໔໒໒. ເຈຕິຍຊາຕກໍ (໖)

໔໕. ຘມ຺ໂມ ຫເວ ຫໂຕ ຫນ຺ຕິ, ນາຫໂຕ ຫນ຺ຕິ ກິຎ຺ຈນໍ [ກຎ຺ຈິນໍ (ປີ.)];

ຕສ຺ມາ ຫິ ຘມ຺ມໍ ນ ຫເນ, ມາ ຕ຺ວໍ [ຕໍ (ສ຺ຍາ. ປີ.)] ຘມ຺ໂມ ຫໂຕ ຫນິ.

໔໖. ອລິກໍ ຠາສມານສ຺ສ, ອປກ຺ກມນ຺ຕິ ເທວຕາ;

ປູຕິກຎ຺ຈ ມຸຂໍ ວາຕິ, ສກຏ຺ຐານາ ຈ ຘໍສຕິ;

ໂຍ ຊານໍ ປຸຈ຺ຉິໂຕ ປຎ຺ຫໍ, ອຎ຺ຎຖາ ນໍ ວິຍາກເຣ.

໔໗. ສເຈ ຫິ ສຈ຺ຈໍ ຠຓສິ, ໂຫຫິ ຣາຊ ຍຖາ ປຸເຣ;

ມຸສາ ເຈ ຠາສເສ ຣາຊ, ຠູມິຍໍ ຕິຏ຺ຐ ເຈຕິຍ.

໔໘. ອກາເລ ວສ຺ສຕີ ຕສ຺ສ, ກາເລ ຕສ຺ສ ນ ວສ຺ສຕິ;

ໂຍ ຊານໍ ປຸຈ຺ຉິໂຕ ປຎ຺ຫໍ, ອຎ຺ຎຖາ ນໍ ວິຍາກເຣ.

໔໙. ສເຈ ຫິ ສຈ຺ຈໍ ຠຓສິ, ໂຫຫິ ຣາຊ ຍຖາ ປຸເຣ;

ມຸສາ ເຈ ຠາສເສ ຣາຊ, ຠູມິໍ ປວິສ ເຈຕິຍ.

໕໐. ຊິວ຺ຫາ ຕສ຺ສ ທ຺ວິຘາ ໂຫຕິ, ອຸຣຄສ຺ເສວ ທິສມ຺ປຕິ;

ໂຍ ຊານໍ ປຸຈ຺ຉິໂຕ ປຎ຺ຫໍ, ອຎ຺ຎຖາ ນໍ ວິຍາກເຣ.

໕໑. ສເຈ ຫິ ສຈ຺ຈໍ ຠຓສິ, ໂຫຫິ ຣາຊ ຍຖາ ປຸເຣ;

ມຸສາ ເຈ ຠາສເສ ຣາຊ, ຠິຍ຺ໂຍ ປວິສ ເຈຕິຍ.

໕໒. ຊິວ຺ຫາ ຕສ຺ສ ນ ຠວຕິ, ມຈ຺ຉສ຺ເສວ ທິສມ຺ປຕິ;

ໂຍ ຊານໍ ປຸຈ຺ຉິໂຕ ປຎ຺ຫໍ, ອຎ຺ຎຖາ ນໍ ວິຍາກເຣ.

໕໓. ສເຈ ຫິ ສຈ຺ຈໍ ຠຓສິ, ໂຫຫິ ຣາຊ ຍຖາ ປຸເຣ;

ມຸສາ ເຈ ຠາສເສ ຣາຊ, ຠິຍ຺ໂຍ ປວິສ ເຈຕິຍ.

໕໔. ຖິໂຍວ ຕສ຺ສ ຊາຍນ຺ຕິ [ຖິໂຍ ຕສ຺ສ ປຊາຍນ຺ຕິ (ກ.)], ນ ປຸມາ ຊາຍເຣ ກຸເລ;

ໂຍ ຊານໍ ປຸຈ຺ຉິໂຕ ປຎ຺ຫໍ, ອຎ຺ຎຖາ ນໍ ວິຍາກເຣ.

໕໕. ສເຈ ຫິ ສຈ຺ຈໍ ຠຓສິ, ໂຫຫິ ຣາຊ ຍຖາ ປຸເຣ;

ມຸສາ ເຈ ຠາສເສ ຣາຊ, ຠິຍ຺ໂຍ ປວິສ ເຈຕິຍ.

໕໖. ປຸຕ຺ຕາ ຕສ຺ສ ນ ຠວນ຺ຕິ, ປກ຺ກມນ຺ຕິ ທິໂສທິສໍ;

ໂຍ ຊານໍ ປຸຈ຺ຉິໂຕ ປຎ຺ຫໍ, ອຎ຺ຎຖາ ນໍ ວິຍາກເຣ.

໕໗. ສເຈ ຫິ ສຈ຺ຈໍ ຠຓສິ, ໂຫຫິ ຣາຊ ຍຖາ ປຸເຣ;

ມຸສາ ເຈ ຠາສເສ ຣາຊ, ຠິຍ຺ໂຍ ປວິສ ເຈຕິຍ.

໕໘. ສ ຣາຊາ ອິສິນາ ສຕ຺ໂຕ, ອນ຺ຕລິກ຺ຂຈໂຣ ປຸເຣ;

ປາເວກ຺ຂິ ປຖວິໍ ເຈຈ຺ໂຈ, ຫີນຕ຺ໂຕ ປຕ຺ວ ປຣິຍາຍໍ [ອຕ຺ຕປຣິຍາຍໍ (ສີ. ສ຺ຍາ.), ປຕ຺ຕປຣິຍາຍໍ (ກ. ສີ. ນິຍ຺ຍ)].

໕໙. ຕສ຺ມາ ຫິ ຉນ຺ທາຄມນໍ, ນປ຺ປສໍສນ຺ຕິ ປຓ຺ຑິຕາ;

ອທຸຏ຺ຐຈິຕ຺ໂຕ ຠາເສຍ຺ຍ, ຄິຣໍ ສຈ຺ຈູປສໍຫິຕນ຺ຕິ.

ເຈຕິຍຊາຕກໍ ຉຏ຺ຐໍ.