໓. ອຑ຺ຒວຄ຺ໂຄ

໓໗໑. ທີຆີຕິໂກສລຊາຕກໍ (໕-໓-໑)

໑໑໐. ເອວໍຠູຕສ຺ສ ເຕ ຣາຊ, ອາຄຕສ຺ສ ວເສ [ວໂສ (ປີ. ກ.)] ມມ;

ອຕ຺ຖິ ນຸ ໂກຈິ ປຣິຍາໂຍ, ໂຍ ຕໍ ທຸກ຺ຂາ ປໂມຈເຍ.

໑໑໑. ເອວໍຠູຕສ຺ສ ເມ ຕາຕ, ອາຄຕສ຺ສ ວເສ ຕວ;

ນຕ຺ຖິ ໂນ ໂກຈິ ປຣິຍາໂຍ, ໂຍ ມໍ ທຸກ຺ຂາ ປໂມຈເຍ.

໑໑໒. ນາຎ຺ຎໍ ສຸຈຣິຕໍ ຣາຊ, ນາຎ຺ຎໍ ຣາຊ ສຸຠາສິຕໍ;

ຕາຍເຕ ມຣຓກາເລ, ເອວເມວິຕຣໍ ຘນໍ.

໑໑໓. ອກ຺ໂກຈ຺ຉິ ມໍ ອວຘິ ມໍ, ອຊິນິ ມໍ ອຫາສິ ເມ;

ເຍ ຈ ຕໍ ອຸປນຍ຺ຫນ຺ຕິ, ເວຣໍ ເຕສໍ ນ ສມ຺ມຕິ.

໑໑໔. ອກ຺ໂກຈ຺ຉິ ມໍ ອວຘິ ມໍ, ອຊິນິ ມໍ ອຫາສິ ເມ;

ເຍ ຈ ຕໍ ນຸປນຍ຺ຫນ຺ຕິ, ເວຣໍ ເຕສູປສມ຺ມຕິ.

໑໑໕. ນ ຫິ ເວເຣນ ເວຣານິ, ສມ຺ມນ຺ຕີຘ ກຸທາຈນໍ;

ອເວເຣນ ຈ ສມ຺ມນ຺ຕິ, ເອສ ຘມ຺ໂມ ສນນ຺ຕໂນຕິ.

ທີຆີຕິໂກສລຊາຕກໍ ປຐມໍ.

໓໗໒. ມິຄໂປຕກຊາຕກໍ (໕-໓-໒)

໑໑໖. ອຄາຣາ ປຈ຺ຈຸເປຕສ຺ສ, ອນຄາຣສ຺ສ ເຕ ສໂຕ;

ສມຓສ຺ສ ນ ຕໍ ສາຘຸ, ຍໍ ເປຕມນຸໂສຈສິ.

໑໑໗. ສໍວາເສນ ຫເວ ສກ຺ກ, ມນຸສ຺ສສ຺ສ ມິຄສ຺ສ ວາ;

ຫທເຍ ຊາຍເຕ ເປມໍ, ນ ຕໍ ສກ຺ກາ ອໂສຈິຕຸໍ.

໑໑໘. ມຕໍ ມຣິສ຺ສໍ ໂຣທນ຺ຕິ, ເຍ ຣຸທນ຺ຕິ ລປນ຺ຕິ ຈ;

ຕສ຺ມາ ຕ຺ວໍ ອິສິ ມາ ໂຣທິ, ໂຣທິຕໍ ໂມຆມາຫຸ ສນ຺ໂຕ.

໑໑໙. ໂຣທິເຕນ ຫເວ ພ຺ຣຫ຺ເມ, ມໂຕ ເປໂຕ ສມຸຏ຺ຐເຫ;

ສພ຺ເພ ສງ຺ຄມ຺ມ ໂຣທາມ, ອຎ຺ຎມຎ຺ຎສ຺ສ ຎາຕເກ.

໑໒໐. ອາທິຕ຺ຕໍ ວຕ ມໍ ສນ຺ຕໍ, ຆຕສິຕ຺ຕໍວ ປາວກໍ;

ວາຣິນາ ວິຍ ໂອສິຎ຺ຈໍ, ສພ຺ພໍ ນິພ຺ພາປເຍ ທຣໍ.

໑໒໑. ອພ຺ພຫິ ວຕ ເມ ສລ຺ລໍ, ຍມາສິ ຫທຍສ຺ສິຕໍ;

ໂຍ ເມ ໂສກປເຣຕສ຺ສ, ປຸຕ຺ຕໂສກໍ ອປານຸທິ.

໑໒໒. ໂສຫໍ ອພ຺ພູຬ຺ຫສລ຺ໂລສ຺ມິ, ວີຕໂສໂກ ອນາວິໂລ;

ນ ໂສຈາມິ ນ ໂຣທາມິ, ຕວ ສຸຕ຺ວານ ວາສວາຕິ.

ມິຄໂປຕກຊາຕກໍ ທຸຕິຍໍ.

