໂກ ອິຘ ມຊ຺ຊ ປຕ຺ໂຕ, ນ ຈາປິ ເມ ທຸຕິໂຍ ໂກຈິ ວິຊ຺ຊຕິ;

ກິເມວ ສນ຺ຘາຍ ເຕ ຠາສິຕໍ ອິເສ, ‘‘ກຸໂຕ ນຸ ອາຄຈ຺ຉຖ ໂຠ ຕໂຍ ຊນາ’’.

໘໙. ຕຸວຎ຺ຈ ເອໂກ ຠຣິຍາ ຈ ເຕ ປິຍາ, ສມຸຄ຺ຄປກ຺ຂິຕ຺ຕນິກິຓ຺ຓມນ຺ຕເຣ;

ສາ ຣກ຺ຂິຕາ ກຸຈ຺ຉິຄຕາວ [ກຸຈ຺ຉິຄຕາ ຈ (ກ.)] ເຕ ສທາ, ວາຍຸສ຺ສ [ຫຣິສ຺ສ (ກ.)] ປຸຕ຺ເຕນ ສຫາ ຕຫິໍ ຣຕາ.

໙໐. ສໍວິຄ຺ຄຣູໂປ ອິສິນາ ວິຍາກໂຕ [ປພ຺ຍາກໂຕ (ກ.), ພ຺ຍາກໂຕ (ສ຺ຍາ. ປີ.)], ໂສ ທານໂວ ຕຕ຺ຖ ສມຸຄ຺ຄມຸຄ຺ຄິລິ;

ອທ຺ທກ຺ຂິ ຠຣິຍໍ ສຸຈິ ມາລຘາຣິນິໍ, ວາຍຸສ຺ສ ປຸຕ຺ເຕນ ສຫາ ຕຫິໍ ຣຕໍ.

໙໑. ສຸທິຏ຺ຐຣູປມຸຄ຺ຄຕປານຸວຕ຺ຕິນາ [ສຸທິຏ຺ຐຣູປຸຄ຺ຄຕປານຸວຕ຺ຕິນາ (ສີ. ສ຺ຍາ. ປີ.)], ຫີນາ ນຣາ ເຍ ປມທາວສໍ ຄຕາ;

ຍຖາ ຫເວ ປາຓຣິເວຕ຺ຖ ຣກ຺ຂິຕາ, ທຸຏ຺ຐາ ມຍີ ອຎ຺ຎມຠິປ຺ປໂມທຍິ.

໙໒. ທິວາ ຈ ຣຕ຺ໂຕ ຈ ມຍາ ອຸປຏ຺ຐິຕາ, ຕປສ຺ສິນາ ໂຊຕິຣິວາ ວເນ ວສໍ;

ສາ ຘມ຺ມມຸກ຺ກມ຺ມ ອຘມ຺ມມາຈຣິ, ອກິຣິຍຣູໂປ ປມທາຫິ ສນ຺ຖໂວ.

໙໓. ສຣີຣມຊ຺ຌມ຺ຫິ ຐິຕາຕິມຎ຺ຎຫໍ, ມຍ຺ຫໍ ອຍນ຺ຕິ ອສຕິໍ ອສຎ຺ຎຕໍ;

ສາ ຘມ຺ມມຸກ຺ກມ຺ມ ອຘມ຺ມມາຈຣິ, ອກິຣິຍຣູໂປ ປມທາຫິ ສນ຺ຖໂວ.

໙໔. ສຸຣກ຺ຂິຕໍ ເມຕິ ກຖໍ ນຸ ວິສ຺ສເສ, ອເນກຈິຕ຺ຕາສຸ ນ ຫຕ຺ຖິ [ອເນກຈິຕ຺ຕາ ປຸນ ເຫຕ຺ຖ (ກ.)] ຣກ຺ຂຓາ;

ເອຕາ ຫິ ປາຕາລປປາຕສນ຺ນິຠາ, ເອຕ຺ຖປ຺ປມຕ຺ໂຕ ພ຺ຍສນໍ ນິຄຈ຺ຉຕິ.

໙໕. ຕສ຺ມາ ຫິ ເຕ ສຸຂິໂນ ວີຕໂສກາ, ເຍ ມາຕຸຄາເມຫິ ຈຣນ຺ຕິ ນິສ຺ສຏາ;

ເອຕໍ ສິວໍ ອຸຕ຺ຕມມາຠິປຕ຺ຖຍໍ, ນ ມາຕຸຄາເມຫິ ກເຣຍ຺ຍ ສນ຺ຖວນ຺ຕິ.

ສມຸຄ຺ຄຊາຕກໍ ທສມໍ.