໔໗໗. ຈູຬນາຣທຊາຕກໍ (໔)

໔໐. ນ ເຕ ກຏ຺ຐານິ ຠິນ຺ນານິ, ນ ເຕ ອຸທກມາຠຕໍ;

ອຄ຺ຄີປິ ເຕ ນ ຫາປິໂຕ [ຫາສິໂຕ (ສີ. ສ຺ຍາ.)], ກິໍ ນຸ ມນ຺ໂທວ ຌາຍສິ.

໔໑. ນ ອຸສ຺ສເຫ ວເນ ວຕ຺ຖຸໍ, ກສ຺ສປາມນ຺ຕຍາມິ ຕໍ;

ທຸກ຺ໂຂ ວາໂສ ອຣຎ຺ຎສ຺ມິໍ, ຣຏ຺ຐໍ ອິຈ຺ຉາມິ ຄນ຺ຕເວ.

໔໒. ຍຖາ ອຫໍ ອິໂຕ ຄນ຺ຕ຺ວາ, ຍສ຺ມິໍ ຊນປເທ ວສໍ;

ອາຈາຣໍ ພ຺ຣຫ຺ເມ [ພ຺ຣຫ຺ມໍ (ກ.)] ສິກ຺ເຂຍ຺ຍໍ, ຕໍ ຘມ຺ມໍ ອນຸສາສ ມໍ.

໔໓. ສເຈ ອຣຎ຺ຎໍ ຫິຕ຺ວານ, ວນມູລຜລານິ ຈ;

ຣຏ຺ເຐ ໂຣຈຍເສ ວາສໍ, ຕໍ ຘມ຺ມໍ ນິສາເມຫິ ເມ.

໔໔. ວິສໍ ມາ ປຏິເສວິຕ຺ໂຖ [ປຏິເສວິຕ຺ຖ (ສ຺ຍາ. ກ.)], ປປາຕໍ ປຣິວຊ຺ຊຍ;

ປງ຺ເກ ຈ ມາ ວິສີທິຕ຺ໂຖ [ປງ຺ໂກ ຈ ມາ ວິສິຍິຕ຺ໂຖ (ກ.)], ຍຕ຺ໂຕ ຈາສີວິເສ ຈເຣ.

໔໕. ກິໍ ນຸ ວິສໍ ປປາໂຕ ວາ, ປງ຺ໂກ ວາ ພ຺ຣຫ຺ມຈາຣິນໍ;

ກໍ ຕ຺ວໍ ອາສີວິສໍ ພ຺ຣູສິ, ຕໍ ເມ ອກ຺ຂາຫິ ປຸຈ຺ຉິໂຕ;

໔໖. ອາສໂວ ຕາຕ ໂລກສ຺ມິໍ, ສຸຣາ ນາມ ປວຸຈ຺ຈຕິ;

ມນຸຎ຺ໂຎ [ມນຸຎ຺ຎາ (ສີ. ສ຺ຍາ. ປີ.)] ສຸຣຠີ ວຄ຺ຄຸ, ສາທຸ [ມຘຸ (ສີ. ສ຺ຍາ.)] ຂຸທ຺ທຣສູປໂມ [ຣສູປມາ (ສີ. ສ຺ຍາ. ປີ.)];

ວິສໍ ຕທາຫຸ ອຣິຍາ ເສ, ພ຺ຣຫ຺ມຈຣິຍສ຺ສ ນາຣທ.

໔໗. ອິຕ຺ຖິໂຍ ຕາຕ ໂລກສ຺ມິໍ, ປມຕ຺ຕໍ ປມເຖນ຺ຕິ ຕາ;

ຫຣນ຺ຕິ ຍຸວິໂນ ຈິຕ຺ຕໍ, ຕູລໍ ຠຏ຺ຐໍວ ມາລຸໂຕ;

ປປາໂຕ ເອໂສ ອກ຺ຂາໂຕ, ພ຺ຣຫ຺ມຈຣິຍສ຺ສ ນາຣທ.

໔໘. ລາໂຠ ສິໂລໂກ ສກ຺ກາໂຣ, ປູຊາ ປຣກຸເລສຸ ຈ;

ປງ຺ໂກ ເອໂສ ຈ [ເອໂສວ (ສີ. ສ຺ຍາ. ປີ.)] ອກ຺ຂາໂຕ, ພ຺ຣຫ຺ມຈຣິຍສ຺ສ ນາຣທ.

໔໙. ສສຕ຺ຖາ [ມຫນ຺ຕາ (ສ຺ຍາ. ກ.)] ຕາຕ ຣາຊາໂນ, ອາວສນ຺ຕິ ມຫິໍ ອິມໍ;

ເຕ ຕາທິເສ ມນຸສ຺ສິນ຺ເທ, ມຫນ຺ເຕ ຕາຕ ນາຣທ.

໕໐. ອິສ຺ສຣານໍ ອຘິປຕີນໍ, ນ ເຕສໍ ປາທໂຕ ຈເຣ;

ອາສີວິໂສຕິ [ອາສີວິໂສ ໂສ (ສີ. ປີ.)] ອກ຺ຂາໂຕ, ພ຺ຣຫ຺ມຈຣິຍສ຺ສ ນາຣທ.

໕໑. ຠຕ຺ຕຕ຺ໂຖ ຠຕ຺ຕກາເລ ຈ [ຍໍ (ສີ. ປີ.)], ຍໍ ເຄຫມຸປສງ຺ກເມ;

ຍເທຕ຺ຖ ກຸສລໍ ຊຎ຺ຎາ, ຕຕ຺ຖ ຆາເສສນໍ ຈເຣ.

໕໒. ປວິສິຕ຺ວາ ປຣກຸລໍ, ປານຕ຺ຖໍ [ປານຕ຺ໂຖ (ສ຺ຍາ. ປີ.)] ໂຠຊນາຍ ວາ;

ມິຕໍ ຂາເທ ມິຕໍ ຠຸຎ຺ເຊ, ນ ຈ ຣູເປ ມນໍ ກເຣ.

໕໓. ໂຄຏ຺ຐໍ ມຊ຺ຊໍ ກິຣາຏຎ຺ຈ [ກິຣາສຎ຺ຈ (ສີ. ສ຺ຍາ.), ກິຣາສໍ ວາ (ປີ.)], ສຠາ ນິກິຣຓານິ ຈ;

ອາຣກາ ປຣິວຊ຺ເຊຫິ, ຍານີວ ວິສມໍ ປຖນ຺ຕິ.

ຈູຬນາຣທຊາຕກໍ ຈຕຸຕ຺ຖໍ.