໒. ປຸຈິມນ຺ທວຄ຺ໂຄ

໓໑໑. ປຸຈິມນ຺ທຊາຕກໍ (໔-໒-໑)

໔໑. ອຸຏ຺ເຐຫິ ໂຈຣ ກິໍ ເສສິ, ໂກ ອຕ຺ໂຖ ສຸປເນນ [ສຸປິເຕນ (ສີ.), ສຸປິເນນ (ປີ. ກ.)] ເຕ;

ມາ ຕໍ ຄເຫສຸໍ [ຄຓ຺ເຫຍ຺ຍຸໍ (ກ.)] ຣາຊາໂນ, ຄາເມ ກິພ຺ພິສກາຣກໍ.

໔໒. ຍໍ ນຸ [ນູນ (ສ຺ຍາ.)] ໂຈຣໍ ຄເຫສ຺ສນ຺ຕິ, ຄາເມ ກິພ຺ພິສກາຣກໍ;

ກິໍ ຕຕ຺ຖ ປຸຈິມນ຺ທສ຺ສ, ວເນ ຊາຕສ຺ສ ຕິຏ຺ຐໂຕ.

໔໓. ນ ຕ຺ວໍ ອສ຺ສຕ຺ຖ ຊານາສິ, ມມ ໂຈຣສ຺ສ ຈນ຺ຕຣໍ;

ໂຈຣໍ ຄເຫຕ຺ວາ ຣາຊາໂນ, ຄາເມ ກິພ຺ພິສກາຣກໍ;

ອປ຺ເປນ຺ຕິ [ອຈ຺ເຈນ຺ຕິ (ສ຺ຍາ.)] ນິມ຺ພສູລສ຺ມິໍ, ຕສ຺ມິໍ ເມ ສງ຺ກເຕ ມໂນ.

໔໔. ສງ຺ເກຍ຺ຍ ສງ຺ກິຕພ຺ພານິ, ຣກ຺ເຂຍ຺ຍານາຄຕໍ ຠຍໍ;

ອນາຄຕຠຍາ ຘີໂຣ, ອຸໂຠ ໂລເກ ອເວກ຺ຂຕີຕິ.

ປຸຈິມນ຺ທຊາຕກໍ ປຐມໍ.

໓໑໒. ກສ຺ສປມນ຺ທິຍຊາຕກໍ (໔-໒-໒)

໔໕. ອປິ ກສ຺ສປ ມນ຺ທິຍາ, ຍຸວາ ສປຕິ ຫນ຺ຕິ [ສມ຺ປຏິຫນ຺ຕິ (ກ.)] ວາ;

ສພ຺ພໍ ຕໍ ຂມເຕ ຘີໂຣ, ປຓ຺ຑິໂຕ ຕໍ ຕິຕິກ຺ຂຕິ.

໔໖. ສເຈປິ ສນ຺ໂຕ ວິວທນ຺ຕິ, ຂິປ຺ປໍ ສນ຺ຘີຍເຣ ປຸນ;

ພາລາ ປຕ຺ຕາວ ຠິຊ຺ຊນ຺ຕິ, ນ ເຕ ສມຖມຊ຺ຌຄູ.

໔໗. ເອເຕ ຠິຍ຺ໂຍ ສມາຍນ຺ຕິ, ສນ຺ຘິ ເຕສໍ ນ ຊີຣຕິ;

ໂຍ ຈາຘິປນ຺ນໍ ຊານາຕິ, ໂຍ ຈ ຊານາຕິ ເທສນໍ.

໔໘. ເອໂສ ຫິ ອຸຕ຺ຕຣິຕໂຣ, ຠາຣວໂຫ ຘຸຣທ຺ຘໂຣ;

ໂຍ ປເຣສາຘິປນ຺ນານໍ, ສຍໍ ສນ຺ຘາຕຸມຣຫຕີຕິ.

ກສ຺ສປມນ຺ທິຍຊາຕກໍ ທຸຕິຍໍ.

