໔໘໔. ສາລິເກທາຣຊາຕກໍ (໑)

໑. ສມ຺ປນ຺ນໍ ສາລິເກທາຣໍ, ສຸວາ ຠຸຎ຺ຊນ຺ຕິ ໂກສິຍ;

ປຏິເວເທມິ ເຕ ພ຺ຣຫ຺ເມ, ນ ເນ [ເຕ (ສີ. ສ຺ຍາ.), ນໍ (ສີ. ສ຺ຍາ. ປີ. ອຏ຺ຐ.), ຕໍ (ກ. ອຏ຺ຐ.)] ວາເຣຕຸມຸສ຺ສເຫ.

໒. ເອໂກ ຈ ຕຕ຺ຖ ສກຸໂຓ, ໂຍ ເນສໍ [ເຕສໍ (ສີ. ອຏ຺ຐ.)] ສພ຺ພສຸນ຺ທໂຣ;

ຠຸຕ຺ວາ ສາລິໍ ຍຖາກາມໍ, ຕຸຓ຺ເຑນາທາຍ ຄຈ຺ຉຕິ.

໓. ໂອຑ຺ເຑນ຺ຕຸ [ອຸຊ຺ຌຸນ຺ຕຸ (ສ຺ຍາ. ກ.) ອງ຺ຄຸຕ຺ຕຣນິກາເຍ ປສ຺ສິຕພ຺ພໍ] ວາຬປາສານິ, ຍຖາ ວຊ຺ເຌຖ ໂສ ທິໂຊ;

ຊີວຎ຺ຈ ນໍ ຄເຫຕ຺ວານ, ອານເຍຫິ [ອານເຍຖ (ສີ. ປີ.)] ມມນ຺ຕິເກ.

໔. ເອເຕ ຠຸຕ຺ວາ ປິວິຕ຺ວາ ຈ [ຠຸຕ຺ວາ ຈ ປິຕ຺ວາ ຈ (ປີ.)], ປກ຺ກມນ຺ຕິ ວິຫງ຺ຄມາ;

ເອໂກ ພທ຺ໂຘສ຺ມິ ປາເສນ, ກິໍ ປາປໍ ປກຕໍ ມຍາ.

໕. ອຸທຣໍ ນູນ ອຎ຺ເຎສໍ, ສຸວ ອຈ຺ໂຈທຣໍ ຕວ;

ຠຸຕ຺ວາ ສາລິໍ ຍຖາກາມໍ, ຕຸຓ຺ເຑນາທາຍ ຄຈ຺ຉສິ.

໖. ໂກຏ຺ຐໍ ນຸ ຕຕ຺ຖ ປູເຣສິ, ສຸວ ເວຣໍ ນຸ ເຕ ມຍາ;

ປຸຏ຺ໂຐ ເມ ສມ຺ມ ອກ຺ຂາຫິ, ກຸຫິໍ ສາລິໍ ນິທາຫສິ [ນິຘີຍສິ (ປີ.)].

໗. ນ ເມ ເວຣໍ ຕຍາ ສທ຺ຘິໍ, ໂກຏ຺ໂຐ ມຍ຺ຫໍ ນ ວິຊ຺ຊຕິ;

ອິຓໍ ມຸຎ຺ຈາມິຓໍ ທມ຺ມິ, ສມ຺ປຕ຺ໂຕ ໂກຏສິມ຺ພລິໍ;

ນິຘິມ຺ປິ ຕຕ຺ຖ ນິທຫາມິ, ເອວໍ ຊານາຫິ ໂກສິຍ.

໘. ກີທິສໍ ເຕ ອິຓທານໍ, ອິຓໂມກ຺ໂຂ ຈ ກີທິໂສ;

ນິຘິນິຘານມກ຺ຂາຫິ, ອຖ ປາສາ ປໂມກ຺ຂສິ.

໙. ອຊາຕປກ຺ຂາ ຕຣຸຓາ, ປຸຕ຺ຕກາ ມຍ຺ຫ ໂກສິຍ;

ເຕ ມໍ ຠຕາ ຠຣິສ຺ສນ຺ຕິ, ຕສ຺ມາ ເຕສໍ ອິຓໍ ທເທ.

