໔. ຈຕຸກ຺ກນິປາໂຕ

໑. ກາລິງ຺ຄວຄ຺ໂຄ

໓໐໑. ຈູຬກາລິງ຺ຄຊາຕກໍ (໔-໑-໑)

໑. ວິວຣຖິມາສໍ [ວິວຣຖ ອິມາສໍ (ສີ. ສ຺ຍາ. ປີ.)] ທ຺ວາຣໍ, ນຄຣໍ ປວິສນ຺ຕຸ [ປວິສິຕຸໍ ມຍາ; (ກ.)] ອຣຸຓຣາຊສ຺ສ;

ສີເຫນ ສຸສິຏ຺ເຐນ, ສຸຣກ຺ຂິຕໍ [ສຸສຕ຺ເຖນ, ສຸຣກ຺ຂິຕໍ (ສີ. ປີ.), ສຸສິຏ຺ເຐນ (ກ.)] ນນ຺ທິເສເນນ.

໒. ຊໂຍ ກລິງ຺ຄານມສຍ຺ຫສາຫິນໍ, ປຣາຊໂຍ ອນໂຍ [ອຊໂຍ (ສ຺ຍາ.), ອນ຺ວິໂຕ (ກ.)] ອສ຺ສການໍ;

ອິຈ຺ເຈວ ເຕ ຠາສິຕໍ ພ຺ຣຫ຺ມຈາຣິ, ນ ອຸຊ຺ຊຸຠູຕາ ວິຕຖໍ ຠຓນ຺ຕິ.

໓. ເທວາ ມຸສາວາທມຸປາຕິວຕ຺ຕາ, ສຈ຺ຈໍ ຘນໍ ປຣມໍ ເຕສຸ [ຕຖໍ ເປມກຣໍ ນຸ (ກ.), ຕຖໍ ປຣມໍ ກຣໍ ນຸ (ສ຺ຍາ.)] ສກ຺ກ;

ຕໍ ເຕ ມຸສາ ຠາສິຕໍ ເທວຣາຊ, ກິໍ ວາ ປຏິຈ຺ຈ ມຆວາ ມຫິນ຺ທ.

໔. ນນຸ ເຕ ສຸຕໍ ພ຺ຣາຫ຺ມຓ ຠຎ຺ຎມາເນ, ເທວາ ນ ອິສ຺ສນ຺ຕິ ປຸຣິສປຣກ຺ກມສ຺ສ;

ທໂມ ສມາຘິ ມນໂສ ອເຠຊ຺ໂຊ [ອເທຊ຺ໂຊ (ສີ. ປີ.), ອຠິຊ຺ໂຊ (ກ.)], ອພ຺ຍຄ຺ຄຕາ ນິກ຺ກມນຎ຺ຈ [ນິກ຺ຂມນຎ຺ຈ (ສີ.)] ກາເລ;

ທຬ຺ຫຎ຺ຈ ວິຣິຍໍ ປຸຣິສປຣກ຺ກໂມ ຈ, ເຕເນວ ອາສິ ວິຊໂຍ ອສ຺ສການນ຺ຕິ.

ຈູຬກາລິງ຺ຄຊາຕກໍ ປຐມໍ.

໓໐໒. ມຫາອສ຺ສາໂຣຫຊາຕກໍ (໔-໑-໒)

໕. ອເທຍ຺ເຍສຸ ທທໍ ທານໍ, ເທຍ຺ເຍສຸ ນປ຺ປເວຈ຺ຉຕິ;

ອາປາສຸ ພ຺ຍສນໍ ປຕ຺ໂຕ, ສຫາຍໍ ນາຘິຄຈ຺ຉຕິ.

໖. ນາເທຍ຺ເຍສຸ ທທໍ ທານໍ, ເທຍ຺ເຍສຸ ໂຍ ປເວຈ຺ຉຕິ;

ອາປາສຸ ພ຺ຍສນໍ ປຕ຺ໂຕ, ສຫາຍມຘິຄຈ຺ຉຕິ.

