໔໖໖. ສມຸທ຺ທວາຓິຊຊາຕກໍ (໓)

໒໕. ກສນ຺ຕິ ວປນ຺ຕິ ເຕ ຊນາ, ມນຸຊາ ກມ຺ມຜລູປຊີວິໂນ;

ນຍິມສ຺ສ ທີປກສ຺ສ ຠາຄິໂນ, ຊມ຺ພຸທີປາ ອິທເມວ ໂນ ວຣໍ.

໒໖. ຕິປຎ຺ຈຣຕ຺ຕູປຄຕມ຺ຫິ ຈນ຺ເທ, ເວໂຄ ມຫາ ເຫຫິຕິ ສາຄຣສ຺ສ;

ອຸປ຺ລວິສ຺ສໍ ທີປມິມໍ ອຸຬາຣໍ, ມາ ໂວ ວຘີ ຄຈ຺ຉຖ ເລຓມຎ຺ຎໍ.

໒໗. ນ ຊາຕຸຍໍ ສາຄຣວາຣິເວໂຄ, ອຸປ຺ລວິສ຺ສໍ ທີປມິມໍ ອຸຬາຣໍ;

ຕໍ ເມ ນິມິຕ຺ເຕຫິ ພຫູຫິ ທິຏ຺ຐໍ, ມາ ເຠຖ ກິໍ ໂສຈຖ ໂມທຖວ຺ໂຫ [ໂມທຖ ໂວ (ກ.) ໖.໓໘ ໂມຄ຺ຄລ຺ລານສຸຕ຺ຕໍ ປສ຺ສິຕພ຺ພໍ].

໒໘. ປຫູຕຠກ຺ຂໍ ພຫຸອນ຺ນປານໍ, ປຕ຺ຕຕ຺ຖ ອາວາສມິມໍ ອຸຬາຣໍ;

ນ ໂວ ຠຍໍ ປຏິປສ຺ສາມິ ກິຎ຺ຈິ, ອາປຸຕ຺ຕປຸຕ຺ເຕຫິ ປໂມທຖວ຺ໂຫ.

໒໙. ໂຍ ເທໂວຍໍ ທກ຺ຂິຓາຍໍ [ທກ຺ຂິຓສ຺ສໍ (ສີ.)] ທິສາຍໍ, ເຂມນ຺ຕິ ປກ຺ໂກສຕິ ຕສ຺ສ ສຈ຺ຈໍ;

ນ ອຸຕ຺ຕໂຣ ເວທິ ຠຍາຠຍສ຺ສ, ມາ ເຠຖ ກິໍ ໂສຈຖ ໂມທຖວ຺ໂຫ.

໓໐. ຍຖາ ອິເມ ວິປ຺ປວທນ຺ຕິ ຍກ຺ຂາ, ເອໂກ ຠຍໍ ສໍສຕິ ເຂມເມໂກ;

ຕທິງ຺ຆ ມຍ຺ຫໍ ວຈນໍ ສຸຓາຖ, ຂິປ຺ປໍ ລຫຸໍ ມາ ວິນສ຺ສິມ຺ຫ ສພ຺ເພ.

໓໑. ສພ຺ເພ ສມາຄມ຺ມ ກໂຣມ ນາວໍ, ໂທຓິໍ ທຬ຺ຫໍ ສພ຺ພຍນ຺ຕູປປນ຺ນໍ;

ສເຈ ອຍໍ ທກ຺ຂິໂຓ ສຈ຺ຈມາຫ, ໂມຆໍ ປຏິກ຺ໂກສຕິ ອຸຕ຺ຕໂຣຍໍ;

ສາ ເຈວ ໂນ ເຫຫິຕິ ອາປທຕ຺ຖາ, ອິມຎ຺ຈ ທີປໍ ນ ປຣິຈ຺ຈເຊມ.

໓໒. ສເຈ ຈ ໂຂ ອຸຕ຺ຕໂຣ ສຈ຺ຈມາຫ, ໂມຆໍ ປຏິກ຺ໂກສຕິ ທກ຺ຂິໂຓຍໍ;

ຕເມວ ນາວໍ ອຠິຣຸຍ຺ຫ ສພ຺ເພ, ເອວໍ ມຍໍ ໂສຕ຺ຖິ ຕເຣມຸ ປາຣໍ.

໓໓. ນ ເວ ສຸຄຓ຺ຫໍ ປຐເມນ ເສຏ຺ຐໍ, ກນິຏ຺ຐມາປາຖຄຕໍ ຄເຫຕ຺ວາ;

ໂຍ ຈີຘ ຕຈ຺ຉໍ [ມຊ຺ຌໍ (ສີ. ສ຺ຍາ. ປີ.)] ປວິເຈຍ຺ຍ ຄຓ຺ຫຕິ [ຄຓ຺ຫິ (ກ.)], ສ ເວ ນໂຣ ເສຏ຺ຐມຸເປຕິ ຐານໍ.

໓໔. ຍຖາປິ ເຕ ສາຄຣວາຣິມຊ຺ເຌ, ສກມ຺ມຸນາ ໂສຕ຺ຖິ ວຫິໍສຸ ວາຓິຊາ;

ອນາຄຕຕ຺ຖໍ ປຏິວິຊ຺ຌິຍານ, ອປ຺ປມ຺ປິ ນາຈ຺ເຈຕິ ສ ຠູຣິປຎ຺ໂຎ.

໓໕. ພາລາ ຈ ໂມເຫນ ຣສານຸຄິທ຺ຘາ, ອນາຄຕໍ ອປ຺ປຏິວິຊ຺ຌິຍຕ຺ຖໍ;

ປຈ຺ຈຸປ຺ປນ຺ເນ ສີທນ຺ຕິ ອຕ຺ຖຊາເຕ, ສມຸທ຺ທມຊ຺ເຌ ຍຖາ ເຕ ມນຸສ຺ສາ.

໓໖. ອນາຄຕໍ ປຏິກຍິຣາຖ ກິຈ຺ຈໍ, ‘‘ມາ ມໍ ກິຈ຺ຈໍ ກິຈ຺ຈກາເລ ພ຺ຍເຘສິ’’;

ຕໍ ຕາທິສໍ ປຏິກຕ [ປຏິກຕໍ (ກ.), ປຏິຄຕ (ສີ. ອຏ຺ຐ.), ປຏິກຈ຺ຈ (?)] ກິຈ຺ຈກາຣິໍ, ນ ຕໍ ກິຈ຺ຈໍ ກິຈ຺ຈກາເລ ພ຺ຍເຘຕີຕິ.

ສມຸທ຺ທວາຓິຊຊາຕກໍ ຕຕິຍໍ.