໔໕໓. ມຫາມງ຺ຄລຊາຕກໍ (໑໕)

໑໕໕. ກິໍສຸ ນໂຣ ຊປ຺ປມຘິຈ຺ຈກາເລ, ກໍ ວາ ວິຊ຺ຊໍ ກຕມໍ ວາ ສຸຕານໍ;

ໂສ ມຈ຺ໂຈ ອສ຺ມິຎ຺ຈ [ອສ຺ມິໍວ (ປີ.)] ປຣມ຺ຫິ ໂລເກ, ກຖໍ ກໂຣ ໂສຕ຺ຖາເນນ ຄຸຕ຺ໂຕ.

໑໕໖. ຍສ຺ສ ເທວາ ປິຕໂຣ ຈ ສພ຺ເພ, ສຣີສປາ [ສິຣິໍສປາ (ສີ. ສ຺ຍາ. ປີ.)] ສພ຺ພຠູຕານິ ຈາປິ;

ເມຕ຺ຕາຍ ນິຈ຺ຈໍ ອປຈິຕານິ ໂຫນ຺ຕິ, ຠູເຕສຸ ເວ ໂສຕ຺ຖານໍ ຕທາຫຸ.

໑໕໗. ໂຍ ສພ຺ພໂລກສ຺ສ ນິວາຕວຸຕ຺ຕິ, ອິຕ຺ຖີປຸມານໍ ສຫທາຣການໍ;

ຂນ຺ຕາ ທຸຣຸຕ຺ຕານມປ຺ປຏິກູລວາທີ, ອຘິວາສນໍ ໂສຕ຺ຖານໍ ຕທາຫຸ.

໑໕໘. ໂຍ ນາວຊານາຕິ ສຫາຍມິຕ຺ເຕ [ສຫາຍມຕ຺ເຕ (ສີ. ປີ.)], ສິປ຺ເປນ ກຸລ຺ຍາຫິ ຘເນນ ຊຈ຺ຈາ;

ຣຸຈິປຎ຺ໂຎ ອຕ຺ຖກາເລ ມຕີມາ [ມຸຕີມາ (ສີ. ປີ.)], ສຫາເຍສຸ ເວ ໂສຕ຺ຖານໍ ຕທາຫຸ.

໑໕໙. ມິຕ຺ຕານິ ເວ ຍສ຺ສ ຠວນ຺ຕິ ສນ຺ໂຕ, ສໍວິສ຺ສຕ຺ຖາ ອວິສໍວາທກສ຺ສ;

ນ ມິຕ຺ຕທຸພ຺ຠີ ສໍວິຠາຄີ ຘເນນ, ມິຕ຺ເຕສຸ ເວ ໂສຕ຺ຖານໍ ຕທາຫຸ.

໑໖໐. ຍສ຺ສ ຠຣິຍາ ຕຸລ຺ຍວຍາ ສມຄ຺ຄາ, ອນຸພ຺ພຕາ ຘມ຺ມກາມາ ປຊາຕາ [ສຊາຕາ (ກ.)];

ໂກລິນິຍາ ສີລວຕີ ປຕິພ຺ພຕາ, ທາເຣສຸ ເວ ໂສຕ຺ຖານໍ ຕທາຫຸ.

໑໖໑. ຍສ຺ສ ຣາຊາ ຠູຕປຕິ [ຠູຕປຕີ (ສີ. ສ຺ຍາ. ປີ.)] ຍສສ຺ສີ, ຊານາຕິ ໂສເຈຍ຺ຍໍ ປຣກ຺ກມຎ຺ຈ;

ອທ຺ເວຊ຺ຌຕາ ສຸຫທຍໍ ມມນ຺ຕິ, ຣາຊູສຸ ເວ ໂສຕ຺ຖານໍ ຕທາຫຸ.

໑໖໒. ອນ຺ນຎ຺ຈ ປານຎ຺ຈ ທທາຕິ ສທ຺ໂຘ, ມາລຎ຺ຈ ຄນ຺ຘຎ຺ຈ ວິເລປນຎ຺ຈ;

ປສນ຺ນຈິຕ຺ໂຕ ອນຸໂມທມາໂນ, ສຄ຺ເຄສຸ ເວ ໂສຕ຺ຖານໍ ຕທາຫຸ.

໑໖໓. ຍມຣິຍຘມ຺ເມນ ປຸນນ຺ຕິ ວຸທ຺ຘາ, ອາຣາຘິຕາ ສມຈຣິຍາຍ ສນ຺ໂຕ;

ພຫຸສ຺ສຸຕາ ອິສໂຍ ສີລວນ຺ໂຕ, ອຣຫນ຺ຕມຊ຺ເຌ ໂສຕ຺ຖານໍ ຕທາຫຸ.

໑໖໔. ເອຕານິ ໂຂ ໂສຕ຺ຖານານິ ໂລເກ, ວິຎ຺ຎຸປ຺ປສຕ຺ຖານິ ສຸຂຸທ຺ຣຍານິ [ສຸຂິນ຺ທ຺ຣິຍານິ (ປີ.)];

ຕານີຘ ເສເວຖ ນໂຣ ສປຎ຺ໂຎ, ນ ຫິ ມງ຺ຄເລ ກິຎ຺ຈນມຕ຺ຖິ ສຈ຺ຈນ຺ຕິ.

ມຫາມງ຺ຄລຊາຕກໍ ປນ຺ນຣສມໍ.