໖. ຉກ຺ກນິປາໂຕ

໑. ອວາຣິຍວຄ຺ໂຄ

໓໗໖. ອວາຣິຍຊາຕກໍ (໖-໑-໑)

໑. ມາສຸ ກຸຊ຺ຌ ຠູມິປຕິ, ມາສຸ ກຸຊ຺ຌ ຣເຖສຠ;

ກຸທ຺ຘໍ ອປ຺ປຏິກຸຊ຺ຌນ຺ໂຕ, ຣາຊາ ຣຏ຺ຐສ຺ສ ປູຊິໂຕ.

໒. ຄາເມ ວາ ຍທິ ວາຣຎ຺ເຎ, ນິນ຺ເນ ວາ ຍທິ ວາ ຖເລ;

ສພ຺ພຕ຺ຖ ອນຸສາສາມິ, ມາສຸ ກຸຊ຺ຌ [ມາສ຺ສຸ ກຸຊ຺ຌິ (ສີ. ປີ.)] ຣເຖສຠ.

໓. ອວາຣິຍປິຕາ ນາມ, ອຫຸ ຄງ຺ຄາຍ ນາວິໂກ;

ປຸພ຺ເພ ຊນໍ ຕາເຣຕ຺ວານ, ປຈ຺ຉາ ຍາຈຕິ ເວຕນໍ;

ເຕນສ຺ສ ຠຓ຺ຑນໍ ໂຫຕິ, ນ ຈ ໂຠເຄຫິ ວຑ຺ຒຕິ.

໔. ອຕິຓ຺ຓໍເຍວ ຍາຈສ຺ສຸ, ອປາຣໍ ຕາຕ ນາວິກ;

ອຎ຺ໂຎ ຫິ ຕິຓ຺ຓສ຺ສ ມໂນ, ອຎ຺ໂຎ ໂຫຕິ ປາເຣສິໂນ [ຕເຣສິໂນ (ສີ. ປີ.), ຕິເຣສິໂນ (ສ຺ຍາ.)].

໕. ຄາເມ ວາ ຍທິ ວາຣຎ຺ເຎ, ນິນ຺ເນ ວາ ຍທິ ວາ ຖເລ;

ສພ຺ພຕ຺ຖ ອນຸສາສາມິ, ມາສຸ ກຸຊ຺ຌິຕ຺ຖ ນາວິກ.

໖. ຍາເຍວານຸສາສນິຍາ, ຣາຊາ ຄາມວຣໍ ອທາ;

ຕາເຍວານຸສາສນິຍາ, ນາວິໂກ ປຫຣີ ມຸຂໍ.

໗. ຠຕ຺ຕໍ ຠິນ຺ນໍ ຫຕາ ຠຣິຍາ, ຄພ຺ໂຠ ຈ ປຕິໂຕ ຉມາ;

ມິໂຄວ ຊາຕຣູເປນ, ນ ເຕນຕ຺ຖໍ ອພນ຺ຘິ ສູຕິ [ອວຑ຺ຒິຕຸນ຺ຕິ (ສີ. ສ຺ຍາ.), ອວຑ຺ຒິ ສູຕິ (?)].

ອວາຣິຍຊາຕກໍ ປຐມໍ.

໓໗໗. ເສຕເກຕຸຊາຕກໍ (໖-໑-໒)

໘. ມາ ຕາຕ ກຸຊ຺ຌິ ນ ຫິ ສາຘຸ ໂກໂຘ, ພຫຸມ຺ປິ ເຕ ອທິຏ຺ຐມສ຺ສຸຕຎ຺ຈ;

ມາຕາ ປິຕາ ທິສຕາ [ທິສາ ຕາຕ (ສ຺ຍາ.), ທິສາ ຕາ (ປີ.)] ເສຕເກຕຸ, ອາຈຣິຍມາຫຸ ທິສຕໍ ປສຕ຺ຖາ.

໙. ອຄາຣິໂນ ອນ຺ນທປານວຕ຺ຖທາ [ອນ຺ນປານວຕ຺ຖທາ (ສ຺ຍາ. ກ.)], ອວ຺ຫາຍິກາ ຕມ຺ປິ ທິສໍ ວທນ຺ຕິ;

ເອສາ ທິສາ ປຣມາ ເສຕເກຕຸ, ຍໍ ປຕ຺ວາ ທຸກ຺ຂີ ສຸຂິໂນ ຠວນ຺ຕິ.

