໑໐. ສິງ຺ຄາລວຄ຺ໂຄ

໒໔໑. ສພ຺ພທາຐິຊາຕກໍ (໒-໑໐-໑)

໑໘໒. ສິງ຺ຄາໂລ ມານຖທ຺ໂຘ ຈ, ປຣິວາເຣນ ອຕ຺ຖິໂກ;

ປາປຸຓິ ມຫຕິໍ ຠູມິໍ, ຣາຊາສິ ສພ຺ພທາຐິນໍ.

໑໘໓. ເອວເມວ ມນຸສ຺ເສສຸ, ໂຍ ໂຫຕິ ປຣິວາຣວາ;

ໂສ ຫິ ຕຕ຺ຖ ມຫາ ໂຫຕິ, ສິງ຺ຄາໂລ ວິຍ ທາຐິນນ຺ຕິ.

ສພ຺ພທາຐິຊາຕກໍ ປຐມໍ.

໒໔໒. ສຸນຂຊາຕກໍ (໒-໑໐-໒)

໑໘໔. ພາໂລ ວຕາຍໍ ສຸນໂຂ, ໂຍ ວຣຕ຺ຕໍ [ໂຍ ຈ ໂຍຕ຺ຕໍ (ກ.)] ນ ຂາທຕິ;

ພນ຺ຘນາ ຈ ປມຸຎ຺ເຈຍ຺ຍ, ອສິໂຕ ຈ ຆຣໍ ວເຊ.

໑໘໕. ອຏ຺ຐິຕໍ ເມ ມນສ຺ມິໍ ເມ, ອໂຖ ເມ ຫທເຍ ກຕໍ;

ກາລຎ຺ຈ ປຏິກງ຺ຂາມິ, ຍາວ ປສ຺ສຸປຕູ ຊໂນ [ປສຸປຕຸຊ຺ຊໂນ (ສ຺ຍາ. ກ.)].

ສຸນຂຊາຕກໍ ທຸຕິຍໍ.

໒໔໓. ຄຸຕ຺ຕິລຊາຕກໍ (໒-໑໐-໓)

໑໘໖. ສຕ຺ຕຕນ຺ຕິໍ ສຸມຘຸຣໍ, ຣາມເຓຍ຺ຍໍ ອວາຈຍິໍ;

ໂສ ມໍ ຣງ຺ຄມ຺ຫິ ອວ຺ເຫຕິ, ສຣຓໍ ເມ ໂຫຫິ ໂກສິຍ.

໑໘໗. ອຫໍ ຕໍ ສຣຓໍ ສມ຺ມ [ອຫໍ ເຕ ສຣຓໍ ໂຫມິ (ວິ. ວ. ໓໒໘)], ອຫມາຈຣິຍປູຊໂກ;

ນ ຕໍ ຊຍິສ຺ສຕິ ສິສ຺ໂສ, ສິສ຺ສມາຈຣິຍ ເຊສ຺ສສີຕິ.

ຄຸຕ຺ຕິລຊາຕກໍ ຕຕິຍໍ.

໒໔໔. ວິຄຕິຈ຺ຉຊາຕກໍ (໒-໑໐-໔)

໑໘໘. ຍໍ ປສ຺ສຕິ ນ ຕໍ ອິຈ຺ຉຕິ, ຍຎ຺ຈ ນ ປສ຺ສຕິ ຕໍ ກິຣິຈ຺ຉຕິ;

ມຎ຺ຎາມິ ຈິຣໍ ຈຣິສ຺ສຕິ, ນ ຫິ ຕໍ ລຈ຺ຉຕິ ຍໍ ສ ອິຈ຺ຉຕິ.

໑໘໙. ຍໍ ລຠຕິ ນ ເຕນ ຕຸສ຺ສຕິ, ຍຎ຺ຈ ປຕ຺ເຖຕິ ລທ຺ຘໍ ຫີເຬຕິ;

ອິຈ຺ຉາ ຫິ ອນນ຺ຕໂຄຈຣາ, ວິຄຕິຈ຺ຉານ [ວີຕິຈ຺ຉານໍ (ສີ. ປີ.)] ນໂມ ກໂຣມເສຕິ.

