໕໓໐. ສໍກິຈ຺ຈຊາຕກໍ (໒)

໖໙. ‘‘ທິສ຺ວາ ນິສິນ຺ນໍ ຣາຊານໍ, ພ຺ຣຫ຺ມທຕ຺ຕໍ ຣເຖສຠໍ;

ອຖສ຺ສ ປຏິເວເທສິ, ຍສ຺ສາສິ ອນຸກມ຺ປໂກ.

໗໐. ‘‘ສໍກິຈ຺ຈາຍໍ ອນຸປ຺ປຕ຺ໂຕ, ອິສີນໍ ສາຘຸສມ຺ມໂຕ;

ຕຣມານຣູໂປ ນິຍ຺ຍາຫິ, ຂິປ຺ປໍ ປສ຺ສ ມເຫສິນໍ.

໗໑. ‘‘ຕໂຕ ຈ ຣາຊາ ຕຣມາໂນ, ຍຸຕ຺ຕມາຣຸຍ຺ຫ ສນ຺ທນໍ;

ມິຕ຺ຕາມຈ຺ຈປຣິພ຺ຍູຬ຺ໂຫ [ປຣິພ຺ພູຬ຺ໂຫ (ສີ. ປີ.)], ອຄມາສິ ຣເຖສໂຠ.

໗໒. ‘‘ນິກ຺ຂິປ຺ປ ປຎ຺ຈ ກກຸຘານິ, ກາສີນໍ ຣຏ຺ຐວຑ຺ຒໂນ;

ວາຬພີຊນິ [ວາ ຬວີຊນີ (ສີ. ປີ.)] ມຸຓ຺ຫີສໍ, ຂຄ຺ຄໍ ຉຕ຺ຕຎ຺ຈຸປາຫນໍ;

໗໓. ‘‘ໂອຣຸຍ຺ຫ ຣາຊາ ຍານມ຺ຫາ, ຐປຍິຕ຺ວາ ປຏິຈ຺ຉທໍ;

ອາສີນໍ ທາຍປສ຺ສສ຺ມິໍ, ສໍກິຈ຺ຈມຸປສງ຺ກມິ.

໗໔. ‘‘ອຸປສງ຺ກມິຕ຺ວາ ໂສ ຣາຊາ, ສມ຺ໂມທິ ອິສິນາ ສຫ;

ຕໍ ກຖໍ ວີຕິສາເຣຕ຺ວາ, ເອກມນ຺ຕໍ ອຸປາວິສິ.

໗໕. ‘‘ເອກມນ຺ຕໍ ນິສິນ຺ໂນວ, ອຖ ກາລໍ ອມຎ຺ຎຖ;

ຕໂຕ ປາປານິ ກມ຺ມານິ, ປຸຈ຺ຉິຕຸໍ ປຏິປຊ຺ຊຖ.

໗໖. ‘‘ອິສິໍ ປຸຈ຺ຉາມ [ປຸຈ຺ຉາມິ (ສີ. ປີ.)] ສໍກິຈ຺ຈໍ, ອິສີນໍ ສາຘຸສມ຺ມຕໍ;

ອາສີນໍ ທາຍປສ຺ສສ຺ມິໍ, ອິສິສງ຺ຆປຸຣກ຺ຂຕໍ [ປຸຣກ຺ຂິຕໍ (ກ.)].

໗໗. ‘‘ກໍ ຄຕິໍ ເປຈ຺ຈ ຄຈ຺ຉນ຺ຕິ, ນຣາ ຘມ຺ມາຕິຈາຣິໂນ;

ອຕິຈິຓ຺ໂຓ ມຍາ ຘມ຺ໂມ, ຕໍ ເມ ອກ຺ຂາຫິ ປຸຈ຺ຉິໂຕ.

໗໘. ‘‘ອິສີ ອວຈ ສໍກິຈ຺ໂຈ, ກາສີນໍ ຣຏ຺ຐວຑ຺ຒນໍ;

ອາສີນໍ ທາຍປສ຺ສສ຺ມິໍ, ມຫາຣາຊ ສຸໂຓຫິ ເມ.

໗໙. ‘‘ອຸປ຺ປເຖນ ວຊນ຺ຕສ຺ສ, ໂຍ ມຄ຺ຄມນຸສາສຕິ;

ຕສ຺ສ ເຈ ວຈນໍ ກຍິຣາ, ນາສ຺ສ ມຄ຺ເຄຍ຺ຍ ກຓ຺ຏໂກ.