໑໐. ຂຣາຊິນາ ຊຏິລາ ປງ຺ກທນ຺ຕາ, ທຸມ຺ມກ຺ຂຣູປາ [ທຸມຸກ຺ຂຣູປາ (ສີ. ສ຺ຍາ.), ທຸມ຺ມຸກ຺ຂຣູປາ (ປີ. ກ.)] ເຍເມ ຊປ຺ປນ຺ຕິ ມນ຺ເຕ;

ກຈ຺ຈິ ນຸ ເຕ ມານຸສເກ ປໂຍເຄ, ອິທໍ ວິທູ ປຣິມຸຕ຺ຕາ ອປາຍາ.

໑໑. ປາປານິ ກມ຺ມານິ ກຕ຺ວານ ຣາຊ, ພຫຸສ຺ສຸໂຕ ເຈ ນ [ພຫຸສ຺ສຸໂຕ ເນວ (ສີ. ສ຺ຍາ.)] ຈເຣຍ຺ຍ ຘມ຺ມໍ;

ສຫສ຺ສເວໂທປິ ນ ຕໍ ປຏິຈ຺ຈ, ທຸກ຺ຂາ ປມຸຎ຺ເຈ ຈຣຓໍ ອປຕ຺ວາ.

໑໒. ສຫສ຺ສເວໂທປິ ນ ຕໍ ປຏິຈ຺ຈ, ທຸກ຺ຂາ ປມຸຎ຺ເຈ ຈຣຓໍ ອປຕ຺ວາ;

ມຎ຺ຎາມິ ເວທາ ອຜລາ ຠວນ຺ຕິ, ສສໍຍມໍ ຈຣຓເມວ [ຈຣຓຎ຺ເຎວ (ສີ. ສ຺ຍາ. ປີ.)] ສຈ຺ຈໍ.

໑໓. ນ ເຫວ ເວທາ ອຜລາ ຠວນ຺ຕິ, ສສໍຍມໍ ຈຣຓເມວ ສຈ຺ຈໍ;

ກິຕ຺ຕິຎ຺ຫິ ປປ຺ໂປຕິ ອຘິຈ຺ຈ ເວເທ, ສນ຺ຕິໍ ປຸເຓຕິ [ສນ຺ຕໍ ປຸເນ’ຕິ (ສີ. ປີ.)] ຈຣເຓນ ທນ຺ໂຕຕິ.

ເສຕເກຕຸຊາຕກໍ ທຸຕິຍໍ.

໓໗໘. ທຣີມຸຂຊາຕກໍ (໖-໑-໓)

໑໔. ປງ຺ໂກ ຈ ກາມາ ປລິໂປ ຈ ກາມາ, ຠຍຎ຺ຈ ເມຕໍ ຕິມູລໍ ປວຸຕ຺ຕໍ;

ຣໂຊ ຈ ຘູໂມ ຈ ມຍາ ປກາສິຕາ, ຫິຕ຺ວາ ຕຸວໍ ປພ຺ພຊ ພ຺ຣຫ຺ມທຕ຺ຕ.

໑໕. ຄຘິໂຕ [ຄຖິໂຕ (ສີ.)] ຈ ຣຕ຺ໂຕ ຈ ອຘິມຸຈ຺ຉິໂຕ ຈ, ກາເມສ຺ວຫໍ ພ຺ຣາຫ຺ມຓ ຠິໍສຣູປໍ;

ຕໍ ນຸສ຺ສເຫ ຊີວິກຕ຺ໂຖ ປຫາຕຸໍ, ກາຫາມິ ປຸຎ຺ຎານິ ອນປ຺ປການິ.

໑໖. ໂຍ ອຕ຺ຖກາມສ຺ສ ຫິຕານຸກມ຺ປິໂນ, ໂອວຊ຺ຊມາໂນ ນ ກໂຣຕິ ສາສນໍ;

ອິທເມວ ເສຍ຺ໂຍ ອິຕິ ມຎ຺ຎມາໂນ, ປຸນປ຺ປຸນໍ ຄພ຺ຠມຸເປຕິ ມນ຺ໂທ.

