໔໕໔. ຆຏປຓ຺ຑິຕຊາຕກໍ (໑໖)

໑໖໕. ອຸຏ຺ເຐຫິ ກຓ຺ຫ ກິໍ ເສສິ, ໂກ ອຕ຺ໂຖ ສຸປເນນ ເຕ;

ໂຍປິ ຕຸຍ຺ຫໍ [ຕາຍໍ (ປີ.)] ສໂກ ຠາຕາ, ຫທຍໍ ຈກ຺ຂຸ ຈ [ຈກ຺ຂຸໍວ (ປີ.)] ທກ຺ຂິຓໍ;

ຕສ຺ສ ວາຕາ ພລີຍນ຺ຕິ, ຆໂຏ ຊປ຺ປຕິ [ສສໍ ຊປ຺ປຕິ (?)] ເກສວ.

໑໖໖. ຕສ຺ສ ຕໍ ວຈນໍ ສຸຕ຺ວາ, ໂຣຫິເຓຍ຺ຍສ຺ສ ເກສໂວ;

ຕຣມານຣູໂປ ວຸຏ຺ຐາສິ, ຠາຕຸໂສເກນ ອຏ຺ຏິໂຕ.

໑໖໗. ກິໍ ນຸ ອຸມ຺ມຕ຺ຕຣູໂປວ, ເກວລໍ ທ຺ວາຣກໍ ອິມໍ;

ສໂສ ສໂສຕິ ລປສິ, ໂກ ນຸ ເຕ ສສມາຫຣິ.

໑໖໘. ໂສວຓ຺ຓມຍໍ ມຓີມຍໍ, ໂລຫມຍໍ ອຖ ຣູປິຍາມຍໍ;

ສງ຺ຂສິລາປວາຬມຍໍ, ກາຣຍິສ຺ສາມິ ເຕ ສສໍ.

໑໖໙. ສນ຺ຕິ ອຎ຺ເຎປິ ສສກາ, ອຣຎ຺ເຎ ວນໂຄຈຣາ;

ເຕປິ ເຕ ອານຍິສ຺ສາມິ, ກີທິສໍ ສສມິຈ຺ຉສິ.

໑໗໐. ນ ຈາຫເມເຕ [ນ ຈາຫເມຕໍ (ສີ.), ນ ວາຫເມເຕ (ສ຺ຍາ.), ນ ວາຫເມຕໍ (ປີ.)] ອິຈ຺ຉາມິ, ເຍ ສສາ ປຖວິສ຺ສິຕາ [ປຐວິໍສິຕາ (ສີ. ສ຺ຍາ. ປີ.)];

ຈນ຺ທໂຕ ສສມິຈ຺ຉາມິ, ຕໍ ເມ ໂອຫຣ ເກສວ.

໑໗໑. ໂສ ນູນ ມຘຸຣໍ ຎາຕິ, ຊີວິຕໍ ວິຊຫິສ຺ສສິ;

ອປຕ຺ຖິຍໍ ໂຍ ປຕ຺ຖຍສິ, ຈນ຺ທໂຕ ສສມິຈ຺ຉສິ.

໑໗໒. ເອວໍ ເຈ ກຓ຺ຫ ຊານາສິ, ຍທຎ຺ຎມນຸສາສສິ;

ກສ຺ມາ ປຸເຣ ມຕໍ ປຸຕ຺ຕໍ, ອຊ຺ຊາປິ ມນຸໂສຈສິ.

໑໗໓. ຍໍ ນ ລພ຺ຠາ ມນຸສ຺ເສນ, ອມນຸສ຺ເສນ ວາ ປຸນ [ປນ (ເປ. ວ. ໒໑໕)];

ຊາໂຕ ເມ ມາ ມຣີ ປຸຕ຺ໂຕ, ກຸໂຕ ລພ຺ຠາ ອລພ຺ຠິຍໍ.

໑໗໔. ນ ມນ຺ຕາ ມູລເຠສຊ຺ຊາ, ໂອສເຘຫິ ຘເນນ ວາ;

ສກ຺ກາ ອານຍິຕຸໍ ກຓ຺ຫ, ຍໍ ເປຕມນຸໂສຈສິ.

໑໗໕. ຍສ຺ສ ເອຕາທິສາ ອສ຺ສຸ, ອມຈ຺ຈາ ປຸຣິສປຓ຺ຑິຕາ;

ຍຖາ ນິຊ຺ຌາປເຍ ອຊ຺ຊ, ຆໂຏ ປຸຣິສປຓ຺ຑິໂຕ.

໑໗໖. ອາທິຕ຺ຕໍ ວຕ ມໍ ສນ຺ຕໍ, ຆຕສິຕ຺ຕໍວ ປາວກໍ;

ວາຣິນາ ວິຍ ໂອສິຎ຺ຈໍ, ສພ຺ພໍ ນິພ຺ພາປເຍ ທຣໍ.

໑໗໗. ອພ຺ພຫີ ວຕ ເມ ສລ຺ລໍ, ຍມາສິ ຫທຍສ຺ສິຕໍ;

ໂຍ ເມ ໂສກປເຣຕສ຺ສ, ປຸຕ຺ຕໂສກໍ ອປານຸທິ.

໑໗໘. ໂສຫໍ ອພ຺ພູຬ຺ຫສລ຺ໂລສ຺ມິ, ວີຕໂສໂກ ອນາວິໂລ;

ນ ໂສຈາມິ ນ ໂຣທາມິ, ຕວ ສຸຕ຺ວານ ມາຓວ [ຠາຕິກ (ເປ. ວ. ໒໒໔)].

໑໗໙. ເອວໍ ກໂຣນ຺ຕິ ສປ຺ປຎ຺ຎາ, ເຍ ໂຫນ຺ຕິ ອນຸກມ຺ປກາ;

ນິວຕ຺ຕຍນ຺ຕິ ໂສກມ຺ຫາ, ຆໂຏ ເຊຏ຺ຐໍວ ຠາຕຣນ຺ຕິ.

ຆຏປຓ຺ຑິຕຊາຕກໍ ໂສຬສມໍ.

ທສກນິປາຕໍ ນິຏ຺ຐິຕໍ.