໔໔໔. ກຓ຺ຫທີປາຍນຊາຕກໍ (໖)

໖໒. ສຕ຺ຕາຫເມວາຫໍ ປສນ຺ນຈິຕ຺ໂຕ, ປຸຎ຺ຎຕ຺ຖິໂກ ອາຈຣິໍ [ອຈຣິໍ (ສີ. ສ຺ຍາ. ປີ.)] ພ຺ຣຫ຺ມຈຣິຍໍ;

ອຖາປຣໍ ຍໍ ຈຣິຕໍ ມເມທໍ [ມມ ຍິທໍ (ສ຺ຍາ.), ມມາຍິທໍ (ປີ.)], ວສ຺ສານິ ປຎ຺ຎາສ ສມາຘິການິ;

ອກາມໂກ ວາປິ [ວາຫິ (ປີ. ກ.)] ອຫໍ ຈຣາມິ, ເອເຕນ ສຈ຺ເຈນ ສຸວຕ຺ຖິ ໂຫຕຸ;

ຫຕໍ ວິສໍ ຊີວຕຸ ຍຎ຺ຎທຕ຺ໂຕ.

໖໓. ຍສ຺ມາ ທານໍ ນາຠິນນ຺ທິໍ ກທາຈິ, ທິສ຺ວານຫໍ ອຕິຖິໍ ວາສກາເລ;

ນ ຈາປິ ເມ ອປ຺ປິຍຕໍ ອເວທຸໍ, ພຫຸສ຺ສຸຕາ ສມຓພ຺ຣາຫ຺ມຓາ ຈ.

ອກາມໂກ ວາປິ ອຫໍ ທທາມິ, ເອເຕນ ສຈ຺ເຈນ ສຸວຕ຺ຖິ ໂຫຕຸ;

ຫຕໍ ວິສໍ ຊີວຕຸ ຍຎ຺ຎທຕ຺ໂຕ.

໖໔. ອາສີວິໂສ ຕາຕ ປຫູຕເຕໂຊ, ໂຍ ຕໍ ອທໍສີ [ອຑໍສີ (ສ຺ຍາ.)] ສຈຣາ [ພິລຣາ (ສີ.), ປິຬາຣາ (ສ຺ຍາ.), ປຕຣາ (ປີ.)] ອຸທິຈ຺ຈ;

ຕສ຺ມິຎ຺ຈ ເມ ອປ຺ປິຍຕາຍ ອຊ຺ຊ, ປິຕຣິ ຈ ເຕ ນຕ຺ຖິ ໂກຈິ ວິເສໂສ;

ເອເຕນ ສຈ຺ເຈນ ສຸວຕ຺ຖິ ໂຫຕຸ, ຫຕໍ ວິສໍ ຊີວຕຸ ຍຎ຺ຎທຕ຺ໂຕ.

໖໕. ສນ຺ຕາ ທນ຺ຕາເຍວ [ທນ຺ຕາ ສນ຺ຕາ ເຍ ຈ (ສ຺ຍາ. ກ.)] ປຣິພ຺ພຊນ຺ຕິ, ອຎ຺ຎຕ຺ຣ ກຓ຺ຫາ ນຕ຺ຖາກາມຣູປາ [ອນກາມຣູປາ (ສີ. ສ຺ຍາ. ປີ.)];

ທີປາຍນ ກິສ຺ສ ຊິຄຸຈ຺ຉມາໂນ, ອກາມໂກ ຈຣສິ ພ຺ຣຫ຺ມຈຣິຍໍ.

໖໖. ສທ຺ຘາຍ ນິກ຺ຂມ຺ມ ປຸນໍ ນິວຕ຺ໂຕ, ໂສ ເອຬມູໂຄວ ພາໂລ [ເອຬມູໂຄ ຈປໂລ (ສ຺ຍາ. ກ.)] ວຕາຍໍ;

ເອຕສ຺ສ ວາທສ຺ສ ຊິຄຸຈ຺ຉມາໂນ, ອກາມໂກ ຈຣາມິ ພ຺ຣຫ຺ມຈຣິຍໍ;

ວິຎ຺ຎຸປ຺ປສຕ຺ຖຎ຺ຈ ສຕຎ຺ຈ ຐານໍ [ວິຎ຺ຎູປສຕ຺ຖໍ ວສິຕໍ ຈ ຐານໍ (ກ.)], ເອວມ຺ປຫໍ ປຸຎ຺ຎກໂຣ ຠວາມິ.

