໕. ຈູຬກຸຓາລວຄ຺ໂຄ

໓໔໑. ກຓ຺ຑຣີຊາຕກໍ (໔-໕-໑)

໑໖໑. ນຣານມາຣາມກຣາສຸ ນາຣິສຸ, ອເນກຈິຕ຺ຕາສຸ ອນິຄ຺ຄຫາສຸ ຈ;

ສພ຺ພຕ຺ຖ ນາປີຕິກຣາປິ [ສພ຺ພ’ຕ຺ຕນາ’ປີຕິກຣາປິ (ສີ. ສ຺ຍາ.)] ເຈ ສິຍາ [ສິຍຸໍ (ສ຺ຍາ.)], ນ ວິສ຺ສເສ ຕິຕ຺ຖສມາ ຫິ ນາຣິໂຍ.

໑໖໒. ຍໍ ເວ [ຍຎ຺ຈ (ສ຺ຍາ. ກ.)] ທິສ຺ວາ ກຓ຺ຑຣີກິນ຺ນຣານໍ [ກິນ຺ນຣກິນ຺ນຣີນໍ (ສ຺ຍາ.), ກິນ຺ນຣີກິນ຺ນຣານໍ (ກ.)], ສພ຺ພິຕ຺ຖິໂຍ ນ ຣມນ຺ຕິ ອຄາເຣ;

ຕໍ ຕາທິສໍ ມຈ຺ຈໍ ຈຊິຕ຺ວາ ຠຣິຍາ, ອຎ຺ຎໍ ທິສ຺ວາ ປຸຣິສໍ ປີຐສປ຺ປິໍ.

໑໖໓. ພກສ຺ສ ຈ ພາວຣິກສ຺ສ [ປາວາຣິກສ຺ສ (ສີ.)] ຣຎ຺ໂຎ, ອຈ຺ຈນ຺ຕກາມານຸຄຕສ຺ສ ຠຣິຍາ;

ອວາຈຣີ [ອຈ຺ຈາຈຣິ (ສ຺ຍາ.), ອນາຈຣິ (ກ.)] ປຏ຺ຐວສານຸຄສ຺ສ [ພທ຺ຘວສານຸຄສ຺ສ (ສີ. ສ຺ຍາ.), ປຕ຺ຕວສານຸຄຕສ຺ສ (ກ.)], ກໍ ວາປິ ອິຕ຺ຖີ ນາຕິຈເຣ ຕທຎ຺ຎໍ.

໑໖໔. ປິງ຺ຄິຍານີ ສພ຺ພໂລກິສ຺ສຣສ຺ສ, ຣຎ຺ໂຎ ປິຍາ ພ຺ຣຫ຺ມທຕ຺ຕສ຺ສ ຠຣິຍາ;

ອວາຈຣີ ປຏ຺ຐວສານຸຄສ຺ສ, ຕໍ ວາປິ ສາ ນາຊ຺ຌຄາ ກາມກາມິນີຕິ.

ກຓ຺ຑຣີຊາຕກໍ [ກິນ຺ນຣີຊາຕກໍ (ກ. ສີ. ກ.), ກຸຓ຺ຑລິກຊາຕກໍ (ສ຺ຍາ.)] ປຐມໍ.

໓໔໒. ວານຣຊາຕກໍ (໔-໕-໒)

໑໖໕. ອສກ຺ຂິໍ ວຕ ອຕ຺ຕານໍ, ອຸທ຺ຘາຕຸໍ ອຸທກາ ຖລໍ;

ນ ທານາຫໍ ປຸນ ຕຸຍ຺ຫໍ, ວສໍ ຄຈ຺ຉາມິ ວາຣິຊ.

໑໖໖. ອລເມເຕຫິ ອມ຺ເພຫິ, ຊມ຺ພູຫິ ປນເສຫິ ຈ;

ຍານິ ປາຣໍ ສມຸທ຺ທສ຺ສ, ວຣໍ ມຍ຺ຫໍ ອຸທຸມ຺ພໂຣ.