໗. ສຎ຺ໂຎຄສມ຺ໂຠຄວິເສສທສ຺ສນໍ, ອນຣິຍຘມ຺ເມສຸ ສເຐສຸ ນສ຺ສຕິ;

ກຕຎ຺ຈ ອຣິເຍສຸ ຈ ອຊ຺ຊເວສຸ, ມຫປ຺ຜລໍ ໂຫຕິ ອຓຸມ຺ປິ ຕາທິສຸ.

໘. ໂຍ ປຸພ຺ເພ ກຕກລ຺ຍາໂຓ, ອກາ ໂລເກ ສຸທຸກ຺ກຣໍ;

ປຈ຺ຉາ ກຍິຣາ ນ ວາ ກຍິຣາ, ອຈ຺ຈນ຺ຕໍ ປູຊນາຣໂຫຕິ.

ມຫາອສ຺ສາໂຣຫຊາຕກໍ ທຸຕິຍໍ.

໓໐໓. ເອກຣາຊຊາຕກໍ (໔-໑-໓)

໙. ອນຸຕ຺ຕເຣ ກາມຄຸເຓ ສມິທ຺ເຘ, ຠຸຕ຺ວານ ປຸພ຺ເພ ວສີ ເອກຣາຊ;

ໂສ ທານິ ທຸຄ຺ເຄ ນຣກມ຺ຫິ ຂິຕ຺ໂຕ, ນປ຺ປຊ຺ຊເຫ ວຓ຺ຓພລໍ ປຸຣາຓໍ.

໑໐. ປຸພ຺ເພວ ຂນ຺ຕີ ຈ ຕໂປ ຈ ມຍ຺ຫໍ, ສມ຺ປຕ຺ຖິຕາ ທຸພ຺ຠິເສນ [ທພ຺ພເສນາ (ສີ. ປີ.)] ອໂຫສິ;

ຕໍ ທານິ ລທ຺ຘານ ກຖໍ ນຸ ຣາຊ, ຊເຫ ອຫໍ ວຓ຺ຓພລໍ ປຸຣາຓໍ.

໑໑. ສພ຺ພາ ກິເຣວໍ ປຣິນິຏ຺ຐິຕານິ, ຍສສ຺ສິນໍ ປຎ຺ຎວນ຺ຕໍ ວິສຍ຺ຫ;

ຍໂສ ຈ ລທ຺ຘາ ປຸຣິມໍ ອຸຬາຣໍ, ນປ຺ປຊ຺ຊເຫ ວຓ຺ຓພລໍ ປຸຣາຓໍ.

໑໒. ປນຸຊ຺ຊ ທຸກ຺ເຂນ ສຸຂໍ ຊນິນ຺ທ, ສຸເຂນ ວາ ທຸກ຺ຂມສຍ຺ຫສາຫິ;

ອຸຠຍຕ຺ຖ ສນ຺ໂຕ ອຠິນິພ຺ພຸຕຕ຺ຕາ, ສຸເຂ ຈ ທຸກ຺ເຂ ຈ ຠວນ຺ຕິ ຕຸລ຺ຍາຕິ.

ເອກຣາຊຊາຕກໍ ຕຕິຍໍ.

໓໐໔. ທທ຺ທຣຊາຕກໍ (໔-໑-໔)

໑໓. ອິມານິ ມໍ ທທ຺ທຣ ຕາປຍນ຺ຕິ, ວາຈາທຸຣຸຕ຺ຕານິ ມນຸສ຺ສໂລເກ;

ມຓ຺ຑູກຠກ຺ຂາ ອຸທກນ຺ຕເສວີ, ອາສີວິສໍ ມໍ ອວິສາ ສປນ຺ຕິ.

໑໔. ສກາ ຣຏ຺ຐາ ປພ຺ພາຊິໂຕ, ອຎ຺ຎໍ ຊນປທໍ ຄໂຕ;

ມຫນ຺ຕໍ ໂກຏ຺ຐໍ ກຍິຣາຖ, ທຸຣຸຕ຺ຕານໍ [ທຸຣຸຕ຺ຕານິ (ກ.)] ນິເຘຕເວ.

