໔໘໒. ຣຸຣຸມິຄຣາຊຊາຕກໍ (໙)

໑໑໗. ຕສ຺ສ [ກສ຺ສ (ສີ. ປີ.)] ຄາມວຣໍ ທມ຺ມິ, ນາຣິໂຍ ຈ ອລງ຺ກຕາ;

ໂຍ [ໂກ (ສີ. ສ຺ຍາ. ປີ.)] ເມຕໍ ມິຄມກ຺ຂາຕິ [ມກ຺ຂາສິ (ສ຺ຍາ. ກ.)], ມິຄານໍ ມິຄມຸຕ຺ຕມໍ.

໑໑໘. ມຍ຺ຫໍ ຄາມວຣໍ ເທຫິ, ນາຣິໂຍ ຈ ອລງ຺ກຕາ;

ອຫໍ ເຕ ມິຄມກ຺ຂິສ຺ສໍ, ມິຄານໍ ມິຄມຸຕ຺ຕມໍ.

໑໑໙. ເອຕສ຺ມິໍ ວນສຓ຺ຑສ຺ມິໍ, ອມ຺ພາ ສາລາ ຈ ປຸປ຺ຜິຕາ;

ອິນ຺ທໂຄປກສຎ຺ຉນ຺ນາ, ເອຕ຺ເຖໂສ ຕິຏ຺ຐເຕ ມິໂຄ.

໑໒໐. ຘນຸໍ ອທ຺ເວຊ຺ຌໍ [ອເທຊ຺ຌໍ (ສີ. ປີ.), ສຣຊ຺ຊໍ (ກ.)] ກຕ຺ວານ, ອຸສຸໍ ສນ຺ນຍ຺ຫຸປາຄມິ [ສນ຺ຘາຍຸປາຄມິ (ສີ. ປີ.)];

ມິໂຄ ຈ ທິສ຺ວາ ຣາຊານໍ, ທູຣໂຕ ອຊ຺ຌຠາສຖ.

໑໒໑. ອາຄເມຫິ ມຫາຣາຊ, ມາ ມໍ ວິຊ຺ຌິ ຣເຖສຠ;

ໂກ ນຸ ເຕ ອິທມກ຺ຂາສິ, ເອຕ຺ເຖໂສ ຕິຏ຺ຐເຕ ມິໂຄ.

໑໒໒. ເອສ ປາປຈໂຣ ໂປໂສ, ສມ຺ມ ຕິຏ຺ຐຕິ ອາຣກາ;

ໂສຍໍ [ໂສ ຫິ (ສີ. ສ຺ຍາ. ປີ.)] ເມ ອິທມກ຺ຂາສິ, ເອຕ຺ເຖໂສ ຕິຏ຺ຐເຕ ມິໂຄ.

໑໒໓. ສຈ຺ຈໍ ກິເຣວ ມາຫໍສຸ, ນຣາ ເອກຈ຺ຈິຍາ ອິຘ;

ກຏ຺ຐໍ ນິປ຺ລວິຕໍ ເສຍ຺ໂຍ, ນ ຕ຺ເວເວກຈ຺ຈິ ໂຍ ນໂຣ.

໑໒໔. ກິໍ ນຸ ຣຸຣຸ ຄຣຫສິ ມິຄານໍ, ກິໍ ປກ຺ຂີນໍ ກິໍ ປນ ມານຸສານໍ;

ຠຍຎ຺ຫິ ມໍ ວິນ຺ທຕິນປ຺ປຣູປໍ, ສຸຕ຺ວານ ຕໍ ມານຸສິໍ ຠາສມານໍ.

໑໒໕. ຍມຸທ຺ຘຣິໍ ວາຫເນ ວຸຍ຺ຫມານໍ, ມໂຫທເກ ສລິເລ ສີຆໂສເຕ;

ຕໂຕນິທານໍ ຠຍມາຄຕໍ ມມ, ທຸກ຺ໂຂ ຫເວ ຣາຊ ອສພ຺ຠິ ສງ຺ຄໂມ.

