໕໑໓. ຊຍທ຺ທິສຊາຕກໍ (໓)

໖໔. ຈິຣສ຺ສໍ ວຕ ເມ ອຸທປາທິ ອຊ຺ຊ, ຠກ຺ໂຂ ມຫາ ສຕ຺ຕມິຠຕ຺ຕກາເລ;

ກຸໂຕສິ ໂກ ວາສິ ຕທິງ຺ຆ ພ຺ຣູຫິ, ອາຈິກ຺ຂ ຊາຕິໍ ວິທິໂຕ ຍຖາສິ.

໖໕. ປຎ຺ຈາລຣາຊາ ມິຄວໍ ປວິຏ຺ໂຐ, ຊຍທ຺ທິໂສ ນາມ ຍທິສ຺ສຸໂຕ ເຕ;

ຈຣາມິ ກຈ຺ຉານິ ວນານິ ຈາຫໍ, ປສທໍ ອິມໍ ຂາທ ມມຊ຺ຊ ມຸຎ຺ຈ.

໖໖. ເສເນວ ຕ຺ວໍ ປຓສິ ສສ຺ສມາໂນ [ສຍ຺ຫມາໂນ (ສ຺ຍາ. ກ.)], ມເມສ ຠກ຺ໂຂ ປສໂທ ຍໍ ວເທສິ;

ຕໍ ຂາທິຍານ ປສທໍ ຊິຆຎ຺ຎໍ [ຊິຆຈ຺ຉໍ (?)], ຂາທິສ຺ສໍ ປຈ຺ຉາ ນ ວິລາປກາໂລ.

໖໗. ນ ຈຕ຺ຖິ ໂມກ຺ໂຂ ມມ ນິກ຺ກເຍນ [ວິກ຺ກເຍນ (ສີ.)], ຄນ຺ຕ຺ວານ ປຈ຺ຈາຄມນາຍ ປຓ຺ເຫ;

ຕໍ ສງ຺ກຣໍ [ສງ຺ຄຣໍ (ສີ. ສ຺ຍາ. ປີ.)] ພ຺ຣາຫ຺ມຓສ຺ສປ຺ປທາຍ, ສຈ຺ຈານຸຣກ຺ຂີ ປຸນຣາວຊິສ຺ສໍ.

໖໘. ກິໍ ກມ຺ມຊາຕໍ ອນຸຕປ຺ປເຕ ຕ຺ວໍ [ອນຸຕປ຺ປຕີ ຕໍ (ສີ. ປີ.)], ປຕ຺ຕໍ ສມີປໍ ມຣຓສ຺ສ ຣາຊ;

ອາຈິກ຺ຂ ເມ ຕໍ ອປິ ສກ຺ກຸເຓມຸ, ອນຸຊານິຕຸໍ ອາຄມນາຍ ປຓ຺ເຫ.

໖໙. ກຕາ ມຍາ ພ຺ຣາຫ຺ມຓສ຺ສ ຘນາສາ, ຕໍ ສງ຺ກຣໍ ປຏິມຸກ຺ກໍ ນ ມຸຕ຺ຕໍ;

ຕໍ ສງ຺ກຣໍ ພ຺ຣາຫ຺ມຓສ຺ສປ຺ປທາຍ, ສຈ຺ຈານຸຣກ຺ຂີ ປຸນຣາວຊິສ຺ສໍ.

໗໐. ຍາ ເຕ ກຕາ ພ຺ຣາຫ຺ມຓສ຺ສ ຘນາສາ, ຕໍ ສງ຺ກຣໍ ປຏິມຸກ຺ກໍ ນ ມຸຕ຺ຕໍ;

ຕໍ ສງ຺ກຣໍ ພ຺ຣາຫ຺ມຓສ຺ສປ຺ປທາຍ, ສຈ຺ຈານຸຣກ຺ຂີ ປຸນຣາວຊສ຺ສຸ.

