໔໗໐. ໂກສິຍຊາຕກໍ (໗)

໗໓. ເນວ ກິຓາມິ ນປິ ວິກ຺ກິຓາມິ, ນ ຈາປິ ເມ ສນ຺ນິຈໂຍ ຈ ອຕ຺ຖິ [ອິຘຕ຺ຖິ (ສ຺ຍາ.)];

ສຸກິຈ຺ຉຣູປໍ ວຕິທໍ ປຣິຕ຺ຕໍ, ປຕ຺ໂຖທໂນ ນາລມຍໍ ທຸວິນ຺ນໍ.

໗໔. ອປ຺ປມ຺ຫາ ອປ຺ປກໍ ທຊ຺ຊາ, ອນຸມຊ຺ຌໂຕ ມຊ຺ຌກໍ;

ພຫຸມ຺ຫາ ພຫຸກໍ ທຊ຺ຊາ, ອທານໍ ນຸປປຊ຺ຊຕິ [ນ ອຸປປຊ຺ຊຕິ (ສີ. ປີ.), ນູປປຊ຺ຊຕິ (ສ຺ຍາ.)].

໗໕. ຕໍ ຕໍ ວທາມິ ໂກສິຍ, ເທຫິ ທານານິ ຠຸຎ຺ຊ ຈ.

ອຣິຍມຄ຺ຄໍ ສມາຣູຫ [ອຣິຍໍ ມຄ຺ຄໍ ສມາຣຸຫ (ສີ. ປີ.)], ເນກາສີ ລຠເຕ ສຸຂໍ.

໗໖. ໂມຆຎ຺ຈສ຺ສ ຫຸຕໍ ໂຫຕິ, ໂມຆຎ຺ຈາປິ ສມີຫິຕໍ;

ອຕິຖິສ຺ມິໍ ໂຍ ນິສິນ຺ນສ຺ມິໍ, ເອໂກ ຠຸຎ຺ຊຕິ ໂຠຊນໍ.

໗໗. ຕໍ ຕໍ ວທາມິ ໂກສິຍ, ເທຫິ ທານານິ ຠຸຎ຺ຊ ຈ;

ອຣິຍມຄ຺ຄໍ ສມາຣູຫ, ເນກາສີ ລຠເຕ ສຸຂໍ.

໗໘. ສຈ຺ຈຎ຺ຈສ຺ສ ຫຸຕໍ ໂຫຕິ, ສຈ຺ຈຎ຺ຈາປິ ສມີຫິຕໍ;

ອຕິຖິສ຺ມິໍ ໂຍ ນິສິນ຺ນສ຺ມິໍ, ເນໂກ ຠຸຎ຺ຊຕິ ໂຠຊນໍ.

໗໙. ຕໍ ຕໍ ວທາມິ ໂກສິຍ, ເທຫິ ທານານິ ຠຸຎ຺ຊ ຈ;

ອຣິຍມຄ຺ຄໍ ສມາຣູຫ, ເນກາສີ ລຠເຕ ສຸຂໍ.

໘໐. ສຣຎ຺ຈ ຊຸຫຕິ ໂປໂສ, ພຫຸກາຍ ຄຍາຍ ຈ;

ໂທເຓ ຕິມ຺ພຣຸຕິຕ຺ຖສ຺ມິໍ, ສີຆໂສເຕ ມຫາວເຫ.

໘໑. ອຕ຺ຣ ຈສ຺ສ ຫຸຕໍ ໂຫຕິ, ອຕ຺ຣ ຈສ຺ສ ສມີຫິຕໍ;

ອຕິຖິສ຺ມິໍ ໂຍ ນິສິນ຺ນສ຺ມິໍ, ເນໂກ ຠຸຎ຺ຊຕິ ໂຠຊນໍ.

໘໒. ຕໍ ຕໍ ວທາມິ ໂກສິຍ, ເທຫິ ທານານິ ຠຸຎ຺ຊ ຈ;

ອຣິຍມຄ຺ຄໍ ສມາຣູຫ, ເນກາສີ ລຠເຕ ສຸຂໍ.

໘໓. ພຬິສຎ຺ຫິ ໂສ ນິຄິລຕິ [ນິຄ຺ຄິລຕິ (ສີ. ປີ.)], ທີຆສຸຕ຺ຕໍ ສພນ຺ຘນໍ;

ອຕິຖິສ຺ມິໍ ໂຍ ນິສິນ຺ນສ຺ມິໍ, ເອໂກ ຠຸຎ຺ຊຕິ ໂຠຊນໍ.

໘໔. ຕໍ ຕໍ ວທາມິ ໂກສິຍ, ເທຫິ ທານານິ ຠຸຎ຺ຊ ຈ;

ອຣິຍມຄ຺ຄໍ ສມາຣູຫ, ເນກາສີ ລຠເຕ ສຸຂໍ.