໑໗. ໂສ ໂຆຣຣູປໍ ນິຣຍໍ ອຸເປຕິ, ສຸຠາສຸຠໍ ມຸຕ຺ຕກຣີສປູຣໍ;

ສຕ຺ຕາ ສກາເຍ ນ ຊຫນ຺ຕິ ຄິທ຺ຘາ, ເຍ ໂຫນ຺ຕິ ກາເມສຸ ອວີຕຣາຄາ.

໑໘. ມີຬ຺ເຫນ ລິຕ຺ຕາ ຣຸຫິເຣນ ມກ຺ຂິຕາ, ເສມ຺ເຫນ ລິຕ຺ຕາ ອຸປນິກ຺ຂມນ຺ຕິ;

ຍໍ ຍຎ຺ຫິ ກາເຍນ ຜຸສນ຺ຕິ ຕາວເທ, ສພ຺ພໍ ອສາຕໍ ທຸຂເມວ ເກວລໍ.

໑໙. ທິສ຺ວາ ວທາມິ ນ ຫິ ອຎ຺ຎໂຕ ສວໍ, ປຸພ຺ເພນິວາສໍ ພຫຸກໍ ສຣາມິ;

ຈິຕ຺ຣາຫິ ຄາຖາຫິ ສຸຠາສິຕາຫິ, ທຣີມຸໂຂ ນິຊ຺ຌາປຍິ ສຸເມຘນ຺ຕິ.

ທຣີມຸຂຊາຕກໍ ຕຕິຍໍ.

໓໗໙. ເນຣຸຊາຕກໍ (໖-໑-໔)

໒໐. ກາໂກລາ ກາກສງ຺ຆາ ຈ, ມຍຎ຺ຈ ປຕຕໍ ວຣາ [ວຣ (ກ.) ມຍນ຺ຕິປທສ຺ສ ຫິ ວິເສສນໍ];

ສພ຺ເພວ ສທິສາ ໂຫມ, ອິມໍ ອາຄມ຺ມ ປພ຺ພຕໍ.

໒໑. ອິຘ ສີຫາ ຈ ພ຺ຍຄ຺ຆາ ຈ, ສິງ຺ຄາລາ ຈ ມິຄາຘມາ;

ສພ຺ເພວ ສທິສາ ໂຫນ຺ຕິ, ອຍໍ ໂກ ນາມ ປພ຺ພໂຕ.

໒໒. ອິມໍ ເນຣູຕິ [ເນຣຸນ຺ຕິ (ສີ. ສ຺ຍາ.)] ຊານນ຺ຕິ, ມນຸສ຺ສາ ປພ຺ພຕຸຕ຺ຕມໍ;

ອິຘ ວຓ຺ເຓນ ສມ຺ປນ຺ນາ, ວສນ຺ຕິ ສພ຺ພປາຓິໂນ.

໒໓. ອມານນາ ຍຕ຺ຖ ສິຍາ, ສນ຺ຕານໍ ວາ ວິມານນາ;

ຫີນສມ຺ມານນາ ວາປິ, ນ ຕຕ຺ຖ ວສຕິໍ ວເສ [ວສຕີ ວເສ (ສ຺ຍາ.), ວສ ທິວເສ (ປີ.)].

໒໔. ຍຕ຺ຖາລໂສ ຈ ທກ຺ໂຂ ຈ, ສູໂຣ ຠີຣຸ ຈ ປູຊິຍາ;

ນ ຕຕ຺ຖ ສນ຺ໂຕ ວສນ຺ຕິ, ອວິເສສກເຣ ນເຣ [ນເຄ (ສີ. ສ຺ຍາ. ປີ.)].

໒໕. ນາຍໍ ເນຣຸ ວິຠຊຕິ, ຫີນອຸກ຺ກຏ຺ຐມຊ຺ຌິເມ;

ອວິເສສກໂຣ ເນຣຸ, ຫນ຺ທ ເນຣຸໍ ຊຫາມເສຕິ.

ເນຣຸຊາຕກໍ ຈຕຸຕ຺ຖໍ.

໓໘໐. ອາສງ຺ກຊາຕກໍ (໖-໑-໕)

໒໖. ອາສາວຕີ ນາມ ລຕາ, ຊາຕາ ຈິຕ຺ຕລຕາວເນ;

ຕສ຺ສາ ວສ຺ສສຫສ຺ເສນ, ເອກໍ ນິພ຺ພຕ຺ຕເຕ ຜລໍ.