໓໑໓. ຂນ຺ຕີວາທີຊາຕກໍ (໔-໒-໓)

໔໙. ໂຍ ເຕ ຫຕ຺ເຖ ຈ ປາເທ ຈ, ກຓ຺ຓນາສຎ຺ຈ ເຉທຍິ;

ຕສ຺ສ ກຸຊ຺ຌ ມຫາວີຣ, ມາ ຣຏ຺ຐໍ ວິນສາ [ວິນສ຺ສ (ກ. ສີ. ສ຺ຍາ. ກ.)] ອິທໍ.

໕໐. ໂຍ ເມ ຫຕ຺ເຖ ຈ ປາເທ ຈ, ກຓ຺ຓນາສຎ຺ຈ ເຉທຍິ;

ຈິຣໍ ຊີວຕຸ ໂສ ຣາຊາ, ນ ຫິ ກຸຊ຺ຌນ຺ຕິ ມາທິສາ.

໕໑. ອຫູ ອຕີຕມທ຺ຘານໍ [ອຫຸ ອຕີຕມທ຺ຘາເນ (ສ຺ຍາ. ປີ. ກ.)], ສມໂຓ ຂນ຺ຕິທີປໂນ;

ຕໍ ຂນ຺ຕິຍາເຍວ ຐິຕໍ, ກາສິຣາຊາ ອເຉທຍິ.

໕໒. ຕສ຺ສ ກມ຺ມ [ກມ຺ມສ຺ສ (ສີ. ປີ.)] ຜຣຸສສ຺ສ, ວິປາໂກ ກຏຸໂກ ອຫຸ;

ຍໍ ກາສິຣາຊາ ເວເທສິ, ນິຣຍມ຺ຫິ ສມປ຺ປິໂຕຕິ.

ຂນ຺ຕີວາທີຊາຕກໍ ຕຕິຍໍ.

໓໑໔. ໂລຫກຸມ຺ຠິຊາຕກໍ (໔-໒-໔)

໕໓. ທຸຊ຺ຊີວິຕມຊີວິມ຺ຫ, ເຍ ສນ຺ເຕ [ເຍສໍ ໂນ (ສ຺ຍາ. ກ.)] ນ ທທມ຺ຫເສ;

ວິຊ຺ຊມາເນສຸ ໂຠເຄສຸ, ທີປໍ ນາກມ຺ຫ ອຕ຺ຕໂນ.

໕໔. ສຏ຺ຐິ [ສຏ຺ຐິໍ (ສ຺ຍາ.)] ວສ຺ສສຫສ຺ສານິ, ປຣິປຸຓ຺ຓານິ ສພ຺ພໂສ;

ນິຣເຍ ປຈ຺ຈມານານໍ, ກທາ ອນ຺ໂຕ ຠວິສ຺ສຕິ.

໕໕. ນຕ຺ຖິ ອນ຺ໂຕ ກຸໂຕ ອນ຺ໂຕ, ນ ອນ຺ໂຕ ປຏິທິສ຺ສຕິ;

ຕທາ ຫິ ປກຕໍ ປາປໍ, ມມ ຕຸຍ຺ຫຎ຺ຈ ມາຣິສາ [ມາຣິສ (ສີ. ສ຺ຍາ. ປີ.)].

໕໖. ໂສຫໍ ນູນ ອິໂຕ ຄນ຺ຕ຺ວາ, ໂຍນິໍ ລທ຺ຘານ ມານຸສິໍ;

ວທຎ຺ຎູ ສີລສມ຺ປນ຺ໂນ, ກາຫາມິ ກຸສລໍ ພຫຸນ຺ຕິ.

ໂລຫກຸມ຺ຠິຊາຕກໍ ຈຕຸຕ຺ຖໍ.

໓໑໕. ສພ຺ພມໍສລາຠຊາຕກໍ (໔-໒-໕)

໕໗. ຜຣຸສາ ວຕ ເຕ ວາຈາ, ມໍສໍ [ສມ຺ມ (ປີ. ກ.)] ຍາຈນໂກ ອສິ [ຈສິ (ປີ.)];

ກິໂລມສທິສີ [ກິໂລມສ຺ສ ສທິສາ (ປີ.)] ວາຈາ, ກິໂລມໍ ສມ຺ມ ທມ຺ມິ ເຕ.

