໔໔໗. ມຫາຘມ຺ມປາລຊາຕກໍ (໙)

໙໒. ກິໍ ເຕ ວຕໍ ກິໍ ປນ ພ຺ຣຫ຺ມຈຣິຍໍ, ກິສ຺ສ ສຸຈິຓ຺ຓສ຺ສ ອຍໍ ວິປາໂກ;

ອກ຺ຂາຫິ ເມ ພ຺ຣາຫ຺ມຓ ເອຕມຕ຺ຖໍ, ກສ຺ມາ ນຸ ຕຸມ຺ຫໍ ທຫຣາ ນ ມິຍ຺ຍເຣ [ມີຍເຣ (ສີ. ປີ.)].

໙໓. ຘມ຺ມໍ ຈຣາມ ນ ມຸສາ ຠຓາມ, ປາປານິ ກມ຺ມານິ ປຣິວຊ຺ຊຍາມ [ວິວຊ຺ຊຍາມ (ສີ. ສ຺ຍາ. ປີ.)];

ອນຣິຍໍ ປຣິວຊ຺ເຊມຸ ສພ຺ພໍ, ຕສ຺ມາ ຫິ ອມ຺ຫໍ ທຫຣາ ນ ມິຍ຺ຍເຣ.

໙໔. ສຸໂຓມ ຘມ຺ມໍ ອສຕໍ ສຕຎ຺ຈ, ນ ຈາປິ ຘມ຺ມໍ ອສຕໍ ໂຣຈຍາມ;

ຫິຕ຺ວາ ອສນ຺ເຕ ນ ຊຫາມ ສນ຺ເຕ, ຕສ຺ມາ ຫິ ອມ຺ຫໍ ທຫຣາ ນ ມິຍ຺ຍເຣ.

໙໕. ປຸພ຺ເພວ ທານາ ສຸມນາ ຠວາມ, ທທມ຺ປິ ເວ ອຕ຺ຕມນາ ຠວາມ;

ທຕ຺ວາປິ ເວ ນານຸຕປ຺ປາມ ປຈ຺ຉາ, ຕສ຺ມາ ຫິ ອມ຺ຫໍ ທຫຣາ ນ ມິຍ຺ຍເຣ.

໙໖. ສມເຓ ມຍໍ ພ຺ຣາຫ຺ມເຓ ອທ຺ຘິເກ ຈ, ວນິພ຺ພເກ ຍາຈນເກ ທລິທ຺ເທ;

ອນ຺ເນນ ປາເນນ ອຠິຕປ຺ປຍາມ, ຕສ຺ມາ ຫິ ອມ຺ຫໍ ທຫຣາ ນ ມິຍ຺ຍເຣ.

໙໗. ມຍຎ຺ຈ ຠຣິຍໍ ນາຕິກ຺ກມາມ, ອມ຺ເຫ ຈ ຠຣິຍາ ນາຕິກ຺ກມນ຺ຕິ;

ອຎ຺ຎຕ຺ຣ ຕາຫິ ພ຺ຣຫ຺ມຈຣິຍໍ ຈຣາມ, ຕສ຺ມາ ຫິ ອມ຺ຫໍ ທຫຣາ ນ ມິຍ຺ຍເຣ.

໙໘. ປາຓາຕິປາຕາ ວິຣມາມ ສພ຺ເພ, ໂລເກ ອທິນ຺ນໍ ປຣິວຊ຺ຊຍາມ;

ອມຊ຺ຊປາ ໂນປິ ມຸສາ ຠຓາມ, ຕສ຺ມາ ຫິ ອມ຺ຫໍ ທຫຣາ ນ ມິຍ຺ຍເຣ.

໙໙. ເອຕາສຸ ເວ ຊາຍເຣ ສຸຕ຺ຕມາສຸ, ເມຘາວິໂນ ໂຫນ຺ຕິ ປຫູຕປຎ຺ຎາ;

ພຫຸສ຺ສຸຕາ ເວທຄຸໂນ [ເວທຄຸຓາ (ສ຺ຍາ. ກ.)] ຈ ໂຫນ຺ຕິ, ຕສ຺ມາ ຫິ ອມ຺ຫໍ ທຫຣາ ນ ມິຍ຺ຍເຣ.

໑໐໐. ມາຕາ ປິຕາ ຈ [ມາຕາ ຈ ປິຕາ (ກ.), ມາຕາປິຕຣາ (ສ຺ຍາ.)] ຠຄິນີ ຠາຕໂຣ ຈ, ປຸຕ຺ຕາ ຈ ທາຣາ ຈ ມຍຎ຺ຈ ສພ຺ເພ;

ຘມ຺ມໍ ຈຣາມ ປຣໂລກເຫຕຸ, ຕສ຺ມາ ຫິ ອມ຺ຫໍ ທຫຣາ ນ ມິຍ຺ຍເຣ.

໑໐໑. ທາສາ ຈ ທາສ຺ໂຍ [ທາສ຺ໂສ (ສີ. ປີ.), ທາສີ (ສ຺ຍາ.)] ອນຸຊີວິໂນ ຈ, ປຣິຈາຣກາ ກມ຺ມກຣາ ຈ ສພ຺ເພ;

ຘມ຺ມໍ ຈຣນ຺ຕິ ປຣໂລກເຫຕຸ, ຕສ຺ມາ ຫິ ອມ຺ຫໍ ທຫຣາ ນ ມິຍ຺ຍເຣ.

໑໐໒. ຘມ຺ໂມ ຫເວ ຣກ຺ຂຕິ ຘມ຺ມຈາຣິໍ, ຘມ຺ໂມ ສຸຈິຓ຺ໂຓ ສຸຂມາວຫາຕິ;

ເອສານິສໍໂສ ຘມ຺ເມ ສຸຈິຓ຺ເຓ, ນ ທຸຄ຺ຄຕິໍ ຄຈ຺ຉຕິ ຘມ຺ມຈາຣີ.

໑໐໓. ຘມ຺ໂມ ຫເວ ຣກ຺ຂຕິ ຘມ຺ມຈາຣິໍ, ຉຕ຺ຕໍ ມຫນ຺ຕໍ ວິຍ ວສ຺ສກາເລ;

ຘມ຺ເມນ ຄຸຕ຺ໂຕ ມມ ຘມ຺ມປາໂລ, ອຎ຺ຎສ຺ສ ອຏ຺ຐີນິ ສຸຂີ ກຸມາໂຣຕິ.

ມຫາຘມ຺ມປາລຊາຕກໍ ນວມໍ.