໔໙໑. ມຫາໂມຣຊາຕກໍ (໘)

໑໔໓. ສເຈ ຫິ ຕ຺ຍາຫໍ ຘນເຫຕຸ ຄາຫິໂຕ, ມາ ມໍ ວຘີ ຊີວຄາຫໍ ຄເຫຕ຺ວາ;

ຣຎ຺ໂຎ ຈ [ຣຎ຺ໂຎວ (ສີ. ປີ.)] ມໍ ສມ຺ມ ອຸປນ຺ຕິກໍ [ອຸປນ຺ຕິ (ສີ. ສ຺ຍາ. ປີ.)] ເນຫິ, ມຎ຺ເຎ ຘນໍ ລຈ຺ຉສິນປ຺ປຣູປໍ.

໑໔໔. ນ ເມ ອຍໍ ຕຸຍ຺ຫ ວຘາຍ ອຊ຺ຊ, ສມາຫິໂຕ ຈາປຘຸເຣ [ຈາປວເຣ (ສີ. ປີ.), ຈາປວໂຣ (ສ຺ຍາ.)] ຂຸຣປ຺ໂປ;

ປາສຎ຺ຈ ຕ຺ຍາຫໍ ອຘິປາຕຍິສ຺ສໍ, ຍຖາສຸຂໍ ຄຈ຺ຉຕຸ ໂມຣຣາຊາ.

໑໔໕. ຍໍ ສຕ຺ຕ ວສ຺ສານິ ມມານຸພນ຺ຘິ, ຣຕ຺ຕິນ຺ທິວໍ ຂຸປ຺ປິປາສໍ ສຫນ຺ໂຕ;

ອຖ ກິສ຺ສ ມໍ ປາສວສູປນີຕໍ, ປມຸຕ຺ຕເວ ອິຈ຺ຉສິ ພນ຺ຘນສ຺ມາ.

໑໔໖. ປາຓາຕິປາຕາ ວິຣໂຕ ນຸສຊ຺ຊ, ອຠຍໍ ນຸ ເຕ ສພ຺ພຠູເຕສຸ ທິນ຺ນໍ;

ຍໍ ມໍ ຕຸວໍ ປາສວສູປນີຕໍ, ປມຸຕ຺ຕເວ ອິຈ຺ຉສິ ພນ຺ຘນສ຺ມາ.

໑໔໗. ປາຓາຕິປາຕາ ວິຣຕສ຺ສ ພ຺ຣູຫິ, ອຠຍຎ຺ຈ ໂຍ ສພ຺ພຠູເຕສຸ ເທຕິ;

ປຸຈ຺ຉາມິ ຕໍ ໂມຣຣາເຊຕມຕ຺ຖໍ, ອິໂຕ ຈຸໂຕ ກິໍ ລຠເຕ ສຸຂໍ ໂສ.

໑໔໘. ປາຓາຕິປາຕາ ວິຣຕສ຺ສ ພ຺ຣູມິ, ອຠຍຎ຺ຈ ໂຍ ສພ຺ພຠູເຕສຸ ເທຕິ;

ທິຏ຺ເຐວ ຘມ຺ເມ ລຠເຕ ປສໍສໍ, ສຄ຺ຄຎ຺ຈ ໂສ ຍາຕິ ສຣີຣເຠທາ.

໑໔໙. ນ ສນ຺ຕິ ເທວາ ອິຕິ ອາຫຸ [ອິຈ຺ຈາຫຸ (ສີ. ປີ.)] ເອເກ, ອິເຘວ ຊີໂວ ວິຠວໍ ອຸເປຕິ;

ຕຖາ ຜລໍ ສຸກຕທຸກ຺ກຏານໍ, ທຕ຺ຕຸປຎ຺ຎຕ຺ຕຎ຺ຈ ວທນ຺ຕິ ທານໍ;

ເຕສໍ ວໂຈ ອຣຫຕໍ ສທ຺ທຫາໂນ, ຕສ຺ມາ ອຫໍ ສກຸເຓ ພາຘຍາມິ.

໑໕໐. ຈນ຺ໂທ ຈ ສຸຣິໂຍ ຈ ອຸໂຠ ສຸທສ຺ສນາ, ຄຈ຺ຉນ຺ຕິ ໂອຠາສຍມນ຺ຕລິກ຺ເຂ;

ອິມສ຺ສ ໂລກສ຺ສ ປຣສ຺ສ ວາ ເຕ, ກຖໍ ນຸ ເຕ ອາຫຸ ມນຸສ຺ສໂລເກ.

໑໕໑. ຈນ຺ໂທ ຈ ສຸຣິໂຍ ຈ ອຸໂຠ ສຸທສ຺ສນາ, ຄຈ຺ຉນ຺ຕິ ໂອຠາສຍມນ຺ຕລິກ຺ເຂ;

ປຣສ຺ສ ໂລກສ຺ສ ນ ເຕ ອິມສ຺ສ, ເທວາຕິ ເຕ ອາຫຸ ມນຸສ຺ສໂລເກ.

