໔໖໗. ກາມຊາຕກໍ (໔)

໓໗. ກາມໍ ກາມຍມານສ຺ສ, ຕສ຺ສ ເຈ ຕໍ ສມິຊ຺ຌຕິ;

ອທ຺ຘາ ປີຕິມໂນ ໂຫຕິ, ລທ຺ຘາ ມຈ຺ໂຈ ຍທິຈ຺ຉຕິ.

໓໘. ກາມໍ ກາມຍມານສ຺ສ, ຕສ຺ສ ເຈ ຕໍ ສມິຊ຺ຌຕິ;

ຕໂຕ ນໍ ອປຣໍ ກາເມ, ຘມ຺ເມ ຕຓ຺ຫໍວ ວິນ຺ທຕິ.

໓໙. ຄວໍວ ສິງ຺ຄິໂນ ສິງ຺ຄໍ, ວຑ຺ຒມານສ຺ສ ວຑ຺ຒຕິ;

ເອວໍ ມນ຺ທສ຺ສ ໂປສສ຺ສ, ພາລສ຺ສ ອວິຊານໂຕ;

ຠິຍ຺ໂຍ ຕຓ຺ຫາ ປິປາສາ ຈ, ວຑ຺ຒມານສ຺ສ ວຑ຺ຒຕິ.

໔໐. ປຖພ຺ຍາ ສາລິຍວກໍ, ຄວສ຺ສໍ [ຄວາສໍ (ສີ. ສ຺ຍາ. ປີ.)] ທາສໂປຣິສໍ;

ທຕ຺ວາ ຈ [ທຕ຺ວາປິ (ສີ. ສ຺ຍາ.), ທຕ຺ວາ ວາ (ປີ.)] ນາລເມກສ຺ສ, ອິຕິ ວິທ຺ວາ [ວິທ຺ຘາ (ສ຺ຍາ.)] ສມໍ ຈເຣ.

໔໑. ຣາຊາ ປສຍ຺ຫ ປຖວິໍ ວິຊິຕ຺ວາ, ສສາຄຣນ຺ຕໍ ມຫິມາວສນ຺ໂຕ;

ໂອຣໍ ສມຸທ຺ທສ຺ສ ອຕິຕ຺ຕຣູໂປ [ອຕິຕ຺ຕິຣູໂປ (ກ.)], ປາຣໍ ສມຸທ຺ທສ຺ສປິ ປຕ຺ຖເຍຖ.

໔໒. ຍາວ ອນຸສ຺ສຣໍ ກາເມ, ມນສາ ຕິຕ຺ຕິ ນາຊ຺ຌຄາ;

ຕໂຕ ນິວຕ຺ຕາ ປຏິກມ຺ມ ທິສ຺ວາ, ເຕ ເວ ສຸຕິຕ຺ຕາ ເຍ [ຕິຕ຺ຕາ (ສີ. ສ຺ຍາ. ປີ.)] ປຎ຺ຎາຍ ຕິຕ຺ຕາ.

໔໓. ປຎ຺ຎາຍ ຕິຕ຺ຕິນໍ [ຕິຕ຺ຕີນໍ (ສີ. ສ຺ຍາ.)] ເສຏ຺ຐໍ, ນ ໂສ ກາເມຫິ ຕປ຺ປຕິ;

ປຎ຺ຎາຍ ຕິຕ຺ຕໍ ປຸຣິສໍ, ຕຓ຺ຫາ ນ ກຸຣຸເຕ ວສໍ.

໔໔. ອປຈິເນເຖວ ກາມານໍ [ກາມານິ (ສີ. ສ຺ຍາ. ປີ.)], ອປ຺ປິຈ຺ຉສ຺ສ ອໂລລຸໂປ;

ສມຸທ຺ທມຕ຺ໂຕ ປຸຣິໂສ, ນ ໂສ ກາເມຫິ ຕປ຺ປຕິ.

໔໕. ຣຖກາໂຣວ ຈມ຺ມສ຺ສ, ປຣິກນ຺ຕໍ ອຸປາຫນໍ;

ຍໍ ຍໍ ຈຊຕິ [ຊຫຕິ (ສ຺ຍາ. ກ.)] ກາມານໍ, ຕໍ ຕໍ ສມ຺ປຊ຺ຊເຕ ສຸຂໍ;

ສພ຺ພໍ ເຈ ສຸຂມິຈ຺ເຉຍ຺ຍ, ສພ຺ເພ ກາເມ ປຣິຈ຺ຈເຊ.

໔໖. ອຏ຺ຐ ເຕ ຠາສິຕາ ຄາຖາ, ສພ຺ພາ ໂຫນ຺ຕິ ສຫສ຺ສິໂຍ [ສຫສ຺ສິຍາ (?) ອຸປຣິ ສຸຕໂສມຊາຕເກ ຕຖາ ທິສ຺ສຕິ];

ປຏິຄຓ຺ຫ ມຫາພ຺ຣຫ຺ເມ, ສາເຘຕໍ ຕວ ຠາສິຕໍ.

໔໗. ນ ເມ ອຕ຺ໂຖ ສຫສ຺ເສຫິ, ສເຕຫິ ນຫຸເຕຫິ ວາ;

ປຈ຺ຉິມໍ ຠາສໂຕ ຄາຖໍ, ກາເມ ເມ ນ ຣໂຕ ມໂນ.

໔໘. ຠທ຺ຣໂກ [ສທ຺ໂທ (ສີ.)] ວຕາຍໍ ມາຓວໂກ, ສພ຺ພໂລກວິທູ ມຸນິ;

ໂຍ ອິມໍ ຕຓ຺ຫໍ [ໂຍ ຕຓ຺ຫໍ (ສີ. ສ຺ຍາ.)] ທຸກ຺ຂຊນນິໍ, ປຣິຊານາຕິ ປຓ຺ຑິໂຕຕິ.

ກາມຊາຕກໍ ຈຕຸຕ຺ຖໍ.