໕. ຣຸຫກວຄ຺ໂຄ

໑໙໑. ຣຸຫກຊາຕກໍ (໒-໕-໑)

໘໑. ອປິ [ອມ຺ໂຠ (ສ຺ຍາ. ກ. ສີ.)] ຣຸຫກ ຉິນ຺ນາປິ, ຊິຍາ ສນ຺ຘີຍເຕ ປຸນ;

ສນ຺ຘີຍສ຺ສຸ ປຸຣາຓິຍາ, ມາ ໂກຘສ຺ສ ວສໍ ຄມິ.

໘໒. ວິຊ຺ຊມາເນສຸ ວາເກສຸ [ວິຊ຺ຊມານາສຸ ມຣຸວາສຸ (ສີ.), ວິຊ຺ຊມານາສຸ ມຣູທ຺ວາສຸ (ປີ.)], ວິຊ຺ຊມາເນສຸ ກາຣິສຸ;

ອຎ຺ຎໍ ຊິຍໍ ກຣິສ຺ສາມິ, ອລຎ຺ເຎວ ປຸຣາຓິຍາຕິ.

ຣຸຫກຊາຕກໍ ປຐມໍ.

໑໙໒. ສິຣິກາຬກຓ຺ຓິຊາຕກໍ (໒-໕-໒)

໘໓. ອິຕ຺ຖີ ສິຍາ ຣູປວຕີ, ສາ ຈ ສີລວຕີ ສິຍາ;

ປຸຣິໂສ ຕໍ ນ ອິຈ຺ເຉຍ຺ຍ, ສທ຺ທຫາສິ ມໂຫສຘ.

໘໔. ສທ຺ທຫາມິ ມຫາຣາຊ, ປຸຣິໂສ ທຸພ຺ຠໂຄ ສິຍາ;

ສິຣີ ຈ ກາຬກຓ຺ຓີ ຈ, ນ ສເມນ຺ຕິ ກຸທາຈນນ຺ຕິ.

ສິຣິກາຬກຓ຺ຓິຊາຕກໍ ທຸຕິຍໍ.

໑໙໓. ຈູຬປທຸມຊາຕກໍ (໒-໕-໓)

໘໕. ອຍເມວ ສາ ອຫມປິ [ອຫມ຺ປິ (ສີ. ສ຺ຍາ. ປີ.), ອຫສ຺ມິ (ກ.)] ໂສ ອນຎ຺ໂຎ, ອຍເມວ ໂສ ຫຕ຺ຖຈ຺ຉິນ຺ໂນ ອນຎ຺ໂຎ;

ຍມາຫ ‘‘ໂກມາຣປຕີ ມມ’’ນ຺ຕິ, ວຊ຺ຌິຕ຺ຖິໂຍ ນຕ຺ຖິ ອິຕ຺ຖີສຸ ສຈ຺ຈໍ.

໘໖. ອິມຎ຺ຈ ຊມ຺ມໍ ມຸສເລນ ຫນ຺ຕ຺ວາ, ລຸທ຺ທໍ ຉວໍ ປຣທາຣູປເສວິໍ;

ອິມິສ຺ສາ ຈ ນໍ ປາປປຕິພ຺ພຕາຍ, ຊີວນ຺ຕິຍາ ຉິນ຺ທຖ ກຓ຺ຓນາສນ຺ຕິ.

ຈູຬປທຸມຊາຕກໍ ຕຕິຍໍ.

໑໙໔. ມຓິໂຈຣຊາຕກໍ (໒-໕-໔)

໘໗. ນ ສນ຺ຕິ ເທວາ ປວສນ຺ຕິ ນູນ, ນ ຫິ ນູນ ສນ຺ຕິ ອິຘ ໂລກປາລາ;

ສຫສາ ກໂຣນ຺ຕານມສຎ຺ຎຕານໍ, ນ ຫິ ນູນ ສນ຺ຕີ ປຏິເສຘິຕາໂຣ.