໑໕. ຍຕ຺ຖ ໂປສໍ ນ ຊານນ຺ຕິ, ຊາຕິຍາ ວິນເຍນ ວາ;

ນ ຕຕ຺ຖ ມານໍ ກຍິຣາຖ, ວສມຎ຺ຎາຕເກ ຊເນ.

໑໖. ວິເທສວາສໍ ວສໂຕ, ຊາຕເວທສເມນປິ [ຊາຕເວທຠເຍນປິ (ກ.)];

ຂມິຕພ຺ພໍ ສປຎ຺ເຎນ, ອປິ ທາສສ຺ສ ຕຊ຺ຊິຕນ຺ຕິ.

ທທ຺ທຣຊາຕກໍ ຈຕຸຕ຺ຖໍ.

໓໐໕. ສີລວີມໍສນຊາຕກໍ (໔-໑-໕)

໑໗. ນຕ຺ຖິ ໂລເກ ຣໂຫ ນາມ, ປາປກມ຺ມໍ ປກຸພ຺ພໂຕ;

ປສ຺ສນ຺ຕິ ວນຠູຕານິ, ຕໍ ພາໂລ ມຎ຺ຎຕີ ຣໂຫ.

໑໘. ອຫໍ ຣໂຫ ນ ປສ຺ສາມິ, ສຸຎ຺ຎໍ ວາປິ ນ ວິຊ຺ຊຕິ;

ຍຕ຺ຖ ອຎ຺ຎໍ [ສຸຎ຺ຎໍ (ສ຺ຍາ. ກ.)] ນ ປສ຺ສາມິ, ອສຸຎ຺ຎໍ ໂຫຕິ ຕໍ ມຍາ.

໑໙. ທຸຊ຺ຊຈ຺ໂຈ ຈ ສຸຊຈ຺ໂຈ [ອຊຈ຺ໂຈ (ປີ.)] ຈ, ນນ຺ໂທ ຈ ສຸຂວຑ຺ຒິໂຕ [ສຸຂວຈ຺ຉໂກ (ສີ.), ສຸຂວຈ຺ຉໂນ (ສ຺ຍາ. ປີ.)];

ເວຊ຺ໂຊ ຈ ອທ຺ຘຸວສີໂລ [ອຖ ສີໂລ (ກ.)] ຈ, ເຕ ຘມ຺ມໍ ຊຫຸ ມຕ຺ຖິກາ.

໒໐. ພ຺ຣາຫ຺ມໂຓ ຈ ກຖໍ ຊເຫ, ສພ຺ພຘມ຺ມານ ປາຣຄູ;

ໂຍ ຘມ຺ມມນຸປາເລຕິ, ຘິຕິມາ ສຈ຺ຈນິກ຺ກໂມຕິ.

ສີລວີມໍສນຊາຕກໍ ປຎ຺ຈມໍ.

໓໐໖. ສຸຊາຕຊາຕກໍ (໔-໑-໖)

໒໑. ກິມຓ຺ຑກາ ອິເມ ເທວ, ນິກ຺ຂິຕ຺ຕາ ກໍສມລ຺ລເກ;

ອຸປໂລຫິຕກາ ວຄ຺ຄູ, ຕໍ [ເຕ (ປີ.)] ເມ ອກ຺ຂາຫິ ປຸຈ຺ຉິໂຕ.

໒໒. ຍານິ ປຸເຣ ຕຸວໍ ເທວິ, ຠຓ຺ຑຸ ນນ຺ຕກວາສິນີ;

ອຸຈ຺ຉງ຺ຄຫຕ຺ຖາ ປຈິນາສິ, ຕສ຺ສາ ເຕ ໂກລິຍໍ ຜລໍ.

໒໓. ອຸຑ຺ຑຍ຺ຫເຕ ນ ຣມຕິ, ໂຠຄາ ວິປ຺ປຊຫນ຺ຕິ ຕໍ [ວິປ຺ປຊຫນ຺ຕິ’ມໍ (?)];

ຕຕ຺ເຖວິມໍ ປຏິເນຖ, ຍຕ຺ຖ ໂກລໍ ປຈິສ຺ສຕິ.

