໔໗໖. ຊວນຫໍສຊາຕກໍ (໓)

໒໗. ອິເຘວ ຫໍສ ນິປຕ, ປິຍໍ ເມ ຕວ ທສ຺ສນໍ;

ອິສ຺ສໂຣສິ ອນຸປ຺ປຕ຺ໂຕ, ຍມິຘຕ຺ຖິ ປເວທຍ.

໒໘. ສວເນນ ເອກສ຺ສ ປິຍາ ຠວນ຺ຕິ, ທິສ຺ວາ ປເນກສ຺ສ ວິເຍຕິ [ວິເນຕິ (ສ຺ຍາ.), ວິເຫຕິ (ປີ.), ວິເຄຕິ (ກ. ອຏ຺ຐ.)] ຉນ຺ໂທ;

ທິສ຺ວາ ຈ ສຸຕ຺ວາ ຈ ປິຍາ ຠວນ຺ຕິ, ກຈ຺ຈິນ຺ນຸ ເມ ປີຍສິ [ປິຍ຺ຍສິ (ສີ. ປີ.)] ທສ຺ສເນນ.

໒໙. ສວເນນ ປິໂຍ ເມສິ, ຠິຍ຺ໂຍ ຈາຄມ຺ມ ທສ຺ສນໍ;

ເອວໍ ປິຍທສ຺ສໂນ ເມ [ເອວໍ ປິຍທສ຺ສໂນ ສມາໂນ (ສີ. ສ຺ຍາ. ປີ.)], ວສ ຫໍສ ມມນ຺ຕິເກ [ມມ ສນ຺ຕິເກ (ສີ. ສ຺ຍາ. ປີ.)].

໓໐. ວເສຍ຺ຍາມ ຕວາຄາເຣ, ນິຈ຺ຈໍ ສກ຺ກຕປູຊິຕາ;

ມຕ຺ໂຕ ຈ ເອກທາ ວຊ຺ເຊ [ວຊ຺ຊາ (ສີ. ປີ.)], ‘‘ຫໍສຣາຊໍ ປຈນ຺ຕຸ ເມ’’.

໓໑. ຘິຣຕ຺ຖຸ ຕໍ ມຊ຺ຊປານໍ, ຍໍ ເມ ປິຍຕຣໍ ຕຍາ;

ນ ຈາປິ ມຊ຺ຊໍ ປິສ຺ສາມິ [ປິວິສ຺ສາມິ (ສ຺ຍາ.), ປາຍາມິ (ສີ. ປີ.)], ຍາວ ເມ ວຈ຺ຉສີ ຆເຣ.

໓໒. ສຸວິຊານໍ ສິງ຺ຄາລານໍ, ສກຸຓານຎ຺ຈ [ສກຸນ຺ຕານຎ຺ຈ (ສີ. ສ຺ຍາ. ປີ.)] ວສ຺ສິຕໍ;

ມນຸສ຺ສວສ຺ສິຕໍ ຣາຊ, ທຸພ຺ພິຊານຕຣໍ ຕໂຕ.

໓໓. ອປິ ເຈ ມຎ຺ຎຕີ ໂປໂສ, ຎາຕິ ມິຕ຺ໂຕ ສຂາຕິ ວາ;

ໂຍ ປຸພ຺ເພ ສຸມໂນ ຫຸຕ຺ວາ, ປຈ຺ຉາ ສມ຺ປຊ຺ຊເຕ ທິໂສ.

໓໔. ຍສ຺ມິໍ ມໂນ ນິວິສຕິ, ອວິທູເຣ ສຫາປິ ໂສ;

ສນ຺ຕິເກປິ ຫິ ໂສ ທູເຣ, ຍສ຺ມິໍ ນາວິສເຕ [ຍສ຺ມາ ວິວສເຕ (ສີ. ສ຺ຍາ. ປີ.)] ມໂນ.

໓໕. ອນ຺ໂຕປິ ໂສ ໂຫຕິ ປສນ຺ນຈິຕ຺ໂຕ, ປາຣໍ ສມຸທ຺ທສ຺ສ ປສນ຺ນຈິຕ຺ໂຕ;

ອນ຺ໂຕປິ ໂສ ໂຫຕິ ປທຸຏ຺ຐຈິຕ຺ໂຕ, ປາຣໍ ສມຸທ຺ທສ຺ສ ປທຸຏ຺ຐຈິຕ຺ໂຕ.

໓໖. ສໍວສນ຺ຕາ ວິວສນ຺ຕິ, ເຍ ທິສາ ເຕ ຣເຖສຠ;

ອາຣາ ສນ຺ໂຕ ສໍວສນ຺ຕິ, ມນສາ ຣຏ຺ຐວຑ຺ຒນ.

໓໗. ອຕິຈິຣໍ ນິວາເສນ, ປິໂຍ ຠວຕິ ອປ຺ປິໂຍ;

ອາມນ຺ຕ ໂຂ ຕໍ ຄຈ຺ຉາມ [ຄຈ຺ຉາມິ (ສ຺ຍາ.)], ປຸຣາ ເຕ ໂຫມ ອປ຺ປິຍາ [ໂຫມິ ອປ຺ປິໂຍ (ສ຺ຍາ.)].

໓໘. ເອວໍ ເຈ ຍາຈມານານໍ, ອຎ຺ຊລິໍ ນາວພຸຊ຺ຌສິ;

ປຣິຈາຣການໍ ສຕໍ [ສນ຺ຕານໍ (ສີ. ສ຺ຍາ.), ສຕ຺ຕານໍ (ປີ.)], ວຈນໍ ນ ກໂຣສິ ໂນ;

ເອວໍ ຕໍ ອຠິຍາຈາມ, ປຸນ ກຍິຣາສິ ປຣິຍາຍໍ.

໓໙. ເອວໍ ເຈ ໂນ ວິຫຣຕໍ, ອນ຺ຕຣາໂຍ ນ ເຫສ຺ສຕິ;

ຕຸຍ຺ຫຎ຺ຈາປິ [ວາປິ (ສ຺ຍາ. ປີ. ກ.)] ມຫາຣາຊ, ມຍ຺ຫຎ຺ຈ [ວາ (ພຫູສຸ)] ຣຏ຺ຐວຑ຺ຒນ;

ອປ຺ເປວ ນາມ ປສ຺ເສມຸ [ປສ຺ເສມ (ສີ. ສ຺ຍາ. ປີ.)], ອໂຫຣຕານມຈ຺ຈເຍຕິ.

ຊວນຫໍສຊາຕກໍ ຕຕິຍໍ.