໘໘. ອກາເລ ວສ຺ສຕີ ຕສ຺ສ, ກາເລ ຕສ຺ສ ນ ວສ຺ສຕິ;

ສຄ຺ຄາ ຈ ຈວຕິ ຐານາ, ນນຸ ໂສ ຕາວຕາ ຫໂຕຕິ.

ມຓິໂຈຣຊາຕກໍ ຈຕຸຕ຺ຖໍ.

໑໙໕. ປພ຺ພຕູປຕ຺ຖຣຊາຕກໍ (໒-໕-໕)

໘໙. ປພ຺ພຕູປຕ຺ຖເຣ [ປພ຺ພຕປຕ຺ຖເຣ (ສີ. ສ຺ຍາ. ປີ.)] ຣມ຺ເມ, ຊາຕາ ໂປກ຺ຂຣຓີ ສິວາ;

ຕໍ ສິງ຺ຄາໂລ ອປາປາຍິ [ອປາປາສິ (ສີ. ສ຺ຍາ. ປີ.)], ຊານໍ ສີເຫນ ຣກ຺ຂິຕໍ.

໙໐. ປິວນ຺ຕິ ເຈ [ປິວນ຺ຕິ ເວ (ສີ.), ປິວນ຺ຕິວ (ປີ.), ປິວນ຺ເຕວ (?)] ມຫາຣາຊ, ສາປທານິ ມຫານທິໍ;

ນ ເຕນ ອນທີ ໂຫຕິ, ຂມສ຺ສຸ ຍທິ ເຕ ປິຍາຕິ.

ປພ຺ພຕູປຕ຺ຖຣ [ປພ຺ພຕປຕ຺ຖຣ (ສີ. ສ຺ຍາ. ປີ.)] ຊາຕກໍ ປຎ຺ຈມໍ.

໑໙໖. ວລາຫກສ຺ສຊາຕກໍ (໒-໕-໖)

໙໑. ເຍ ນ ກາຫນ຺ຕິ ໂອວາທໍ, ນຣາ ພຸທ຺ເຘນ ເທສິຕໍ;

ພ຺ຍສນໍ ເຕ ຄມິສ຺ສນ຺ຕິ, ຣກ຺ຂສີຫິວ ວາຓິຊາ.

໙໒. ເຍ ຈ ກາຫນ຺ຕິ ໂອວາທໍ, ນຣາ ພຸທ຺ເຘນ ເທສິຕໍ;

ໂສຕ຺ຖິໍ ປາຣໍ ຄມິສ຺ສນ຺ຕິ, ວລາເຫເນວ [ວາລາເຫເນວ (ສີ. ປີ.)] ວາຓິຊາຕິ.

ວລາຫກສ຺ສ [ວາລາຫສ຺ສ (ສີ. ປີ.)] ຊາຕກໍ ຉຏ຺ຐໍ.

໑໙໗. ມິຕ຺ຕາມິຕ຺ຕຊາຕກໍ (໒-໕-໗)

໙໓. ນ ນໍ ອຸມ຺ຫຍເຕ ທິສ຺ວາ, ນ ຈ ນໍ ປຏິນນ຺ທຕິ;

ຈກ຺ຂູນິ ຈສ຺ສ ນ ທທາຕິ, ປຏິໂລມຎ຺ຈ ວຕ຺ຕຕິ.

໙໔. ເອເຕ ຠວນ຺ຕິ ອາກາຣາ, ອມິຕ຺ຕສ຺ມິໍ ປຕິຏ຺ຐິຕາ;

ເຍຫິ ອມິຕ຺ຕໍ ຊາເນຍ຺ຍ, ທິສ຺ວາ ສຸຕ຺ວາ ຈ ປຓ຺ຑິໂຕຕິ.

ມິຕ຺ຕາມິຕ຺ຕຊາຕກໍ ສຕ຺ຕມໍ.

໑໙໘. ຣາຘຊາຕກໍ (໒-໕-໘)

໙໕. ປວາສາ ອາຄໂຕ ຕາຕ, ອິທານິ ນຈິຣາຄໂຕ;

ກຈ຺ຈິນ຺ນຸ ຕາຕ ເຕ ມາຕາ, ນ ອຎ຺ຎມຸປເສວຕິ.