໒໗. ຕໍ ເທວາ ປຍິຣຸປາສນ຺ຕິ, ຕາວ ທູຣຜລໍ ສຕິໍ;

ອາສີເສວ [ອາສິໍເສວ (ສີ. ສ຺ຍາ. ປີ.)] ຕຸວໍ ຣາຊ, ອາສາ ຜລວຕີ ສຸຂາ.

໒໘. ອາສີສເຕວ [ອາສິໍເສເຖວ (ສີ. ສ຺ຍາ. ປີ.)] ໂສ ປກ຺ຂີ, ອາສີສເຕວ [ອາສິໍເສເຖວ (ສີ. ສ຺ຍາ. ປີ.)] ໂສ ທິໂຊ;

ຕສ຺ສ ຈາສາ [ຕສ຺ເສວາສາ (ສ຺ຍາ.)] ສມິຊ຺ຌຕິ, ຕາວ ທູຣຄຕາ ສຕີ;

ອາສີເສວ ຕຸວໍ ຣາຊ, ອາສາ ຜລວຕີ ສຸຂາ.

໒໙. ສມ຺ເປສິ ໂຂ ມໍ ວາຈາຍ, ນ ຈ ສມ຺ເປສິ [ສໍເສສິ (ກ.)] ກມ຺ມຸນາ;

ມາລາ ເສເຣຍ຺ຍກສ຺ເສວ, ວຓ຺ຓວນ຺ຕາ ອຄນ຺ຘິກາ.

໓໐. ອຜລໍ ມຘຸຣໍ ວາຈໍ, ໂຍ ມິຕ຺ເຕສຸ ປກຸພ຺ພຕິ;

ອທທໍ ອວິສ຺ສຊໍ ໂຠຄໍ, ສນ຺ຘິ ເຕນສ຺ສ ຊີຣຕິ.

໓໑. ຍຎ຺ຫິ ກຍິຣາ ຕຎ຺ຫິ ວເທ, ຍໍ ນ ກຍິຣາ ນ ຕໍ ວເທ;

ອກໂຣນ຺ຕໍ ຠາສມານໍ, ປຣິຊານນ຺ຕິ ປຓ຺ຑິຕາ.

໓໒. ພລຎ຺ຈ ວຕ ເມ ຂີຓໍ, ປາເຖຍ຺ຍຎ຺ຈ ນ ວິຊ຺ຊຕິ;

ສງ຺ເກ ປາຓູປໂຣຘາຍ, ຫນ຺ທ ທານິ ວຊາມຫໍ.

໓໓. ເອຕເທວ ຫິ ເມ ນາມໍ, ຍໍ ນາມສ຺ມິ ຣເຖສຠ;

ອາຄເມຫິ ມຫາຣາຊ, ປິຕຣໍ ອາມນ຺ຕຍາມຫນ຺ຕິ.

ອາສງ຺ກຊາຕກໍ ປຎ຺ຈມໍ.

໓໘໑. ມິຄາໂລປຊາຕກໍ (໖-໑-໖)

໓໔. ນ ເມ ຣຸຈ຺ຈິ ມິຄາໂລປ, ຍສ຺ສ ເຕ ຕາທິສີ ຄຕີ;

ອຕຸຈ຺ຈໍ ຕາຕ ປຕສິ, ອຠູມິໍ ຕາຕ ເສວສິ.

໓໕. ຈຕຸກ຺ກຓ຺ຓໍວ ເກທາຣໍ, ຍທາ ເຕ ປຖວີ ສິຍາ;

ຕໂຕ ຕາຕ ນິວຕ຺ຕສ຺ສຸ, ມາສ຺ສຸ ເອຕ຺ໂຕ ປຣໍ ຄມິ.

໓໖. ສນ຺ຕິ ອຎ຺ເຎປິ ສກຸຓາ, ປຕ຺ຕຍານາ ວິຫງ຺ຄມາ;

ອກ຺ຂິຕ຺ຕາ ວາຕເວເຄນ, ນຏ຺ຐາ ເຕ ສສ຺ສຕີສມາ.

