໓໘໙. ສຸວຓ຺ຓກກ຺ກຏຊາຕກໍ (໖-໒-໔)

໙໔. ສິງ຺ຄີມິໂຄ ອາຍຕຈກ຺ຂຸເນຕ຺ໂຕ, ອຏ຺ຐິຕ຺ຕໂຈ ວາຣິສໂຍ ອໂລໂມ;

ເຕນາຠິຠູໂຕ ກປຓໍ ຣຸທາມິ, ຫເຣ ສຂາ ກິສ຺ສ ນຸ ມໍ ຊຫາສິ.

໙໕. ໂສ ປສ຺ສສນ຺ໂຕ ມຫຕາ ຜເຓນ, ຠຸຊງ຺ຄໂມ ກກ຺ກຏມຊ຺ຌປຕ຺ໂຕ;

ສຂາ ສຂາຣໍ ປຣິຕາຍມາໂນ, ຠຸຊງ຺ຄມໍ ກກ຺ກຏໂກ ຄເຫສິ.

໙໖. ນ ວາຍສໍ ໂນ ປນ ກຓ຺ຫສປ຺ປໍ, ຆາສຕ຺ຖິໂກ ກກ຺ກຏໂກ ອເທຍ຺ຍ;

ປຸຈ຺ຉາມິ ຕໍ ອາຍຕຈກ຺ຂຸເນຕ຺ຕ, ອຖ ກິສ຺ສ ເຫຕຸມ຺ຫ ອຸໂຠ ຄຫີຕາ.

໙໗. ອຍໍ ປຸຣິໂສ ມມ ອຕ຺ຖກາໂມ, ໂຍ ມໍ ຄເຫຕ຺ວານ ທກາຍ ເນຕິ;

ຕສ຺ມິໍ ມເຕ ທຸກ຺ຂມນປ຺ປກໍ ເມ, ອຫຎ຺ຈ ເອໂສ ຈ ອຸໂຠ ນ ໂຫມ.

໙໘. ມມຎ຺ຈ ທິສ຺ວານ ປວທ຺ຘກາຍໍ, ສພ຺ໂພ ຊໂນ ຫິໍສິຕຸເມວ ມິຈ຺ເຉ;

ສາທຸຎ຺ຈ ຖູລຎ຺ຈ ມຸທຸຎ຺ຈ ມໍສໍ, ກາກາປິ ມໍ ທິສ຺ວານ [ທິສ຺ວ (ສີ. ປີ.)] ວິເຫຐເຍຍ຺ຍຸໍ.

໙໙. ສເຈຕສ຺ສ ເຫຕຸມ຺ຫ ອຸໂຠ ຄຫີຕາ, ອຸຏ຺ຐາຕຸ ໂປໂສ ວິສມາວມາມິ [ວິສມາຈມາມິ (ສີ. ປີ. ກ.)];

ມມຎ຺ຈ ກາກຎ຺ຈ ປມຸຎ຺ຈ ຂິປ຺ປໍ, ປຸເຣ ວິສໍ ຄາຬ຺ຫມຸເປຕິ ມຈ຺ຈໍ.

໑໐໐. ສປ຺ປໍ ປໂມກ຺ຂາມິ ນ ຕາວ ກາກໍ, ປຏິພນ຺ຘໂກ [ປຏິພທ຺ຘໂກ (ສີ. ປີ.)] ໂຫຫິຕິ [ໂຫຕິ ຫິ (ສ຺ຍາ.)] ຕາວ ກາໂກ;

ປຸຣິສຎ຺ຈ ທິສ຺ວານ ສຸຂິໍ ອໂຣຄໍ, ກາກໍ ປໂມກ຺ຂາມິ ຍເຖວ ສປ຺ປໍ.

໑໐໑. ກາໂກ ຕທາ ເທວທຕ຺ໂຕ ອໂຫສິ, ມາໂຣ ປນ ກຓ຺ຫສປ຺ໂປ ອໂຫສິ;

ອານນ຺ທຠທ຺ໂທ ກກ຺ກຏໂກ ອໂຫສິ, ອຫໍ ຕທາ ພ຺ຣາຫ຺ມໂຓ ໂຫມິ ສຕ຺ຖາຕິ [ຕຕ຺ຖາຕິ (ສີ. ປີ.)].

ສຸວຓ຺ຓກກ຺ກຏຊາຕກໍ ຈຕຸຕ຺ຖໍ.