໑໖໗. ໂຍ ຈ ອຸປ຺ປຕິຕໍ ອຕ຺ຖໍ, ນ ຂິປ຺ປມນຸພຸຊ຺ຌຕິ;

ອມິຕ຺ຕວສມນ຺ເວຕິ, ປຈ຺ຉາ ຈ ອນຸຕປ຺ປຕິ.

໑໖໘. ໂຍ ຈ ອຸປ຺ປຕິຕໍ ອຕ຺ຖໍ, ຂິປ຺ປເມວ ນິໂພຘຕິ;

ມຸຈ຺ຈເຕ ສຕ຺ຕຸສມ຺ພາຘາ, ນ ຈ ປຈ຺ຉານຸຕປ຺ປຕີຕິ.

ວານຣຊາຕກໍ ທຸຕິຍໍ.

໓໔໓. ກຸນ຺ຕິນີຊາຕກໍ (໔-໕-໓)

໑໖໙. ອວສິມ຺ຫ ຕວາຄາເຣ, ນິຈ຺ຈໍ ສກ຺ກຕປູຊິຕາ;

ຕ຺ວເມວ ທານິມກຣິ, ຫນ຺ທ ຣາຊ ວຊາມຫໍ.

໑໗໐. ໂຍ ເວ ກເຕ ປຏິກເຕ, ກິພ຺ພິເສ ປຏິກິພ຺ພິເສ;

ເອວໍ ຕໍ ສມ຺ມຕີ ເວຣໍ, ວສ ກຸນ຺ຕິນິ ມາຄມາ.

໑໗໑. ນ ກຕສ຺ສ ຈ ກຕ຺ຕາ ຈ, ເມຕ຺ຕິ [ເມຕ຺ຕີ (ປີ.), ມິຕ຺ຕີ (ກ.)] ສນ຺ຘີຍເຕ ປຸນ;

ຫທຍໍ ນານຸຊານາຕິ, ຄຈ຺ຉຎ຺ເຎວ ຣເຖສຠ.

໑໗໒. ກຕສ຺ສ ເຈວ ກຕ຺ຕາ ຈ, ເມຕ຺ຕິ ສນ຺ຘີຍເຕ ປຸນ;

ຘີຣານໍ ໂນ ຈ ພາລານໍ, ວສ ກຸນ຺ຕິນິ ມາຄມາຕິ.

ກຸນ຺ຕິນີຊາຕກໍ ຕຕິຍໍ.

໓໔໔. ອມ຺ພຊາຕກໍ (໔-໕-໔)

໑໗໓. ໂຍ ນີລິຍໍ ມຓ຺ຑຍຕິ, ສຓ຺ຑາເສນ ວິຫຎ຺ຎຕິ;

ຕສ຺ສ ສາ ວສມນ຺ເວຕຸ, ຍາ ເຕ ອມ຺ເພ ອວາຫຣິ.

໑໗໔. ວີສໍ ວາ ປຎ຺ຈວີສໍ [ປຓ຺ຓຸວີສໍ (ກ. ສີ. ປີ.)] ວາ, ອູນຕິໍສໍ ວ ຊາຕິຍາ;

ຕາທິສາ ປຕິ ມາ ລທ຺ຘາ [ປຕິໍ ມາ ລທ຺ຘາ (ປີ.), ປຕິ ມາ’ລຕ຺ຖ (?)], ຍາ ເຕ ອມ຺ເພ ອວາຫຣິ.

໑໗໕. ທີຆໍ ຄຈ຺ຉຕຸ ອທ຺ຘານໍ, ເອກິກາ ອຠິສາຣິກາ;

ສງ຺ເກເຕ ປຕິ ມາ ອທ຺ທ [ມາ ອທ຺ທສ (ສີ. ປີ.)], ຍາ ເຕ ອມ຺ເພ ອວາຫຣິ.

໑໗໖. ອລງ຺ກຕາ ສຸວສນາ, ມາລິນີ ຈນ຺ທນຸສ຺ສທາ;

ເອກິກາ ສຍເນ ເສຕຸ, ຍາ ເຕ ອມ຺ເພ ອວາຫຣີຕິ.

