໔໔໖. ຕກ຺ກລຊາຕກໍ (໘)

໘໒. ນ ຕກ຺ກລາ ສນ຺ຕິ ນ ອາລຸວານິ [ອາລຸປານິ (ສີ. ສ຺ຍາ. ປີ.)], ນ ພິຬາລິໂຍ ນ ກຬມ຺ພານິ ຕາຕ;

ເອໂກ ອຣຎ຺ຎມ຺ຫິ ສຸສານມຊ຺ເຌ, ກິມຕ຺ຖິໂກ ຕາຕ ຂຓາສິ ກາສຸໍ.

໘໓. ປິຕາມໂຫ ຕາຕ ສຸທຸພ຺ພໂລ ເຕ, ອເນກພ຺ຍາຘີຫິ ທຸເຂນ ຜຸຏ຺ໂຐ;

ຕມຊ຺ຊຫໍ ນິຂຓິສ຺ສາມິ ໂສພ຺ເຠ, ນ ຫິສ຺ສ ຕໍ ຊີວິຕໍ ໂຣຈຍາມິ.

໘໔. ສງ຺ກປ຺ປເມຕໍ ປຏິລທ຺ຘ ປາປກໍ, ອຈ຺ຈາຫິຕໍ ກມ຺ມ ກໂຣສິ ລຸທ຺ທໍ;

ມຍາປິ ຕາຕ ປຏິລຈ຺ຉເສ ຕຸວໍ, ເອຕາທິສໍ ກມ຺ມ ຊຣູປນີໂຕ;

ຕໍ ກຸລ຺ລວຕ຺ຕໍ ອນຸວຕ຺ຕມາໂນ, ອຫມ຺ປິ ຕໍ ນິຂຓິສ຺ສາມິ ໂສພ຺ເຠ.

໘໕. ຜຣຸສາຫິ ວາຈາຫິ ປກຸພ຺ພມາໂນ, ອາສຊ຺ຊ ມໍ ຕ຺ວໍ ວທເສ ກຸມາຣ;

ປຸຕ຺ໂຕ ມມໍ ໂອຣສໂກ ສມາໂນ, ອຫິຕານຸກມ຺ປີ ມມ ຕ຺ວໍສິ ປຸຕ຺ຕ.

໘໖. ນ ຕາຫໍ [ຕ຺ຍາຫໍ (ສ຺ຍາ.)] ຕາຕ ອຫິຕານຸກມ຺ປີ, ຫິຕານຸກມ຺ປີ ເຕ ອຫມ຺ປິ [ອຫຎ຺ຫິ (ສ຺ຍາ.)] ຕາຕ;

ປາປຎ຺ຈ ຕໍ ກມ຺ມ ປກຸພ຺ພມານໍ, ອຣຫາມິ ໂນ ວາຣຍິຕຸໍ ຕໂຕ.

໘໗. ໂຍ ມາຕຣໍ ວາ ປິຕຣໍ ສວິຏ຺ຐ [ມາຕຣໍ ປິຕຣໍ ວາ ວສິຏ຺ຐ (ສີ. ປີ.)], ອທູສເກ ຫິໍສຕິ ປາປຘມ຺ໂມ;

ກາຍສ຺ສ ເຠທາ ອຠິສມ຺ປຣາຍໍ, ອສໍສຍໍ ໂສ ນິຣຍໍ ອຸເປຕິ [ປເຣຕິ (ສີ. ປີ.)].

໘໘. ໂຍ ມາຕຣໍ ວາ ປິຕຣໍ ສວິຏ຺ຐ, ອນ຺ເນນ ປາເນນ ອຸປຏ຺ຐຫາຕິ;

ກາຍສ຺ສ ເຠທາ ອຠິສມ຺ປຣາຍໍ, ອສໍສຍໍ ໂສ ສຸຄຕິໍ ອຸເປຕິ.

໘໙. ນ ເມ ຕ຺ວໍ ປຸຕ຺ຕ ອຫິຕານຸກມ຺ປີ, ຫິຕານຸກມ຺ປີ ເມ [ມມ (?)] ຕ຺ວໍສິ ປຸຕ຺ຕ;

ອຫຎ຺ຈ ຕໍ ມາຕຣາ ວຸຈ຺ຈມາໂນ, ເອຕາທິສໍ ກມ຺ມ ກໂຣມິ ລຸທ຺ທໍ.

໙໐. ຍາ ເຕ ສາ ຠຣິຍາ ອນຣິຍຣູປາ, ມາຕາ ມເມສາ ສກິຍາ ຊເນຕ຺ຕິ;

ນິທ຺ຘາປເຍ [ນິທ຺ຘາມເສ (ປີ.)] ຕຎ຺ຈ ສກາ ອຄາຣາ, ອຎ຺ຎມ຺ປິ ເຕ ສາ ທຸຂມາວເຫຍ຺ຍ.

໙໑. ຍາ ເຕ ສາ ຠຣິຍາ ອນຣິຍຣູປາ, ມາຕາ ມເມສາ ສກິຍາ ຊເນຕ຺ຕິ;

ທນ຺ຕາ ກເຣຓູວ ວສູປນີຕາ, ສາ ປາປຘມ຺ມາ ປຸນຣາວຊາຕູຕິ.

ຕກ຺ກລຊາຕກໍ ອຏ຺ຐມໍ.