໔໘໓. ສຣຠມິຄຊາຕກໍ (໑໐)

໑໓໔. ອາສີເສເຖວ [ອາສິໍເສເຖວ (ສີ. ສ຺ຍາ. ປີ.)] ປຸຣິໂສ, ນ ນິພ຺ພິນ຺ເທຍ຺ຍ ປຓ຺ຑິໂຕ;

ປສ຺ສາມິ ໂວຫໍ ອຕ຺ຕານໍ, ຍຖາ ອິຈ຺ຉິໍ ຕຖາ ອຫຸ.

໑໓໕. ອາສີເສເຖວ ປຸຣິໂສ, ນ ນິພ຺ພິນ຺ເທຍ຺ຍ ປຓ຺ຑິໂຕ;

ປສ຺ສາມິ ໂວຫໍ ອຕ຺ຕານໍ, ອຸທກາ ຖລມຸພ຺ຠຕໍ.

໑໓໖. ວາຍເມເຖວ ປຸຣິໂສ, ນ ນິພ຺ພິນ຺ເທຍ຺ຍ ປຓ຺ຑິໂຕ;

ປສ຺ສາມິ ໂວຫໍ ອຕ຺ຕານໍ, ຍຖາ ອິຈ຺ຉິໍ ຕຖາ ອຫຸ.

໑໓໗. ວາຍເມເຖວ ປຸຣິໂສ, ນ ນິພ຺ພິນ຺ເທຍ຺ຍ ປຓ຺ຑິໂຕ;

ປສ຺ສາມິ ໂວຫໍ ອຕ຺ຕານໍ, ອຸທກາ ຖລມຸພ຺ຠຕໍ.

໑໓໘. ທຸກ຺ຂູປນີໂຕປິ ນໂຣ ສປຎ຺ໂຎ, ອາສໍ ນ ຉິນ຺ເທຍ຺ຍ ສຸຂາຄມາຍ;

ພຫູ ຫິ ຜສ຺ສາ ອຫິຕາ ຫິຕາ ຈ, ອວິຕກ຺ກິຕາ ມຈ຺ຈມຸປພ຺ພຊນ຺ຕິ [ມຈ຺ຈຸມຸປພ຺ພຊນ຺ຕິ (ກ. ສີ. ປີ.), ມຈ຺ຈຸມຸປປຊ຺ຊນ຺ຕິ (ສ຺ຍາ. ກ.) ເອຕ຺ຖ ‘‘ອວິຕກ຺ກິຕາປິ ຜສ຺ໂສ ມຈ຺ຈໍ ຊນໍ ອຸປຄຈ຺ຉນ຺ຕີ’’ຕິ ອຕ຺ໂຖ].

໑໓໙. ອຈິນ຺ຕິຕມ຺ປິ ຠວຕິ, ຈິນ຺ຕິຕມ຺ປິ ວິນສ຺ສຕິ;

ນ ຫິ ຈິນ຺ຕາມຍາ ໂຠຄາ, ອິຕ຺ຖິຍາ ປຸຣິສສ຺ສ ວາ.

໑໔໐. ສຣຠໍ ຄິຣິທຸຄ຺ຄສ຺ມິໍ, ຍໍ ຕ຺ວໍ ອນຸສຣີ ປຸເຣ;

ອລີນຈິຕ຺ຕສ຺ສ ຕຸວໍ, ວິກ຺ກນ຺ຕມນຸຊີວສິ [ຕວ, ວິກ຺ກນ຺ຕໍ ຊີວິຕໍ ລຠິ (ກ.)].

໑໔໑. ໂຍ ຕໍ ວິທຸຄ຺ຄາ ນຣກາ ສມຸທ຺ຘຣິ, ສິລາຍ ໂຍຄ຺ຄໍ ສຣໂຠ ກຣິຕ຺ວາ;

ທຸກ຺ຂູປນີຕໍ ມຈ຺ຈຸມຸຂາ ປໂມຈຍິ, ອລີນຈິຕ຺ຕໍ ຕໍ ມິຄໍ [ຕເມວ (ສ຺ຍາ. ກ.)] ວເທສິ.

໑໔໒. ກິໍ ຕ຺ວໍ ນຸ [ຕຸວນ຺ນຸ (ສີ. ປີ.)] ຕຕ຺ເຖວ ຕທາ ອໂຫສິ, ອຸທາຫຸ ເຕ ໂກຈິ ນໍ [ຕໍ (ກ.)] ເອຕທກ຺ຂາ;

ວິວຏ຺ຏຈ຺ຉທ຺ໂທ ນຸສິ ສພ຺ພທສ຺ສີ, ຎາຓໍ ນຸ ເຕ ພ຺ຣາຫ຺ມຓ ຠິໍສຣູປໍ.

໑໔໓. ນ ເຈວຫໍ ຕຕ຺ຖ ຕທາ ອໂຫສິໍ, ນ ຈາປິ ເມ ໂກຈິ ນໍ [ຕໍ (ກ.)] ເອຕທກ຺ຂາ;

ຄາຖາປທານຎ຺ຈ ສຸຠາສິຕານໍ, ອຕ຺ຖໍ ຕທາເນນ຺ຕິ ຊນິນ຺ທ ຘີຣາ.