ວິຄຕິຈ຺ຉ [ວີຕິຈ຺ຉ (ສີ. ປີ.)] ຊາຕກໍ ຈຕຸຕ຺ຖໍ.

໒໔໕. ມູລປຣິຍາຍຊາຕກໍ (໒-໑໐-໕)

໑໙໐. ກາໂລ ຆສຕິ ຠູຕານິ, ສພ຺ພາເນວ ສຫຕ຺ຕນາ;

ໂຍ ຈ ກາລຆໂສ ຠູໂຕ, ສ ຠູຕປຈນິໍ ປຈິ.

໑໙໑. ພຫູນິ ນຣສີສານິ, ໂລມສານິ ພ຺ຣຫານິ ຈ;

ຄີວາສຸ ປຏິມຸກ຺ການິ, ໂກຈິເທເວຕ຺ຖ ກຓ຺ຓວາຕິ.

ມູລປຣິຍາຍຊາຕກໍ ປຎ຺ຈມໍ.

໒໔໖. ພາໂລວາທຊາຕກໍ (໒-໑໐-໖)

໑໙໒. ຫນ຺ຕ຺ວາ ເຉຕ຺ວາ [ຌຕ຺ວາ (ສີ. ປີ.), ຆຕ຺ວາ (ສ຺ຍາ.)] ວຘິຕ຺ວາ ຈ, ເທຕິ ທານໍ ອສຎ຺ຎໂຕ;

ເອທິສໍ ຠຕ຺ຕໍ ຠຸຎ຺ຊມາໂນ, ສ ປາປມຸປລິມ຺ປຕິ [ສ ປາເປນ ອຸປລິປ຺ປຕິ (ສີ. ປີ.)].

໑໙໓. ປຸຕ຺ຕທາຣມ຺ປິ ເຈ ຫນ຺ຕ຺ວາ, ເທຕິ ທານໍ ອສຎ຺ຎໂຕ;

ຠຸຎ຺ຊມາໂນປິ ສປ຺ປຎ຺ໂຎ, ນ ປາປມຸປລິມ຺ປຕີຕິ.

ພາໂລວາທຊາຕກໍ ຉຏ຺ຐໍ.

໒໔໗. ປາທຎ຺ຊລີຊາຕກໍ (໒-໑໐-໗)

໑໙໔. ອທ຺ຘາ ປາທຎ຺ຊລີ ສພ຺ເພ, ປຎ຺ຎາຍ ອຕິໂຣຈຕິ;

ຕຖາ ຫິ ໂອຏ຺ຐໍ ຠຎ຺ຊຕິ, ອຸຕ຺ຕຣິໍ ນູນ ປສ຺ສຕິ.

໑໙໕. ນາຍໍ ຘມ຺ມໍ ອຘມ຺ມໍ ວາ, ອຕ຺ຖານຕ຺ຖຎ຺ຈ ພຸຊ຺ຌຕິ;

ອຎ຺ຎຕ຺ຣ ໂອຏ຺ຐນິພ຺ໂຠຄາ, ນາຍໍ ຊານາຕິ ກິຎ຺ຈນນ຺ຕິ.

ປາທຎ຺ຊລີຊາຕກໍ ສຕ຺ຕມໍ.

໒໔໘. ກິໍສຸໂກປມຊາຕກໍ (໒-໑໐-໘)

໑໙໖. ສພ຺ເພຫິ ກິໍສຸໂກ ທິຏ຺ໂຐ, ກິໍນ຺ເວຕ຺ຖ ວິຈິກິຈ຺ຉຖ;

ນ ຫິ ສພ຺ເພສຸ ຐາເນສຸ, ສາຣຖີ ປຣິປຸຈ຺ຉິໂຕ.