໑໐. ມາຕາ ປິຕາ ຈ ເມ ວຸທ຺ຘາ, ຊິຓ຺ຓກາ ຄຕໂຍພ຺ພນາ;

ເຕສໍ ຕຸຓ຺ເຑນ ຫາຕູນ, ມຸຎ຺ເຈ ປຸພ຺ພກຕໍ [ປຸພ຺ເພ ກຕໍ (ສີ.)] ອິຓໍ.

໑໑. ອຎ຺ເຎປິ ຕຕ຺ຖ ສກຸຓາ, ຂີຓປກ຺ຂາ ສຸທຸພ຺ພລາ;

ເຕສໍ ປຸຎ຺ຎຕ຺ຖິໂກ ທມ຺ມິ, ຕໍ ນິຘິໍ ອາຫຸ ປຓ຺ຑິຕາ.

໑໒. ອີທິສໍ [ເອທິສໍ (ສີ. ປີ.)] ເມ ອິຓທານໍ, ອິຓໂມກ຺ໂຂ ຈ ອີທິໂສ;

ນິຘິນິຘານມກ຺ຂາມິ [ນິຘິໍ ນິຘານໍ ອກ຺ຂາຕໍ (ສີ. ປີ.)], ເອວໍ ຊານາຫິ ໂກສິຍ.

໑໓. ຠທ຺ທໂກ ວຕຍໍ ປກ຺ຂີ, ທິໂຊ ປຣມຘມ຺ມິໂກ;

ເອກຈ຺ເຈສຸ ມນຸສ຺ເສສຸ, ອຍໍ ຘມ຺ໂມ ນ ວິຊ຺ຊຕິ.

໑໔. ຠຸຎ຺ຊ ສາລິໍ ຍຖາກາມໍ, ສຫ ສພ຺ເພຫິ ຎາຕິຠິ;

ປຸນາປິ ສຸວ ປສ຺ເສມຸ, ປິຍໍ ເມ ຕວ ທສ຺ສນໍ.

໑໕. ຠຸຕ຺ຕຎ຺ຈ ປີຕຎ຺ຈ ຕວສ຺ສມມ຺ຫິ [ຕວສ຺ສພ຺ຍມ຺ຫິ (ກ.)], ຣຕ຺ຕິຎ຺ຈ [ຣຕີ ຈ (ສີ. ປີ.)] ໂນ ໂກສິຍ ເຕ ສກາເສ;

ນິກ຺ຂິຕ຺ຕທຓ຺ເຑສຸ ທທາຫິ ທານໍ, ຊິຓ຺ເຓ ຈ ມາຕາປິຕໂຣ ຠຣສ຺ສຸ.

໑໖. ລກ຺ຂີ ວຕ ເມ ອຸທປາທິ ອຊ຺ຊ, ໂຍ ອທ຺ທສາສິໍ ປວຣໍ [ໂຍຫໍ ອທສ຺ສໍ ປຣມໍ (ສ຺ຍາ. ກ.)] ທິຊານໍ;

ສຸວສ຺ສ ສຸຕ຺ວານ ສຸຠາສິຕານິ, ກາຫາມິ ປຸຎ຺ຎານິ ອນປ຺ປການິ.

໑໗. ໂສ ໂກສິໂຍ ອຕ຺ຕມໂນ ອຸທຄ຺ໂຄ, ອນ຺ນຎ຺ຈ ປານຎ຺ຈຠິສງ຺ຂຣິຕ຺ວາ [ອນ຺ນຎ຺ຈ ປານໍ ອຠິສໍຫຣິຕ຺ວາ (ກ.)];

ອນ຺ເນນ ປາເນນ ປສນ຺ນຈິຕ຺ໂຕ, ສນ຺ຕປ຺ປຍິ ສມຓພ຺ຣາຫ຺ມເຓ ຈາຕິ.

ສາລິເກທາຣຊາຕກໍ [ເກທາຣຊາຕກໍ (ກ.)] ປຐມໍ.