໓໗. ອກຕ຺ວາ ອປນນ຺ທສ຺ສ [ອປຣຓ຺ຓສ຺ສ (ສີ. ສ຺ຍາ. ປີ.)], ປິຕຸ ວຸທ຺ຘສ຺ສ ສາສນໍ;

ກາລວາເຕ ອຕິກ຺ກມ຺ມ, ເວຣມ຺ຠານໍ ວສໍ ອຄາ [ຄໂຕ (ສີ.)].

໓໘. ຕສ຺ສ ປຸຕ຺ຕາ ຈ ທາຣາ ຈ, ເຍ ຈຎ຺ເຎ ອນຸຊີວິໂນ;

ສພ຺ເພ ພ຺ຍສນມາປາທຸໍ, ອໂນວາທກເຣ ທິເຊ.

໓໙. ເອວມ຺ປິ ອິຘ ວຸທ຺ຘານໍ, ໂຍ ວາກ຺ຍໍ ນາວພຸຊ຺ຌຕິ;

ອຕິສີມຈໂຣ [ອຕິສີມໍ ຈໂຣ (ສີ. ສ຺ຍາ. ກ.)] ທິຕ຺ໂຕ, ຄິຊ຺ໂຌວາຕີຕສາສໂນ;

ສພ຺ເພ ພ຺ຍສນໍ ປປ຺ໂປນ຺ຕິ, ອກຕ຺ວາ ພຸທ຺ຘສາສນນ຺ຕິ.

ມິຄາໂລປຊາຕກໍ ຉຏ຺ຐໍ.

໓໘໒. ສິຣິກາຬກຓ຺ຓິຊາຕກໍ (໖-໑-໗)

໔໐. ກາ ນຸ ກາເຬນ ວຓ຺ເຓນ, ນ ຈາປິ [ນ ຈາສິ (ສີ.)] ປິຍທສ຺ສນາ;

ກາ ວາ ຕ຺ວໍ ກສ຺ສ ວາ ຘີຕາ, ກຖໍ ຊາເນມຸ ຕໍ ມຍໍ.

໔໑. ມຫາຣາຊສ຺ສຫໍ ຘີຕາ, ວິຣູປກ຺ຂສ຺ສ ຈຓ຺ຑິຍາ;

ອຫໍ ກາຬີ ອລກ຺ຂິກາ, ກາຬກຓ຺ຓີຕິ ມໍ ວິທູ;

ໂອກາສໍ ຍາຈິໂຕ ເທຫິ, ວເສມຸ ຕວ ສນ຺ຕິເກ.

໔໒. ກິໍສີເລ ກິໍສມາຈາເຣ, ປຸຣິເສ ນິວິສເສ ຕຸວໍ;

ປຸຏ຺ຐາ ເມ ກາຬິ ອກ຺ຂາຫິ, ກຖໍ [ຍຖາ (ສີ. ປີ.)] ຊາເນມຸ ຕໍ ມຍໍ.

໔໓. ມກ຺ຂີ ປຬາສີ ສາຣມ຺ຠີ, ອິສ຺ສຸກີ ມຈ຺ຉຣີ ສໂຐ;

ໂສ ມຍ຺ຫໍ ປຸຣິໂສ ກນ຺ໂຕ, ລທ຺ຘໍ ຍສ຺ສ ວິນສ຺ສຕິ.

໔໔. ໂກຘໂນ ອຸປນາຫີ ຈ, ປິສຸໂຓ ຈ ວິເຠທໂກ;

ກຓ຺ຑກວາໂຈ [ອຓ຺ຑກວາໂຈ (ກ. ສີ. ປີ.)] ຜຣຸໂສ, ໂສ ເມ ກນ຺ຕຕໂຣ ຕໂຕ.

໔໕. ອຊ຺ຊ ສຸເວຕິ ປຸຣິໂສ, ສທຕ຺ຖໍ ນາວພຸຊ຺ຌຕິ;

ໂອວຊ຺ຊມາໂນ ກຸປ຺ປຕິ, ເສຍ຺ຍໍ ໂສ ອຕິມຎ຺ຎຕິ.

໔໖. ທວປ຺ປລຸທ຺ໂຘ [ເທວປ຺ປລຸທ຺ໂຘ (ກ.), ທວປ຺ປລທ຺ໂຘ (ປີ.)] ປຸຣິໂສ, ສພ຺ພມິຕ຺ເຕຫິ ຘໍສຕິ;

ໂສ ມຍ຺ຫໍ ປຸຣິໂສ ກນ຺ໂຕ, ຕສ຺ມິໍ ໂຫມິ ອນາມຍາ.