໕໘. ອງ຺ຄເມຕໍ ມນຸສ຺ສານໍ, ຠາຕາ ໂລເກ ປວຸຈ຺ຈຕິ;

ອງ຺ຄສ຺ສ ສທິສີ ວາຈາ [ອງ຺ຄສ຺ສທິສີ ເຕ ວາຈາ (ກ.)], ອງ຺ຄໍ ສມ຺ມ ທທາມິ ເຕ.

໕໙. ຕາຕາຕິ ປຸຕ຺ໂຕ ວທມາໂນ, ກມ຺ເປຕິ [ສມ຺ເມຕິ (ກ.)] ຫທຍໍ ປິຕຸ;

ຫທຍສ຺ສ ສທິສີ [ຫທຍສ຺ສທິສີ (ກ.)] ວາຈາ, ຫທຍໍ ສມ຺ມ ທມ຺ມິ ເຕ.

໖໐. ຍສ຺ສ ຄາເມ ສຂາ ນຕ຺ຖິ, ຍຖາຣຎ຺ຎໍ ຕເຖວ ຕໍ;

ສພ຺ພສ຺ສ ສທິສີ ວາຈາ, ສພ຺ພໍ ສມ຺ມ ທທາມິ ເຕຕິ.

ສພ຺ພມໍສລາຠຊາຕກໍ [ມໍສຊາຕກໍ (ສີ. ສ຺ຍາ. ປີ.)] ປຎ຺ຈມໍ.

໓໑໖. ສສປຓ຺ຑິຕຊາຕກໍ (໔-໒-໖)

໖໑. ສຕ຺ຕ ເມ ໂຣຫິຕາ ມຈ຺ຉາ, ອຸທກາ ຖລມຸພ຺ຠຕາ;

ອິທໍ ພ຺ຣາຫ຺ມຓ ເມ ອຕ຺ຖິ, ເອຕໍ ຠຸຕ຺ວາ ວເນ ວສ.

໖໒. ທຸສ຺ສ ເມ ເຂຕ຺ຕປາລສ຺ສ, ຣຕ຺ຕິຠຕ຺ຕໍ ອປາຠຕໍ;

ມໍສສູລາ ຈ ທ຺ເວ ໂຄຘາ, ເອກຎ຺ຈ ທຘິວາຣກໍ;

ອິທໍ ພ຺ຣາຫ຺ມຓ ເມ ອຕ຺ຖິ, ເອຕໍ ຠຸຕ຺ວາ ວເນ ວສ.

໖໓. ອມ຺ພປກ຺ກໍ ທກໍ [ອມ຺ພປກ຺ໂກທກໍ (ສີ. ປີ.)] ສີຕໍ, ສີຕຈ຺ຉາຍາ ມໂນຣມາ [ສີຕຈ຺ຉາຍໍ ມໂນຣມໍ (ສີ. ສ຺ຍາ. ປີ.)];

ອິທໍ ພ຺ຣາຫ຺ມຓ ເມ ອຕ຺ຖິ, ເອຕໍ ຠຸຕ຺ວາ ວເນ ວສ.

໖໔. ນ ສສສ຺ສ ຕິລາ ອຕ຺ຖິ, ນ ມຸຄ຺ຄາ ນປິ ຕຓ຺ຑຸລາ;

ອິມິນາ ອຄ຺ຄິນາ ປກ຺ກໍ, ມມໍ [ມໍສໍ (ກ.)] ຠຸຕ຺ວາ ວເນ ວສາຕິ.

ສສປຓ຺ຑິຕຊາຕກໍ ຉຏ຺ຐໍ.

໓໑໗. ມຕໂຣທນຊາຕກໍ (໔-໒-໗)

໖໕. ມຕໍ ມຕໍ ເອວ [ມຕມຕເມວ (ສີ. ສ຺ຍາ. ປີ.)] ໂຣທຖ, ນ ຫິ ຕໍ ໂຣທຖ ໂຍ ມຣິສ຺ສຕິ;

ສພ຺ເພປິ [ສພ຺ເພວ (ສີ. ສ຺ຍາ. ປີ.)] ສຣີຣຘາຣິໂນ, ອນຸປຸພ຺ເພນ ຊຫນ຺ຕິ ຊີວິຕໍ.