ອມ຺ພຊາຕກໍ [ອມ຺ພໂຈຣຊາຕກໍ (ກ. ສີ. ປີ.)] ຈຕຸຕ຺ຖໍ.

໓໔໕. ຄຊກຸມ຺ຠຊາຕກໍ (໔-໕-໕)

໑໗໗. ວນໍ ຍທຄ຺ຄິ ທຫຕິ, ປາວໂກ ກຓ຺ຫວຕ຺ຕນີ;

ກຖໍ ກໂຣສິ ປຈລກ, ເອວໍ ທນ຺ຘປຣກ຺ກໂມ.

໑໗໘. ພຫູນິ ຣຸກ຺ຂຉິທ຺ທານິ, ປຖພ຺ຍາ ວິວຣານິ ຈ;

ຕານິ ເຈ ນາຠິສມ຺ໂຠມ, ໂຫຕິ ໂນ ກາລປຣິຍາໂຍ.

໑໗໙. ໂຍ ທນ຺ຘກາເລ ຕຣຕິ, ຕຣຓີເຍ ຈ ທນ຺ຘຕິ;

ສຸກ຺ຂປຓ຺ຓໍວ ອກ຺ກມ຺ມ, ອຕ຺ຖໍ ຠຎ຺ຊຕິ ອຕ຺ຕໂນ.

໑໘໐. ໂຍ ທນ຺ຘກາເລ ທນ຺ເຘຕິ, ຕຣຓີເຍ ຈ ຕາຣຍິ;

ສສີວ ຣຕ຺ຕິໍ ວິຠຊໍ, ຕສ຺ສຕ຺ໂຖ ປຣິປູຣຕີຕິ.

ຄຊກຸມ຺ຠຊາຕກໍ ປຎ຺ຈມໍ.

໓໔໖. ເກສວຊາຕກໍ (໔-໕-໖)

໑໘໑. ມນຸສ຺ສິນ຺ທໍ ຊຫິຕ຺ວານ, ສພ຺ພກາມສມິທ຺ຘິນໍ;

ກຖໍ ນຸ ຠຄວາ ເກສີ, ກປ຺ປສ຺ສ ຣມຕິ ອສ຺ສເມ [ຣມຕສ຺ສເມ (ກ.)].

໑໘໒. ສາທູນີ [ສາຘູນິ (ກ. ສີ. ສ຺ຍາ. ກ.)] ຣມຓີຍານິ, ສນ຺ຕິ ວກ຺ຂາ ມໂນຣມາ;

ສຸຠາສິຕານິ ກປ຺ປສ຺ສ, ນາຣທ ຣມຍນ຺ຕິ ມໍ.

໑໘໓. ສາລີນໍ ໂອທນໍ ຠຸຎ຺ເຊ, ສຸຈິໍ ມໍສູປເສຈນໍ;

ກຖໍ ສາມາກນີວາຣໍ, ອໂລຓໍ ຉາທຍນ຺ຕິ ຕໍ.

໑໘໔. ສາທຸໍ ວາ [ອສາທຸໍ (ປີ.)] ຍທິ ວາສາທຸໍ, ອປ຺ປໍ ວາ ຍທິ ວາ ພຫຸໍ;

ວິສ຺ສຕ຺ໂຖ ຍຕ຺ຖ ຠຸຎ຺ເຊຍ຺ຍ, ວິສ຺ສາສປຣມາ ຣສາຕິ.

ເກສວຊາຕກໍ [ເກສີຊາຕກໍ (ກ.)] ຉຏ຺ຐໍ.

໓໔໗. ອຍກູຏຊາຕກໍ (໔-໕-໗)

໑໘໕. ສພ຺ພາຍສໍ ກູຏມຕິປ຺ປມາຓໍ, ປຄ຺ຄຍ຺ຫ ໂຍ [ໂສ (ປີ.)] ຕິຏ຺ຐສິ ອນ຺ຕລິກ຺ເຂ;

ຣກ຺ຂາຍ ເມ [ມໍ (ສີ.)] ຕ຺ວໍ ວິຫິໂຕ ນຸສຊ຺ຊ, ອຸທາຫຸ ເມ ເຈຕຍເສ [ວາຍມເສ (ສີ. ສ຺ຍາ.)] ວຘາຍ.