໒໔. ໂຫນ຺ຕິ ເຫເຕ ມຫາຣາຊ, ອິທ຺ຘິປ຺ປຕ຺ຕາຍ [ອິທ຺ຘິມຕ຺ຕາຍ (ກ.)] ນາຣິຍາ;

ຂມ ເທວ ສຸຊາຕາຍ, ມາສ຺ສາ [ມາສຸ (ກ.)] ກຸຊ຺ຌ ຣເຖສຠາຕິ.

ສຸຊາຕຊາຕກໍ ຉຏ຺ຐໍ.

໓໐໗. ປລາສຊາຕກໍ (໔-໑-໗)

໒໕. ອເຈຕນໍ ພ຺ຣາຫ຺ມຓ ອສ຺ສຸຓນ຺ຕໍ, ຊາໂນ ອຊານນ຺ຕມິມໍ ປລາສໍ;

ອາຣທ຺ຘວິຣິໂຍ ຘຸວໍ ອປ຺ປມຕ຺ໂຕ, ສຸຂເສຍ຺ຍໍ ປຸຈ຺ຉສິ ກິສ຺ສ ເຫຕຸ.

໒໖. ທູເຣ ສຸໂຕ ເຈວ ພ຺ຣຫາ ຈ ຣຸກ຺ໂຂ, ເທເສ ຐິໂຕ ຠູຕນິວາສຣູໂປ;

ຕສ຺ມາ ນມສ຺ສາມິ ອິມໍ ປລາສໍ, ເຍ ເຈຕ຺ຖ ຠູຕາ ເຕ [ເຕ ຈ (ສີ. ປີ.)] ຘນສ຺ສ ເຫຕຸ.

໒໗. ໂສ ເຕ ກຣິສ຺ສາມິ ຍຖານຸຠາວໍ, ກຕຎ຺ຎຸຕໍ ພ຺ຣາຫ຺ມຓ ເປກ຺ຂມາໂນ;

ກຖຎ຺ຫິ ອາຄມ຺ມ ສຕໍ ສກາເສ, ໂມຆານິ ເຕ ອສ຺ສຸ ປຣິຜນ຺ທິຕານິ.

໒໘. ໂຍ ຕິນ຺ທຸກຣຸກ຺ຂສ຺ສ ປໂຣ [ປຸໂຣ (ກ.)] ປິລກ຺ໂຂ [ປິລກ຺ຂຸ (ສີ. ປີ.), ມິລກ຺ຂຸ (ກ.)], ປຣິວາຣິໂຕ ປຸພ຺ພຍຎ຺ໂຎ ອຸຬາໂຣ;

ຕສ຺ເສສ ມູລສ຺ມິໍ ນິຘິ ນິຂາໂຕ, ອທາຍາໂທ ຄຈ຺ຉ ຕໍ ອຸທ຺ຘຣາຫີຕິ.

ປລາສຊາຕກໍ ສຕ຺ຕມໍ.

໓໐໘. ສກຸຓຊາຕກໍ (໔-໑-໘)

໒໙. ອກຣມ຺ຫສ ເຕ ກິຈ຺ຈໍ, ຍໍ ພລໍ ອຫຸວມ຺ຫເສ;

ມິຄຣາຊ ນໂມ ຕ຺ຍຕ຺ຖຸ, ອປິ ກິຎ຺ຈິ ລຠາມເສ.

໓໐. ມມ ໂລຫິຕຠກ຺ຂສ຺ສ, ນິຈ຺ຈໍ ລຸທ຺ທານິ ກຸພ຺ພໂຕ;

ທນ຺ຕນ຺ຕຣຄໂຕ ສນ຺ໂຕ, ຕໍ ພຫຸໍ ຍມ຺ປິ ຊີວສິ.

໓໑. ອກຕຎ຺ຎຸມກຕ຺ຕາຣໍ, ກຕສ຺ສ ອປ຺ປຏິກາຣກໍ;

ຍສ຺ມິໍ ກຕຎ຺ຎຸຕາ ນຕ຺ຖິ, ນິຣຕ຺ຖາ ຕສ຺ສ ເສວນາ.

