໓. ກລ຺ຍາຓວຄ຺ໂຄ

໑໗໑. ກລ຺ຍາຓຘມ຺ມຊາຕກໍ (໒-໓-໑)

໔໑. ກລ຺ຍາຓຘມ຺ໂມຕິ ຍທາ ຊນິນ຺ທ, ໂລເກ ສມຎ຺ຎໍ ອນຸປາປຸຓາຕິ;

ຕສ຺ມາ ນ ຫິຍ຺ເຍຖ [ຫີເຍຖ (ສີ.)] ນໂຣ ສປຎ຺ໂຎ, ຫິຣິຍາປິ ສນ຺ໂຕ ຘຸຣມາທິຍນ຺ຕິ.

໔໒. ສາຍໍ ສມຎ຺ຎາ ອິຘ ມຊ຺ຊ ປຕ຺ຕາ, ກລ຺ຍາຓຘມ຺ໂມຕິ ຊນິນ຺ທ ໂລເກ;

ຕາຫໍ ສເມກ຺ຂໍ ອິຘ ປພ຺ພຊິສ຺ສໍ, ນ ຫິ ມຕ຺ຖິ ຉນ຺ໂທ ອິຘ ກາມໂຠເຄຕິ.

ກລ຺ຍາຓຘມ຺ມຊາຕກໍ ປຐມໍ.

໑໗໒. ທທ຺ທຣຊາຕກໍ (໒-໓-໒)

໔໓. ໂກ ນຸ ສທ຺ເທນ ມຫຕາ, ອຠິນາເທຕິ ທທ຺ທຣໍ;

ຕໍ ສີຫາ ນປ຺ປຏິນທນ຺ຕິ [ກິໍ ສີຫາ ນປ຺ປຏິນທນ຺ຕິ (ສີ. ປີ.), ນ ສີຫາ ປຏິນທນ຺ຕິ (ກ.)], ໂກ ນາເມໂສ ມິຄາຘິຠູ.

໔໔. ອຘໂມ ມິຄຊາຕານໍ, ສິງ຺ຄາໂລ ຕາຕ ວສ຺ສຕິ;

ຊາຕິມສ຺ສ ຊິຄຸຈ຺ຉນ຺ຕາ, ຕຸຓ຺ຫີ ສີຫາ ສມຈ຺ຉເຣຕິ.

ທທ຺ທຣຊາຕກໍ ທຸຕິຍໍ.

໑໗໓. ມກ຺ກຏຊາຕກໍ (໒-໓-໓)

໔໕. ຕາຕ ມາຓວໂກ ເອໂສ, ຕາລມູລໍ ອປສ຺ສິໂຕ;

ອຄາຣກຎ຺ຈິທໍ ອຕ຺ຖິ, ຫນ຺ທ ເທມສ຺ສຄາຣກໍ.

໔໖. ມາ ໂຂ ຕ຺ວໍ ຕາຕ ປກ຺ໂກສິ, ທູເສຍ຺ຍ ໂນ ອຄາຣກໍ;

ເນຕາທິສໍ ມຸຂໍ ໂຫຕິ, ພ຺ຣາຫ຺ມຓສ຺ສ ສຸສີລິໂນຕິ.

ມກ຺ກຏຊາຕກໍ ຕຕິຍໍ.

໑໗໔. ທຸພ຺ຠິຍມກ຺ກຏຊາຕກໍ (໒-໓-໔)

໔໗. ອທມ຺ຫ ເຕ ວາຣິ ປຫູຕຣູປໍ, ຆມ຺ມາຠິຕຕ຺ຕສ຺ສ ປິປາສິຕສ຺ສ;

ໂສ ທານິ ປິຕ຺ວານ [ປີຕ຺ວານ (ສີ. ປີ.)] ກິຣິງ຺ກໂຣສິ [ກິກິໍກໂຣສິ (ສີ. ສ຺ຍາ. ປີ.)], ອສງ຺ຄໂມ ປາປຊເນນ ເສຍ຺ໂຍ.