໘໐. ‘‘ອຘມ຺ມໍ ປຏິປນ຺ນສ຺ສ, ໂຍ ຘມ຺ມມນຸສາສຕິ;

ຕສ຺ສ ເຈ ວຈນໍ ກຍິຣາ, ນ ໂສ ຄຈ຺ເຉຍ຺ຍ ທຸຄ຺ຄຕິໍ.

໘໑. ‘‘ຘມ຺ໂມ ປໂຖ ມຫາຣາຊ, ອຘມ຺ໂມ ປນ ອຸປ຺ປໂຖ;

ອຘມ຺ໂມ ນິຣຍໍ ເນຕິ, ຘມ຺ໂມ ປາເປຕິ ສຸຄ຺ຄຕິໍ.

໘໒. ‘‘ອຘມ຺ມຈາຣິໂນ ຣາຊ, ນຣາ ວິສມຊີວິໂນ;

ຍໍ ຄຕິໍ ເປຈ຺ຈ ຄຈ຺ຉນ຺ຕິ, ນິຣເຍ ເຕ ສຸໂຓຫິ ເມ.

໘໓. ‘‘ສຎ຺ຊີໂວ ກາຬສຸຕ຺ໂຕ ຈ, ສງ຺ຆາໂຕ [ສງ຺ຂາໂຏ (ສ຺ຍາ. ກ.)] ທ຺ເວ ຈ ໂຣຣຸວາ;

ອຖາປໂຣ ມຫາວີຈິ, ຕາປໂນ [ຕປໂນ (ສີ. ປີ.)] ຈ ປຕາປໂນ.

໘໔. ‘‘ອິຈ຺ເຈເຕ ອຏ຺ຐ ນິຣຍາ, ອກ຺ຂາຕາ ທຸຣຕິກ຺ກມາ;

ອາກິຓ຺ຓາ ລຸທ຺ທກມ຺ເມຫິ, ປຈ຺ເຈກາ ໂສຬສຸສ຺ສທາ.

໘໕. ‘‘ກທຣິຍຕາປນາ [ກທຣິຍຕປນາ (ສີ. ປີ.)] ໂຆຣາ, ອຈ຺ຈິມນ຺ໂຕ [ອຈ຺ຈິມນ຺ຕາ (ປີ.)] ມຫພ຺ຠຍາ;

ໂລມຫໍສນຣູປາ ຈ, ເຠສ຺ມາ ປຏິຠຍາ ທຸຂາ.

໘໖. ‘‘ຈຕຸກ຺ກຓ຺ຓາ ຈຕຸທ຺ວາຣາ, ວິຠຕ຺ຕາ ຠາຄໂສ ມິຕາ;

ອໂຍປາກາຣປຣິຍນ຺ຕາ, ອຍສາ ປຏິກຸຊ຺ຊິຕາ.

໘໗. ‘‘ເຕສໍ ອໂຍມຍາ ຠູມິ, ຊລິຕາ ເຕຊສາ ຍຸຕາ;

ສມນ຺ຕາ ໂຍຊນສຕໍ, ຜຸຏາ [ຜຣິຕ຺ວາ (ອ. ນິ. ໓.໓໖; ເປ. ວ. ໗໑)] ຕິຏ຺ຐນ຺ຕິ ສພ຺ພທາ.

໘໘. ‘‘ເອເຕ ປຕນ຺ຕິ ນິຣເຍ, ອຸທ຺ຘໍປາທາ ອວໍສິຣາ;

ອິສີນໍ ອຕິວຕ຺ຕາໂຣ, ສຎ຺ຎຕານໍ ຕປສ຺ສິນໍ.

໘໙. ‘‘ເຕ ຠູນຫຸໂນ ປຈ຺ຈນ຺ຕິ, ມຈ຺ຉາ ພິລກຕາ ຍຖາ;

ສໍວຈ຺ຉເຣ ອສງ຺ເຂຍ຺ເຍ, ນຣາ ກິພ຺ພິສກາຣິໂນ.

໙໐. ‘‘ຑຍ຺ຫມາເນນ ຄຕ຺ເຕນ, ນິຈ຺ຈໍ ສນ຺ຕຣພາຫິຣໍ;

ນິຣຍາ ນາຘິຄຈ຺ຉນ຺ຕິ, ທ຺ວາຣໍ ນິກ຺ຂມເນສິໂນ.

