໑໐. ລິຕ຺ຕວຄ຺ໂຄ

໙໑. ລິຕ຺ຕໍ ປຣເມນ ເຕຊສາ, ຄິລມກ຺ຂໍ ປຸຣິໂສ ນ ພຸຊ຺ຌຕິ;

ຄິລ ເຣ ຄິລ ປາປຘຸຕ຺ຕກ, ປຈ຺ຉາ ເຕ ກຏຸກໍ ຠວິສ຺ສຕີຕິ.

ລິຕ຺ຕຊາຕກໍ ປຐມໍ.

໙໒. ອຸກ຺ກຏ຺ເຐ ສູຣມິຈ຺ຉນ຺ຕິ, ມນ຺ຕີສຸ ອກຸຕູຫລໍ;

ປິຍຎ຺ຈ ອນ຺ນປານມ຺ຫິ, ອຕ຺ເຖ ຊາເຕ ຈ ປຓ຺ຑິຕນ຺ຕິ.

ມຫາສາຣຊາຕກໍ ທຸຕິຍໍ.

໙໓. ນ ວິສ຺ສເສ ອວິສ຺ສຕ຺ເຖ, ວິສ຺ສຕ຺ເຖປິ ນ ວິສ຺ສເສ;

ວິສ຺ສາສາ ຠຍມນ຺ເວຕິ, ສີຫໍວ ມິຄມາຕຸກາຕິ [ມິຄມາຕຸຍາ (ກ.)].

ວິສາສໂຠຊນຊາຕກໍ ຕຕິຍໍ.

໙໔. ໂສຕຕ຺ໂຕ ໂສສິນ຺ໂທ [ໂສສີໂຕ (ສີ. ສ຺ຍາ. ປີ.), ໂສສິໂນ (ກ.)] ເຈວ, ເອໂກ ຠິໍສນເກ ວເນ;

ນຄ຺ໂຄ ນ ຈຄ຺ຄິມາສີໂນ, ເອສນາປສຸໂຕ ມຸນີຕິ.

ໂລມຫໍສຊາຕກໍ ຈຕຸຕ຺ຖໍ.

໙໕. ອນິຈ຺ຈາ ວຕ ສງ຺ຂາຣາ, ອຸປ຺ປາທວຍຘມ຺ມິໂນ;

ອຸປ຺ປຊ຺ຊິຕ຺ວາ ນິຣຸຊ຺ຌນ຺ຕິ, ເຕສໍ ວູປສໂມ ສຸໂຂຕິ.

ມຫາສຸທສ຺ສນຊາຕກໍ ປຎ຺ຈມໍ.

໙໖. ສມຕິຕ຺ຕິກໍ ອນວເສກໍ, ເຕລປຕ຺ຕໍ ຍຖາ ປຣິຫເຣຍ຺ຍ;

ເອວໍ ສຈິຕ຺ຕມນຸຣກ຺ເຂ, ປຕ຺ຖຍາໂນ ທິສໍ ອຄຕປຸພ຺ພນ຺ຕິ.

ເຕລປຕ຺ຕຊາຕກໍ ຉຏ຺ຐໍ.

໙໗. ຊີວກຎ຺ຈ ມຕໍ ທິສ຺ວາ, ຘນປາລິຎ຺ຈ ທຸຄ຺ຄຕໍ;

ປນ຺ຖກຎ຺ຈ ວເນ ມູຬ຺ຫໍ, ປາປໂກ ປຸນຣາຄໂຕຕິ.

ນາມສິທ຺ຘິຊາຕກໍ ສຕ຺ຕມໍ.

໙໘. ສາຘຸ ໂຂ ປຓ຺ຑິໂຕ ນາມ, ນ ຕ຺ເວວ ອຕິປຓ຺ຑິໂຕ;

ອຕິປຓ຺ຑິເຕນ ປຸຕ຺ເຕນ, ມນມ຺ຫິ ອຸປກູຬິໂຕຕິ [ອຸປກູລິໂຕຕິ (ສີ.), ອຸປກຸຏ຺ຐິໂຕຕິ (ສ຺ຍາ.), ອຸປກຸຏິໂຕ (ກ.)].

ກູຏວາຓິຊຊາຕກໍ ອຏ຺ຐມໍ.

໙໙. ປໂຣສຫສ຺ສມ຺ປິ ສມາຄຕານໍ, ກນ຺ເທຍ຺ຍຸໍ ເຕ ວສ຺ສສຕໍ ອປຎ຺ຎາ;

ເອໂກວ ເສຍ຺ໂຍ ປຸຣິໂສ ສປຎ຺ໂຎ, ໂຍ ຠາສິຕສ຺ສ ວິຊານາຕິ ອຕ຺ຖນ຺ຕິ.

ປໂຣສຫສ຺ສຊາຕກໍ ນວມໍ.

໑໐໐. ອສາຕໍ ສາຕຣູເປນ, ປິຍຣູເປນ ອປ຺ປິຍໍ;

ທຸກ຺ຂໍ ສຸຂສ຺ສ ຣູເປນ, ປມຕ຺ຕມຕິວຕ຺ຕຕີຕິ.

ອສາຕຣູປຊາຕກໍ ທສມໍ.

ລິຕ຺ຕວຄ຺ໂຄ ທສໂມ.

ຕສ຺ສຸທ຺ທານໍ –

ຄິລມກ຺ຂກຸຕູຫລ ມາຕຸກສ຺ສາ, ມຸນິນາ ຈ ອນິຈ຺ຈຕ ປຕ຺ຕວຣໍ;

ຘນປາລິວໂຣ ອຕິປຓ຺ຑິຕໂກ, ສປໂຣສຫສ຺ສອສາຕທສາຕິ.

ມຊ຺ຌິໂມ ປຓ຺ຓາສໂກ.