໔໘. ໂກ ເຕ ສຸໂຕ ວາ ທິຏ຺ໂຐ ວາ, ສີລວາ ນາມ ມກ຺ກໂຏ;

ອິທານິ ໂຂ ຕໍ ໂອຫຈ຺ຉໍ [ອູຫຈ຺ຈ (ສີ. ປີ.), ໂອຫຈ຺ຈໍ (ສ຺ຍາ.), ອຸຫຊ຺ຊໍ (ກ.)], ເອສາ ອສ຺ມາກ ຘມ຺ມຕາຕິ.

ທຸພ຺ຠິຍມກ຺ກຏຊາຕກໍ ຈຕຸຕ຺ຖໍ.

໑໗໕. ອາທິຈ຺ຈຸປຏ຺ຐານຊາຕກໍ (໒-໓-໕)

໔໙. ສພ຺ເພສຸ ກິຣ ຠູເຕສຸ, ສນ຺ຕິ ສີລສມາຫິຕາ;

ປສ຺ສ ສາຂາມິຄໍ ຊມ຺ມໍ, ອາທິຈ຺ຈມຸປຕິຏ຺ຐຕິ.

໕໐. ນາສ຺ສ ສີລໍ ວິຊານາຖ, ອນຎ຺ຎາຍ ປສໍສຖ;

ອຄ຺ຄິຫຸຕ຺ຕຎ຺ຈ ອຸຫນ຺ນໍ [ອູຫນ຺ຕໍ (ສີ.), ອູຫນໍ (ສ຺ຍາ.), ອູຫນ຺ຕິ (ປີ.), ອຸຫທໍ (ກ.)], ທ຺ເວ ຈ ຠິນ຺ນາ ກມຓ຺ຑລູຕິ.

ອາທິຈ຺ຈຸປຏ຺ຐານຊາຕກໍ ປຎ຺ຈມໍ.

໑໗໖. ກຬາຍມຸຏ຺ຐິຊາຕກໍ (໒-໓-໖)

໕໑. ພາໂລ ວຕາຍໍ ທຸມສາຂໂຄຈໂຣ, ປຎ຺ຎາ ຊນິນ຺ທ ນຍິມສ຺ສ ວິຊ຺ຊຕິ;

ກຬາຍມຸຏ຺ຐິໍ [ກລາຍມຸຏ຺ຐິໍ (ສີ. ປີ.)] ອວກິຣິຍ ເກວລໍ, ເອກໍ ກຬາຍໍ ປຕິຕໍ ຄເວສຕິ.

໕໒. ເອວເມວ ມຍໍ ຣາຊ, ເຍ ຈຎ຺ເຎ ອຕິໂລຠິໂນ;

ອປ຺ເປນ ພຫຸໍ ຊິຍ຺ຍາມ, ກຬາເຍເນວ ວານໂຣຕິ.

ກຬາຍມຸຏ຺ຐິຊາຕກໍ ຉຏ຺ຐໍ.

໑໗໗. ຕິນ຺ທຸກຊາຕກໍ (໒-໓-໗)

໕໓. ຘນຸຫຕ຺ຖກລາເປຫິ, ເນຕ຺ຕິໍ ສວຣຘາຣິຠິ;

ສມນ຺ຕາ ປຣິກິຓ຺ຓມ຺ຫ, ກຖໍ ໂມກ຺ໂຂ ຠວິສ຺ສຕິ.

໕໔. ອປ຺ເປວ ພຫຸກິຈ຺ຈານໍ, ອຕ຺ໂຖ ຊາເຍຖ ໂກຈິ ນໍ;

ອຕ຺ຖິ ຣຸກ຺ຂສ຺ສ ອຈ຺ຉິນ຺ນໍ, ຂຊ຺ຊຖຎ຺ເຎວ ຕິນ຺ທຸກນ຺ຕິ.