໖໖. ເທວມນຸສ຺ສາ ຈຕຸປ຺ປທາ, ປກ຺ຂິຄຓາ ອຸຣຄາ ຈ ໂຠຄິໂນ;

ສມ຺ຫິ [ຍມ຺ຫິ (ສ຺ຍາ.), ອສ຺ມິໍ (ປີ. ກ.)] ສຣີເຣ ອນິສ຺ສຣາ, ຣມມານາວ ຊຫນ຺ຕິ ຊີວິຕໍ.

໖໗. ເອວໍ ຈລິຕໍ ອສຓ຺ຐິຕໍ, ສຸຂທຸກ຺ຂໍ ມນຸເຊສ຺ວເປກ຺ຂິຍ;

ກນ຺ທິຕຣຸທິຕໍ ນິຣຕ຺ຖກໍ, ກິໍ ໂວ ໂສກຄຓາຠິກີຣເຣ.

໖໘. ຘຸຕ຺ຕາ ຈ ໂສຓ຺ຑາ [ຘຸຕ຺ຕາ ໂສຓ຺ຑາ (ສີ.), ຘຸຕ຺ຕາ ໂສຓ຺ຑາ ຈ (ສ຺ຍາ.)] ອກຕາ, ພາລາ ສູຣາ ອໂຍຄິໂນ [ພາລາ ສູຣາ ວີຣາ ອໂຍຄິໂນ (ປີ.)];

ຘີຣໍ ມຎ຺ຎນ຺ຕິ ພາໂລຕິ, ເຍ ຘມ຺ມສ຺ສ ອໂກວິທາຕິ.

ມຕໂຣທນຊາຕກໍ ສຕ຺ຕມໍ.

໓໑໘. ກຓເວຣຊາຕກໍ (໔-໒-໘)

໖໙. ຍໍ ຕໍ ວສນ຺ຕສມເຍ, ກຓເວເຣສຸ ຠາຓຸສຸ;

ສາມໍ ພາຫາຍ ປີເຬສິ, ສາ ຕໍ ອາໂຣຄ຺ຍມພ຺ຣວິ.

໗໐. ອມ຺ໂຠ ນ ກິຣ ສທ຺ເຘຍ຺ຍໍ, ຍໍ ວາໂຕ ປພ຺ພຕໍ ວເຫ;

ປພ຺ພຕຎ຺ເຈ ວເຫ ວາໂຕ, ສພ຺ພມ຺ປິ ປຖວິໍ ວເຫ;

ຍຕ຺ຖ ສາມາ ກາລກຕາ [ກາລງ຺ກຕາ (ກ.)], ສາ ມໍ ອາໂຣຄ຺ຍມພ຺ຣວິ.

໗໑. ນ ເຈວ ສາ ກາລກຕາ, ນ ຈ ສາ ອຎ຺ຎມິຈ຺ຉຕິ;

ເອກຠຕ຺ຕິກິນີ [ເອກຠຕ຺ຕາ ກິຣ (ສີ. ສ຺ຍາ.), ເອກຠຕ຺ຕກິນີ (ປີ.)] ສາມາ, ຕເມວ ອຠິກງ຺ຂຕິ.

໗໒. ອສນ຺ຖຸຕໍ ມໍ ຈິຣສນ຺ຖຸເຕນ [ອສນ຺ຘຕໍ ມໍ ຈິຣສນ຺ຘເຕນ (ກ.)], ນິມີນິ ສາມາ ອຘຸວໍ ຘຸເວນ;

ມຍາປິ ສາມາ ນິມິເນຍ຺ຍ ອຎ຺ຎໍ, ອິໂຕ ອຫໍ ທູຣຕຣໍ ຄມິສ຺ສນ຺ຕິ.

ກຓເວຣຊາຕກໍ ອຏ຺ຐມໍ.