໑໒໖. ໂສຫໍ ຈຕຸປ຺ປຕ຺ຕມິມໍ ວິຫງ຺ຄມໍ, ຕນຸຈ຺ຉິທໍ ຫທເຍ ໂອສ຺ສຊາມິ;

ຫນາມິ ຕໍ ມິຕ຺ຕທຸພ຺ຠິໍ ອກິຈ຺ຈກາຣິໍ [ຫນາມິ ມິຕ຺ຕທ຺ທຸ’ມກິຈ຺ຈກາຣິໍ (ສີ. ປີ.)], ໂຍ ຕາທິສໍ ກມ຺ມກຕໍ ນ ຊາເນ.

໑໒໗. ຘີຣສ຺ສ ພາລສ຺ສ ຫເວ ຊນິນ຺ທ, ສນ຺ໂຕ ວຘໍ ນປ຺ປສໍສນ຺ຕິ ຊາຕຸ;

ກາມໍ ຆຣໍ ຄຈ຺ຉຕຸ ປາປຘມ຺ໂມ, ຍຎ຺ຈສ຺ສ ຠຏ຺ຐໍ ຕເທຕສ຺ສ ເທຫິ;

ອຫຎ຺ຈ ເຕ ກາມກໂຣ ຠວາມິ.

໑໒໘. ອທ຺ຘາ ຣຸຣຸ ອຎ຺ຎຕໂຣ ສຕໍ ໂສ [ສຕໍ’ເສ (ສີ.)], ໂຍ ທຸພ຺ຠໂຕ [ທຸພ຺ຠິໂນ (ສ຺ຍາ.), ທູຠໂຕ (ປີ.)] ມານຸສສ຺ສ ນ ທຸພ຺ຠິ;

ກາມໍ ຆຣໍ ຄຈ຺ຉຕຸ ປາປຘມ຺ໂມ, ຍຎ຺ຈສ຺ສ ຠຏ຺ຐໍ ຕເທຕສ຺ສ ທມ຺ມິ;

ອຫຎ຺ຈ ເຕ ກາມຈາຣໍ ທທາມິ.

໑໒໙. ສຸວິຊານໍ ສິງ຺ຄາລານໍ, ສກຸຓານຎ຺ຈວສ຺ສິຕໍ;

ມນຸສ຺ສວສ຺ສິຕໍ ຣາຊ, ທຸພ຺ພິຊານຕຣໍ ຕໂຕ.

໑໓໐. ອປິ ເຈ ມຎ຺ຎຕີ ໂປໂສ, ຎາຕິ ມິຕ຺ໂຕ ສຂາຕິ ວາ;

ໂຍ ປຸພ຺ເພ ສຸມໂນ ຫຸຕ຺ວາ, ປຈ຺ຉາ ສມ຺ປຊ຺ຊເຕ ທິໂສ.

໑໓໑. ສມາຄຕາ ຊານປທາ, ເນຄມາ ຈ ສມາຄຕາ;

ມິຄາ ສສ຺ສານິ ຂາທນ຺ຕິ, ຕໍ ເທໂວ ປຏິເສຘຕຸ.

໑໓໒. ກາມໍ ຊນປໂທ ມາສິ, ຣຏ຺ຐຎ຺ຈາປິ ວິນສ຺ສຕຸ;

ນ ຕ຺ເວວາຫໍ ຣຸຣຸໍ ທຸພ຺ເຠ, ທຕ຺ວາ ອຠຍທກ຺ຂິຓໍ.

໑໓໓. ມາ ເມ ຊນປໂທ ອາສິ [ມາ ມໍ ຊນປໂທ ອຫຸ (ສ຺ຍາ.)], ຣຏ຺ຐຎ຺ຈາປິ ວິນສ຺ສຕຸ;

ນ ຕ຺ເວວາຫໍ [ນ ຕ຺ເວວ (ກ. ສີ. ກ.)] ມິຄຣາຊສ຺ສ, ວຣໍ ທຕ຺ວາ ມຸສາ ຠເຓຕິ.

ຣຸຣຸມິຄຣາຊຊາຕກໍ ນວມໍ.