໔໗. ອເປຫິ ເອຕ຺ໂຕ ຕ຺ວໍ ກາຬິ, ເນຕໍ ອມ຺ເຫສຸ ວິຊ຺ຊຕິ;

ອຎ຺ຎໍ ຊນປທໍ ຄຈ຺ຉ, ນິຄເມ ຣາຊຘານິໂຍ.

໔໘. ອຫມ຺ປິ ໂຂ ຕໍ [ເຈຕໍ (ສີ.)] ຊານາມິ, ເນຕໍ ຕຸມ຺ເຫສຸ ວິຊ຺ຊຕິ;

ສນ຺ຕິ ໂລເກ ອລກ຺ຂິກາ, ສງ຺ຆຣນ຺ຕິ ພຫຸໍ ຘນໍ;

ອຫໍ ເທໂວ ຈ ເມ ຠາຕາ, ອຸໂຠ ນໍ ວິຘມາມເສ.

໔໙. ກາ ນຸ ທິພ຺ເພນ ວຓ຺ເຓນ, ປຖພ຺ຍາ ສຸປຕິຏ຺ຐິຕາ;

ກາ ວາ ຕ຺ວໍ ກສ຺ສ ວາ ຘີຕາ, ກຖໍ ຊາເນມຸ ຕໍ ມຍໍ.

໕໐. ມຫາຣາຊສ຺ສຫໍ ຘີຕາ, ຘຕຣຏ຺ຐສ຺ສ ສິຣີມໂຕ [ຘຕຣຏ຺ຐສິຣີມໂຕ (ສ຺ຍາ. ກ.)];

ອຫໍ ສິຣີ ຈ ລກ຺ຂີ ຈ, ຠູຣິປຎ຺ຎາຕິ ມໍ ວິທູ;

ໂອກາສໍ ຍາຈິໂຕ ເທຫິ, ວເສມຸ ຕວ ສນ຺ຕິເກ.

໕໑. ກິໍສີເລ ກິໍສມາຈາເຣ, ປຸຣິເສ ນິວິສເສ ຕຸວໍ;

ປຸຏ຺ຐາ ເມ ລກ຺ຂິ ອກ຺ຂາຫິ, ກຖໍ [ຍຖາ (ສີ. ປີ.)] ຊາເນມຸ ຕໍ ມຍໍ.

໕໒. ໂຍ ຈາປິ ສີເຕ ອຖວາປິ ອຸຓ຺ເຫ, ວາຕາຕເປ ຑໍສສຣີສເປ ຈ;

ຂຸຘໍ [ຂຸທ຺ທໍ (ສ຺ຍາ. ກ.), ຂຸທໍ (ປີ.)] ປິປາສໍ ອຠິຠຸຍ຺ຍ ສພ຺ພໍ, ຣຕ຺ຕິນ຺ຕິວໍ ໂຍ ສຕຕໍ ນິຍຸຕ຺ໂຕ;

ກາລາຄຕຎ຺ຈ ນ ຫາເປຕິ ອຕ຺ຖໍ, ໂສ ເມ ມນາໂປ ນິວິເສ ຈ ຕມ຺ຫິ.

໕໓. ອກ຺ໂກຘໂນ ມິຕ຺ຕວາ ຈາຄວາ ຈ, ສີລູປປນ຺ໂນ ອສໂຐຊຸຠູໂຕ [ອສໂຐ ອຸຊ຺ຊຸຠູໂຕ (ປີ.)];

ສງ຺ຄາຫໂກ ສຂິໂລ ສຓ຺ຫວາໂຈ, ມຫຕ຺ຕປຕ຺ໂຕປິ ນິວາຕວຸຕ຺ຕິ;

ຕສ຺ມິໍຫໍ [ຕສ຺ມາຫໍ (ສີ. ປີ.)] ໂປເສ ວິປຸລາ ຠວາມິ, ອູມິ ສມຸທ຺ທສ຺ສ ຍຖາປິ ວຓ຺ຓໍ.