໗໑. ມຸຕ຺ໂຕ ຈ ໂສ ໂປຣິສາທສ຺ສ [ປຸຣິສາທສ຺ສ (ປີ.)] ຫຕ຺ຖາ, ຄນ຺ຕ຺ວາ ສກໍ ມນ຺ທິຣໍ ກາມກາມີ;

ຕໍ ສງ຺ກຣໍ ພ຺ຣາຫ຺ມຓສ຺ສປ຺ປທາຍ, ອາມນ຺ຕຍີ ປຸຕ຺ຕມລີນສຕ຺ຕໍ [ສຕ຺ຕຸໍ (ສ຺ຍາ. ປີ. ກ.)].

໗໒. ອຊ຺ເຊວ ຣຊ຺ຊໍ ອຠິສິຎ຺ຈຍສ຺ສຸ, ຘມ຺ມໍ ຈຣ ເສສຸ ປເຣສຸ ຈາປິ;

ອຘມ຺ມກາໂຣ ຈ ເຕ ມາຫຸ ຣຏ຺ເຐ, ຄຈ຺ຉາມຫໍ ໂປຣິສາທສ຺ສ ຎຕ຺ເຕ [ຎນ຺ເຕ (ສ຺ຍາ.)].

໗໓. ກິໍ ກມ຺ມ ກຸພ຺ພໍ ຕວ ເທວ ປາວ [ເທວປາເທ (ສີ. ສ຺ຍາ. ປີ.)], ນາຣາຘຍີ ຕໍ ຕທິຈ຺ຉາມິ ໂສຕຸໍ;

ຍມຊ຺ຊ ຣຊ຺ຊມ຺ຫິ ອຸທສ຺ສເຍ ຕຸວໍ, ຣຊ຺ຊມ຺ປິ ນິຈ຺ເຉຍ຺ຍໍ ຕຍາ ວິນາຫໍ.

໗໔. ນ ກມ຺ມຸນາ ວາ ວຈສາ ວ ຕາຕ, ອປຣາຘິໂຕຫໍ ຕຸວິຍໍ ສຣາມິ;

ສນ຺ຘິຎ຺ຈ [ສທ຺ຘິໍ ຈ (ກ.)] ກຕ຺ວາ ປຸຣິສາທເກນ, ສຈ຺ຈານຸຣກ຺ຂີ ປຸນາຫໍ ຄມິສ຺ສໍ.

໗໕. ອຫໍ ຄມິສ຺ສາມິ ອິເຘວ ໂຫຫິ, ນຕ຺ຖິ ຕໂຕ ຊີວໂຕ ວິປ຺ປໂມກ຺ໂຂ;

ສເຈ ຕຸວໍ ຄຈ຺ຉສິເຍວ ຣາຊ, ອຫມ຺ປິ ຄຈ຺ຉາມິ ອຸໂຠ ນ ໂຫມ.

໗໖. ອທ຺ຘາ ຫິ ຕາຕ ສຕາເນສ ຘມ຺ໂມ, ມຣຓາ ຈ ເມ ທຸກ຺ຂຕຣໍ ຕທສ຺ສ;

ກມ຺ມາສປາໂທ ຕໍ ຍທາ ປຈິຕ຺ວາ, ປສຍ຺ຫ ຂາເທ ຠິທາ ຣຸກ຺ຂສູເລ.

໗໗. ປາເຓນ ເຕ ປາຓມຫໍ ນິມິສ຺ສໍ, ມາ ຕ຺ວໍ ອຄາ ໂປຣິສາທສ຺ສ ຎຕ຺ເຕ;

ເອຕຎ຺ຈ ເຕ ປາຓມຫໍ ນິມິສ຺ສໍ, ຕສ຺ມາ ມຕໍ ຊີວິຕສ຺ສ ວຓ຺ເຓມິ [ວເຣມິ (ສີ.)].