໖໗. ສມເຓ ຕຸວໍ ພ຺ຣາຫ຺ມເຓ ອທ຺ຘິເກ ຈ, ສນ຺ຕປ຺ປຍາສິ ອນ຺ນປາເນນ ຠິກ຺ຂໍ;

ໂອປານຠູຕໍວ ຆຣໍ ຕວ ຍິທໍ, ອນ຺ເນນ ປາເນນ ອຸເປຕຣູປໍ;

ອຖ ກິສ຺ສ ວາທສ຺ສ ຊິຄຸຈ຺ຉມາໂນ, ອກາມໂກ ທານມິມໍ ທທາສິ.

໖໘. ປິຕໂຣ ຈ ເມ ອາສຸໍ ປິຕາມຫາ ຈ, ສທ຺ຘາ ອຫຸໍ ທານປຕີ ວທຎ຺ຎູ;

ຕໍ ກຸລ຺ລວຕ຺ຕໍ ອນຸວຕ຺ຕມາໂນ, ມາຫໍ ກຸເລ ອນ຺ຕິມຄນ຺ຘໂນ [ຄນ຺ຘິໂນ (ສ຺ຍາ. ປີ. ກ.), ຄນ຺ຘິນີ (ສີ.)] ອຫຸໍ;

ເອຕສ຺ສ ວາທສ຺ສ ຊິຄຸຈ຺ຉມາໂນ, ອກາມໂກ ທານມິມໍ ທທາມິ.

໖໙. ທຫຣິໍ ກຸມາຣິໍ ອສມຕ຺ຖປຎ຺ຎໍ, ຍໍ ຕານຍິໍ ຎາຕິກຸລາ ສຸຄຕ຺ເຕ;

ນ ຈາປິ ເມ ອປ຺ປິຍຕໍ ອເວທິ, ອຎ຺ຎຕ຺ຣ ກາມາ ປຣິຈາຣຍນ຺ຕາ [ປຣິຈາຣຍນ຺ຕີ (ສີ. ປີ.)];

ອຖ ເກນ ວຓ຺ເຓນ ມຍາ ເຕ ໂຠຕິ, ສໍວາສຘມ຺ໂມ ອຫຸ ເອວຣູໂປ.

໗໐. ອາຣາ ທູເຣ ນຍິຘ ກທາຈິ ອຕ຺ຖິ, ປຣມ຺ປຣາ ນາມ ກຸເລ ອິມສ຺ມິໍ;

ຕໍ ກຸລ຺ລວຕ຺ຕໍ ອນຸວຕ຺ຕມານາ, ມາຫໍ ກຸເລ ອນ຺ຕິມຄນ຺ຘິນີ ອຫຸໍ;

ເອຕສ຺ສ ວາທສ຺ສ ຊິຄຸຈ຺ຉມານາ, ອກາມິກາ ປທ຺ຘຈຣາມ຺ຫິ [ປຏ຺ຐຈຣາມ຺ຫິ (ສ຺ຍາ. ກ.)] ຕຸຍ຺ຫໍ.

໗໑. ມຓ຺ຑພ຺ຍ ຠາສິໍ ຍມຠາສເນຍ຺ຍໍ [ຠາສິສ຺ສໍ ອຠາສເນຍ຺ຍໍ (ສີ. ສ຺ຍາ. ປີ.), ຠາສິສ຺ສ’ມຠາສເນຍ຺ຍໍ (?)], ຕໍ ຂມ຺ຍຕໍ ປຸຕ຺ຕກເຫຕຸ ມຊ຺ຊ;

ປຸຕ຺ຕເປມາ ນ ອິຘ ປຣຕ຺ຖິ ກິຎ຺ຈິ, ໂສ ໂນ ອຍໍ ຊີວຕິ ຍຎ຺ຎທຕ຺ໂຕຕິ.

ກຓ຺ຫທີປາຍນຊາຕກໍ [ມຓ຺ຑພ຺ຍຊາຕກໍ (ສ຺ຍາ. ກ.)] ຉຏ຺ຐໍ.