໔໕໒. ຠູຣິປຎ຺ຎຊາຕກໍ (໑໔)

໑໔໕. ສຈ຺ຈໍ ກິຣ ຕ຺ວໍ ອປິ [ຕ຺ວມ຺ປິ (ສີ.), ຕຸວມ຺ປິ (ສ຺ຍາ.), ຕ຺ວໍ ອສິ (ກ.)] ຠູຣິປຎ຺ຎ, ຍາ ຕາທິສີ ສີຣິ ຘິຕີ ມຕີ ຈ;

ນ ຕາຍເຕຠາວວສູປນິຕໍ, ໂຍ ຍວກໍ ຠຸຎ຺ຊສິ ອປ຺ປສູປໍ.

໑໔໖. ສຸຂໍ ທຸກ຺ເຂນ ປຣິປາຈຍນ຺ໂຕ, ກາລາ ກາລໍ ວິຈິນໍ ຉນ຺ທຉນ຺ໂນ;

ອຕ຺ຖສ຺ສ ທ຺ວາຣານິ ອວາປຸຣນ຺ໂຕ, ເຕນາຫໍ ຕຸສ຺ສາມິ ຍໂວທເນນ.

໑໔໗. ກາລຎ຺ຈ ຎຕ຺ວາ ອຠິຊີຫນາຍ, ມນ຺ເຕຫິ ອຕ຺ຖໍ ປຣິປາຈຍິຕ຺ວາ;

ວິຊມ຺ຠິສ຺ສໍ ສີຫວິຊມ຺ຠິຕານິ, ຕາຍິທ຺ຘິຍາ ທກ຺ຂສິ ມໍ ປຸນາປິ.

໑໔໘. ສຸຂີປິ ເຫເກ [ສຸຂີ ຫິ ເອເກ (ສີ.), ສຸຂີຕິ ເຫເກ (?)] ນ ກໂຣນ຺ຕິ ປາປໍ, ອວຓ຺ຓສໍສຄ຺ຄຠຍາ ປຸເນເກ;

ປຫູ ສມາໂນ ວິປຸລຕ຺ຖຈິນ຺ຕີ, ກິໍກາຣຓາ ເມ ນ ກໂຣສິ ທຸກ຺ຂໍ.

໑໔໙. ນ ປຓ຺ຑິຕາ ອຕ຺ຕສຸຂສ຺ສ ເຫຕຸ, ປາປານິ ກມ຺ມານິ ສມາຈຣນ຺ຕິ;

ທຸກ຺ເຂນ ຜຸຏ຺ຐາ ຂລິຕາປິ ສນ຺ຕາ, ຉນ຺ທາ ຈ ໂທສາ ນ ຊຫນ຺ຕິ ຘມ຺ມໍ.

໑໕໐. ເຍນ ເກນຈິ ວຓ຺ເຓນ, ມຸທຸນາ ທາຣຸເຓນ ວາ;

ອຸທ຺ຘເຣ ທີນມຕ຺ຕານໍ, ປຈ຺ຉາ ຘມ຺ມໍ ສມາຈເຣ.

໑໕໑. ຍສ຺ສ ຣຸກ຺ຂສ຺ສ ຉາຍາຍ, ນິສີເທຍ຺ຍ ສເຍຍ຺ຍ ວາ;

ນ ຕສ຺ສ ສາຂໍ ຠຎ຺ເຊຍ຺ຍ, ມິຕ຺ຕທຸພ຺ໂຠ ຫິ ປາປໂກ.

໑໕໒. ຍສ຺ສາປິ [ຍສ຺ສ ຫິ (ສີ. ກ.)] ຘມ຺ມໍ ປຸຣິໂສ [ມນຸໂຊ (ສີ.)] ວິຊຎ຺ຎາ, ເຍ ຈສ຺ສ ກງ຺ຂໍ ວິນຍນ຺ຕິ ສນ຺ໂຕ;

ຕໍ ຫິສ຺ສ ທີປຎ຺ຈ ປຣາຍນຎ຺ຈ, ນ ເຕນ ເມຕ຺ຕິໍ ຊຣເຍຖ ປຎ຺ໂຎ.

໑໕໓. ອລໂສ ຄິຫີ ກາມໂຠຄີ ນ ສາຘຸ, ອສຎ຺ຎໂຕ ປພ຺ພຊິໂຕ ນ ສາຘຸ;

ຣາຊາ ນ ສາຘຸ ອນິສມ຺ມກາຣີ, ໂຍ ປຓ຺ຑິໂຕ ໂກຘໂນ ຕໍ ນ ສາຘຸ.

໑໕໔. ນິສມ຺ມ ຂຕ຺ຕິໂຍ ກຍິຣາ, ນານິສມ຺ມ ທິສມ຺ປຕິ;

ນິສມ຺ມກາຣິໂນ ຣາຊ, ຍໂສ ກິຕ຺ຕິ ຈ ວຑ຺ຒຕີຕິ.

ຠູຣິປຎ຺ຎຊາຕກໍ ຈຸທ຺ທສມໍ.