໔໒໙. ມຫາສຸວຊາຕກໍ (໓)

໒໐. ທຸໂມ ຍທາ ໂຫຕິ ຜລູປປນ຺ໂນ, ຠຸຎ຺ຊນ຺ຕິ ນໍ ວິຫງ຺ຄມາ [ວິຫຄາ (ສີ. ປີ.)] ສມ຺ປຕນ຺ຕາ;

ຂີຓນ຺ຕິ ຎຕ຺ວານ ທຸມໍ ຜລຈ຺ຈເຍ [ຎຕ຺ວາ ທຸມປ຺ຜລຈ຺ຈເຍນ (ກ.)], ທິໂສທິສໍ ຍນ຺ຕິ ຕໂຕ ວິຫງ຺ຄມາ.

໒໑. ຈຣ ຈາຣິກໍ ໂລຫິຕຕຸຓ຺ຑ ມາມຣິ, ກິໍ ຕ຺ວໍ ສຸວ ສຸກ຺ຂທຸມມ຺ຫິ ຌາຍສິ;

ຕທິງ຺ຆ ມໍ ພ຺ຣູຫິ ວສນ຺ຕສນ຺ນິຠ, ກສ຺ມາ ສຸວ ສຸກ຺ຂທຸມໍ ນ ຣິຎ຺ຈສິ.

໒໒. ເຍ ເວ ສຂີນໍ ສຂາໂຣ ຠວນ຺ຕິ, ປາຓຈ຺ຈເຍ [ປາຓໍ ຈເຊ (ກ.), ປາຓຈ຺ຈເຍ ມຣຓກາເລ ຈ ສຸຂທຸກ຺ເຂສຸ ຈ ນ ຊຫນ຺ຕີຕິ ສມ຺ພນ຺ໂຘ] ທຸກ຺ຂສຸເຂສຸ ຫໍສ;

ຂີຓໍ ອຂີຓນ຺ຕິ ນ ຕໍ ຊຫນ຺ຕິ, ສນ຺ໂຕ ສຕໍ ຘມ຺ມມນຸສ຺ສຣນ຺ຕາ.

໒໓. ໂສຫໍ ສຕໍ ອຎ຺ຎຕໂຣສ຺ມິ ຫໍສ, ຎາຕີ ຈ ເມ ໂຫຕິ ສຂາ ຈ ຣຸກ຺ໂຂ;

ຕໍ ນຸສ຺ສເຫ ຊີວິກຕ຺ໂຖ ປຫາຕຸໍ, ຂີຓນ຺ຕິ ຎຕ຺ວານ ນ ເຫສ ຘມ຺ໂມ [ນ ໂສສ (ກ.), ນ ເອສ (ສ຺ຍາ.)].

໒໔. ສາຘຸ ສກ຺ຂິ ກຕໍ ໂຫຕິ, ເມຕ຺ຕິ ສໍສຕິ ສນ຺ຖໂວ [ມິຕ຺ຕໍ ສງ຺ຄຕິ ສນ຺ຘໂວ (ກ.)];

ສເຈຕໍ ຘມ຺ມໍ ໂຣເຈສິ, ປາສໍໂສສິ ວິຊານຕໍ.

໒໕. ໂສ ເຕ ສຸວ ວຣໍ ທມ຺ມິ, ປຕ຺ຕຍານ ວິຫງ຺ຄມ;

ວຣໍ ວຣສ຺ສຸ ວກ຺ກງ຺ຄ, ຍໍ ກິຎ຺ຈິ ມນສິຈ຺ຉສິ.

໒໖. ວຣຎ຺ຈ ເມ ຫໍສ ຠວໍ ທເທຍ຺ຍ, ອຍຎ຺ຈ ຣຸກ຺ໂຂ ປຸນຣາຍຸໍ ລເຠຖ;

ໂສ ສາຂວາ ຜລິມາ ສໍວິຣູຬ຺ໂຫ, ມຘຸຕ຺ຖິໂກ ຕິຏ຺ຐຕຸ ໂສຠມາໂນ.

໒໗. ຕໍ ປສ຺ສ ສມ຺ມ ຜລິມໍ ອຸຬາຣໍ, ສຫາວ ເຕ ໂຫຕຸ ອຸທຸມ຺ພເຣນ;

ໂສ ສາຂວາ ຜລິມາ ສໍວິຣູຬ຺ໂຫ, ມຘຸຕ຺ຖິໂກ ຕິຏ຺ຐຕຸ ໂສຠມາໂນ.

໒໘. ເອວໍ ສກ຺ກ ສຸຂີ ໂຫຫິ, ສຫ ສພ຺ເພຫິ ຎາຕິຠິ;

ຍຖາຫມຊ຺ຊ ສຸຂິໂຕ, ທິສ຺ວານ ສຜລໍ ທຸມໍ.

໒໙. ສຸວສ຺ສ ຈ ວຣໍ ທຕ຺ວາ, ກຕ຺ວານ ສຜລໍ ທຸມໍ;

ປກ຺ກາມິ ສຫ ຠຣິຍາຍ, ເທວານໍ ນນ຺ທນໍ ວນນ຺ຕິ.

ມຫາສຸວຊາຕກໍ ຕຕິຍໍ.