໔໔໘. ກຸກ຺ກຸຏຊາຕກໍ (໑໐)

໑໐໔. ນາສ຺ມເສ ກຕປາປມ຺ຫິ, ນາສ຺ມເສ ອລິກວາທິເນ;

ນາສ຺ມເສ ອຕ຺ຕຕ຺ຖປຎ຺ຎມ຺ຫິ, ອຕິສນ຺ເຕປິ ນາສ຺ມເສ.

໑໐໕. ຠວນ຺ຕິ ເຫເກ ປຸຣິສາ, ໂຄປິປາສິກຊາຕິກາ [ໂຄປິປາສກຊາຕິກາ (ສີ. ສ຺ຍາ. ປີ.)];

ຆສນ຺ຕິ ມຎ຺ເຎ ມິຕ຺ຕານິ, ວາຈາຍ ນ ຈ ກມ຺ມຸນາ.

໑໐໖. ສຸກ຺ຂຎ຺ຊລິປຄ຺ຄຫິຕາ, ວາຈາຍ ປລິຄຸຓ຺ຐິຕາ;

ມນຸສ຺ສເຜຄ຺ຄູ ນາສີເທ, ຍສ຺ມິໍ ນຕ຺ຖິ ກຕຎ຺ຎຸຕາ.

໑໐໗. ນ ຫິ ອຎ຺ຎຎ຺ຎຈິຕ຺ຕານໍ, ອິຕ຺ຖີນໍ ປຸຣິສານ ວາ;

ນານາວິກຕ຺ວາ [ນານາວ ກຕ຺ວາ (ສີ. ປີ.)] ສໍສຄ຺ຄໍ, ຕາທິສມ຺ປິ ຈ ນາສ຺ມເສ [ຕາທິສມ຺ປິ ນ ວິສ຺ສເສ (ສ຺ຍາ.)].

໑໐໘. ອນຣິຍກມ຺ມໂມກ຺ກນ຺ຕໍ, ອເຖຕໍ [ອຕ຺ເຖຕໍ (ສີ. ສ຺ຍາ. ປີ.)] ສພ຺ພຆາຕິນໍ;

ນິສິຕໍວ ປຏິຈ຺ຉນ຺ນໍ, ຕາທິສມ຺ປິ ຈ ນາສ຺ມເສ.

໑໐໙. ມິຕ຺ຕຣູເປນິເຘກຈ຺ເຈ, ສາຂລ຺ເຍນ ອເຈຕສາ;

ວິວິເຘຫິ ອຸປາຍນ຺ຕິ, ຕາທິສມ຺ປິ ຈ ນາສ຺ມເສ.

໑໑໐. ອາມິສໍ ວາ ຘນໍ ວາປິ, ຍຕ຺ຖ ປສ຺ສຕິ ຕາທິໂສ;

ທຸພ຺ຠິໍ ກໂຣຕິ ທຸມ຺ເມໂຘ, ຕຎ຺ຈ ຫນ຺ຕ຺ວານ [ຌາຕ຺ວານ (ສີ. ປີ.), ຫິຕ຺ວານ (ສ຺ຍາ.)] ຄຈ຺ຉຕິ.

໑໑໑. ມິຕ຺ຕຣູເປນ ພຫໂວ, ຉນ຺ນາ ເສວນ຺ຕິ ສຕ຺ຕໂວ;

ຊເຫ ກາປຸຣິເສ ເຫເຕ, ກຸກ຺ກຸໂຏ ວິຍ ເສນກໍ.

໑໑໒. ໂຍ ຈ [ໂຍຘ (ຊາ. ໑.໘.໒໕ ສຸລສາຊາຕເກ)] ອຸປ຺ປຕິຕໍ ອຕ຺ຖໍ, ນ ຂິປ຺ປມນຸພຸຊ຺ຌຕິ;

ອມິຕ຺ຕວສມນ຺ເວຕິ, ປຈ຺ຉາ ຈ ອນຸຕປ຺ປຕິ.

໑໑໓. ໂຍ ຈ ອຸປ຺ປຕິຕໍ ອຕ຺ຖໍ, ຂິປ຺ປເມວ ນິໂພຘຕິ;

ມຸຈ຺ຈເຕ ສຕ຺ຕຸສມ຺ພາຘາ, ກຸກ຺ກຸໂຏ ວິຍ ເສນກາ;

໑໑໔. ຕໍ ຕາທິສໍ ກູຏມິໂວຑ຺ຑິຕໍ ວເນ, ອຘມ຺ມິກໍ ນິຈ຺ຈວິຘໍສກາຣິນໍ;

ອາຣາ ວິວຊ຺ເຊຍ຺ຍ ນໂຣ ວິຈກ຺ຂໂຓ, ເສນໍ ຍຖາ ກຸກ຺ກຸໂຏ ວໍສການເນຕິ.

ກຸກ຺ກຸຏຊາຕກໍ ທສມໍ.