໙໖. ນ ໂຂ ປເນຕໍ ສຸຠຓໍ, ຄິຣໍ ສຈ຺ຈຸປສໍຫິຕໍ;

ສເຍຖ ໂປຏ຺ຐປາໂທວ, ມຸມ຺ມຸເຣ [ມຸມ຺ມຸເຣ (ສ຺ຍາ.), ມໍ ປຸເຣ (ກ.) ມຸມ຺ມຸຣສທ຺ໂທ ຖຸສຄ຺ຄິມ຺ຫິ ກຸກ຺ກຸເຬ ຈ ວຕ຺ຕຕີຕິ ສກ຺ກຕາຠິຘາເນສຸ] ອຸປກູຖິໂຕຕິ [ອຸປກູສິໂຕຕິ (ສີ. ສ຺ຍາ. ປີ.), ອຸປກູລິໂຕ (ກ.)].

ຣາຘຊາຕກໍ ອຏ຺ຐມໍ.

໑໙໙. ຄຫປຕິຊາຕກໍ (໒-໕-໙)

໙໗. ອຸຠຍໍ ເມ ນ ຂມຕິ, ອຸຠຍໍ ເມ ນ ຣຸຈ຺ຈຕິ;

ຍາຈາຍໍ ໂກຏ຺ຐໂມຕິຓ຺ຓາ, ນາທ຺ທສໍ ອິຕິ ຠາສຕິ.

໙໘. ຕໍ ຕໍ ຄາມປຕິ ພ຺ຣູມິ, ກທເຣ ອປ຺ປສ຺ມິ ຊີວິເຕ;

ທ຺ເວ ມາເສ ສງ຺ຄຣໍ ກຕ຺ວາ [ກາຣໍ ກຕ຺ວານ (ສີ. ປີ.), ສໍກຣໍ ກຕ຺ວາ (ກ.)], ມໍສໍ ຊຣຄ຺ຄວໍ ກິສໍ;

ອປ຺ປຕ຺ຕກາເລ ໂຈເທສິ, ຕມ຺ປິ ມຍ຺ຫໍ ນ ຣຸຈ຺ຈຕີຕິ.

ຄຫປຕິຊາຕກໍ ນວມໍ.

໒໐໐. ສາຘຸສີລຊາຕກໍ (໒-໕-໑໐)

໙໙. ສຣີຣທພ຺ຍໍ ວຸຑ຺ຒພ຺ຍໍ [ວທ຺ຘພ຺ຍໍ (ສີ. ປີ.)], ໂສຊຈ຺ຈໍ ສາຘຸສີລິຍໍ;

ພ຺ຣາຫ຺ມຓໍ ເຕວ ປຸຈ຺ຉາມ, ກນ຺ນຸ ເຕສໍ ວນິມ຺ຫເສ [ວຓິມ຺ຫເສ (ສີ. ປີ.)].

໑໐໐. ອຕ຺ໂຖ ອຕ຺ຖິ ສຣີຣສ຺ມິໍ, ວຸຑ຺ຒພ຺ຍສ຺ສ ນໂມ ກເຣ;

ອຕ຺ໂຖ ອຕ຺ຖິ ສຸຊາຕສ຺ມິໍ, ສີລໍ ອສ຺ມາກ ຣຸຈ຺ຈຕີຕິ.

ສາຘຸສີລຊາຕກໍ ທສມໍ.

ຣຸຫກວຄ຺ໂຄ ປຎ຺ຈໂມ.

ຕສ຺ສຸທ຺ທານໍ –

ອປິຣຸຫກ ຣູປວຕີ ມຸສໂລ, ປວສນ຺ຕິ ສປຎ຺ຈມໂປກ຺ຂຣຓີ;

ອຖ ມຸຕ຺ຕິມວາຓິຊ ອຸມ຺ຫຍເຕ, ຈິຣອາຄຕ ໂກຏ຺ຐ ສຣີຣ ທສາຕິ.