໙. ອປາຍິມ຺ຫວຄ຺ໂຄ

໘໑. ອປາຍິມ຺ຫ ອນຈ຺ຈິມ຺ຫ, ອຄາຍິມ຺ຫ ຣຸທິມ຺ຫ ຈ;

ວິສຎ຺ຎິກຣຓິໍ ປິຕ຺ວາ [ປີຕ຺ວາ (ສີ. ສ຺ຍາ. ປີ.)], ທິຏ຺ຐາ ນາຫຸມ຺ຫ ວານຣາຕິ.

ສຸຣາປານຊາຕກໍ ປຐມໍ.

໘໒. ອຕິກ຺ກມ຺ມ ຣມຓກໍ, ສທາມຕ຺ຕຎ຺ຈ ທູຠກໍ;

ສ຺ວາສິ ປາສາຓມາສີໂນ, ຍສ຺ມາ ຊີວໍ ນ ໂມກ຺ຂສີຕິ.

ມິຕ຺ຕວິນ຺ທກຊາຕກໍ ທຸຕິຍໍ.

໘໓. ມິຕ຺ໂຕ ຫເວ ສຕ຺ຕປເທນ ໂຫຕິ, ສຫາໂຍ ປນ ທ຺ວາທສເກນ ໂຫຕິ;

ມາສຑ຺ຒມາເສນ ຈ ຎາຕິ ໂຫຕິ, ຕຕຸຕ຺ຕຣິໍ ອຕ຺ຕສໂມປິ ໂຫຕິ;

ໂສຫໍ ກຖໍ ອຕ຺ຕສຸຂສ຺ສ ເຫຕຸ, ຈິຣສນ຺ຖຸຕໍ [ຈິຣສນ຺ຘວໍ (ກ.), ຈິຣສຕ຺ຖຸນໍ (ປີ.)] ກາຬກຓ຺ຓິໍ ຊເຫຍ຺ຍນ຺ຕິ.

ກາລກຓ຺ຓິຊາຕກໍ ຕຕິຍໍ.

໘໔. ອາໂຣຄ຺ຍມິຈ຺ເຉ ປຣມຎ຺ຈ ລາຠໍ, ສີລຎ຺ຈ ວຸທ຺ຘານຸມຕໍ ສຸຕຎ຺ຈ;

ຘມ຺ມານຸວຕ຺ຕີ ຈ ອລີນຕາ ຈ, ອຕ຺ຖສ຺ສ ທ຺ວາຣາ ປມຸຂາ ຉເຬເຕຕິ.

ອຕ຺ຖສ຺ສທ຺ວາຣຊາຕກໍ ຈຕຸຕ຺ຖໍ.

໘໕. ອາຍຕິໍ ໂທສໍ ນາຎ຺ຎາຍ, ໂຍ ກາເມ ປຏິເສວຕິ;

ວິປາກນ຺ເຕ ຫນນ຺ຕິ ນໍ, ກິໍປກ຺ກມິວ ຠກ຺ຂິຕນ຺ຕິ.

ກິໍປກ຺ກຊາຕກໍ ປຎ຺ຈມໍ.

໘໖. ສີລໍ ກິເຣວ ກລ຺ຍາຓໍ, ສີລໍ ໂລເກ ອນຸຕ຺ຕຣໍ;

ປສ຺ສ ໂຆຣວິໂສ ນາໂຄ, ສີລວາຕິ ນ ຫຎ຺ຎຕີຕິ.

ສີລວີມໍສກຊາຕກໍ ຉຏ຺ຐໍ.

໘໗. ຍສ຺ສ ມງ຺ຄລາ ສມູຫຕາເສ [ສມູຫຕາ (ສີ. ສ຺ຍາ. ປີ. ສຸ. ນິ. ໓໖໒], ອຸປ຺ປາຕາ [ອຸປ຺ປາທາ (ປີ.)] ສຸປິນາ ຈ ລກ຺ຂຓາ ຈ;

ໂສ [ສ (ສີ. ປີ. ກ.)] ມງ຺ຄລໂທສວີຕິວຕ຺ໂຕ, ຍຸຄໂຍຄາຘິຄໂຕ ນ ຊາຕຸເມຕີຕິ.

ມງ຺ຄລຊາຕກໍ ສຕ຺ຕມໍ.

໘໘. ກລ຺ຍາຓິເມວ ມຸຎ຺ເຈຍ຺ຍ, ນ ຫິ ມຸຎ຺ເຈຍ຺ຍ ປາປິກໍ;

ໂມກ຺ໂຂ ກລ຺ຍາຓິຍາ ສາຘຸ, ມຸຕ຺ວາ ຕປ຺ປຕິ ປາປິກນ຺ຕິ.

ສາຣມ຺ຠຊາຕກໍ ອຏ຺ຐມໍ.

໘໙. ວາຈາວ ກິຣ ເຕ ອາສິ, ສຓ຺ຫາ ສຂິລຠາຓິໂນ;

ຕິຓມຕ຺ເຕ ອສຊ຺ຊິຕ຺ໂຖ, ໂນ ຈ ນິກ຺ຂສຕໍ ຫຣນ຺ຕິ.

ກຸຫກຊາຕກໍ ນວມໍ.

໙໐. ໂຍ ປຸພ຺ເພ ກຕກລ຺ຍາໂຓ, ກຕຕ຺ໂຖ ນາວພຸຊ຺ຌຕິ;

ປຈ຺ຉາ ກິຈ຺ເຈ ສມຸປ຺ປນ຺ເນ, ກຕ຺ຕາຣໍ ນາຘິຄຈ຺ຉຕີຕິ.

ອກຕຎ຺ຎຸຊາຕກໍ ທສມໍ.

ອປາຍິມ຺ຫວຄ຺ໂຄ ນວໂມ.

ຕສ຺ສຸທ຺ທານໍ –

ອປາຍິມ຺ຫ ຈ ທູຠກໍ ສຕ຺ຕປທໍ, ຉຬທ຺ວຣ ຈ ອາຍຕິນາ ຈ ປຸນ;

ອຫິສີລວ ມງ຺ຄລິ ປາປິກສ຺ສາ, ສຕໍນິກ຺ຂ ກຕຕ຺ຖວເຣນ ທສາຕິ.