໗໘. ຕໂຕ ຫເວ ຘິຕິມາ ຣາຊປຸຕ຺ໂຕ, ວນ຺ທິຕ຺ວາ ມາຕຸ ຈ ປິຕຸ ຈ [ວນ຺ທິຕ຺ຖ ມາຕຸຈ຺ຈ ປິຕຸຈ຺ຈ (ສີ. ປີ.)] ປາເທ;

ທຸຂິນິສ຺ສ ມາຕາ ນິປຕາ [ນິປຕີ (ສີ. ປີ.)] ປຖພ຺ຍາ, ປິຕາສ຺ສ ປຄ຺ຄຍ຺ຫ ຠຸຊານິ ກນ຺ທຕິ.

໗໙. ຕໍ ຄຈ຺ຉນ຺ຕໍ ຕາວ ປິຕາ ວິທິຕ຺ວາ, ປຣມ຺ມຸໂຂ ວນ຺ທຕິ ປຎ຺ຊລີໂກ;

ໂສໂມ ຈ ຣາຊາ ວຣຸໂຓ ຈ ຣາຊາ, ປຊາປຕີ ຈນ຺ທິມາ ສູຣິໂຍ ຈ;

ເອເຕຫິ ຄຸຕ຺ໂຕ ປຸຣິສາທກມ຺ຫາ, ອນຸຎ຺ຎາໂຕ ໂສຕ຺ຖິ ປຈ຺ເຈຫິ ຕາຕ.

໘໐. ຍໍ ທຓ຺ຑກິຣຎ຺ໂຎ ຄຕສ຺ສ [ຍໍ ທຓ຺ຑກາຣຎ຺ຎຄຕສ຺ສ (ປີ.)] ມາຕາ, ຣາມສ຺ສກາສິ ໂສຕ຺ຖານໍ ສຸຄຸຕ຺ຕາ;

ຕໍ ເຕ ອຫໍ ໂສຕ຺ຖານໍ ກໂຣມິ, ເອເຕນ ສຈ຺ເຈນ ສຣນ຺ຕຸ ເທວາ;

ອນຸຎ຺ຎາໂຕ ໂສຕ຺ຖິ ປຈ຺ເຈຫິ ປຸຕ຺ຕ.

໘໑. ອາວີ ຣໂຫ ວາປີ ມໂນປໂທສໍ, ນາຫໍ ສເຣ ຊາຕຸ ມລີນສຕ຺ເຕ;

ເອເຕນ ສຈ຺ເຈນ ສຣນ຺ຕຸ ເທວາ, ອນຸຎ຺ຎາໂຕ ໂສຕ຺ຖິ ປຈ຺ເຈຫິ ຠາຕິກ [ຠາຕ (ສີ.), ຠາຕາ (ສ຺ຍາ. ປີ.)].

໘໒. ຍສ຺ມາ ຈ ເມ ອນຘິມໂນສິ ສາມິ, ນ ຈາປິ ເມ ມນສາ ອປ຺ປິໂຍສິ;

ເອເຕນ ສຈ຺ເຈນ ສຣນ຺ຕຸ ເທວາ, ອນຸຎ຺ຎາໂຕ ໂສຕ຺ຖິ ປຈ຺ເຈຫິ ສາມິ.

໘໓. ພ຺ຣຫາ ອຸຊູ ຈາຣຸມຸໂຂ ກຸໂຕສິ, ນ ມໍ ປຊານາສິ ວເນ ວສນ຺ຕໍ;

ລຸທ຺ທໍ ມໍ ຎຕ຺ວາ ‘‘ປຸຣິສາທໂກ’’ຕິ, ໂກ ໂສຕ຺ຖິ ມາຊານມິຘາ’ວເຊຍ຺ຍ.

