໔໔໕. ນິຄ຺ໂຣຘຊາຕກໍ (໗)

໗໒. ນ ວາຫເມຕໍ [ນ ຈາຫເມຕໍ (ສີ.)] ຊານາມິ, ໂກ ວາຍໍ ກສ຺ສ ວາຕິ ວາ [ຈາຕິ ວາ (ສີ.)];

ຍຖາ ສາໂຂ ຈຣິ [ວທີ (ສີ. ສ຺ຍາ. ປີ.)] ເອວໍ, ນິຄ຺ໂຣຘ ກິນ຺ຕິ ມຎ຺ຎສິ.

໗໓. ຕໂຕ ຄລວິນີເຕນ, ປຸຣິສາ ນີຫຣິໍສຸ ມໍ;

ທຕ຺ວາ ມຸຂປຫາຣານິ, ສາຂສ຺ສ ວຈນໍກຣາ.

໗໔. ເອຕາທິສໍ ທຸມ຺ມຕິນາ, ອກຕຎ຺ຎຸນ ທຸພ຺ຠິນາ;

ກຕໍ ອນຣິຍໍ ສາເຂນ, ສຂິນາ ເຕ ຊນາຘິປ.

໗໕. ນ ວາຫເມຕໍ ຊານາມິ, ນປິ ເມ ໂກຈິ ສໍສຕິ;

ຍໍ ເມ ຕ຺ວໍ ສມ຺ມ ອກ຺ຂາສິ, ສາເຂນ ກາຣຓໍ [ກຑ຺ຒນໍ (ສີ. ສ຺ຍາ.)] ກຕໍ.

໗໖. ສຂີນໍ ສາຊີວກໂຣ, ມມ ສາຂສ຺ສ ຈູຠຍໍ;

ຕ຺ວໍ ໂນສິສ຺ສຣິຍໍ ທາຕາ, ມນຸສ຺ເສສຸ ມຫນ຺ຕຕໍ;

ຕຍາມາ ລພ຺ຠິຕາ ອິທ຺ຘີ, ເອຕ຺ຖ ເມ ນຕ຺ຖິ ສໍສໂຍ.

໗໗. ຍຖາປິ ພີຊມຄ຺ຄິມ຺ຫິ, ຑຍ຺ຫຕິ ນ ວິຣູຫຕິ;

ເອວໍ ກຕໍ ອສປ຺ປຸຣິເສ, ນສ຺ສຕິ ນ ວິຣູຫຕິ.

໗໘. ກຕຎ຺ຎຸມ຺ຫິ ຈ ໂປສມ຺ຫິ, ສີລວນ຺ເຕ ອຣິຍວຸຕ຺ຕິເນ;

ສຸເຂຕ຺ເຕ ວິຍ ພີຊານິ, ກຕໍ ຕມ຺ຫິ ນ ນສ຺ສຕິ.

໗໙. ອິມໍ ຊມ຺ມໍ ເນກຕິກໍ, ອສປ຺ປຸຣິສຈິນ຺ຕກໍ;

ຫນນ຺ຕຸ ສາຂໍ ສຕ຺ຕີຫິ, ນາສ຺ສ ອິຈ຺ຉາມິ ຊີວິຕໍ.

໘໐. ຂມຕສ຺ສ ມຫາຣາຊ, ປາຓາ ນ ປຏິອານຍາ [ທຸປ຺ປຏິອານຍາ (ສີ. ສ຺ຍາ. ປີ.)];

ຂມ ເທວ ອສປ຺ປຸຣິສສ຺ສ, ນາສ຺ສ ອິຈ຺ຉາມຫໍ ວຘໍ.

໘໑. ນິຄ຺ໂຣຘເມວ ເສເວຍ຺ຍ, ນ ສາຂມຸປສໍວເສ;

ນິຄ຺ໂຣຘສ຺ມິໍ ມຕໍ ເສຍ຺ໂຍ, ຍຎ຺ເຈ ສາຂສ຺ມິ ຊີວິຕນ຺ຕິ.

ນິຄ຺ໂຣຘຊາຕກໍ ສຕ຺ຕມໍ.