໓໑໙. ຕິຕ຺ຕິຣຊາຕກໍ (໔-໒-໙)

໗໓. ສຸສຸຂໍ ວຕ ຊີວາມິ, ລຠາມິ ເຈວ ຠຸຎ຺ຊິຕຸໍ;

ປຣິປນ຺ເຖວ ຕິຏ຺ຐາມິ, ກາ ນຸ ຠນ຺ເຕ ຄຕີ ມມ.

໗໔. ມໂນ ເຈ ເຕ ນປ຺ປຓມຕິ, ປກ຺ຂິ ປາປສ຺ສ ກມ຺ມຸໂນ;

ອພ຺ຍາວຏສ຺ສ ຠທ຺ຣສ຺ສ, ນ ປາປມຸປລິມ຺ປຕິ.

໗໕. ຎາຕໂກ ໂນ ນິສິນ຺ໂນຕິ, ພຫຸ ອາຄຈ຺ຉເຕ ຊໂນ;

ປຏິຈ຺ຈ ກມ຺ມໍ ຜຸສຕິ, ຕສ຺ມິໍ ເມ ສງ຺ກເຕ ມໂນ.

໗໖. ນ ປຏິຈ຺ຈ ກມ຺ມໍ ຜຸສຕິ, ມໂນ ເຈ ນປ຺ປທຸສ຺ສຕິ;

ອປ຺ໂປສ຺ສຸກ຺ກສ຺ສ ຠທ຺ຣສ຺ສ, ນ ປາປມຸປລິມ຺ປຕີຕິ.

ຕິຕ຺ຕິຣຊາຕກໍ ນວມໍ.

໓໒໐. ສຸຈ຺ຈຊຊາຕກໍ (໔-໒-໑໐)

໗໗. ສຸຈ຺ຈຊໍ ວຕ ນຈ຺ຈຊິ, ວາຈາຍ ອທທໍ ຄິຣິໍ;

ກິໍ ຫິຕສ຺ສ ຈຊນ຺ຕສ຺ສ, ວາຈາຍ ອທທ ປພ຺ພຕໍ.

໗໘. ຍຎ຺ຫິ ກຍິຣາ ຕຎ຺ຫິ ວເທ, ຍໍ ນ ກຍິຣາ ນ ຕໍ ວເທ;

ອກໂຣນ຺ຕໍ ຠາສມານໍ, ປຣິຊານນ຺ຕິ ປຓ຺ຑິຕາ.

໗໙. ຣາຊປຸຕ຺ຕ ນໂມ ຕ຺ຍຕ຺ຖຸ, ສຈ຺ເຈ ຘມ຺ເມ ຐິໂຕ ຈສິ;

ຍສ຺ສ ເຕ ພ຺ຍສນໍ ປຕ຺ໂຕ, ສຈ຺ຈສ຺ມິໍ ຣມເຕ ມໂນ.

໘໐. ຍາ ທລິທ຺ທີ ທລິທ຺ທສ຺ສ, ອຑ຺ຒາ ອຑ຺ຒສ຺ສ ກິຕ຺ຕິມ [ກິຕ຺ຕິມາ (ສີ. ສ຺ຍາ. ປີ.)];

ສາ ຫິສ຺ສ ປຣມາ ຠຣິຍາ, ສຫິຣຎ຺ຎສ຺ສ ອິຕ຺ຖິໂຍຕິ.

ສຸຈ຺ຈຊຊາຕກໍ ທສມໍ.

ປຸຈິມນ຺ທວຄ຺ໂຄ ທຸຕິໂຍ.

ຕສ຺ສຸທ຺ທານໍ –

ອຖ ໂຈຣ ສກສ຺ສປ ຂນ຺ຕີວໂຣ, ທຸຊ຺ຊີວິຕຕາ ຈ ວຣາ ຜຣຸສາ;

ອຖ ສສ ມຕຎ຺ຈ ວສນ຺ຕ ສຸຂໍ, ສຸຈ຺ຈຊໍວຕນຈ຺ຈຊິນາ ຈ ທສາຕິ.