໘໔. ຊານາມິ ລຸທ຺ທ ປຸຣິສາທໂກ ຕ຺ວໍ, ນ ຕໍ ນ ຊານາມິ ວເນ ວສນ຺ຕໍ;

ອຫຎ຺ຈ ປຸຕ຺ໂຕສ຺ມິ ຊຍທ຺ທິສສ຺ສ, ມມຊ຺ຊ ຂາທ ປິຕຸໂນ ປໂມກ຺ຂາ.

໘໕. ຊານາມິ ປຸຕ຺ໂຕຕິ [ປຸຕ຺ໂຕສິ (ສ຺ຍາ. ກ.)] ຊຍທ຺ທິສສ຺ສ, ຕຖາ ຫິ ໂວ ມຸຂວຓ຺ໂຓ ອຸຠິນ຺ນໍ;

ສຸທຸກ຺ກຣຎ຺ເຎວ [ສຸທຸກ຺ກຣຎ຺ເຈວ (ສ຺ຍາ. ປີ. ກ.)] ກຕໍ ຕເວທໍ, ໂຍ ມຕ຺ຕຸມິຈ຺ເຉ ປິຕຸໂນ ປໂມກ຺ຂາ.

໘໖. ນ ທຸກ຺ກຣໍ ກິຎ຺ຈິ ມເຫຕ຺ຖ ມຎ຺ເຎ, ໂຍ ມຕ຺ຕຸມິຈ຺ເຉ ປິຕຸໂນ ປໂມກ຺ຂາ;

ມາຕຸ ຈ [ມາຕຸຈ຺ຈ (ສີ.)] ເຫຕຸ ປຣໂລກ ຄນ຺ຕ຺ວາ [ຄມ຺ຍາ (ສີ. ສ຺ຍາ.), ຄມ຺ຍ (ປີ.)], ສຸເຂນ ສຄ຺ເຄນ ຈ ສມ຺ປຍຸຕ຺ໂຕ.

໘໗. ອຫຎ຺ຈ ໂຂ ອຕ຺ຕໂນ ປາປກິຣິຍໍ, ອາວີ ຣໂຫ ວາປິ ສເຣ ນ ຊາຕຸ;

ສງ຺ຂາຕຊາຕີມຣໂຓຫມສ຺ມິ, ຍເຖວ ເມ ອິຘ ຕຖາ ປຣຕ຺ຖ.

໘໘. ຂາທຊ຺ຊ ມໍ ທານິ ມຫານຸຠາວ, ກຣສ຺ສຸ ກິຈ຺ຈານິ ອິມໍ ສຣີຣໍ;

ຣຸກ຺ຂສ຺ສ ວາ ເຕ ປປຕາມິ ອຄ຺ຄາ, ຉາທຍມາໂນ ມຍ຺ຫໍ ຕ຺ວມເທສິ ມໍສໍ.

໘໙. ອິທຎ຺ຈ ເຕ ຣຸຈ຺ຈຕິ ຣາຊປຸຕ຺ຕ, ຈເຊສິ [ຈຊາສິ (ສີ. ປີ.)] ປາຓໍ ປິຕຸໂນ ປໂມກ຺ຂາ;

ຕສ຺ມາ ຫິ ໂສ [ຕສ຺ມາຕິຫ (ສີ. ສ຺ຍາ.)] ຕ຺ວໍ ຕຣມານຣູໂປ, ສມ຺ຠຎ຺ຊ ກຏ຺ຐານິ ຊເລຫິ ອຄ຺ຄິໍ.

໙໐. ຕໂຕ ຫເວ ຘິຕິມາ ຣາຊປຸຕ຺ໂຕ, ທາຣຸໍ ສມາຫຕ຺ວາ ມຫນ຺ຕມຄ຺ຄິໍ;

ສນ຺ທີປຍິຕ຺ວາ ປຏິເວທຍິຕ຺ຖ, ອາທີປິໂຕ ທານິ ມຫາຍມຄ຺ຄິ [ມຍາ ຍກ຺ຂມຄ຺ຄິ (ກ.)].