໓໒. ຍສ຺ສ ສມ຺ມຸຂຈິຓ຺ເຓນ, ມິຕ຺ຕຘມ຺ໂມ ນ ລພ຺ຠຕິ;

ອນຸສູຍ [ອນຸສຸຍ຺ຍ (ສີ. ປີ.)] ມນກ຺ໂກສໍ, ສຓິກໍ ຕມ຺ຫາ ອປກ຺ກເມຕິ.

ສກຸຓຊາຕກໍ ອຏ຺ຐມໍ.

໓໐໙. ຉວກຊາຕກໍ (໔-໑-໙)

໓໓. ສພ຺ພມິທໍ ຈຣິມໍ ກຕໍ [ຈຣິມວຕໍ (ສີ. ປີ.)], ອຸໂຠ ຘມ຺ມໍ ນ ປສ຺ສເຣ;

ອຸໂຠ ປກຕິຍາ ຈຸຕາ, ໂຍ ຈາຍໍ ມນ຺ເຕຊ຺ຌາເປຕິ [ມນ຺ຕຊ຺ຌາຍຕິ (ສີ.), ສຊ຺ຌາປຍຕິ (ປີ.)];

ໂຍ ຈ ມນ຺ຕໍ ອຘີຍຕິ.

໓໔. ສາລີນໍ ໂອທນໍ ຠຸຎ຺ເຊ, ສຸຈິໍ ມໍສູປເສຈນໍ;

ຕສ຺ມາ ເອຕໍ ນ ເສວາມິ, ຘມ຺ມໍ ອິສີຫິ ເສວິຕໍ.

໓໕. ປຣິພ຺ພຊ ມຫາ ໂລໂກ [ມຫາພ຺ຣຫ຺ເມ (ກ.)], ປຈນ຺ຕຎ຺ເຎປິ ປາຓິໂນ;

ມາ ຕໍ ອຘມ຺ໂມ ອາຈຣິໂຕ, ອສ຺ມາ ກຸມ຺ຠມິວາຠິທາ.

໓໖. ຘິຣຕ຺ຖຸ ຕໍ ຍສລາຠໍ, ຘນລາຠຎ຺ຈ ພ຺ຣາຫ຺ມຓ;

ຍາ ວຸຕ຺ຕິ ວິນິປາເຕນ, ອຘມ຺ມຈຣເຓນ ວາຕິ.

ຉວກຊາຕກໍ ນວມໍ.

໓໑໐. ເສຍ຺ຍຊາຕກໍ (໔-໑-໑໐)

໓໗. ສສມຸທ຺ທປຣິຍາຍໍ, ມຫິໍ ສາຄຣກຸຓ຺ຑລໍ;

ນ ອິຈ຺ເຉ ສຫ ນິນ຺ທາຍ, ເອວໍ ເສຍ຺ຍ [ສຍ຺ຫ (ສີ. ສ຺ຍາ. ປີ.)] ວິຊານຫິ.

໓໘. ຘິຣຕ຺ຖຸ ຕໍ ຍສລາຠໍ, ຘນລາຠຎ຺ຈ ພ຺ຣາຫ຺ມຓ;

ຍາ ວຸຕ຺ຕິ ວິນິປາເຕນ, ອຘມ຺ມຈຣເຓນ ວາ.

໓໙. ອປິ ເຈ ປຕ຺ຕມາທາຍ, ອນຄາໂຣ ປຣິພ຺ພເຊ;

ສາເຍວ ຊີວິກາ ເສຍ຺ໂຍ, ຍາ ຈາຘມ຺ເມນ ເອສນາ.

໔໐. ອປິ ເຈ ປຕ຺ຕມາທາຍ, ອນຄາໂຣ ປຣິພ຺ພເຊ;

ອຎ຺ຎໍ ອຫິໍສຍໍ ໂລເກ, ອປິ ຣຊ຺ເຊນ ຕໍ ວຣນ຺ຕິ.

ເສຍ຺ຍຊາຕກໍ [ສຍ຺ຫຊາຕກໍ (ສີ. ສ຺ຍາ. ປີ.)] ທສມໍ.

