໔໑໗. ກຈ຺ຈານິຊາຕກໍ (໑)

໑. ໂອທາຕວຕ຺ຖາ ສຸຈິ ອລ຺ລເກສາ, ກຈ຺ຈານິ ກິໍ ກຸມ຺ຠິມຘິສ຺ສຍິຕ຺ວາ [ກຸມ຺ຠິມປສ຺ສຍິຕ຺ວາ (ປີ.)];

ປິຏ຺ຐາ ຕິລາ ໂຘວສິ ຕຓ຺ຑຸລານິ, ຕິໂລທໂນ ເຫຫິຕິ ກິສ຺ສ ເຫຕຸ.

໒. ນ ໂຂ ອຍໍ ພ຺ຣາຫ຺ມຓ ໂຠຊນຕ຺ຖາ [ໂຠຊນຕ຺ຖໍ (ສ຺ຍາ.)], ຕິໂລທໂນ ເຫຫິຕິ ສາຘຸປກ຺ໂກ;

ຘມ຺ໂມ ມໂຕ ຕສ຺ສ ປຫຸຕ຺ຕມຊ຺ຊ [ປຫູນມຊ຺ຊ (ສ຺ຍາ.), ປຫູຕມຊ຺ຊ (ສີ.), ພຫູຕມຊ຺ຊາ (ປີ.)], ອຫໍ ກຣິສ຺ສາມິ ສຸສານມຊ຺ເຌ.

໓. ອນຸວິຈ຺ຈ ກຈ຺ຈານິ ກໂຣຫິ ກິຈ຺ຈໍ, ຘມ຺ໂມ ມໂຕ ໂກ ນຸ ຕເວວ [ຕເວຕ (ສີ. ສ຺ຍາ. ປີ.)] ສໍສິ;

ສຫສ຺ສເນຕ຺ໂຕ ອຕຸລານຸຠາໂວ, ນ ມິຍ຺ຍຕີ ຘມ຺ມວໂຣ ກທາຈິ.

໔. ທຬ຺ຫປ຺ປມາຓໍ ມມ ເອຕ຺ຖ ພ຺ຣຫ຺ເມ, ຘມ຺ໂມ ມໂຕ ນຕ຺ຖິ ມເມຕ຺ຖ ກງ຺ຂາ;

ເຍ ເຍວ ທານິ ປາປາ ຠວນ຺ຕິ, ເຕ ເຕວ ທານິ ສຸຂິຕາ ຠວນ຺ຕິ.

໕. ສຸຓິສາ ຫິ ມຍ຺ຫໍ ວຎ຺ຌາ ອໂຫສິ, ສາ ມໍ ວຘິຕ຺ວານ ວິຊາຍິ ປຸຕ຺ຕໍ;

ສາ ທານິ ສພ຺ພສ຺ສ ກຸລສ຺ສ ອິສ຺ສຣາ, ອຫໍ ປນມ຺ຫິ [ວສາມິ (ສ຺ຍາ.)] ອປວິທ຺ຘາ ເອກິກາ.

໖. ຊີວາມິ ໂວຫໍ ນ ມໂຕຫມສ຺ມິ [ນາຫໍ ມໂຕສ຺ມິ (ສີ. ປີ.)], ຕເວວ ອຕ຺ຖາຍ ອິຘາຄໂຕສ຺ມິ;

ຍາ ຕໍ ວຘິຕ຺ວານ ວິຊາຍິ ປຸຕ຺ຕໍ, ສຫາວ ປຸຕ຺ເຕນ ກໂຣມິ ຠສ຺ມໍ.

໗. ເອວຎ຺ຈ [ເອຕຎ຺ຈ (ສີ. ປີ.)] ເຕ ຣຸຈ຺ຈຕິ ເທວຣາຊ, ມເມວ ອຕ຺ຖາຍ ອິຘາຄໂຕສິ;

ອຫຎ຺ຈ ປຸຕ຺ໂຕ ສຸຓິສາ ຈ ນຕ຺ຕາ, ສມ຺ໂມທມານາ ຆຣມາວເສມ.

໘. ເອວຎ຺ຈ ເຕ ຣຸຈ຺ຈຕິ ກາຕິຍານິ, ຫຕາປິ ສນ຺ຕາ ນ ຊຫາສິ ຘມ຺ມໍ;

ຕຸວຎ຺ຈ [ຕ຺ວຎ຺ຈ (ປີ. ກ.)] ປຸຕ຺ໂຕ ສຸຓິສາ ຈ ນຕ຺ຕາ, ສມ຺ໂມທມານາ ຆຣມາວເສຖ.

໙. ສາ ກາຕິຍານີ ສຸຓິສາຍ ສທ຺ຘິໍ, ສມ຺ໂມທມານາ ຆຣມາວສິຕ຺ຖ;

ປຸຕ຺ໂຕ ຈ ນຕ຺ຕາ ຈ ອຸປຏ຺ຐຫິໍສຸ, ເທວານມິນ຺ເທນ ອຘິຄ຺ຄຫີຕາຕິ.

ກຈ຺ຈານິຊາຕກໍ ປຐມໍ.