໙໑. ‘‘ປຸຣຕ຺ຖິເມນ ຘາວນ຺ຕິ, ຕໂຕ ຘາວນ຺ຕິ ປຈ຺ຉໂຕ;

ອຸຕ຺ຕເຣນປິ ຘາວນ຺ຕິ, ຕໂຕ ຘາວນ຺ຕິ ທກ຺ຂິຓໍ;

ຍໍ ຍຎ຺ຫິ ທ຺ວາຣໍ ຄຈ຺ຉນ຺ຕິ, ຕໍ ຕເທວ ປິຘີຍເຣ [ປິຖິຍ຺ຍຕິ (ສີ.), ປິຖິຍ຺ຍເຣ (ສ຺ຍາ.), ປິຖີຍເຣ (ປີ.)].

໙໒. ‘‘ພຫູນິ ວສ຺ສສຫສ຺ສານິ, ຊນາ ນິຣຍຄາມິໂນ;

ພາຫາ ປຄ຺ຄຍ຺ຫ ກນ຺ທນ຺ຕິ, ປຕ຺ວາ ທຸກ຺ຂໍ ອນປ຺ປກໍ.

໙໓. ‘‘ອາສີວິສໍວ ກຸປິຕໍ, ເຕຊສ຺ສິໍ ທຸຣຕິກ຺ກມໍ;

ນ ສາຘຸຣູເປ ອາສີເທ, ສຎ຺ຎຕານໍ ຕປສ຺ສິນໍ.

໙໔. ‘‘ອຕິກາໂຍ ມຫິສ຺ສາໂສ, ອຊ຺ຊຸໂນ ເກກກາຘິໂປ;

ສຫສ຺ສພາຫຸ ອຸຈ຺ຉິນ຺ໂນ, ອິສິມາສຊ຺ຊ ໂຄຕມໍ.

໙໕. ‘‘ອຣຊໍ ຣຊສາ ວຈ຺ຉໍ, ກິສໍ ອວກິຣິຍ ທຓ຺ຑກີ;

ຕາໂລວ ມູລໂຕ [ສມູໂລ (ກ.)] ຉິນ຺ໂນ, ສ ຣາຊາ ວິຠວງ຺ຄໂຕ.

໙໖. ‘‘ອຸປຫຈ຺ຈ ມນໍ ມຊ຺ໂຌ [ເມຊ຺ໂຌ (ກ.)], ມາຕງ຺ຄສ຺ມິໍ ຍສສ຺ສິເນ;

ສປາຣິສຊ຺ໂຊ ອຸຈ຺ຉິນ຺ໂນ, ມຊ຺ຌາຣຎ຺ຎໍ ຕທາ ອຫຸ.

໙໗. ‘‘ກຓ຺ຫທີປາຍນາສຊ຺ຊ, ອິສິໍ ອນ຺ຘກເວຓ຺ຑໂຍ [ເວຓ຺ຫຸໂຍ (ສີ. ປີ.), ປິຓ຺ຫໂຍ (?)];

ອຎ຺ໂຎຎ຺ຎໍ [ອຎ຺ຎມຎ຺ຎໍ (ສີ. ປີ.)] ມຸສລາ [ມຸສເລ (ສີ. ສ຺ຍາ. ປີ.)] ຫນ຺ຕ຺ວາ, ສມ຺ປຕ຺ຕາ ຍມສາຘນໍ [ຍມສາທນໍ (ປີ.)].

໙໘. ‘‘ອຖາຍໍ ອິສິນາ ສຕ຺ໂຕ, ອນ຺ຕລິກ຺ຂຈໂຣ ປຸເຣ;

ປາເວກ຺ຂິ ປຖວິໍ [ປຐວິໍ (ສີ. ສ຺ຍາ. ປີ.)] ເຈຈ຺ໂຈ, ຫີນຕ຺ໂຕ ປຕ຺ຕປຣິຍາຍໍ.

໙໙. ‘‘ຕສ຺ມາ ຫິ ຉນ຺ທາຄມນໍ, ນປ຺ປສໍສນ຺ຕິ ປຓ຺ຑິຕາ;

ອທຸຏ຺ຐຈິຕ຺ໂຕ ຠາເສຍ຺ຍ, ຄິຣໍ ສຈ຺ຈູປສໍຫິຕໍ.