ກາລິງ຺ຄວຄ຺ໂຄ [ວິວຣວຄ຺ໂຄ (ສີ. ປີ.)] ປຐໂມ.

ຕສ຺ສຸທ຺ທານໍ –

ວິວຣຎ຺ຈ ອເທຍ຺ຍ ສມິທ຺ຘວຣໍ, ອຖ ທທ຺ທຣ ປາປມຫາຕິຣໂຫ;

ອຖ ໂກລິ ປລາສວຣຎ຺ຈ ກຣ, ຈຣິມໍ ສສມຸທ຺ທວເຣນ ທສາຕິ.

໒. ປຸຈິມນ຺ທວຄ຺ໂຄ

໓໑໑. ປຸຈິມນ຺ທຊາຕກໍ (໔-໒-໑)

໔໑. ອຸຏ຺ເຐຫິ ໂຈຣ ກິໍ ເສສິ, ໂກ ອຕ຺ໂຖ ສຸປເນນ [ສຸປິເຕນ (ສີ.), ສຸປິເນນ (ປີ. ກ.)] ເຕ;

ມາ ຕໍ ຄເຫສຸໍ [ຄຓ຺ເຫຍ຺ຍຸໍ (ກ.)] ຣາຊາໂນ, ຄາເມ ກິພ຺ພິສກາຣກໍ.

໔໒. ຍໍ ນຸ [ນູນ (ສ຺ຍາ.)] ໂຈຣໍ ຄເຫສ຺ສນ຺ຕິ, ຄາເມ ກິພ຺ພິສກາຣກໍ;

ກິໍ ຕຕ຺ຖ ປຸຈິມນ຺ທສ຺ສ, ວເນ ຊາຕສ຺ສ ຕິຏ຺ຐໂຕ.

໔໓. ນ ຕ຺ວໍ ອສ຺ສຕ຺ຖ ຊານາສິ, ມມ ໂຈຣສ຺ສ ຈນ຺ຕຣໍ;

ໂຈຣໍ ຄເຫຕ຺ວາ ຣາຊາໂນ, ຄາເມ ກິພ຺ພິສກາຣກໍ;

ອປ຺ເປນ຺ຕິ [ອຈ຺ເຈນ຺ຕິ (ສ຺ຍາ.)] ນິມ຺ພສູລສ຺ມິໍ, ຕສ຺ມິໍ ເມ ສງ຺ກເຕ ມໂນ.

໔໔. ສງ຺ເກຍ຺ຍ ສງ຺ກິຕພ຺ພານິ, ຣກ຺ເຂຍ຺ຍານາຄຕໍ ຠຍໍ;

ອນາຄຕຠຍາ ຘີໂຣ, ອຸໂຠ ໂລເກ ອເວກ຺ຂຕີຕິ.

ປຸຈິມນ຺ທຊາຕກໍ ປຐມໍ.

໓໑໒. ກສ຺ສປມນ຺ທິຍຊາຕກໍ (໔-໒-໒)

໔໕. ອປິ ກສ຺ສປ ມນ຺ທິຍາ, ຍຸວາ ສປຕິ ຫນ຺ຕິ [ສມ຺ປຏິຫນ຺ຕິ (ກ.)] ວາ;

ສພ຺ພໍ ຕໍ ຂມເຕ ຘີໂຣ, ປຓ຺ຑິໂຕ ຕໍ ຕິຕິກ຺ຂຕິ.

໔໖. ສເຈປິ ສນ຺ໂຕ ວິວທນ຺ຕິ, ຂິປ຺ປໍ ສນ຺ຘີຍເຣ ປຸນ;

ພາລາ ປຕ຺ຕາວ ຠິຊ຺ຊນ຺ຕິ, ນ ເຕ ສມຖມຊ຺ຌຄູ.

໔໗. ເອເຕ ຠິຍ຺ໂຍ ສມາຍນ຺ຕິ, ສນ຺ຘິ ເຕສໍ ນ ຊີຣຕິ;

ໂຍ ຈາຘິປນ຺ນໍ ຊານາຕິ, ໂຍ ຈ ຊານາຕິ ເທສນໍ.