໓໗໓. ມູສິກຊາຕກໍ (໕-໓-໓)

໑໒໓. ກຸຫິໍ ຄຕາ ກຕ຺ຖ ຄຕາ, ອິຕິ ລາລປ຺ປຕີ ຊໂນ;

ອຫເມເວໂກ ຊານາມິ, ອຸທປາເນ ມູສິກາ ຫຕາ.

໑໒໔. ຍຎ຺ເຈຕໍ [ຍເຖຕໍ (ປີ.), ຍເວຕໍ (ກ.), ຍເມຕໍ (ກຕ຺ຖຈິ)] ອິຕິ ຈີຕິ ຈ, ຄທ຺ຣໂຠວ ນິວຕ຺ຕສິ;

ອຸທປາເນ ມູສິກໍ ຫນ຺ຕ຺ວາ, ຍວໍ ຠກ຺ເຂຕຸມິຈ຺ຉສິ.

໑໒໕. ທຫໂຣ ຈາສິ ທຸມ຺ເມຘ, ປຐມຸປ຺ປຕ຺ຕິໂກ [ປຐມຸປ຺ປຕ຺ຕິໂຕ (ສີ. ປີ.)] ສຸສຸ;

ທີຆຎ຺ເຈຕໍ [ທີຆເມຕໍ (ປີ.)] ສມາສຊ຺ຊ [ສມາປຊ຺ຊ (ສ຺ຍາ. ກ.)], ນ ເຕ ທສ຺ສາມິ ຊີວິຕໍ.

໑໒໖. ນານ຺ຕລິກ຺ຂຠວເນນ, ນາງ຺ຄປຸຕ຺ຕປິເນນ [ນາງ຺ຄປຸຕ຺ຕສິເຣນ (ສີ. ສ຺ຍາ. ປີ.)] ວາ;

ປຸຕ຺ເຕນ ຫິ ປຕ຺ຖຍິໂຕ, ສິໂລເກຫິ ປໂມຈິໂຕ.

໑໒໗. ສພ຺ພໍ ສຸຕມຘີເຍຖ, ຫີນມຸກ຺ກຏ຺ຐມຊ຺ຌິມໍ;

ສພ຺ພສ຺ສ ອຕ຺ຖໍ ຊາເນຍ຺ຍ, ນ ຈ ສພ຺ພໍ ປໂຍຊເຍ;

ໂຫຕິ ຕາທິສໂກ ກາໂລ, ຍຕ຺ຖ ອຕ຺ຖາວຫໍ ສຸຕນ຺ຕິ.

ມູສິກຊາຕກໍ ຕຕິຍໍ.

໓໗໔. ຈູຬຘນຸຄ຺ຄຫຊາຕກໍ (໕-໓-໔)

໑໒໘. ສພ຺ພໍ ຠຓ຺ຑໍ ສມາທາຍ, ປາຣໍ ຕິຓ຺ໂຓສິ ພ຺ຣາຫ຺ມຓ;

ປຈ຺ຈາຄຈ຺ຉ ລຫຸໍ ຂິປ຺ປໍ, ມມ຺ປິ ຕາເຣຫິ ທານິໂຕ [ທານິໂຠ (ສ຺ຍາ.)].

໑໒໙. ອສນ຺ຖຸຕໍ ມໍ ຈິຣສນ຺ຖຸເຕນ, ນິມີນິ ໂຠຕີ ອທ຺ຘຸວໍ ຘຸເວນ;

ມຍາປິ ໂຠຕີ ນິມິເນຍ຺ຍ ອຎ຺ຎໍ, ອິໂຕ ອຫໍ ທູຣຕຣໍ ຄມິສ຺ສໍ.

໑໓໐. ກາຍໍ ເອຬຄລາຄຸມ຺ເພ [ເອຬຄຓຄຸມ຺ເພ (ກ.)], ກໂຣຕິ ອຫຸຫາສິຍໍ;

ນຍີຘ ນຈ຺ຈຄີຕໍ ວາ [ນຍິຘ ນຈ຺ຈໍ ວາ ຄີຕໍ ວາ (ສີ. ສ຺ຍາ. ປີ.)], ຕາຬໍ ວາ ສຸສມາຫິຕໍ;

ອນມ຺ຫິກາເລ [ອນມ຺ຫກາເລ (ປີ.)] ສຸໂສຓິ [ສຸສ຺ໂສຓິ (ສີ. ສ຺ຍາ. ປີ.)], ກິໍ ນຸ ຊຄ຺ຆສິ ໂສຠເນ [ໂສຠເຓ (ປີ. ກ.)].

໑໓໑. ສິງ຺ຄາລ ພາລ ທຸມ຺ເມຘ, ອປ຺ປປຎ຺ໂຎສິ ຊມ຺ພຸກ;

ຊີໂນ ມຈ຺ຉຎ຺ຈ ເປສິຎ຺ຈ, ກປໂຓ ວິຍ ຌາຍສິ.

