໕. ກຸມ຺ຠວຄ຺ໂຄ

໒໙໑. ສຸຣາຆຏຊາຕກໍ (໒-໕-໑)

໑໒໑. ສພ຺ພກາມທທໍ ກຸມ຺ຠໍ, ກຸຏໍ ລທ຺ຘານ ຘຸຕ຺ຕໂກ;

ຍາວ ນໍ ອນຸປາເລຕິ, ຕາວ ໂສ ສຸຂເມຘຕິ.

໑໒໒. ຍທາ ມຕ຺ໂຕ ຈ ທິຕ຺ໂຕ ຈ, ປມາທາ ກຸມ຺ຠມພ຺ຠິທາ;

ຕທາ ນຄ຺ໂຄ ຈ ໂປຕ຺ໂຖ ຈ, ປຈ຺ຉາ ພາໂລ ວິຫຎ຺ຎຕິ.

໑໒໓. ເອວເມວ ໂຍ ຘນໍ ລທ຺ຘາ, ປມຕ຺ໂຕ [ອມຕ຺ຕາ (ສີ.), ອມຕ຺ໂຕ (ປີ.)] ປຣິຠຸຎ຺ຊຕິ;

ປຈ຺ຉາ ຕປ຺ປຕິ ທຸມ຺ເມໂຘ, ກຸຏໍ ຠິຕ຺ວາວ [ກຸຏໍ ຠິນ຺ໂນວ (ສີ. ປີ.), ກຸຏຠິນ຺ໂນວ (?)] ຘຸຕ຺ຕໂກຕິ.

ສຸຣາຆຏ [ຠທ຺ຣຆຏ (ສີ. ປີ.), ຠທ຺ຣຆຏເຠທກ (ສ຺ຍາ.)] ຊາຕກໍ ປຐມໍ.

໒໙໒. ສຸປຕ຺ຕຊາຕກໍ (໓-໕-໒)

໑໒໔. ພາຣາຓສ຺ຍໍ [ພາຣາຓສ຺ສໍ (ສີ. ປີ.)] ມຫາຣາຊ, ກາກຣາຊາ ນິວາສໂກ [ນິວາສິໂກ (ສີ. ປີ.)];

ອສີຕິຍາ ສຫສ຺ເສຫິ, ສຸປຕ຺ໂຕ ປຣິວາຣິໂຕ.

໑໒໕. ຕສ຺ສ ໂທຫຬິນີ ຠຣິຍາ, ສຸຜສ຺ສາ ຠກ຺ຂິຕຸມິຈ຺ຉຕິ [ມຈ຺ຉມິຈ຺ຉຕິ (ສີ. ປີ.)];

ຣຎ຺ໂຎ ມຫານເສ ປກ຺ກໍ, ປຈ຺ຈຄ຺ຆໍ ຣາຊໂຠຊນໍ.

໑໒໖. ເຕສາຫໍ ປຫິໂຕ ທູໂຕ, ຣຎ຺ໂຎ ຈມ຺ຫິ ອິຘາຄໂຕ;

ຠຕ຺ຕຸ ອປຈິຕິໍ ກຸມ຺ມິ, ນາສາຍມກຣໍ [ມກຣິໍ (ສີ. ນິສ຺ສຍ)] ວຓນ຺ຕິ.

ສຸປຕ຺ຕຊາຕກໍ ທຸຕິຍໍ.

໒໙໓. ກາຍນິພ຺ພິນ຺ທຊາຕກໍ (໓-໕-໓)

໑໒໗. ຜຸຏ຺ຐສ຺ສ ເມ ອຎ຺ຎຕເຣນ ພ຺ຍາຘິນາ, ໂຣເຄນ ພາຬ຺ຫໍ ທຸຂິຕສ຺ສ ຣຸປ຺ປໂຕ;

ປຣິສຸສ຺ສຕິ ຂິປ຺ປມິທໍ ກເຬວຣໍ, ປຸປ຺ຜໍ ຍຖາ ປໍສຸນິ ອາຕເປ ກຕໍ.

໑໒໘. ອຊຎ຺ຎໍ ຊຎ຺ຎສງ຺ຂາຕໍ, ອສຸຈິໍ ສຸຈິສມ຺ມຕໍ;

ນານາກຸຓປປຣິປູຣໍ, ຊຎ຺ຎຣູປໍ ອປສ຺ສໂຕ.