໔໘. ເອໂສ ຫິ ອຸຕ຺ຕຣິຕໂຣ, ຠາຣວໂຫ ຘຸຣທ຺ຘໂຣ;

ໂຍ ປເຣສາຘິປນ຺ນານໍ, ສຍໍ ສນ຺ຘາຕຸມຣຫຕີຕິ.

ກສ຺ສປມນ຺ທິຍຊາຕກໍ ທຸຕິຍໍ.

໓໑໓. ຂນ຺ຕີວາທີຊາຕກໍ (໔-໒-໓)

໔໙. ໂຍ ເຕ ຫຕ຺ເຖ ຈ ປາເທ ຈ, ກຓ຺ຓນາສຎ຺ຈ ເຉທຍິ;

ຕສ຺ສ ກຸຊ຺ຌ ມຫາວີຣ, ມາ ຣຏ຺ຐໍ ວິນສາ [ວິນສ຺ສ (ກ. ສີ. ສ຺ຍາ. ກ.)] ອິທໍ.

໕໐. ໂຍ ເມ ຫຕ຺ເຖ ຈ ປາເທ ຈ, ກຓ຺ຓນາສຎ຺ຈ ເຉທຍິ;

ຈິຣໍ ຊີວຕຸ ໂສ ຣາຊາ, ນ ຫິ ກຸຊ຺ຌນ຺ຕິ ມາທິສາ.

໕໑. ອຫູ ອຕີຕມທ຺ຘານໍ [ອຫຸ ອຕີຕມທ຺ຘາເນ (ສ຺ຍາ. ປີ. ກ.)], ສມໂຓ ຂນ຺ຕິທີປໂນ;

ຕໍ ຂນ຺ຕິຍາເຍວ ຐິຕໍ, ກາສິຣາຊາ ອເຉທຍິ.

໕໒. ຕສ຺ສ ກມ຺ມ [ກມ຺ມສ຺ສ (ສີ. ປີ.)] ຜຣຸສສ຺ສ, ວິປາໂກ ກຏຸໂກ ອຫຸ;

ຍໍ ກາສິຣາຊາ ເວເທສິ, ນິຣຍມ຺ຫິ ສມປ຺ປິໂຕຕິ.

ຂນ຺ຕີວາທີຊາຕກໍ ຕຕິຍໍ.

໓໑໔. ໂລຫກຸມ຺ຠິຊາຕກໍ (໔-໒-໔)

໕໓. ທຸຊ຺ຊີວິຕມຊີວິມ຺ຫ, ເຍ ສນ຺ເຕ [ເຍສໍ ໂນ (ສ຺ຍາ. ກ.)] ນ ທທມ຺ຫເສ;

ວິຊ຺ຊມາເນສຸ ໂຠເຄສຸ, ທີປໍ ນາກມ຺ຫ ອຕ຺ຕໂນ.

໕໔. ສຏ຺ຐິ [ສຏ຺ຐິໍ (ສ຺ຍາ.)] ວສ຺ສສຫສ຺ສານິ, ປຣິປຸຓ຺ຓານິ ສພ຺ພໂສ;

ນິຣເຍ ປຈ຺ຈມານານໍ, ກທາ ອນ຺ໂຕ ຠວິສ຺ສຕິ.

໕໕. ນຕ຺ຖິ ອນ຺ໂຕ ກຸໂຕ ອນ຺ໂຕ, ນ ອນ຺ໂຕ ປຏິທິສ຺ສຕິ;

ຕທາ ຫິ ປກຕໍ ປາປໍ, ມມ ຕຸຍ຺ຫຎ຺ຈ ມາຣິສາ [ມາຣິສ (ສີ. ສ຺ຍາ. ປີ.)].

໕໖. ໂສຫໍ ນູນ ອິໂຕ ຄນ຺ຕ຺ວາ, ໂຍນິໍ ລທ຺ຘານ ມານຸສິໍ;

ວທຎ຺ຎູ ສີລສມ຺ປນ຺ໂນ, ກາຫາມິ ກຸສລໍ ພຫຸນ຺ຕິ.

ໂລຫກຸມ຺ຠິຊາຕກໍ ຈຕຸຕ຺ຖໍ.