໔໗໑. ເມຓ຺ຑກປຎ຺ຫຊາຕກໍ (໘)

໙໔. ເຍສໍ ນ ກທາຈິ ຠູຕປຸພ຺ພໍ, ສຂ຺ຍໍ [ສກ຺ຂິໍ (ສີ. ປີ.), ສຂິ (ສ຺ຍາ.)] ສຕ຺ຕປທມ຺ປິມສ຺ມິ ໂລເກ;

ຊາຕາ ອມິຕ຺ຕາ ທຸເວ ສຫາຍາ, ປຏິສນ຺ຘາຍ ຈຣນ຺ຕິ ກິສ຺ສ ເຫຕຸ.

໙໕. ຍທິ ເມ ອຊ຺ຊ ປາຕຣາສກາເລ, ປຎ຺ຫໍ ນ ສກ຺ກຸເຓຍ຺ຍາຖ ວຕ຺ຕຸເມຕໍ;

ຣຏ຺ຐາ ປພ຺ພາຊຍິສ຺ສາມິ ໂວ ສພ຺ເພ, ນ ຫິ ມຕ຺ໂຖ ທຸປ຺ປຎ຺ຎຊາຕິເກຫິ.

໙໖. ມຫາຊນສມາຄມມ຺ຫິ ໂຆເຣ, ຊນໂກລາຫລສງ຺ຄມມ຺ຫິ ຊາເຕ;

ວິກ຺ຂິຕ຺ຕມນາ ອເນກຈິຕ຺ຕາ, ປຎ຺ຫໍ ນ ສກ຺ກຸໂຓມ ວຕ຺ຕຸເມຕໍ.

໙໗. ເອກຄ຺ຄຈິຕ຺ຕາວ ເອກເມກາ, ຣຫສິ ຄຕາ ອຕ຺ຖໍ ນິຈິນ຺ຕຍິຕ຺ວາ [ອຕ຺ຖານິ ຈິນ຺ຕຍິຕ຺ວາ (ສ຺ຍາ. ກ.)];

ປວິເວເກ ສມ຺ມສິຕ຺ວານ ຘີຣາ, ອຖ ວກ຺ຂນ຺ຕິ ຊນິນ຺ທ ເອຕມຕ຺ຖໍ.

໙໘. ອຸຄ຺ຄປຸຕ຺ຕ-ຣາຊປຸຕ຺ຕິຍານໍ, ອຸຣພ຺ຠສ຺ສ ມໍສໍ ປິຍໍ ມນາປໍ;

ນ ສຸນຂສ຺ສ ເຕ ອເທນ຺ຕິ ມໍສໍ, ອຖ ເມຓ຺ຑສ຺ສ ສຸເຓນ ສຂ຺ຍມສ຺ສ.

໙໙. ຈມ຺ມໍ ວິຫນນ຺ຕິ ເອຬກສ຺ສ, ອສ຺ສປິຏ຺ຐຕ຺ຖຣສ຺ສຸຂສ຺ສ [ອສ຺ສປິຏ຺ຐຕ຺ຖຣຓສຸຂສ຺ສ (ສີ.)] ເຫຕຸ;

ນ ຈ ເຕ ສຸນຂສ຺ສ ອຕ຺ຖຣນ຺ຕິ, ອຖ ເມຓ຺ຑສ຺ສ ສຸເຓນ ສຂ຺ຍມສ຺ສ.

໑໐໐. ອາເວລ຺ລິຕສິງ຺ຄິໂກ ຫິ ເມຓ຺ໂຑ, ນ ຈ ສຸນຂສ຺ສ ວິສາຓການິ ອຕ຺ຖິ;

ຕິຓຠກ຺ໂຂ ມໍສໂຠຊໂນ ຈ, ອຖ ເມຓ຺ຑສ຺ສ ສຸເຓນ ສຂ຺ຍມສ຺ສ.

໑໐໑. ຕິຓມາສິ ປລາສມາສິ ເມຓ຺ໂຑ, ນ ຈ ສຸນໂຂ ຕິຓມາສິ ໂນ ປລາສໍ;

ຄຓ຺ເຫຍ຺ຍ ສຸໂຓ ສສໍ ພິຬາຣໍ, ອຖ ເມຓ຺ຑສ຺ສ ສຸເຓນ ສຂ຺ຍມສ຺ສ.

໑໐໒. ອຏ຺ຐຑ຺ຒປໂທ ຈຕຸປ຺ປທສ຺ສ, ເມຓ຺ໂຑ ອຏ຺ຐນໂຂ ອທິສ຺ສມາໂນ;

ຉາທິຍມາຫຣຕີ ອຍໍ ອິມສ຺ສ, ມໍສໍ ອາຫຣຕີ ອຍໍ ອມຸສ຺ສ.

໑໐໓. ປາສາທວຣຄໂຕ ວິເທຫເສຏ຺ໂຐ, ວິຕິຫາຣໍ ອຎ຺ຎມຎ຺ຎໂຠຊນານໍ;

ອທ຺ທກ຺ຂິ [ອທ຺ທສ (ສ຺ຍາ. ກ.)] ກິຣ ສກ຺ຂິກໍ ຊນິນ຺ໂທ, ພຸຠຸກ຺ກສ຺ສ ປຸຓ຺ຓໍ ມຸຂສ຺ສ [ໂຠຠຸກ຺ຂສ຺ສ ຈ ປຸຓ຺ຓມຸຂສ຺ສ (ສີ.)] ເຈຕໍ.

໑໐໔. ລາຠາ ວຕ ເມ ອນປ຺ປຣູປາ, ຍສ຺ສ ເມທິສາ ປຓ຺ຑິຕາ ກຸລມ຺ຫິ;

ປຎ຺ຫສ຺ສ ຄມ຺ຠີຣຄຕໍ ນິປຸຓມຕ຺ຖໍ, ປຏິວິຊ຺ຌນ຺ຕິ ສຸຠາສິເຕນ ຘີຣາ.

໑໐໕. ອສ຺ສຕຣິຣຖຎ຺ຈ ເອກເມກໍ, ຜີຕໍ ຄາມວຣຎ຺ຈ ເອກເມກໍ;

ສພ຺ເພສໍ ໂວ ທມ຺ມິ ປຓ຺ຑິຕານໍ, ປຣມປ຺ປຕີຕມໂນ ສຸຠາສິເຕນາຕິ.

ເມຓ຺ຑກປຎ຺ຫຊາຕກໍ ອຏ຺ຐມໍ.