໑໒໙. ຘິຣຕ຺ຖຸມໍ ອາຕຸຣໍ ປູຕິກາຍໍ, ເຊຄຸຈ຺ຉິຍໍ ອສ຺ສຸຈິໍ ພ຺ຍາຘິຘມ຺ມໍ;

ຍຕ຺ຖປ຺ປມຕ຺ຕາ ອຘິມຸຈ຺ຉິຕາ ປຊາ, ຫາເປນ຺ຕິ ມຄ຺ຄໍ ສຸຄຕູປປຕ຺ຕິຍາຕິ.

ກາຍນິພ຺ພິນ຺ທ [ກາຍວິຈ຺ຉນ຺ທ (ສີ.), ກາຍວິຈ຺ຉິນ຺ທ (ປີ.)] ຊາຕກໍ ຕຕິຍໍ.

໒໙໔. ຊມ຺ພຸຂາທກຊາຕກໍ (໓-໕-໔)

໑໓໐. ໂກຍໍ ພິນ຺ທຸສ຺ສໂຣ ວຄ຺ຄຸ, ສຣວນ຺ຕານ [ປວທນ຺ຕານ (ສີ. ປີ.)] ມຸຕ຺ຕໂມ;

ອຈ຺ຈຸໂຕ ຊມ຺ພຸສາຂາຍ, ໂມຣຈ຺ຉາໂປວ ກູຊຕິ.

໑໓໑. ກຸລປຸຕ຺ໂຕວ ຊານາຕິ [ກຸລປຸຕ຺ໂຕ ປຊານາຕິ (ສ຺ຍາ. ກ.)], ກຸລປຸຕ຺ຕໍ [ກຸລປຸຕ຺ເຕ (ສີ. ປີ.)] ປສໍສິຕຸໍ;

ພ຺ຍຄ຺ຆຈ຺ຉາປສຣີວຓ຺ຓ, ຠຸຎ຺ຊ ສມ຺ມ ທທາມິ ເຕ.

໑໓໒. ຈິຣສ຺ສໍ ວຕ ປສ຺ສາມິ, ມຸສາວາທີ ສມາຄເຕ;

ວນ຺ຕາທໍ ກຸຓປາທຎ຺ຈ, ອຎ຺ຎມຎ຺ຎໍ ປສໍສເກຕິ.

ຊມ຺ພຸຂາທກຊາຕກໍ ຈຕຸຕ຺ຖໍ.

໒໙໕. ອນ຺ຕຊາຕກໍ (໓-໕-໕)

໑໓໓. ອຸສຠສ຺ເສວ ເຕ ຂນ຺ໂຘ, ສີຫສ຺ເສວ ວິຊມ຺ຠິຕໍ;

ມິຄຣາຊ ນໂມ ຕ຺ຍຕ຺ຖຸ, ອປິ ກິຎ຺ຈິ ລຠາມເສ.

໑໓໔. ກຸລປຸຕ຺ໂຕວ ຊານາຕິ, ກຸລປຸຕ຺ຕໍ ປສໍສິຕຸໍ;

ມຍູຣຄີວສງ຺ກາສ, ອິໂຕ ປຣິຍາຫິ ວາຍສ.

໑໓໕. ມິຄານໍ ສິງ຺ຄາໂລ [ໂກຕ຺ຖຸໂກ (ສີ. ປີ.), ໂກຏ຺ຐຸໂກ (ສ຺ຍາ.)] ອນ຺ໂຕ, ປກ຺ຂີນໍ ປນ ວາຍໂສ;

ເອຣຓ຺ໂຑ ອນ຺ໂຕ ຣຸກ຺ຂານໍ, ຕໂຍ ອນ຺ຕາ ສມາຄຕາຕິ.

ອນ຺ຕຊາຕກໍ ປຎ຺ຈມໍ.

໒໙໖. ສມຸທ຺ທຊາຕກໍ (໓-໕-໖)

໑໓໖. ໂກ ນາຍໍ [ໂກ ນ຺ວາຍໍ (ສ຺ຍາ.)] ໂລຓໂຕຍສ຺ມິໍ, ສມນ຺ຕາ ປຣິຘາວຕິ;

ມຈ຺ເຉ ມກເຣ ຈ ວາເຣຕິ, ອູມີສຸ ຈ ວິຫຎ຺ຎຕິ.

