໔໘໑. ຕກ຺ກາຣິຍຊາຕກໍ (໘)

໑໐໔. ອຫເມວ ທຸພ຺ຠາສິຕໍ ຠາສິ ພາໂລ, ເຠໂກວຣຎ຺ເຎ ອຫິມວ຺ຫາຍມາໂນ [ມວ຺ຫຍາໂນ (ສີ. ປີ.)];

ຕກ຺ກາຣິເຍ ໂສພ຺ຠມິມໍ [ໂສພ຺ຠມ຺ຫິ ອຫໍ (ກ.)] ປຕາມິ, ນ ກິເຣວ ສາຘຸ ອຕິເວລຠາຓີ [ສາຘູຕ຺ຍຕິເວລຠາຓີ (ກ.)].

໑໐໕. ປປ຺ໂປຕິ ມຈ຺ໂຈ ອຕິເວລຠາຓີ, ພນ຺ຘໍ ວຘໍ ໂສກປຣິທ຺ທວຎ຺ຈ;

ອຕ຺ຕານເມວ ຄຣຫາສິ ເອຕ຺ຖ, ອາເຈຣ ຍໍ ຕໍ ນິຂຓນ຺ຕິ ໂສພ຺ເຠ.

໑໐໖. ກິເມວຫໍ ຕຸຓ຺ຑິລມນຸປຸຈ຺ຉິໍ, ກເຣຍ຺ຍ ສໍ [ກເຣຍ຺ຍາສໍ (ສ຺ຍາ.), ກເຣຍ຺ຍ ສ (ກ.), ຠເຣຍ຺ຍ ສໍ (?)] ຠາຕຣໍ ກາຬິກາຍໍ [ກາຬິກາຍ (ສ຺ຍາ. ກ.)];

ນຄ຺ໂຄວຫໍ [ນຄ຺ໂຄຈ’ຫໍ (?)] ວຕ຺ຖຍຸຄຎ຺ຈ ຊີໂນ, ອຍມ຺ປິ ອຕ຺ໂຖ ພຫຸຕາທິໂສວ.

໑໐໗. ໂຍ ຍຸຊ຺ຌມານານມຍຸຊ຺ຌມາໂນ [ຍຸຊ຺ຌມາເນນ ອຍຸຊ຺ຌມາໂນ (ກ.)], ເມຓ຺ຑນ຺ຕຣໍ ອຈ຺ຈຸປຕີ ກຸລິງ຺ໂຄ;

ໂສ ປິໍສິໂຕ ເມຓ຺ຑສິເຣຫິ ຕຕ຺ຖ, ອຍມ຺ປິ ອຕ຺ໂຖ ພຫຸຕາທິໂສວ.

໑໐໘. ຈຕຸໂຣ ຊນາ ໂປຕ຺ຖກມຄ຺ຄເຫສຸໍ, ເອກຎ຺ຈ ໂປສໍ ອນຸຣກ຺ຂມານາ;

ສພ຺ເພວ ເຕ ຠິນ຺ນສິຣາ ສຍິໍສຸ, ອຍມ຺ປິ ອຕ຺ໂຖ ພຫຸຕາທິໂສວ.

໑໐໙. ອຊາ ຍຖາ ເວຬຸຄຸມ຺ພສ຺ມິໍ ພທ຺ຘາ [ພນ຺ຘໍ (ສ຺ຍາ. ກ.)], ອວກ຺ຂິປນ຺ຕີ ອສິມຊ຺ຌຄຈ຺ຉິ;

ເຕເນວ ຕສ຺ສາ ຄລກາວກນ຺ຕໍ [ຄລຍາ ວິກນ຺ຕຸໍ (ກ.), ຄລກໍ ວິກນ຺ຕາ (ສ຺ຍາ.)], ອຍມ຺ປິ ອຕ຺ໂຖ ພຫຸຕາທິໂສວ.

໑໑໐. ອິເມ ນ ເທວາ ນ ຄນ຺ຘພ຺ພປຸຕ຺ຕາ, ມິຄາ ອິເມ ອຕ຺ຖວສໍ ຄຕາ ເມ [ອຕ຺ຖວສາຠຕາ ອິເມ (ສີ. ສ຺ຍາ. ປີ.)];

ເອກຎ຺ຈ ນໍ ສາຍມາເສ ປຈນ຺ຕຸ, ເອກໍ ປຸນປ຺ປາຕຣາເສ [ເອກຎ຺ຈ ນໍ ປາຕຣາເສ (ກ. ສີ. ປີ.)] ປຈນ຺ຕຸ.