໑໐໐. ‘‘ມນສາ ເຈ ປທຸຏ຺ເຐນ, ໂຍ ນໂຣ ເປກ຺ຂເຕ ມຸນິໍ;

ວິຊ຺ຊາຈຣຓສມ຺ປນ຺ນໍ, ຄນ຺ຕາ ໂສ ນິຣຍໍ ອໂຘ.

໑໐໑. ‘‘ເຍ ວຸຑ຺ເຒ [ວທ຺ເຘ (ກ.)] ປຣິຠາສນ຺ຕິ, ຜຣຸສູປກ຺ກມາ ຊນາ;

ອນປຈ຺ຈາ ອທາຍາທາ, ຕາລວຕ຺ຖຸ [ຕາລວຕ຺ຖູ (ສ຺ຍາ.), ຕາລາວຕ຺ຖຸ (ປີ.)] ຠວນ຺ຕິ ເຕ.

໑໐໒. ‘‘ໂຍ ຈ ປພ຺ພຊິຕໍ ຫນ຺ຕິ, ກຕກິຈ຺ຈໍ ມເຫສິນໍ;

ສ ກາຬສຸຕ຺ເຕ ນິຣເຍ, ຈິຣຣຕ຺ຕາຍ ປຈ຺ຈຕິ.

໑໐໓. ‘‘ໂຍ ຈ ຣາຊາ ອຘມ຺ມຏ຺ໂຐ, ຣຏ຺ຐວິທ຺ຘໍສໂນ ມໂຄ [ຈຸໂຕ (ສີ.)];

ຕາປຍິຕ຺ວາ ຊນປທໍ, ຕາປເນ ເປຈ຺ຈ ປຈ຺ຈຕິ.

໑໐໔. ‘‘ໂສ ຈ ວສ຺ສສຫສ຺ສານິ [ວສ຺ສສຫສ຺ສານໍ (ສີ. ສ຺ຍາ.)], ສຕໍ ທິພ຺ພານິ ປຈ຺ຈຕິ;

ອຈ຺ຈິສງ຺ຆປເຣໂຕ ໂສ, ທຸກ຺ຂໍ ເວເທຕິ ເວທນໍ.

໑໐໕. ‘‘ຕສ຺ສ ອຄ຺ຄິສິຂາ ກາຍາ, ນິຈ຺ຉຣນ຺ຕິ ປຠສ຺ສຣາ;

ເຕໂຊຠກ຺ຂສ຺ສ ຄຕ຺ຕານິ, ໂລເມຫິ ຈ [ໂລມຄ຺ເຄຫິ ຈ (ສີ. ສ຺ຍາ. ປີ.)] ນເຂຫິ ຈ.

໑໐໖. ‘‘ຑຍ຺ຫມາເນນ ຄຕ຺ເຕນ, ນິຈ຺ຈໍ ສນ຺ຕຣພາຫິຣໍ;

ທຸກ຺ຂາຠິຕຸນ຺ໂນ ນທຕິ, ນາໂຄ ຕຸຕ຺ຕຏ຺ຏິໂຕ [ຕຸຕ຺ຕທ຺ທິໂຕ (ສີ.)] ຍຖາ.

໑໐໗. ‘‘ໂຍ ໂລຠາ ປິຕຣໍ ຫນ຺ຕິ, ໂທສາ ວາ ປຸຣິສາຘໂມ;

ສ ກາຬສຸຕ຺ເຕ ນິຣເຍ, ຈິຣຣຕ຺ຕາຍ ປຈ຺ຈຕິ.

໑໐໘. ‘‘ສ ຕາທິໂສ ປຈ຺ຈຕິ ໂລຫກຸມ຺ຠິຍໍ, ປກ຺ກຎ຺ຈ ສຕ຺ຕີຫິ ຫນນ຺ຕິ ນິຕ຺ຕຈໍ;

ອນ຺ຘໍ ກຣິຕ຺ວາ ມຸຕ຺ຕກຣີສຠກ຺ຂໍ, ຂາເຣ ນິມຸຊ຺ຊນ຺ຕິ ຕຖາວິຘໍ ນຣໍ.