໑໓໗. ອນນ຺ຕປາຍີ ສກຸໂຓ, ອຕິຕ຺ໂຕຕິ ທິສາສຸໂຕ;

ສມຸທ຺ທໍ ປາຕຸມິຈ຺ຉາມິ, ສາຄຣໍ ສຣິຕໍ ປຕິໍ.

໑໓໘. ໂສ ອຍໍ ຫາຍຕິ ເຈວ, ປູຣເຕ ຈ ມໂຫທຘິ;

ນາສ຺ສ ນາຍຕິ ປີຕນ຺ໂຕ, ອເປຍ຺ໂຍ ກິຣ ສາຄໂຣຕິ.

ສມຸທ຺ທຊາຕກໍ ຉຏ຺ຐໍ.

໒໙໗. ກາມວິລາປຊາຕກໍ (໓-໕-໗)

໑໓໙. ອຸຈ຺ເຈ ສກຸຓ ເຑມານ, ປຕ຺ຕຍານ ວິຫງ຺ຄມ;

ວຊ຺ຊາສິ ໂຂ ຕ຺ວໍ ວາມູຣຸໍ, ຈິຣໍ ໂຂ ສາ ກຣິສ຺ສຕິ [ສຣິສ຺ສຕິ (ກ.)].

໑໔໐. ອິທໍ ໂຂ ສາ ນ ຊານາຕິ, ອສິໍ ສຕ຺ຕິຎ຺ຈ ໂອຑ຺ຑິຕໍ;

ສາ ຈຓ຺ຑີ ກາຫຕິ ໂກຘໍ, ຕໍ ເມ ຕປຕິ ໂນ ອິທໍ [ໂນ ອິຘ (ສີ. ສ຺ຍາ. ປີ.)].

໑໔໑. ເອສ ອຸປ຺ປລສນ຺ນາໂຫ, ນິກ຺ຂຎ຺ຈຸສ຺ສີສໂກຫິຕໍ [ນິກ຺ຂມຸສ຺ສີສເກ ກຕໍ (ສີ. ປີ.), ນິກ຺ຂຎ຺ຈຸສ຺ສີສເກ ກຕໍ (ສ຺ຍາ.)];

ກາສິກຎ຺ຈ ມຸທຸໍ ວຕ຺ຖໍ, ຕປ຺ເປຕຸ ຘນິກາ ປິຍາຕິ [ຘນກາມິຍາຕິ (ສ຺ຍາ. ປີ.), ຘນກາມິກາຕິ (ສີ.)].

ກາມວິລາປຊາຕກໍ ສຕ຺ຕມໍ.

໒໙໘. ອຸທຸມ຺ພຣຊາຕກໍ (໓-໕-໘)

໑໔໒. ອຸທຸມ຺ພຣາ ຈິເມ ປກ຺ກາ, ນິຄ຺ໂຣຘາ ຈ ກປິຕ຺ຖນາ;

ເອຫິ ນິກ຺ຂມ ຠຸຎ຺ຊສ຺ສຸ, ກິໍ ຊິຆຈ຺ຉາຍ ມິຍ຺ຍສິ.

໑໔໓. ເອວໍ ໂສ ສຸຫິໂຕ ໂຫຕິ, ໂຍ ວຸຑ຺ຒມປຈາຍຕິ;

ຍຖາຫມຊ຺ຊ ສຸຫິໂຕ, ທຸມປກ຺ການິ ມາສິໂຕ.

໑໔໔. ຍໍ ວເນໂຊ ວເນຊສ຺ສ, ວຎ຺ເຈຍ຺ຍ ກປິໂນ ກປິ;

ທຫໂຣ ກປິ [ທຫໂຣປິ ຕໍ ນ (ສີ. ປີ.), ທຫໂຣປິ ນ (ສ຺ຍາ.)] ສທ຺ເຘຍ຺ຍ, ນ ຫິ ຊິຓ຺ໂຓ ຊຣາກປີຕິ.

ອຸທຸມ຺ພຣຊາຕກໍ ອຏ຺ຐມໍ.