໑໘໖. ທູໂຕ ອຫໍ ຣາຊິຘ ຣກ຺ຂສານໍ, ວຘາຍ ຕຸຍ຺ຫໍ ປຫິໂຕຫມສ຺ມິ;

ອິນ຺ໂທ ຈ ຕໍ ຣກ຺ຂຕິ ເທວຣາຊາ, ເຕນຸຕ຺ຕມງ຺ຄໍ ນ ເຕ [ນ ຫິ (ກ. ສີ. ປີ.), ເຕ ນ (ກ.)] ຜາລຍາມິ.

໑໘໗. ສເຈ ຈ ມໍ ຣກ຺ຂຕິ ເທວຣາຊາ, ເທວານມິນ຺ໂທ ມຆວາ ສຸຊມ຺ປຕິ;

ກາມໍ ປິສາຈາ ວິນທນ຺ຕຸ ສພ຺ເພ, ນ ສນ຺ຕເສ ຣກ຺ຂສິຍາ ປຊາຍ.

໑໘໘. ກາມໍ ກນ຺ທນ຺ຕຸ [ກນ຺ຕນ຺ຕຸ (ກ.), ກຓ຺ຑນ຺ຕຸ (ສ຺ຍາ.)] ກຸມ຺ຠຓ຺ຑາ, ສພ຺ເພ ປໍສຸປິສາຈກາ;

ນາລໍ ປິສາຈາ ຍຸທ຺ຘາຍ, ມຫຕີ ສາ ວິຠິໍສິກາຕິ [ວິເຠສິກາຕິ (ສ຺ຍາ.), ວິເຫສິກາຕິ (ປີ.)].

ອຍກູຏຊາຕກໍ ສຕ຺ຕມໍ.

໓໔໘. ອຣຎ຺ຎຊາຕກໍ (໔-໕-໘)

໑໘໙. ອຣຎ຺ຎາ ຄາມມາຄມ຺ມ, ກິໍສີລໍ ກິໍວຕໍ ອຫໍ;

ປຸຣິສໍ ຕາຕ ເສເວຍ຺ຍໍ, ຕໍ ເມ ອກ຺ຂາຫິ ປຸຈ຺ຉິໂຕ.

໑໙໐. ໂຍ ຕໍ ວິສ຺ສາສເຍ ຕາຕ, ວິສ຺ສາສຎ຺ຈ ຂເມຍ຺ຍ ເຕ;

ສຸສ຺ສູສີ ຈ ຕິຕິກ຺ຂີ ຈ, ຕໍ ຠເຊຫິ ອິໂຕ [ຕໍ ຠເຊຍ຺ຍາສິໂຕ (ກ.)] ຄໂຕ.

໑໙໑. ຍສ຺ສ ກາເຍນ ວາຈາຍ, ມນສາ ນຕ຺ຖິ ທຸກ຺ກຏໍ;

ອຸຣສີວ ປຕິຏ຺ຐາຍ, ຕໍ ຠເຊຫິ ອິໂຕ ຄໂຕ.

໑໙໒. ຫລິທ຺ທິຣາຄໍ ກປິຈິຕ຺ຕໍ, ປຸຣິສໍ ຣາຄວິຣາຄິນໍ;

ຕາທິສໍ ຕາຕ ມາ ເສວິ, ນິມ຺ມນຸສ຺ສມ຺ປິ ເຈ ສິຍາຕິ.

ອຣຎ຺ຎຊາຕກໍ ອຏ຺ຐມໍ.

໓໔໙. ສນ຺ຘິເຠທຊາຕກໍ (໔-໕-໙)

໑໙໓. ເນວ ອິຕ຺ຖີສຸ ສາມຎ຺ຎໍ, ນາປິ ຠກ຺ເຂສຸ ສາຣຖິ;

ອຖສ຺ສ ສນ຺ຘິເຠທສ຺ສ, ປສ຺ສ ຍາວ ສຸຈິນ຺ຕິຕໍ.