໑໐໙. ‘‘ຕຕ຺ຕໍ ປກ຺ກຸຖິຕມໂຍຄຸຬຎ຺ຈ [ປກ຺ກຸຘິຕມໂຍຄຸຬຎ຺ຈ (ກ.)], ທີເຆ ຈ ຜາເລ ຈິຣຣຕ຺ຕຕາປິເຕ;

ວິກ຺ຂມ຺ຠມາທາຍ ວິພນ຺ຘ [ວິພທ຺ຘ (ສີ.), ວິຠຊ຺ຊ (ສ຺ຍາ. ປີ.)] ຣຊ຺ຊຸຠິ, ວິວເຏ ມຸເຂ ສມ຺ປວິສນ຺ຕິ [ສໍຈວນ຺ຕິ (ສີ. ສ຺ຍາ. ປີ.)] ຣກ຺ຂສາ.

໑໑໐. ‘‘ສາມາ ຈ ໂສຓາ ສພລາ ຈ ຄິຊ຺ຌາ, ກາໂກຬສງ຺ຆາ ຈ ທິຊາ ອໂຍມຸຂາ;

ສງ຺ຄມ຺ມ ຂາທນ຺ຕິ ວິປ຺ຜນ຺ທມານໍ, ຊິວ຺ຫໍ ວິຠຊ຺ຊ ວິຆາສໍ ສໂລຫິຕໍ.

໑໑໑. ‘‘ຕໍ ທຑ຺ຒຕາລໍ ປຣິຠິນ຺ນຄຕ຺ຕໍ, ນິປ຺ໂປຖຍນ຺ຕາ ອນຸວິຈຣນ຺ຕິ ຣກ຺ຂສາ;

ຣຕີ ຫິ ເນສໍ ທຸຂິໂນ ປນີຕເຣ, ເອຕາທິສສ຺ມິໍ ນິຣເຍ ວສນ຺ຕິ;

ເຍ ເກຈິ ໂລເກ ອິຘ ເປຕ຺ຕິຆາຕິໂນ.

໑໑໒. ‘‘ປຸຕ຺ໂຕ ຈ ມາຕຣໍ ຫນ຺ຕ຺ວາ, ອິໂຕ ຄນ຺ຕ຺ວາ ຍມກ຺ຂຍໍ;

ຠຸສມາປຊ຺ຊເຕ ທຸກ຺ຂໍ, ອຕ຺ຕກມ຺ມຜລູປໂຄ.

໑໑໓. ‘‘ອມນຸສ຺ສາ ອຕິພລາ, ຫນ຺ຕາຣໍ ຊນຍນ຺ຕິຍາ;

ອໂຍມເຍຫິ ວາເຬຫິ [ຜາເລຫິ (ປີ.)], ປີຬຍນ຺ຕິ ປຸນປ຺ປຸນໍ.

໑໑໔. ‘‘ຕມສ຺ສວໍ [ຕໍ ປສ຺ສວໍ (ສີ. ສ຺ຍາ.), ຕໍ ປສ຺ສຸຕໍ (ປີ.)] ສກາ ຄຕ຺ຕາ, ຣຸຫິຣໍ [ຣຸຘິຣໍ (ສີ. ສ຺ຍາ.)] ອຕ຺ຕສມ຺ຠວໍ;

ຕມ຺ພໂລຫວິລີນໍວ, ຕຕ຺ຕໍ ປາເຍນ຺ຕິ ມຕ຺ຕິຆໍ [ມຕ຺ຕິຍໍ (ສີ.)].

໑໑໕. ‘‘ຊິຄຸຈ຺ຉໍ ກຸຓປໍ ປູຕິໍ, ທຸຄ຺ຄນ຺ຘໍ ຄູຖກທ຺ທມໍ;

ປຸພ຺ພໂລຫິຕສງ຺ກາສໍ, ຣຫທໂມຄຍ຺ຫ [ຣຫໂທຄ຺ຄຍ຺ຫ (ກ.)] ຕິຏ຺ຐຕິ.

໑໑໖. ‘‘ຕເມນໍ ກິມໂຍ ຕຕ຺ຖ, ອຕິກາຍາ ອໂຍມຸຂາ;

ຉວິໍ ເຠຕ຺ວານ [ເຉຕ຺ວານ (ສີ. ປີ.)] ຂາທນ຺ຕິ, ສໍຄິທ຺ຘາ [ປຄິທ຺ຘາ (ສີ. ສ຺ຍາ. ປີ.)] ມໍສໂລຫິເຕ.

