໔໓໔. ຈກ຺ກວາກຊາຕກໍ (໘)

໖໙. ກາສາຍວຕ຺ເຖ ສກຸເຓ ວທາມິ, ທຸເວ ທຸເວ ນນ຺ທມເນ [ນນ຺ທິມເນ (ສີ. ປີ.)] ຈຣນ຺ເຕ;

ກໍ ອຓ຺ຑຊໍ ອຓ຺ຑຊາ ມານຸເສສຸ, ຊາຕິໍ ປສໍສນ຺ຕິ ຕທິງ຺ຆ ພ຺ຣູຖ.

໗໐. ອມ຺ເຫ ມນຸສ຺ເສສຸ ມນຸສ຺ສຫິໍສ, ອນຸພ຺ພເຕ [ອນຸປຸພ຺ພເກ (ກ.)] ຈກ຺ກວາເກ ວທນ຺ຕິ;

ກລ຺ຍາຓຠາວມ຺ເຫ [ຠາວ’ມ຺ຫ (ສີ. ປີ.)] ທິເຊສຸ ສມ຺ມຕາ, ອຠິຣູປາ [ອຠີຕຣູປາ (ສີ. ສ຺ຍາ. ປີ.)] ວິຈຣາມ ອຓ຺ຓເວ. ( ) [(ນ ຆາສເຫຕູປິ ກໂຣມ ປາປໍ) (ກ.)]

໗໑. ກິໍ ອຓ຺ຓເວ ການິ ຜລານິ ຠຸຎ຺ເຊ, ມໍສໍ ກຸໂຕ ຂາທຖ ຈກ຺ກວາກາ;

ກິໍ ໂຠຊນໍ ຠຸຎ຺ຊຖ ໂວ ອໂນມາ [ອຠິຓ຺ຫໍ (ກ.)], ພລຎ຺ຈ ວຓ຺ໂຓ ຈ ອນປ຺ປຣູປາ [ອນປ຺ປຣູໂປ (ສີ. ສ຺ຍາ. ປີ.)].

໗໒. ນ ອຓ຺ຓເວ ສນ຺ຕິ ຜລານິ ຘງ຺ກ, ມໍສໍ ກຸໂຕ ຂາທິຕຸໍ ຈກ຺ກວາເກ;

ເສວາລຠກ຺ຂມ຺ຫ [ຠກ຺ຂິມ຺ຫ (ກ.)] ອປາຓໂຠຊນາ [ອວາກໂຠຊນາ (ສີ. ປີ.)], ນ ຆາສເຫຕູປິ ກໂຣມ ປາປໍ.

໗໓. ນ ເມ ອິທໍ ຣຸຈ຺ຈຕິ ຈກ຺ກວາກ, ອສ຺ມິໍ ຠເວ ໂຠຊນສນ຺ນິກາໂສ;

ອໂຫສິ ປຸພ຺ເພ ຕໂຕ ເມ ອຎ຺ຎຖາ, ອິຈ຺ເຈວ ເມ ວິມຕິ ເອຕ຺ຖ ຊາຕາ.

໗໔. ອຫມ຺ປິ ມໍສານິ ຜລານິ ຠຸຎ຺ເຊ, ອນ຺ນານິ ຈ ໂລຓິຍເຕລິຍານິ;

ຣສໍ ມນຸສ຺ເສສຸ ລຠາມິ ໂຠຕ຺ຕຸໍ, ສູໂຣວ ສງ຺ຄາມມຸຂໍ ວິເຊຕ຺ວາ;

ນ ຈ ເມ ຕາທິໂສ ວຓ຺ໂຓ, ຈກ຺ກວາກ ຍຖາ ຕວ.

໗໕. ອສຸທ຺ຘຠກ຺ໂຂສິ ຂຓານຸປາຕີ, ກິຈ຺ເຉນ ເຕ ລພ຺ຠຕິ ອນ຺ນປານໍ;

ນ ຕຸສ຺ສສີ ຣຸກ຺ຂຜເລຫິ ຘງ຺ກ, ມໍສານິ ວາ ຍານິ ສຸສານມຊ຺ເຌ.

໗໖. ໂຍ ສາຫເສນ ອຘິຄມ຺ມ ໂຠເຄ, ປຣິຠຸຎ຺ຊຕິ ຘງ຺ກ ຂຓານຸປາຕີ;

ຕໂຕ ອຸປກ຺ໂກສຕິ ນໍ ສຠາໂວ, ອຸປກ຺ກຸຏ຺ໂຐ ວຓ຺ຓພລໍ ຊຫາຕິ.

໗໗. ອປ຺ປມ຺ປິ ເຈ ນິພ຺ພຸຕິໍ ຠຸຎ຺ຊຕີ ຍທິ, ອສາຫເສນ ອປຣູປຆາຕີ [ອສາຫເສນານຸປຆາຕິໂນ (ກ.)];

ພລຎ຺ຈ ວຓ຺ໂຓ ຈ ຕທສ຺ສ ໂຫຕິ, ນ ຫິ ສພ຺ໂພ ອາຫາຣມເຍນ ວຓ຺ໂຓຕິ.

ຈກ຺ກວາກຊາຕກໍ ອຏ຺ຐມໍ.