໑໙໔. ອສິ ຕິກ຺ໂຂວ ມໍສມ຺ຫິ, ເປສຸຎ຺ຎໍ ປຣິວຕ຺ຕຕິ;

ຍຕ຺ຖູສຠຎ຺ຈ ສີຫຎ຺ຈ, ຠກ຺ຂຍນ຺ຕິ ມິຄາຘມາ.

໑໙໕. ອິມໍ ໂສ ສຍນໍ ເສຕິ, ຍມິມໍ [ຍຍິມໍ (ສີ. ປີ.), ຍິມໍ (ກ.)] ປສ຺ສສິ ສາຣຖິ;

ໂຍ ວາຈໍ ສນ຺ຘິເຠທສ຺ສ, ປິສຸຓສ຺ສ ນິໂພຘຕິ.

໑໙໖. ເຕ ຊນາ ສຸຂເມຘນ຺ຕິ, ນຣາ ສຄ຺ຄຄຕາຣິວ;

ເຍ ວາຈໍ ສນ຺ຘິເຠທສ຺ສ, ນາວໂພຘນ຺ຕິ ສາຣຖີຕິ.

ສນ຺ຘິເຠທຊາຕກໍ ນວມໍ.

໓໕໐. ເທວຕາປຎ຺ຫຊາຕກໍ (໔-໕-໑໐)

໑໙໗. ຫນ຺ຕິ ຫຕ຺ເຖຫິ ປາເທຫິ, ມຸຂຎ຺ຈ ປຣິສຸມ຺ຠຕິ;

ສ ເວ ຣາຊ ປິໂຍ ໂຫຕິ, ກໍ ເຕນ ຕ຺ວາຠິປສ຺ສສິ [ມຠິປສ຺ສສິ (ສີ.)].

໑໙໘. ອກ຺ໂກສຕິ ຍຖາກາມໍ, ອາຄມຎ຺ຈສ຺ສ ອິຈ຺ຉຕິ;

ສ ເວ ຣາຊ ປິໂຍ ໂຫຕິ, ກໍ ເຕນ ຕ຺ວາຠິປສ຺ສສິ.

໑໙໙. ອພ຺ຠກ຺ຂາຕິ ອຠູເຕນ, ອລິເກນາຠິສາຣເຍ;

ສ ເວ ຣາຊ ປິໂຍ ໂຫຕິ, ກໍ ເຕນ ຕ຺ວາຠິປສ຺ສສິ.

໒໐໐. ຫຣໍ ອນ຺ນຎ຺ຈ ປານຎ຺ຈ, ວຕ຺ຖເສນາສນານິ ຈ;

ອຎ຺ຎທຕ຺ຖຸຫຣາ ສນ຺ຕາ, ເຕ ເວ ຣາຊ ປິຍາ ໂຫນ຺ຕິ;

ກໍ ເຕນ ຕ຺ວາຠິປສ຺ສສີຕິ.

ເທວຕາປຎ຺ຫຊາຕກໍ ທສມໍ.

ຈູຬກຸຓາລວຄ຺ໂຄ ປຎ຺ຈໂມ.

ຕສ຺ສຸທ຺ທານໍ –

ນຣານໍ ອສກ຺ຂິວສິມ຺ຫວໂຣ, ນີລິຍມຄ຺ຄິວຣຎ຺ຈ ປຸນ;

ປຸນ ຣສາຍສກູຏວໂຣ, ຕຖາຣຎ຺ຎ ສາຣຖິ ຫນ຺ຕິ ທສາຕິ.

ອຖ ວຄ຺ຄຸທ຺ທານໍ –

ກາລິງ຺ຄໍ [ວິວຣໍ (ພຫູສຸ)] ປຸຈິມນ຺ທຎ຺ຈ, ກຸຏິທູສກ ໂກກິລາ [ກຸຏິທູສໍ ພຫຸຠາຓກໍ (ພຫູສຸ)];

ຈູຬກຸຓາລວຄ຺ໂຄ ໂສ, ປຎ຺ຈໂມ ສຸປ຺ປກາສິໂຕຕິ.

ຈຕຸກ຺ກນິປາຕໍ ນິຏ຺ຐິຕໍ.