໑໑໗. ‘‘ໂສ ຈ ຕໍ ນິຣຍໍ ປຕ຺ໂຕ, ນິມຸຄ຺ໂຄ ສຕໂປຣິສໍ;

ປູຕິກໍ ກຸຓປໍ ວາຕິ, ສມນ຺ຕາ ສຕໂຍຊນໍ.

໑໑໘. ‘‘ຈກ຺ຂຸມາປິ ຫິ ຈກ຺ຂູຫິ, ເຕນ ຄນ຺ເຘນ ຊີຍຕິ;

ເອຕາທິສໍ ພ຺ຣຫ຺ມທຕ຺ຕ, ມາຕຸໂຆ ລຠເຕ ທຸຂໍ.

໑໑໙. ‘‘ຂຸຣຘາຣມນຸກ຺ກມ຺ມ, ຕິກ຺ຂໍ ທຸຣຠິສມ຺ຠວໍ;

ປຕນ຺ຕິ ຄພ຺ຠປາຕິໂຍ [ຄພ຺ຠປາຕິນິໂຍ (ສີ. ສ຺ຍາ. ປີ.)], ທຸຄ຺ຄໍ ເວຕຣຓິໍ [ເວຕ຺ຕຣຓິໍ (ສ຺ຍາ. ກ.)] ນທິໍ.

໑໒໐. ‘‘ອໂຍມຍາ ສິມ຺ພລິໂຍ, ໂສຬສງ຺ຄຸລກຓ຺ຏກາ;

ອຸຠໂຕ ອຠິລມ຺ພນ຺ຕິ, ທຸຄ຺ຄໍ ເວຕຣຓິໍ [ເວຕ຺ຕຣຓິໍ (ສ຺ຍາ. ກ.)] ນທິໍ.

໑໒໑. ‘‘ເຕ ອຈ຺ຈິມນ຺ໂຕ ຕິຏ຺ຐນ຺ຕິ, ອຄ຺ຄິກ຺ຂນ຺ຘາວ ອາຣກາ;

ອາທິຕ຺ຕາ ຊາຕເວເທນ, ອຸທ຺ຘໍ ໂຍຊນມຸຄ຺ຄຕາ.

໑໒໒. ‘‘ເອເຕ ວຊນ຺ຕິ [ສຊນ຺ຕິ (ສີ. ປີ.), ປຊ຺ຊນ຺ຕິ (ສ຺ຍາ.)] ນິຣເຍ, ຕຕ຺ເຕ ຕິຂິຓກຓ຺ຏເກ;

ນາຣິໂຍ ຈ ອຕິຈາຣາ [ອຕິຈາຣິນິໂຍ (ສີ. ສ຺ຍາ. ປີ.)], ນຣາ ຈ ປຣທາຣຄູ.

໑໒໓. ‘‘ເຕ ປຕນ຺ຕິ ອໂຘກ຺ຂນ຺ຘາ, ວິວຕ຺ຕາ ວິຫຕາ ປຸຖູ;

ສຍນ຺ຕິ ວິນິວິທ຺ຘງ຺ຄາ, ທີຆໍ ຊຄ຺ຄນ຺ຕິ ສພ຺ພທາ [ສໍວຣິໍ (ສີ. ປີ.)].

໑໒໔. ‘‘ຕໂຕ ຣຕ຺ຍາ ວິວສາເນ [ວິວສເນ (ສີ. ສ຺ຍາ. ປີ.)], ມຫຕິໍ ປພ຺ພຕູປມໍ;

ໂລຫກຸມ຺ຠິໍ ປວຊ຺ຊນ຺ຕິ, ຕຕ຺ຕໍ ອຄ຺ຄິສມູທກໍ.

໑໒໕. ‘‘ເອວໍ ທິວາ ຈ ຣຕ຺ໂຕ ຈ, ທຸສ຺ສີລາ ໂມຫປາຣຸຕາ;

ອນຸໂຠນ຺ຕິ ສກໍ ກມ຺ມໍ, ປຸພ຺ເພ ທຸກ຺ກຏມຕ຺ຕໂນ.

໑໒໖. ‘‘ຍາ ຈ ຠຣິຍາ ຘນກ຺ກີຕາ, ສາມິກໍ ອຕິມຎ຺ຎຕິ;

ສສ຺ສຸໍ ວາ ສສຸຣໍ ວາປິ, ເຊຏ຺ຐໍ ວາປິ ນນນ຺ທຣໍ [ນນນ຺ທນໍ (ສ຺ຍາ. ກ.)].