໒໙໙. ໂກມາຣປຸຕ຺ຕຊາຕກໍ (໓-໕-໙)

໑໔໕. ປຸເຣ ຕຸວໍ ສີລວຕໍ ສກາເສ, ໂອກ຺ກນ຺ຕິກໍ [ໂອກ຺ກນ຺ທິກໍ (ສີ. ສ຺ຍາ. ປີ.)] ກີຬສິ ອສ຺ສມມ຺ຫິ;

ກໂຣຫເຣ [ກໂຣຫິ ເຣ (ກ.)] ມກ຺ກຏິຍານິ ມກ຺ກຏ, ນ ຕໍ ມຍໍ ສີລວຕໍ ຣມາມ.

໑໔໖. ສຸຕາ ຫິ ມຍ຺ຫໍ ປຣມາ ວິສຸທ຺ຘິ, ໂກມາຣປຸຕ຺ຕສ຺ສ ພຫຸສ຺ສຸຕສ຺ສ;

ມາ ທານິ ມໍ ມຎ຺ຎິ ຕຸວໍ ຍຖາ ປຸເຣ, ຌານານຸຍຸຕ຺ໂຕ ວິຫຣາມິ [ຌານານຸຍຸຕ຺ຕາ ວິຫຣາມ (ສີ. ປີ.)] ອາວຸໂສ.

໑໔໗. ສເຈປິ ເສລສ຺ມິ ວເປຍ຺ຍ ພີຊໍ, ເທໂວ ຈ ວສ຺ເສ ນ ຫິ ຕໍ ວິຣູຬ຺ເຫ [ເນວ ຫິ ຕໍ ຣຸເຫຍ຺ຍ (ສີ. ປີ.), ນ ຫິ ຕໍ ວິຣູເຫ (?)];

ສຸຕາ ຫິ ເຕ ສາ ປຣມາ ວິສຸທ຺ຘິ, ອາຣາ ຕຸວໍ ມກ຺ກຏ ຌານຠູມິຍາຕິ.

ໂກມາຣປຸຕ຺ຕຊາຕກໍ ນວມໍ.

໓໐໐. ວກຊາຕກໍ (໓-໕-໑໐)

໑໔໘. ປຣປາຓໂຣຘາ [ປຣປາຓຆາເຕ (ສ຺ຍາ.), ປຣປາຓໂຣຈໍ (ກ.)] ຊີວນ຺ໂຕ, ມໍສໂລຫິຕໂຠຊໂນ;

ວໂກ ວຕໍ ສມາທາຍ, ອຸປປຊ຺ຊິ ອຸໂປສຖໍ.

໑໔໙. ຕສ຺ສ ສກ຺ໂກ ວຕຎ຺ຎາຍ, ອຊຣູເປນຸປາຄມິ;

ວີຕຕໂປ ອຊ຺ຌປ຺ປຕ຺ໂຕ, ຠຎ຺ຊິ ໂລຫິຕໂປ ຕປໍ.

໑໕໐. ເອວເມວ ອິເຘກຈ຺ເຈ, ສມາທານມ຺ຫິ ທຸພ຺ພລາ;

ລຫຸໍ ກໂຣນ຺ຕິ ອຕ຺ຕານໍ, ວໂກວ ອຊກາຣຓາຕິ.

ວກຊາຕກໍ ທສມໍ.

ກຸມ຺ຠວຄ຺ໂຄ ປຎ຺ຈໂມ.

ຕສ຺ສຸທ຺ທານໍ –

ວຣກຸມ຺ຠ ສຸປຕ຺ຕສິຣິວ຺ຫຍໂນ, ສຸຈິສມ຺ມຕ ພິນ຺ທຸສໂຣ ຈຸສໂຠ;

ສຣິຕໍປຕິ ຈຓ຺ຑິ ຊຣາກປິນາ, ອຖ ມກ຺ກຏິຍາ ວກເກນ ທສາຕິ.

ອຖ ວຄ຺ຄຸທ຺ທານໍ –

ສງ຺ກປ຺ໂປ ປທຸໂມ ເຈວ, ອຸທປາເນນ ຕຕິຍໍ;

ອພ຺ຠນ຺ຕຣໍ ຆຏເຠທໍ, ຕິກນິປາຕມ຺ຫິລງ຺ກຕນ຺ຕິ.

ຕິກນິປາຕໍ ນິຏ຺ຐິຕໍ.