໑໕໒. ເອຕ຺ເຖວ ເຕ ນີຫຕາ ຫີນວາທາ, ອເຫຕຸກາ ເຍ ນ ວທນ຺ຕິ ກມ຺ມໍ;

ຕຖາ ຜລໍ ສຸກຕທຸກ຺ກຏານໍ, ທຕ຺ຕຸປຎ຺ຎຕ຺ຕໍ ເຍ ຈ ວທນ຺ຕິ ທານໍ.

໑໕໓. ອທ຺ຘາ ຫິ ສຈ຺ຈໍ ວຈນໍ ຕເວທໍ [ຕເວຕໍ (ສີ. ສ຺ຍາ. ປີ.)], ກຖຎ຺ຫິ ທານໍ ອຜລໍ ຠເວຍ຺ຍ [ວເທຍ຺ຍ (ສີ. ປີ.)];

ຕຖາ ຜລໍ ສຸກຕທຸກ຺ກຏານໍ, ທຕ຺ຕຸປຎ຺ຎຕ຺ຕຎ຺ຈ ກຖໍ ຠເວຍ຺ຍ.

໑໕໔. ກຖໍກໂຣ ກິນ຺ຕິກໂຣ ກິມາຈຣໍ, ກິໍ ເສວມາໂນ ເກນ ຕໂປຄຸເຓນ;

ອກ຺ຂາຫິ [ອກ຺ຂາຫິ ຕໍ ທານິ (ກ.)] ເມ ໂມຣຣາເຊຕມຕ຺ຖໍ, ຍຖາ ອຫໍ ໂນ ນິຣຍໍ ປເຕຍ຺ຍໍ.

໑໕໕. ເຍ ເກຈິ ອຕ຺ຖິ ສມຓາ ປຖພ຺ຍາ, ກາສາຍວຕ຺ຖາ ອນຄາຣິຍາ ເຕ;

ປາໂຕວ ປິຓ຺ຑາຍ ຈຣນ຺ຕິ ກາເລ, ວິກາລຈຣິຍາ ວິຣຕາ ຫິ ສນ຺ໂຕ.

໑໕໖. ເຕ ຕຕ຺ຖ ກາເລນຸປສງ຺ກມິຕ຺ວາ, ປຸຈ຺ຉາຫິ ຍໍ ເຕ ມນໂສ ປິຍໍ ສິຍາ;

ເຕ ເຕ ປວກ຺ຂນ຺ຕິ ຍຖາປຊານໍ, ອິມສ຺ສ ໂລກສ຺ສ ປຣສ຺ສ ຈຕ຺ຖໍ.

໑໕໗. ຕຈໍວ ຊິຓ຺ຓໍ ອຸຣໂຄ ປຸຣາຓໍ, ປຓ຺ຑູປລາສໍ ຫຣິໂຕ ທຸໂມວ;

ເອສປ຺ປຫີໂນ ມມ ລຸທ຺ທຠາໂວ, ຊຫາມຫໍ ລຸທ຺ທກຠາວມຊ຺ຊ.

໑໕໘. ເຍ ຈາປິ ເມ ສກຸຓາ ອຕ຺ຖິ ພທ຺ຘາ, ສຕານິເນການິ ນິເວສນສ຺ມິໍ;

ເຕສມ຺ປຫໍ [ເຕສໍ ອຫໍ (ສ຺ຍາ. ກ.)] ຊີວິຕມຊ຺ຊ ທມ຺ມິ, ໂມກ຺ຂຎ຺ຈ ເຕ ປຕ຺ຕາ [ປຕ຺ໂຕ (ສີ.), ອຈ຺ຉ (ສ຺ຍາ.)] ສກໍ ນິເກຕໍ.

໑໕໙. ລຸທ຺ໂທ ຈຣີ ປາສຫຕ຺ໂຖ ອຣຎ຺ເຎ, ພາເຘຕຸ ໂມຣາຘິປຕິໍ ຍສສ຺ສິໍ;

ພນ຺ຘິຕ຺ວາ [ພນ຺ຘິຕ຺ວ (ສີ. ປີ.)] ໂມຣາຘິປຕິໍ ຍສສ຺ສິໍ, ທຸກ຺ຂາ ສ ປມຸຈ຺ຈິ [ທຸກ຺ຂາ ປມຸຈ຺ຈິ (ສີ.), ທຸກ຺ຂາ ປມຸຎ຺ຈິ (ສ຺ຍາ. ປີ.)] ຍຖາຫໍ ປມຸຕ຺ໂຕຕິ.

ມຫາໂມຣຊາຕກໍ ອຏ຺ຐມໍ.