໑໔໔. ອາທາຍ ປຕ຺ຕິໍ [ປຕ຺ຕໍ (ສ຺ຍາ.), ປຏ຺ຏິໍ (ກ.)] ປຣວິຣິຍຆາຕິໍ, ຈາເປ ສຣໍ ກິໍ ວິຈິກິຈ຺ຉເສ ຕຸວໍ;

ນຸນ຺ໂນ [ນຸຓ຺ໂຓ (ກ. ສີ. ສ຺ຍາ.), ຕຸຓ຺ໂຓ (ກ.)] ສໂຣ ສຣຠໍ ຫນ຺ຕຸ ຂິປ຺ປໍ, ອນ຺ນຎ຺ຫິ ເອຕໍ ວຣປຎ຺ຎ ຣຎ຺ໂຎ.

໑໔໕. ອທ຺ຘາ ປຊານາມິ ອຫມ຺ປິ ເອຕໍ, ອນ຺ນໍ ມິໂຄ ພ຺ຣາຫ຺ມຓ ຂຕ຺ຕິຍສ຺ສ;

ປຸພ຺ເພ ກຕຎ຺ຈ [ປຸພ຺ເພ ຈ ກຕໍ (ກ.)] ອປຈາຍມາໂນ, ຕສ຺ມາ ມິຄໍ ສຣຠໍ ໂນ ຫນາມິ.

໑໔໖. ເນໂສ ມິໂຄ ມຫາຣາຊ, ອສຸເຣໂສ ທິສມ຺ປຕິ;

ເອຕໍ ຫນ຺ຕ຺ວາ ມນຸສ຺ສິນ຺ທ, ຠວສ຺ສຸ ອມຣາຘິໂປ.

໑໔໗. ສເຈ ຈ ຣາຊາ [ຣາຊ (ສີ. ສ຺ຍາ. ປີ.)] ວິຈິກິຈ຺ຉເສ ຕຸວໍ, ຫນ຺ຕຸໍ ມິຄໍ ສຣຠໍ ສຫາຍກໍ [ສຫາຍກໍ ເມ (ສີ. ປີ.)];

ສປຸຕ຺ຕທາໂຣ ນຣວີຣເສຏ຺ຐ [ນຣວິຣິຍເສຏ຺ຐ (ສີ. ປີ.)], ຄນ຺ຕ຺ວາ [ຄນ຺ຕາ (ສີ. ປີ. ອຏ຺ຐ.)] ຕຸວໍ ເວຕຣຓິໍ ຍມສ຺ສ.

໑໔໘. ກາມໍ ອຫໍ ຊານປທາ ຈ ສພ຺ເພ, ປຸຕ຺ຕາ ຈ ທາຣາ ຈ ສຫາຍສງ຺ຆາ;

ຄຈ຺ເຉມຸ ຕໍ ເວຕຣຓິໍ ຍມສ຺ສ, ນ ຕ຺ເວວ ຫຎ຺ໂຎ ມມ ປາຓໂທ ໂຍ [ປາຓທ’ສ຺ສ (ສີ. ສ຺ຍາ. ປີ.)].

໑໔໙. ອຍໍ ມິໂຄ ກິຈ຺ຉຄຕສ຺ສ ມຍ຺ຫໍ, ເອກສ຺ສ ກຕ຺ຕາ ວິວນສ຺ມິ ໂຆເຣ;

ຕໍ ຕາທິສໍ ປຸພ຺ພກິຈ຺ຈໍ ສຣນ຺ໂຕ, ຊານໍ ມຫາພ຺ຣຫ຺ເມ ກຖໍ ຫເນຍ຺ຍໍ.

໑໕໐. ມິຕ຺ຕາຠິຣາຘີ ຈິຣເມວ ຊີວ, ຣຊ຺ຊໍ ອິມໍ ຘມ຺ມຄຸເຓ [ຣຊ຺ຊມ຺ປິມໍ ຈສ຺ສ ຄເຓ (ກ.)] ປສາສ;

ນາຣີຄເຓຫິ ປຣິຈາຣິຍນ຺ໂຕ, ໂມທສ຺ສຸ ຣຏ຺ເຐ ຕິທິເວວ ວາສໂວ.

໑໕໑. ອກ຺ໂກຘໂນ ນິຈ຺ຈປສນ຺ນຈິຕ຺ໂຕ, ສພ຺ພາຕິຖີ ຍາຈໂຍໂຄ ຠວິຕ຺ວາ [ປາຫຸນເກ ກຣິຕ຺ວາ (ສ຺ຍາ.), ຍາຈໂຍໂຄ ວິທິຕ຺ວາ (ກ.)];

ທຕ຺ວາ ຈ ຠຸຕ຺ວາ ຈ ຍຖານຸຠາວໍ, ອນິນ຺ທິໂຕ ສຄ຺ຄມຸເປຫິ ຐານນ຺ຕິ.

ສຣຠມິຄຊາຕກໍ ທສມໍ.

ເຕຣສກນິປາຕໍ ນິຏ຺ຐິຕໍ.