ຕິນ຺ທຸກຊາຕກໍ ສຕ຺ຕມໍ.

໑໗໘. ກຈ຺ຉປຊາຕກໍ (໒-໓-໘)

໕໕. ຊນິຕ຺ຕໍ ເມ ຠວິຕ຺ຕໍ ເມ, ອິຕິ ປງ຺ເກ ອວສ຺ສຍິໍ;

ຕໍ ມໍ ປງ຺ໂກ ອຊ຺ຌຠວິ, ຍຖາ ທຸພ຺ພລກໍ ຕຖາ;

ຕໍ ຕໍ ວທາມິ ຠຄ຺ຄວ, ສຸໂຓຫິ ວຈນໍ ມມ.

໕໖. ຄາເມ ວາ ຍທິ ວາ ຣຎ຺ເຎ, ສຸຂໍ ຍຕ຺ຣາຘິຄຈ຺ຉຕິ;

ຕໍ ຊນິຕ຺ຕໍ ຠວິຕ຺ຕຎ຺ຈ, ປຸຣິສສ຺ສ ປຊານໂຕ;

ຍມ຺ຫິ ຊີເວ ຕມ຺ຫິ ຄຈ຺ເຉ, ນ ນິເກຕຫໂຕ ສິຍາຕິ.

ກຈ຺ຉປຊາຕກໍ ອຏ຺ຐມໍ.

໑໗໙. ສຕຘມ຺ມຊາຕກໍ (໒-໓-໙)

໕໗. ຕຎ຺ຈ ອປ຺ປຎ຺ຈ ອຸຈ຺ຉິຏ຺ຐໍ, ຕຎ຺ຈ ກິຈ຺ເຉນ ໂນ ອທາ;

ໂສຫໍ ພ຺ຣາຫ຺ມຓຊາຕິໂກ, ຍໍ ຠຸຕ຺ຕໍ ຕມ຺ປິ ອຸຄ຺ຄຕໍ.

໕໘. ເອວໍ ຘມ຺ມໍ ນິຣໍກຕ຺ວາ [ນິຣາກຕ຺ວາ (?) ນິ + ອາ + ກຣ + ຕ຺ວາ], ໂຍ ອຘມ຺ເມນ ຊີວຕິ;

ສຕຘມ຺ໂມວ ລາເຠນ, ລທ຺ເຘນປິ ນ ນນ຺ທຕີຕິ.

ສຕຘມ຺ມຊາຕກໍ ນວມໍ.

໑໘໐. ທຸທ຺ທທຊາຕກໍ (໒-໓-໑໐)

໕໙. ທຸທ຺ທທໍ ທທມານານໍ, ທຸກ຺ກຣໍ ກມ຺ມ ກຸພ຺ພຕໍ;

ອສນ຺ໂຕ ນານຸກຸພ຺ພນ຺ຕິ, ສຕໍ ຘມ຺ໂມ ທຸຣນ຺ນໂຍ.

໖໐. ຕສ຺ມາ ສຕຎ຺ຈ ອສຕໍ, ນານາ ໂຫຕິ ອິໂຕ ຄຕິ;

ອສນ຺ໂຕ ນິຣຍໍ ຍນ຺ຕິ, ສນ຺ໂຕ ສຄ຺ຄປຣາຍຓາຕິ [ປຣາຍນາ (ສ຺ຍາ. ກ.)].

ທຸທ຺ທທຊາຕກໍ ທສມໍ.

ກລ຺ຍາຓວຄ຺ໂຄ ຕຕິໂຍ.

ຕສ຺ສຸທ຺ທານໍ –

ສຸສມຎ຺ຎມິຄາຘິຠູ ມາຓວໂກ, ວາຣິປຫູຕຣູປາທິຈ຺ຈຸປຏ຺ຐານາ;

ສກຬາຍສຕິນ຺ທຸກປງ຺ກ ປຸນ, ສຕຘມ຺ມ ສຸທຸທ຺ທທເກນ ທສາຕິ.