໑໓໒. ສຸທສ຺ສໍ ວຊ຺ຊມຎ຺ເຎສໍ, ອຕ຺ຕໂນ ປນ ທຸທ຺ທສໍ;

ຊີນາ ປຕິຎ຺ຈ ຊາຣຎ຺ຈ, ມຎ຺ເຎ ຕ຺ວຎ຺ເຎວ [ມມ຺ປິ ຕ຺ວຎ຺ເຎວ (ສີ. ສ຺ຍາ.), ຕ຺ວມ຺ປິ ມຎ຺ເຎວ (ປີ.)] ຌາຍສິ.

໑໓໓. ເອວເມຕໍ ມິຄຣາຊ, ຍຖາ ຠາສສິ ຊມ຺ພຸກ;

ສາ ນູນາຫໍ ອິໂຕ ຄນ຺ຕ຺ວາ, ຠຕ຺ຕຸ ເຫສ຺ສໍ ວສານຸຄາ.

໑໓໔. ໂຍ ຫເຣ ມຕ຺ຕິກໍ ຖາລໍ, ກໍສຖາລມ຺ປິ ໂສ ຫເຣ;

ກຕຎ຺ເຈວ [ກຕໍເຍວ (ສີ. ສ຺ຍາ. ປີ.)] ຕຍາ ປາປໍ, ປຸນເປວໍ ກຣິສ຺ສສີຕິ.

ຈູຬຘນຸຄ຺ຄຫຊາຕກໍ ຈຕຸຕ຺ຖໍ.

໓໗໕. ກໂປຕຊາຕກໍ (໕-໓-໕)

໑໓໕. ອິທານິ ໂຂມ຺ຫິ ສຸຂິໂຕ ອໂຣໂຄ, ນິກ຺ກຓ຺ຏໂກ ນິປ຺ປຕິໂຕ ກໂປໂຕ;

ກາຫາມິ ທານີ ຫທຍສ຺ສ ຕຸຏ຺ຐິໍ, ຕຖາຫິມໍ ມໍສສາກໍ ພເລຕິ.

໑໓໖. ກາຍໍ ພລາກາ ສິຂິໂນ, ໂຈຣີ ລງ຺ຆິປິຕາມຫາ;

ໂອຣໍ ພລາເກ ອາຄຈ຺ຉ, ຈຓ຺ໂຑ ເມ ວາຍໂສ ສຂາ.

໑໓໗. ອລຎ຺ຫິ ເຕ ຊຄ຺ຆິຕາເຍ, ມມໍ ທິສ຺ວານ ເອທິສໍ;

ວິລູນໍ ສູທປຸຕ຺ເຕນ, ປິຏ຺ຐມຓ຺ເຑນ [ປິຏ຺ຐມທ຺ເທນ (ສີ. ສ຺ຍາ. ປີ.)] ມກ຺ຂິຕໍ.

໑໓໘. ສຸນ຺ຫາໂຕ ສຸວິລິຕ຺ໂຕສິ, ອນ຺ນປາເນນ ຕປ຺ປິໂຕ;

ກຓ຺ເຐ ຈ ເຕ ເວຬຸຣິໂຍ, ອຄມາ ນຸ ກຊງ຺ຄລໍ.

໑໓໙. ມາ ເຕ ມິຕ຺ໂຕ ອມິຕ຺ໂຕ ວາ, ອຄມາສິ ກຊງ຺ຄລໍ;

ປິຎ຺ຉານິ ຕຕ຺ຖ ລາຍິຕ຺ວາ, ກຓ຺ເຐ ພນ຺ຘນ຺ຕິ ວຏ຺ຏນໍ.

໑໔໐. ປຸນປາປຊ຺ຊສີ ສມ຺ມ, ສີລຎ຺ຫິ ຕວ ຕາທິສໍ;

ນ ຫິ ມານຸສກາ ໂຠຄາ, ສຸຠຸຎ຺ຊາ ໂຫນ຺ຕິ ປກ຺ຂິນາຕິ.

ກໂປຕຊາຕກໍ ປຎ຺ຈມໍ.

ອຑ຺ຒວຄ຺ໂຄ ຕຕິໂຍ.

ຕສ຺ສຸທ຺ທານໍ –

ອຖ ວຓ຺ຓ ສສີລ ຫິຣິ ລຠເຕ, ສຸມຸຂາ ວິສ ສາຬິຍມິຕ຺ຕວໂຣ;

ອຖ ຈກ຺ກ ປລາສ ສຣາຊ ສໂຕ, ຍວ ພາລ ກໂປຕກ ປນ຺ນຣສາຕິ.

ອຖ ວຄ຺ຄຸທ຺ທານໍ –

ຊີນຎ຺ຈ ວຓ຺ຓໍ ອສມໍວຄຸປ຺ປຣິ, ສຸເທສິຕາ ຊາຕກນ຺ຕິ ສນ຺ຕິ ວີສຕິ [ຊາຕກ ປຎ຺ຈວີສຕິ (?)];

ມເຫສິໂນ ພ຺ຣຫ຺ມຈຣິຕ຺ຕມຸຕ຺ຕ-ມໂວຈ ຄາຖາ ອຕ຺ຖວຕີ ສຸພ຺ຍຎ຺ຊນາຕິ.

ປຎ຺ຈກນິປາຕໍ ນິຏ຺ຐິຕໍ.