໙໑. ຂາທຊ຺ຊ ມໍ ທານິ ປສຍ຺ຫກາຣີ, ກິໍ ມໍ ມຸຫຸໍ ເປກ຺ຂສິ ຫຏ຺ຐໂລໂມ;

ຕຖາ ຕຖາ ຕຸຍ຺ຫມຫໍ ກໂຣມິ, ຍຖາ ຍຖາ ມໍ ຉາທຍມາໂນ ອເທສິ.

໙໒. ໂກ ຕາທິສໍ ອຣຫຕິ ຂາທິຕາເຍ, ຘມ຺ເມ ຐິຕໍ ສຈ຺ຈວາທິໍ ວທຎ຺ຎຸໍ;

ມຸທ຺ຘາປິ ຕສ຺ສ ວິຜເລຍ຺ຍ ສຕ຺ຕຘາ, ໂຍ ຕາທິສໍ ສຈ຺ຈວາທິໍ ອເທຍ຺ຍ.

໙໓. ອິທຎ຺ຫິ ໂສ ພ຺ຣາຫ຺ມຓໍ ມຎ຺ຎມາໂນ, ສໂສ ອວາເສສິ ສເກ ສຣີເຣ;

ເຕເນວ ໂສ ຈນ຺ທິມາ ເທວປຸຕ຺ໂຕ, ສສຕ຺ຖຸໂຕ [ສສຏ຺ຐໂກ (ສ຺ຍາ.)] ກາມທຸຫຊ຺ຊ [ກາມຣຸຫຊ຺ຊ (ກ.)] ຍກ຺ຂ.

໙໔. ຈນ຺ໂທ ຍຖາ ຣາຫຸມຸຂາ ປມຸຕ຺ໂຕ, ວິໂຣຈເຕ ປນ຺ນຣເສວ ຠາຓຸມາ [ຠານຸມາ (ສີ. ປີ.)];

ເອວໍ ຕຸວໍ ໂປຣິສາທາ ປມຸຕ຺ໂຕ, ວິໂຣຈ ກປິເລ [ກມ຺ປິລ຺ລ (ສີ. ປີ.), ກປິລ຺ເລ (ສ຺ຍາ.)] ມຫານຸຠາວ;

ອາໂມທຍໍ ປິຕຣໍ ມາຕຣຎ຺ຈ, ສພ຺ໂພ ຈ ເຕ ນນ຺ທຕຸ ຎາຕິປກ຺ໂຂ.

໙໕. ຕໂຕ ຫເວ ຘິຕິມາ ຣາຊປຸຕ຺ໂຕ, ກຕຎ຺ຊລີ ປຣິຍາຍ [ປຣິຍຄາ (ສີ.), ປຄ຺ຄຍ຺ຫ (ສ຺ຍາ. ປີ.)] ໂປຣິສາທໍ;

ອນຸຎ຺ຎາໂຕ ໂສຕ຺ຖິ ສຸຂີ ອໂຣໂຄ, ປຈ຺ຈາຄມາ [ປຈ຺ຈາຄ (ປີ.)] ກປິລມລີນສຕ຺ຕາ [ກມ຺ປິລ຺ລ’ມລີນສຕ຺ໂຕ (ສີ. ປີ.), ກປິລ’ມລີນສຕ຺ຕາ (ກ.)].

໙໖. ຕໍ ເນຄມາ ຊານປທາ ຈ ສພ຺ເພ, ຫຕ຺ຖາໂຣຫາ ຣຖິກາ ປຕ຺ຕິກາ ຈ;

ນມສ຺ສມານາ ປຎ຺ຊລິກາ ອຸປາຄມຸໍ, ນມຕ຺ຖຸ ເຕ ທຸກ຺ກຣກາຣໂກສີຕິ.

ຊຍທ຺ທິສຊາຕກໍ [ຊຍທິສຊາຕກໍ (ກ.)] ຕຕິຍໍ.