໑໙໗. ເອວໍ ສພ຺ເພຫິ ຎາເຓຫິ, ເຍສໍ ຘມ຺ມາ ອຊານິຕາ;

ເຕ ເວ ຘມ຺ເມສຸ ກງ຺ຂນ຺ຕິ, ກິໍສຸກສ຺ມິໍວ ຠາຕໂຣຕິ.

ກິໍສຸໂກປມຊາຕກໍ ອຏ຺ຐມໍ.

໒໔໙. ສາລກຊາຕກໍ (໒-໑໐-໙)

໑໙໘. ເອກປຸຕ຺ຕໂກ ຠວິສ຺ສສິ, ຕ຺ວຎ຺ຈ ໂນ ເຫສ຺ສສິ ອິສ຺ສໂຣ ກຸເລ;

ໂອໂຣຫ ທຸມສ຺ມາ ສາລກ, ເອຫິ ທານິ ຆຣກໍ ວເຊມເສ.

໑໙໙. ນນຸ ມໍ ສຸຫທໂຍຕິ [ນນຸ ມໍ ຫທເຍຕິ (ສີ. ປີ.)] ມຎ຺ຎສິ, ຍຎ຺ຈ ມໍ ຫນສິ ເວຬຸຍຏ຺ຐິຍາ;

ປກ຺ກມ຺ພວເນ ຣມາມເສ, ຄຈ຺ຉ ຕ຺ວໍ ຆຣກໍ ຍຖາສຸຂນ຺ຕິ.

ສາລກຊາຕກໍ ນວມໍ.

໒໕໐. ກປິຊາຕກໍ (໒-໑໐-໑໐)

໒໐໐. ອຍໍ ອິສີ ອຸປສມສໍຍເມ ຣໂຕ, ສ ຕິຏ຺ຐຕິ [ສນ຺ຕິຏ຺ຐຕິ (ສີ. ປີ.)] ສິສິຣຠເຍນ ອຏ຺ຏິໂຕ;

ຫນ຺ທ ອຍໍ ປວິສຕຸມໍ ອຄາຣກໍ, ວິເນຕຸ ສີຕໍ ທຣຖຎ຺ຈ ເກວລໍ.

໒໐໑. ນາຍໍ ອິສີ ອຸປສມສໍຍເມ ຣໂຕ, ກປີ ອຍໍ ທຸມວຣສາຂໂຄຈໂຣ;

ໂສ ທູສໂກ ໂຣສໂກ ຈາປິ ຊມ຺ໂມ, ສເຈວເຊມມ຺ປິ [ສເຈ + ອາວເຊ + ອິມມ຺ປິ] ທູເສຍ຺ຍຄາຣນ຺ຕິ [ທູສເຍ ຆຣນ຺ຕິ (ສີ. ສ຺ຍາ. ປີ.)].

ກປິຊາຕກໍ ທສມໍ.

ສິງ຺ຄາລວຄ຺ໂຄ ທສໂມ.

ຕສ຺ສຸທ຺ທານໍ –

ອຖ ຣາຊາ ສິງ຺ຄາລວໂຣ ສຸນໂຂ, ຕຖາ ໂກສິຍ ອິຈ຺ຉຕິ ກາລຆໂສ;

ອຖ ທານວໂຣຏ຺ຐປິ ສາຣຖິນາ, ປຸນມ຺ພວນຎ຺ຈ ສິສິຣກປິ ທສາຕິ.

ອຖ ວຄ຺ຄຸທ຺ທານໍ –

ທຬ຺ຫຎ຺ຈ ວຄ຺ຄໍ ອປເຣນ ສນ຺ຖວໍ, ກລ຺ຍາຓວຄ຺ຄາສທິໂສ ຈ ຣູຫກໍ;

ນຕໍທຬ຺ຫ ພີຣຓຖມ຺ຠກໍ ປຸນ, ກາສາວຸປາຫນ ສິງ຺ຄາລເກນ ທສາຕິ.

ທຸກນິປາຕໍ ນິຏ຺ຐິຕໍ.