໑໑໑. ສຕໍ ສຫສ຺ສານິ ທຸຠາສິຕານິ, ກລມ຺ປິ ນາຄ຺ຆນ຺ຕິ ສຸຠາສິຕສ຺ສ;

ທຸພ຺ຠາສິຕໍ ສງ຺ກມາໂນ ກິເລໂສ [ກິລິສ຺ສຕິ (?)], ຕສ຺ມາ ຕຸຓ຺ຫີ ກິມ຺ປຸຣິສາ [ກິໍປຸຣິໂສ (ສີ. ສ຺ຍາ.)] ນ ພາລ຺ຍາ.

໑໑໒. ຍາ ເມສາ ພ຺ຍາຫາສິ [ພ຺ຍາກາສິ (ສີ. ສ຺ຍາ. ປີ.)] ປມຸຎ຺ຈເຖຕໍ, ຄິຣິຎ຺ຈ ນໍ [ຄິຣິໍ ວຣໍ (ກ.)] ຫິມວນ຺ຕໍ ນຍນ຺ຕຸ;

ອິມຎ຺ຈ ໂຂ ເທນ຺ຕຸ ມຫານສາຍ, ປາໂຕວ ນໍ ປາຕຣາເສ ປຈນ຺ຕຸ.

໑໑໓. ປຊ຺ຊຸນ຺ນນາຖາ ປສໂວ, ປສຸນາຖາ ອຍໍ ປຊາ;

ຕ຺ວໍ ນາໂຖສິ [ຕ຺ວໍ-ນາໂຖ’ສ຺ມິ (ສີ. ສ຺ຍາ. ປີ.)] ມຫາຣາຊ, ນາໂຖຫໍ ຠຣິຍາຍ ເມ [ອມ຺ຫ-ນາຖາ ມມ ຠຣິຍາ (ກ. ສີ. ສ຺ຍາ.)];

ທ຺ວິນ຺ນມຎ຺ຎຕຣໍ ຎຕ຺ວາ, ມຸຕ຺ໂຕ ຄຈ຺ເຉຍ຺ຍ ປພ຺ພຕໍ.

໑໑໔. ນ ເວ ນິນ຺ທາ ສຸປຣິວຊ຺ຊເຍຖ [ສຸປຣິວຊ຺ຊຍາຖ (ສ຺ຍາ.)], ນານາ ຊນາ ເສວິຕພ຺ພາ ຊນິນ຺ທ;

ເຍເນວ ເອໂກ ລຠເຕ ປສໍສໍ, ເຕເນວ ອຎ຺ໂຎ ລຠເຕ ນິນ຺ທິຕາຣໍ.

໑໑໕. ສພ຺ໂພ ໂລໂກ ປຣິຈິຕ຺ໂຕ ອຕິຈິຕ຺ໂຕ [ປຣຈິຕ຺ເຕນ ອຕິຈິຕ຺ໂຕ (ສີ. ສ຺ຍາ.), ປຣຈິຕ຺ເຕນ ອຈິຕ຺ໂຕ (ສີ. ອຏ຺ຐ.)], ສພ຺ໂພ ໂລໂກ ຈິຕ຺ຕວາ ສມ຺ຫິ ຈິຕ຺ເຕ;

ປຈ຺ເຈກຈິຕ຺ຕາ ປຸຖຸ ສພ຺ພສຕ຺ຕາ, ກສ຺ສີຘ ຈິຕ຺ຕສ຺ສ ວເສ ນ ວຕ຺ເຕ.

໑໑໖. ຕຸຓ຺ຫີ ອຫູ ກິມ຺ປຸຣິໂສ ສຠຣິໂຍ [ອຠາຓີ (ກ.)], ໂຍ ທານິ ພ຺ຍາຫາສິ ຠຍສ຺ສ ຠີໂຕ;

ໂສ ທານິ ມຸຕ຺ໂຕ ສຸຂິໂຕ ອໂຣໂຄ, ວາຈາກິເຣວຕ຺ຕວຕີ ນຣານນ຺ຕິ.

ຕກ຺ກາຣິຍຊາຕກໍ ອຏ຺ຐມໍ.