໔໔໓. ຈູຬໂພຘິຊາຕກໍ (໕)

໔໙. ໂຍ ເຕ ອິມໍ ວິສາລກ຺ຂິໍ, ປິຍໍ ສມ຺ຫິຕຠາສິນິໍ [ສມ຺ມິລ຺ລຠາສິນິໍ (ສີ. ປີ.), ສມ຺ມິລ຺ລຫາສິນິໍ (ສ຺ຍາ.)];

ອາທາຍ ພລາ ຄຈ຺ເຉຍ຺ຍ, ກິໍ ນຸ ກຍິຣາສິ ພ຺ຣາຫ຺ມຓ.

໕໐. ອຸປ຺ປຊ຺ເຊ [ອຸປ຺ປຊ຺ຊ (ສີ. ປີ.)] ເມ ນ ມຸຈ຺ເຈຍ຺ຍ, ນ ເມ ມຸຈ຺ເຈຍ຺ຍ ຊີວໂຕ;

ຣຊໍວ ວິປຸລາ ວຸຏ຺ຐິ, ຂິປ຺ປເມວ ນິວາຣເຍ [ນິວາຣຍິໍ (ກ.)].

໕໑. ຍໍ ນຸ ປຸພ຺ເພ ວິກຕ຺ຖິຕ຺ໂຖ [ວິກຕ຺ຖິໂຕ (ກ. ສີ. ສ຺ຍາ. ກ.)], ພລມ຺ຫິວ ອປສ຺ສິໂຕ;

ສ຺ວຊ຺ຊ ຕຸຓ຺ຫິກໂຕ [ຕຸຓ຺ຫິກໂຕ (ສີ.), ຕຸຓ຺ຫິກ຺ຂໂກ (ປີ.)] ທານິ, ສງ຺ຆາຏິໍ ສິພ຺ພມຈ຺ຉສິ.

໕໒. ອຸປ຺ປຊ຺ຊິ ເມ ນ ມຸຈ຺ຈິຕ຺ຖ, ນ ເມ ມຸຈ຺ຈິຕ຺ຖ ຊີວໂຕ;

ຣຊໍວ ວິປຸລາ ວຸຏ຺ຐິ, ຂິປ຺ປເມວ ນິວາຣຍິໍ.

໕໓. ກິໍ ເຕ ອຸປ຺ປຊ຺ຊິ ໂນ ມຸຈ຺ຈິ, ກິໍ ເຕ ນ ມຸຈ຺ຈິ ຊີວໂຕ;

ຣຊໍວ ວິປຸລາ ວຸຏ຺ຐິ, ກຕມໍ ຕ຺ວໍ ນິວາຣຍິ.

໕໔. ຍມ຺ຫິ ຊາເຕ ນ ປສ຺ສຕິ, ອຊາເຕ ສາຘຸ ປສ຺ສຕິ;

ໂສ ເມ ອຸປ຺ປຊ຺ຊິ ໂນ ມຸຈ຺ຈິ, ໂກໂຘ ທຸມ຺ເມຘໂຄຈໂຣ.

໕໕. ເຍນ ຊາເຕນ ນນ຺ທນ຺ຕິ, ອມິຕ຺ຕາ ທຸກ຺ຂເມສິໂນ;

ໂສ ເມ ອຸປ຺ປຊ຺ຊິ ໂນ ມຸຈ຺ຈິ, ໂກໂຘ ທຸມ຺ເມຘໂຄຈໂຣ.

໕໖. ຍສ຺ມິຎ຺ຈ ຊາຍມານມ຺ຫິ, ສທຕ຺ຖໍ ນາວພຸຊ຺ຌຕິ;

ໂສ ເມ ອຸປ຺ປຊ຺ຊິ ໂນ ມຸຈ຺ຈິ, ໂກໂຘ ທຸມ຺ເມຘໂຄຈໂຣ.

໕໗. ເຍນາຠິຠູໂຕ ກຸສລໍ ຊຫາຕິ, ປຣກ຺ກເຣ ວິປຸລຎ຺ຈາປິ ອຕ຺ຖໍ;

ສ ຠີມເສໂນ ພລວາ ປມທ຺ທີ, ໂກໂຘ ມຫາຣາຊ ນ ເມ ອມຸຈ຺ຈຖ.

໕໘. ກຏ຺ຐສ຺ມິໍ ມຕ຺ຖມານສ຺ມິໍ [ມນ຺ຖມານສ຺ມິໍ (ປີ.), ມທ຺ທມານສ຺ມິໍ (ກ.)], ປາວໂກ ນາມ ຊາຍຕິ;

ຕເມວ ກຏ຺ຐໍ ຑຫຕິ, ຍສ຺ມາ ໂສ ຊາຍເຕ ຄິນິ.

໕໙. ເອວໍ ມນ຺ທສ຺ສ ໂປສສ຺ສ, ພາລສ຺ສ ອວິຊານໂຕ;

ສາຣມ຺ຠາ [ສາຣພ຺ຠາ (ກ.)] ຊາຍເຕ ໂກໂຘ, ໂສປິ ເຕເນວ ຑຍ຺ຫຕິ.

໖໐. ອຄ຺ຄີວ ຕິຓກຏ຺ຐສ຺ມິໍ, ໂກໂຘ ຍສ຺ສ ປວຑ຺ຒຕິ;

ນິຫີຍຕິ ຕສ຺ສ ຍໂສ, ກາຬປກ຺ເຂວ ຈນ຺ທິມາ.

໖໑. ອເນໂຘ [ອນິນ຺ໂຘ (ສີ. ກ.), ອນິນ຺ໂທ (ສ຺ຍາ.)] ຘູມເກຕູວ, ໂກໂຘ ຍສ຺ສູປສມ຺ມຕິ;

ອາປູຣຕິ ຕສ຺ສ ຍໂສ, ສຸກ຺ກປກ຺ເຂວ ຈນ຺ທິມາຕິ.

ຈູຬໂພຘິຊາຕກໍ ປຎ຺ຈມໍ.