໘໕. ອຸຬາຣວຓ຺ຓາ ວຕ ພ຺ຣາຫ຺ມຓາ ອິເມ, ອຍຎ຺ຈ ໂວ ສຸນໂຂ ກິສ຺ສ ເຫຕຸ;

ອຸຈ຺ຈາວຈໍ ວຓ຺ຓນິຠໍ ວິກຸພ຺ພຕິ, ອກ຺ຂາຖ ໂນ ພ຺ຣາຫ຺ມຓາ ເກ ນຸ ຕຸມ຺ເຫ.

໘໖. ຈນ຺ໂທ ຈ ສຸຣິໂຍ ຈ [ສູຣິໂຍ ຈ (ກ.)] ອຸໂຠ ອິຘາຄຕາ, ອຍໍ ປນ ມາຕລິ ເທວສາຣຖິ;

ສກ຺ໂກຫມສ຺ມິ ຕິທສານມິນ຺ໂທ, ເອໂສ ຈ ໂຂ ປຎ຺ຈສິໂຂຕິ ວຸຈ຺ຈຕິ.

໘໗. ປາຓິສ຺ສຣາ ມຸທິງ຺ຄາ ຈ [ມຸຕິງ຺ຄາ ຈ (ສີ. ສ຺ຍາ. ປີ.], ມຸຣຊາລມ຺ພຣານິ ຈ;

ສຸຕ຺ຕເມນໍ ປໂພເຘນ຺ຕິ, ປຏິພຸທ຺ໂຘ ຈ ນນ຺ທຕິ.

໘໘. ເຍ ເກຈິເມ ມຈ຺ຉຣິໂນ ກທຣິຍາ, ປຣິຠາສກາ ສມຓພ຺ຣາຫ຺ມຓານໍ;

ອິເຘວ ນິກ຺ຂິປ຺ປ ສຣີຣເທຫໍ, ກາຍສ຺ສ ເຠທາ ນິຣຍໍ ວຊນ຺ຕິ.

໘໙. ເຍ ເກຈິເມ ສຸຄ຺ຄຕິມາສມານາ [ສຸຄ຺ຄຕິມາສສານາ (ສີ. ປີ.), ສຸຄ຺ຄຕາສິສມານາ (ກ.)], ຘມ຺ເມ ຐິຕາ ສໍຍເມ ສໍວິຠາເຄ;

ອິເຘວ ນິກ຺ຂິປ຺ປ ສຣີຣເທຫໍ, ກາຍສ຺ສ ເຠທາ ສຸຄຕິໍ ວຊນ຺ຕິ.

໙໐. ຕ຺ວໍ ໂນສິ ຎາຕິ ປຸຣິມາສຸ ຊາຕິສຸ, ໂສ ມຈ຺ຉຣີ ໂຣສໂກ [ໂກສິໂຍ (ສ຺ຍາ. ກ.)] ປາປຘມ຺ໂມ;

ຕເວວ ອຕ຺ຖາຍ ອິຘາຄຕມ຺ຫາ, ມາ ປາປຘມ຺ໂມ ນິຣຍໍ ຄມິຕ຺ຖ [ອປ຺ປຕ຺ຖ (ກ. ສີ. ສ຺ຍາ. ປີ.)].

໙໑. ອທ຺ຘາ ຫິ ມໍ ໂວ ຫິຕກາມາ, ຍໍ ມໍ ສມນຸສາສຖ;

ໂສຫໍ ຕຖາ ກຣິສ຺ສາມິ, ສພ຺ພໍ ວຸຕ຺ຕໍ ຫິເຕສິຠິ.

໙໒. ເອສາຫມຊ຺ເຊວ ອຸປາຣມາມິ, ນ ຈາປິຫໍ [ນ ຈາປຫໍ (ສີ. ປີ.)] ກິຎ຺ຈິ ກເຣຍ຺ຍ ປາປໍ;

ນ ຈາປິ ເມ ກິຎ຺ຈິ ອເທຍ຺ຍມຕ຺ຖິ, ນ ຈາປິທຕ຺ວາ ອຸທກໍ ປິວາມິ [ອຸທກມ຺ປຫໍ ປິເພ (ສີ.)].

໙໓. ເອວຎ຺ຈ ເມ ທທໂຕ ສພ຺ພກາລໍ [ກາເລ (ກ.)], ໂຠຄາ ອິເມ ວາສວ ຂີຍິສ຺ສນ຺ຕິ;

ຕໂຕ ອຫໍ ປພ຺ພຊິສ຺ສາມິ ສກ຺ກ, ຫິຕ຺ວານ ກາມານິ ຍໂຖຘິການີຕິ.

ໂກສິຍຊາຕກໍ ສຕ຺ຕມໍ.