໕໔. ໂຍ ຈາປິ ມິຕ຺ເຕ ອຖວາ ອມິຕ຺ເຕ, ເສຏ຺ເຐ ສຣິກ຺ເຂ ອຖ ວາປິ ຫີເນ;

ອຕ຺ຖໍ ຈຣນ຺ຕໍ ອຖວາ ອນຕ຺ຖໍ, ອາວີ ຣໂຫ ສງ຺ຄຫເມວ ວຕ຺ເຕ [ວຕ຺ໂຕ (ສ຺ຍາ. ກ.)].

ວາຈໍ ນ ວຊ຺ຊາ ຜຣຸສໍ ກທາຈິ, ມຕສ຺ສ ຊີວສ຺ສ ຈ ຕສ຺ສ ໂຫມິ.

໕໕. ເອເຕສໍ ໂຍ ອຎ຺ຎຕຣໍ ລຠິຕ຺ວາ, ກນ຺ຕາ ສິຣີ [ກນ຺ຕສິຣິໍ (ກຕ຺ຖຈິ), ກນ຺ຕໍ ສິຣິໍ (ສ຺ຍາ.) ອຏ຺ຐກຖາຍໍ ທຸຕິຍຕຕິຍປາຐນ຺ຕຣານິ] ມຊ຺ຊຕິ ອປ຺ປປຎ຺ໂຎ;

ຕໍ ທິຕ຺ຕຣູປໍ ວິສມໍ ຈຣນ຺ຕໍ, ກຣີສຐານໍວ [ກຣີສຊາຕໍ ວ (ສີ. ສ຺ຍາ.)] ວິວຊ຺ຊຍາມິ.

໕໖. ອຕ຺ຕນາ ກຸຣຸເຕ ລກ຺ຂິໍ, ອລກ຺ຂິໍ ກຸຣຸຕຕ຺ຕນາ;

ນ ຫິ ລກ຺ຂິໍ ອລກ຺ຂິໍ ວາ, ອຎ຺ໂຎ ອຎ຺ຎສ຺ສ ກາຣໂກຕິ.

ສິຣິກາຬກຓ຺ຓິຊາຕກໍ ສຕ຺ຕມໍ.

໓໘໓. ກຸກ຺ກຸຏຊາຕກໍ (໖-໑-໘)

໕໗. ສຸຈິຕ຺ຕປຕ຺ຕຉທນ, ຕມ຺ພຈູຬ ວິຫງ຺ຄມ;

ໂອໂຣຫ ທຸມສາຂາຍ, ມຸຘາ ຠຣິຍາ ຠວາມິ ເຕ.

໕໘. ຈຕຸປ຺ປທີ ຕ຺ວໍ ກລ຺ຍາຓິ, ທ຺ວິປທາຫໍ ມໂນຣເມ;

ມິຄີ ປກ຺ຂີ ອສຎ຺ຎຸຕ຺ຕາ, ອຎ຺ຎໍ ປຣິເຍສ ສາມິກໍ.

໕໙. ໂກມາຣິກາ ເຕ ເຫສ຺ສາມິ, ມຎ຺ຊຸກາ ປິຍຠາຓິນີ;

ວິນ຺ທ ມໍ ອຣິເຍນ ເວເທນ, ສາວຍ ມໍ ຍທິຈ຺ຉສິ.

໖໐. ກຸຓປາທິນິ ໂລຫິຕເປ, ໂຈຣິ ກຸກ຺ກຸຏໂປຖິນິ;

ນ ຕ຺ວໍ ອຣິເຍນ ເວເທນ, ມມໍ ຠຕ຺ຕາຣມິຈ຺ຉສິ.

໖໑. ເອວມ຺ປິ ຈຕຸຣາ [ຈາຕຸຣາ (ສ຺ຍາ. ກ.)] ນາຣີ, ທິສ຺ວານ ສຘນໍ [ປວຣໍ (ສີ. ສ຺ຍາ. ປີ.)] ນຣໍ;

ເນນ຺ຕິ ສຓ຺ຫາຫິ ວາຈາຫິ, ພິຬາຣີ ວິຍ ກຸກ຺ກຸຏໍ.

໖໒. ໂຍ ຈ ອຸປ຺ປຕິຕໍ ອຕ຺ຖໍ, ນ ຂິປ຺ປມນຸພຸຊ຺ຌຕິ;

ອມິຕ຺ຕວສມນ຺ເວຕິ, ປຈ຺ຉາ ຈ ອນຸຕປ຺ປຕິ.