໑໒໗. ‘‘ຕສ຺ສາ ວງ຺ເກນ ຊິວ຺ຫຄ຺ຄໍ, ນິພ຺ພຫນ຺ຕິ ສພນ຺ຘນໍ;

ສ ພ຺ຍາມມຕ຺ຕໍ ກິມິນໍ, ຊິວ຺ຫໍ ປສ຺ສຕິ ອຕ຺ຕນິ [ອຕ຺ຕໂນ (ສີ. ສ຺ຍາ.)];

ວິຎ຺ຎາເປຕຸໍ ນ ສກ຺ໂກຕິ, ຕາປເນ ເປຈ຺ຈ ປຈ຺ຈຕິ.

໑໒໘. ‘‘ໂອຣພ຺ຠິກາ ສູກຣິກາ, ມຈ຺ຉິກາ ມິຄພນ຺ຘກາ;

ໂຈຣາ ໂຄຆາຕກາ ລຸທ຺ທາ, ອວຓ຺ເຓ ວຓ຺ຓກາຣກາ.

໑໒໙. ‘‘ສຕ຺ຕີຫິ ໂລຫກູເຏຫິ, ເນຕ຺ຕິໍເສຫິ ອຸສູຫິ ຈ;

ຫຎ຺ຎມານາ ຂາຣນທິໍ, ປປຕນ຺ຕິ [ສມ຺ປຕນ຺ຕິ (ກ.)] ອວໍສິຣາ.

໑໓໐. ‘‘ສາຍໍ ປາໂຕ ກູຏກາຣີ, ອໂຍກູເຏຫິ ຫຎ຺ຎຕິ;

ຕໂຕ ວນ຺ຕໍ ທຸຣຕ຺ຕານໍ, ປເຣສໍ ຠຸຎ຺ຊເຣ [ຠຸຎ຺ຊເຕ (ສີ. ສ຺ຍາ. ປີ.)] ສທາ.

໑໓໑. ‘‘ຘງ຺ກາ ເຠຣຓ຺ຑກາ [ເຠທຓ຺ຑກາ (ກ.)] ຄິຊ຺ຌາ, ກາໂກຬາ ຈ ອໂຍມຸຂາ;

ວິປ຺ຜນ຺ທມານໍ ຂາທນ຺ຕິ, ນຣໍ ກິພ຺ພິສກາຣກໍ [ກິພ຺ພິສກາຣິນໍ (ປີ.)].

໑໓໒. ‘‘ເຍ ມິເຄນ ມິຄໍ ຫນ຺ຕິ, ປກ຺ຂິໍ ວາ ປນ ປກ຺ຂິນາ;

ອສນ຺ໂຕ ຣຊສາ ຉນ຺ນາ, ຄນ຺ຕາ [ຄຕາ (ກ.)] ເຕ ນິຣຍຸສ຺ສທໍ [ນິຣຍໍ ອໂຘ (ປີ.)].

໑໓໓. ‘‘ສນ຺ໂຕ ຈ [ສນ຺ໂຕວ (ສ຺ຍາ.)] ອຸທ຺ຘໍ ຄຈ຺ຉນ຺ຕິ, ສຸຈິຓ຺ເຓນິຘ ກມ຺ມຸນາ;

ສຸຈິຓ຺ຓສ຺ສ ຜລໍ ປສ຺ສ, ສອິນ຺ທາ [ສຫິນ຺ທາ (ສີ.)] ເທວາ ສພ຺ຣຫ຺ມກາ.

໑໓໔. ‘‘ຕໍ ຕໍ ພ຺ຣູມິ ມຫາຣາຊ, ຘມ຺ມໍ ຣຏ຺ຐປຕີ ຈຣ;

ຕຖາ [ຕຖາ ຕຖາ (ສີ. ສ຺ຍາ. ປີ.)] ຣາຊ ຈຣາຫິ ຘມ຺ມໍ, ຍຖາ ຕໍ ສຸຈິຓ຺ຓໍ ນານຸຕປ຺ເປຍ຺ຍ ປຈ຺ຉາ’’ຕິ.

ສໍກິຈ຺ຈຊາຕກໍ ທຸຕິຍໍ.

ສຏ຺ຐິນິປາຕໍ ນິຏ຺ຐິຕໍ.